Read Kernewek 1 Makkabeyon 1 Bible Online

1 Makkabeyon 1 - Kernewek bible

1 Makkabeyon 1

¹Wosa Aleksander mab Felip an Masedonek, neb a dheuth a bow Kittim, dhe weskel Darius myghtern Persia ha Media, ev a'n siwyas avel myghtern. Ev re dhothya ha bos myghtern pow Grek seulabrys.

²Ev a omladhas yn lies kas, fetha lies dinas, ha ladha myghternedh an norvys.

³Ev a dravalyas bys pennow an norvys, ha kemmeres preydh dhiworth lies kenedhel. Pan eth an norvys ha bos kosel a-ragdho, ughelhes o ha goethus o y golonn.

⁴Ev a guntellas lu fest krev ha reynya war diryow, kenedhlow ha pennsevigyon, hag i a ros trubyt dhodho.

⁵Wosa hemma gyllys klav o hag ev a wodhva y vos ow merwel.

⁶Ytho ev a elwis y soedhogyon an moyha enorys, re biens megys ganso a'y yowynkneth, ha ranna y wlaskor yntredha, hag ev hwath yn few.

⁷Ha wosa Aleksander dhe reynya dewdhek blydhen, ev a verwis.

⁸Ena y soedhogyon a dhallathas reynya, peub yn y dyller y honan.

⁹I oll a omwiskas gans diadem wosa y vernans, hag yndella y hwrug aga mebyon war aga lergh lies blydhen, hag i a lieshas drogow war an norvys.

¹⁰Anedha y teuth gwreydhenn beghus, Antioghus Epifanes,[1] mab myghtern Antioghus; ev re bia goestel yn Rom. Ev a dhallathas reynya y'n kans, seytegves blydhen warn ugens a wlaskor an Grekys.[2]

¹¹Y'n dydhyow na tus dhilagha a omdhiskwedhas yn Ysrael ha toella lies, ow leverel, ‘Deun ha gwren kevambos gans an Jentilys yn agan kyrghynn, rag a-ban dhiberthsyn dhiworta, deuva lies terroes warnan.’

¹²Plegadow o an gusul ma gansa,

¹³ha re a'n dus eth dhe'n myghtern, neb a ros kummyas dhedha may holyons ordenansow an Jentilys.

¹⁴Ytho i a dhrehevis gymnasium yn Yerusalem herwydh usadow an Jentilys,

¹⁵ha kudha merkyow aga throdreghyans ha gasa an kevambos sans. I a junyas gans an Jentilys hag a omwerthas dhe wul droktra.

¹⁶Pan welas Antioghus y wlaskor dhe vos fastys, ev a erviras dhe dhos ha bos myghtern Ejyp rag may halla reynya war an dhiw wlaskor.

¹⁷Ytho ev a omsettyas orth Ejyp gans lu krev, gans charettow, ha gans olifanses ha marghoglu ha gans lu lestri bras.

¹⁸Ev a werryas orth Ptolemi myghtern Ejyp yn kas, ha Ptolemi a dreylyas ha fia dhe'n fo a-ragdho, ha lies a veu goliys hag a goedhas.

¹⁹Hag i a gemmeras an sitys kerys yn pow Ejyp, hag ev a ravnas pow Ejyp.

²⁰Wosa gweskel Ejyp, Antioghus a dhehwelis y'n tressa ha seyth-ugensves blydhen.[3] Ev eth yn-bann erbynn Ysrael hag a dheuth dhe Yerusalem gans lu krev.

²¹Ev a entras gans balghder dhe'n sentri ha kemmeres an alter a owr, an kantoler, hag oll y dhaffar.

²²Ev a gemmeras ynwedh an voes rag bara an wolok, an hanafow rag an offrynnow diwes, an bollow, an ynkyslestri a owr, an kroglenn, ha'n kurunyow, hag ev a bilyas dhe-ves oll an afinans a owr yn tal an tempel.

²³Ev a gemmeras an arghans ha'n owr ha'n lestri kostek; ev a gemmeras ynwedh an tresoryow kudhys a drovyas.

²⁴Orth aga hemmeres ev eth dh'y wlaskor y honan. Ev a wrug lies ladhva, hag a gewsis gans balghder bras.

²⁵Yth esa kynvann meur yn Ysrael yn oll aga thylleryow,

²⁶Rewloryon ha henavogyon a hanasas, maghtethyon ha gwer yowynk eth ha bos gwann, ha tekter an benynes a veu chanjys.

²⁷Pub gour pries a gemmeras an drem yn-bann; hi neb a esedhas yn hy chambour a gynis.

²⁸An tir a grenas rag y drigoryon, hag oll chi Yakob a veu gwiskys yn meth.

²⁹Diw vlydhen a-wosa an myghtern a dhannvonas dhe sitys Yuda kuntellor a drubyt, hag ev a dheuth dhe Yerusalem gans lu bras.

³⁰Ev a gewsis dhedha geryow kres yn fals, hag i a grysis dhodho, mes distowgh ev a goedhas war an sita, ha'y gweskel yn kwyls ha distrui meur a bobel yn Ysrael.

³¹Ev a ravnas an sita ha'y leski gans tan, hag a dorras dhe'n dor hy chiow ha'y fosow yn hy hyrghynn.

³²I a gemmeras an benynes ha'n fleghes yn kethneth, ha sesya an chatel.

³³Ena i a geras sita Davydh gans fos veur ha krev ha touryow krev, hag hi eth ha bos aga dinas.

³⁴I a worras ena genedhel beghus, ha gwer dhilagha. An re ma a omgrevhas ynna;

³⁵i a greunis arvow ha boes, hag ow kuntelles preydhyow Yerusalem i a's gwithas ena hag i a dheuth ha bos antell veur.

³⁶Rag an tour eth ha bos kontrewaytyans erbynn an sentri, eskar drog dhe Ysrael heb lett.

³⁷Dhe bub tu a'n sentri i a skoellyas goes gwiryon, hag i a dhefolas an sentri.

³⁸Rag own anedha trigoryon Yerusalem a fias dhe'n fo; hi eth ha bos trigva estrenyon; hi eth ha bos estrenes dh'y agh, ha'y fleghes a's forsakyas.

³⁹Hy sentri eth ha bos mar ynyal avel difeyth; hy goelyow a veu treylys dhe gyni, hy sabotys dhe vewl, hy enor dhe vismer.

⁴⁰Hy disenor a veu lieshes yn kemusur gans hy glori kyns; hy goeth a veu treylys dhe gyni.

⁴¹Ena an myghtern a skrifas dh'y wlaskor oll may fe peub oll unn bobel,

⁴²ha may forsakya pub huni y usadow teythyek. Oll an kenedhlow a assentyas dhe worhemmynn an myghtern,

⁴³ha lies yn Ysrael a dhegemmeras y gryjyans; i a sakrifias dhe idolys hag a dhisakras an sabot.

⁴⁴An myghtern a dhannvonas lytherow yn leuv kannasow dhe Yerusalem ha dhe sitys Yuda; ev a erghis dhedha holya usadow o estren dhe'n tir

⁴⁵ha difenna offrynnow leskys ha sakrifisow hag offrynnow diwes a-ji dhe'n sentri ha disakra sabotys ha goelyow,

⁴⁶ha defolya an sentri ha'n oferysi,

⁴⁷drehevel alteryow ha sentris rag idolyow, ha sakrifia mogh hag enyvales avlan erell,

⁴⁸ha gasa aga mebyon antrodreghys. Res o dhedha omwul kasadow dre bup-tra avlan hag ansans,

⁴⁹rag mayth ankoffens an lagha ha chanjya oll an ordenansow.

⁵⁰Hag yn-medh ev, ‘Neb na vo gostydh dhe worhemmynn an myghtern a verow.’

⁵¹Yn geryow a'n par ma ev a skrifas dh'y wlaskor oll. Hag ev a ordenas hwithroryon war oll an bobel hag erghi dhe sitys Yuda sakrifia, sita ha sita.

⁵²Lies a'n bobel, peub re asas an lagha, a junyas gansa, hag i a wrug droktra y'n tir;

⁵³i a wrug dhe Ysrael omgudha yn pub skovva a's tevo.

⁵⁴Yn pymthegves dydh a Kislev, y'n pymp ha dew-ugensves blydhen,[4] i a dhrehevis pyth kasadow an difeythter war an alter a offrynnow leskys. Ynwedh i a dhrehevis alteryow yn sitys Yuda a-derdro,

⁵⁵hag a loskas ynkys orth darasow an chiow hag y'n stretys.

⁵⁶I a dorras dhe demmyn lyvrow an lagha a gavsons ha'ga leski gans tan.

⁵⁷Le mayth o kevys lyver an lagha gans nebonan, po mars o nebonan lel dhe'n lagha, gorhemmynn an myghtern a'n dampnyas dhe'n mernans.

⁵⁸I a wre freudh erbynn Ysrael, erbynn an re kevys mis wosa mis y'n sitys.

⁵⁹Hag y'n pympes dydh warn ugens a'n mis i a sakrifia war an alter esa war alter an offrynn leskys.

⁶⁰Herwydh an gorhemmynn i a ladhas an benynes re wrussa may fedha aga fleghes trodreghys,

⁶¹ha'ga theylu ha'n re re a's trodroghsons; hag i a grogas an fleghigow yn kyrghynn konna aga mamm.

⁶²Mes lies yn Ysrael a omgrevhas hag yth ens ervirys yn aga holonn na dhybrens boes avlan.

⁶³I a dhewisas merwel rag na vons defolys gans boes ha disakra an kevambos sans; hag i a verwis.

⁶⁴Ha sorr pur vras a dheuth war Ysrael.