Read Kernewek 1 Makkabeyon 10 Bible Online

1 Makkabeyon 10 - Kernewek bible

1 Makkabeyon 10

¹Y'n kans ha tri-ugensves blydhen[19] Aleksander Epifanes, mab Antioghus a diras hag a gemmeras Ptolemais. I a'n wolkommas, hag ev a dhallathas reynya ynni.

²Pan glewas Demetrius an myghtern hemma, ev a guntellas lu fest bras hag a geskerdhas er y bynn yn batel.

³Demetrius a dhannvonas lyther dhe Yonathan yn geryow a gres rag y enora,

⁴rag y leveris dhodho y honan, ‘Oberyn yn kynsa rag may hwryllyn kres ganso kyns ev dhe wul kres gans Aleksander er agan pynn,

⁵rag ev a berth kov a oll an drogoberow a wrussyn orto hag orth y vreder hag orth y genedhel.’

⁶Ytho Demetrius a ros dhodho awtorita rag gelwel soudoryon, rag aga arva, ha mos ha bos y geffrysyas, hag ev a worhemmynnis may fe an woestlow esa a-ji dhe'n tour delivrys dhodho.

⁷Ena Yonathan a dheuth dhe Yerusalem hag a lennas an lyther yn klewans oll an bobel ha gans an dus y'n tour.

⁸Own meur a's tevo pan glewsons an myghtern dhe ri dhodho awtorita rag gelwel soudoryon.

⁹Mes an dus y'n tour a dhelivras an woestlow dhe Yonathan, hag ev a's daskorras dh'aga herens.

¹⁰Yth esa Yonathan trigys yn Yerusalem hag ev a dhallathas dastrehevel ha nowydhhe an sita.

¹¹Ev a leveris dhe'n re esa ow kul an ober, drehevel an fosow ha kylghya menydh Sion gans meyn pedrekhes rag kerweyth gwell; hag y hwrussons yndella.

¹²Ena an estrenyon esa a-ji dhe'n dinasow drehevys gans Bagghides a fias dhe'n fo;

¹³peub a asas y dyller ha dehweles dh'y bow y honan.

¹⁴Marnas yn Beth-sur re a wortas hag a assa an lagha ha'n gorhemmynnow, rag y feu tyller meneghi ragdha.

¹⁵Ytho pan glewas myghtern Aleksander oll an ambosow dannvenys gans Demetrius dhe Yonathan, ha tus a dherivas dhodho a'n batelyow ha'n gweythresow kolonnek gwrys gans Yonathan ha'y vreder, hag a'n ahweryow re borthsens,

¹⁶yn-medh ev, ‘Ple kevyn gour haval dhodho? Lemmyn ytho ni a'n gwra agan koweth ha'gan keffrysyas.’

¹⁷Hag ev a skrifas lyther ha'y dhannvon dhodho, y'n geryow a hol:

¹⁸‘Myghtern Aleksander dh'y vroder Yonathan, salusyans.

¹⁹Ni re glewas y'th kever, ty dhe vos kasor galloesek ha gwiw dhe vos agan koweth.

²⁰Ytho lemmyn ni re'th apoyntyas dhe vos arghoferyas dha genedhel; y fydhydh henwys koweth a'n myghtern. Hag y tegoedh dhis kemmeres agan tu ha gwitha kowethyans genen.’ Hag ev a dhannvonas dhodho pows purpur ha kurun a owr.

²¹Ytho Yonathan a omwiskas y'n dillas sans y'n seythves mis a'n kans ha tri-ugensves blydhen,[20] yn goel an skovvaow, hag ev a guntellas kasoryon hag a dharbaris arvow pals.

²²Pan glewas Demetrius hemma, ev a gemmeras duwon hag yn-medh ev,

²³‘Pyth yw hemma re wrussyn? Gyllys yw Aleksander a-ragon ni ow kul kowethyans gans an Yedhewon rag y omgrevhe.

²⁴My ynwedh a skrif dhedha geryow a gennerth hag ambosa dhedha enor ha rohow rag ma'm bo aga gweres.’

²⁵Ytho ev a dhannvonas lyther dhodho war-lergh an geryow ma: ‘Myghtern Demetrius dhe genedhel an Yedhewon. Salusyans.

²⁶A-ban withsowgh agas kevambos genen, ha pesya yn agan kowethyans, heb kilfia dh'agan eskerens, ni re glewas anodho ha re lowenhas.

²⁷Ha lemmyn gwrewgh pesya yn lenduri genen, ha ni a attal dhis gans da drefenn an pyth a wredh ragon.

²⁸Ni a wront dhis lies frankedh hag a re dhis rohow.

²⁹‘Ha lemmyn my a'gas liver hwi, ha my a rydhha oll an Yedhewon a dyli trubyt ha toll hoelan ha tollow an gurun;

³⁰ha a-dhia'n jydh hedhyw hag yn-rag my a'gas rydhha a pe tressa rann an ys ha hanter froeth an gwydh a dhesedh my dh'y degemmeres. Ny's kuntellav a bow Yuda nag a'n tri ranndir keworrys dhedhi dhiworth Samaria ha Galile, a'n jydh ma ha bys vykken.

³¹Yerusalem yw sans, ytho hy degedhow ha' y gobrow a vydh heb toll.

³²My a hepkorr ynwedh ow maystri war an tour yn Yerusalem hag y'n rov dhe'n arghoferyas, rag may hworro ynno gwer dewisys ganso rag y witha.

³³Ha pubonan a'n Yedhewon re beu kemmerys avel keth dhiworth pow Yuda yn ranndir pynag a'm wlaskor, my a'n deliver heb ronson; ha defendyes oll an soedhogyon an tollow war aga chatel ynwedh.

³⁴‘Oll an goelyow ha'n sabotys ha'n loeryow nowydh ha'n dydhyow apoyntys ha'n trydydh kyns goel ha'n trydydh wosa goel — bedhens dydhyow a rydhheans dhiworth tollow hag a dhelivrans rag an Yedhewon usi a-ji dhe'm gwlaskor.

³⁵Ny'n jevydh nebonan awtorita rag kavoes travyth dhiworta nag annia onan vytholl anedha a-dro dhe dra vytholl.

³⁶‘Bedhes Yedhewon omrolys yn luyow an myghtern bys y'n myns a dheg mil wour warn ugens, ha bedhes an keth mentons res dhedha a dhegoedh dhe oll luyow an myghtern.

³⁷Bedhes re anedha gorrys yn dinasow bras an myghtern ha bedhes re anedha gorrys yn soedhow trestys y'n wlaskor. Bedhes aga soedhogyon ha'ga ledyoryon anedha aga honan, ha bewens herwydh aga laghys aga honan, par dell worhemmynnis an myghtern y'n pow Yuda.

³⁸‘Ha'n tri ranndir re beu keworrys dhe Yudi dhiworth pow Samaria, bedhens junys orth Yudi bys may fons aswonnys dhe vos yn-dann unn rewler hag i dhe obaya an arghoferyas a-der re erell.

³⁹Ptolemais ha'n tir yn y ogas my re's ros yn ro dhe'n sentri yn Yerusalem, rag tyli kostow an sentri a goedh aga thyli.

⁴⁰My ow honan a re pymthek mil shekel a arghans pub blydhen yn-mes a wobrow an myghtern a dylleryow gwiw.

⁴¹Hag oll an talasow a-dhelergh na veu pes gans an soedhogyon dell wrens y'n kynsa blydhynyow, i a re alemma rag kostow an tempel.

⁴²Dres henna, an pymp mil shekel a arghans kemmerys gans ow soedhogyon a wobrow blydhenyek an tempel, hemma ynwedh yw remittys, drefenn y vos dhe'n oferysi hag a serv ena.

⁴³Ha piw pynag a hwila meneghi yn Yerusalem, po yn onan a'y glosow, drefenn ev dhe vos yn kendon dhe'n myghtern, po kendon pynag arall, bedhes kwit a henna ha daskavoes oll y byth yn ow ruvaneth.

⁴⁴‘Bedhes an kost a dhastrehevyans ha nowydhheans an sentri pes a akontow an myghtern.

⁴⁵Ha bedhes an kost a dhastrehevel fosow Yerusalem ha'n kerweyth a-dro dhedhi, ha'n kost a dhastrehevel an fosow yn Yudi pes ynwedh dhiworth akontow an myghtern.’

⁴⁶Pan glewas Yonathan ha'n bobel an geryow ma, ny's kryssons na'ga degemmeres, drefenn i dhe berthi kov an drogow meur re wrussa Demetrius yn Ysrael ha fatell y's arwasksa.

⁴⁷Gwell o gansa Aleksander, drefenn ev dhe vos an kynsa ow kewsel geryow a gres dhedha, hag i a besyas avel y geffrysysi oll y dhydhyow.

⁴⁸Aleksander an myghtern a guntellas lu bras hag a gampyas a-dal Demetrius.

⁴⁹An dhew vyghtern a vetyas yn batel, ha lu Demetrius a fias dhe'n fo hag Aleksander a'n holyas hag a's fethas.

⁵⁰Ev a vatalyas yn krev bys pan sedhas an howl, ha Demetrius a goedhas y'n jydh na.

⁵¹Ena Aleksander a dhannvonas kannasow dhe Ptolemi myghtern Ejyp gans an messaj a hol:

⁵²‘A-ban dhehwelis dhe'm ruvaneth ha esedha war dron ow thasow, ha fondya ow governans, ha brewi Demetrius, ha kavoes maystri war agan bro,

⁵³my eth er y bynn yn batel ha kekeffrys ev ha'y lu a veu brewys genen, ha ni re gavas agan esedhva war dron y ruvaneth —

⁵⁴lemmyn ytho fastyn ni kowethyans an eyl gans y gila; ro dhymmo lemmyn dha vyrgh avel gwreg, hag yth av ha bos dha dheuv, ha my a re rohow dhis ha dhedhi hi herwydh dha savla.’

⁵⁵Ptolemi a worthybis ha leverel, ‘Gwynnvys an jydh may tehwelsys dhe wlaskor dha dasow hag esedha war dron aga ruvaneth.

⁵⁶Lemmyn my a wra ragos par dell skrifsys; mes met genev yn Ptolemais rag may hwellyn an eyl y gila, hag yth av ha bos dha hwegron dell re leversys.’

⁵⁷Ytho Ptolemi a dheuth yn-mes a Ejyp, ev ha Kleopatra y vyrgh, hag a dheuth dhe Ptolemais y'n kans, dew ha tri-ugensves blydhen.[21]

⁵⁸Aleksander an myghtern a'n metyas, ha Ptolemi a ros dhodho Kleopatra y vyrgh yn demmedhyans hag a solempnyas hy demmedhyans yn Ptolemais gans ryelder bras, par dell wra myghternedh.

⁵⁹Ena Aleksander an myghtern a skrifas dhe Yonathan may teffa ha metya ganso.

⁶⁰Ytho yth eth dhe Ptolemais gans meuredh ha metya an dhew vyghtern; ev a ros dhedha arghans hag owr, ha dh'aga howetha ev a ros rohow pals, hag ev a'n jevo favour gansa.

⁶¹Bagas a wer, bilens a Ysrael, a omguntellas er y bynn, gwer dhilagha, rag y guhudha, mes ny wrug an myghtern fors anedha.

⁶²An myghtern a worhemmynnis may fe diwiskys Yonathan a'y dhillas ha wiskys yn purpur, hag yndella i a wrug.

⁶³Ena an myghtern a wrug dhodho esedha rybdho; hag y leveris dh'y soedhogyon, ‘Ewgh yn-mes ganso bys yn kres an sita ha dyllewgh na goedh dhe nebonan y guhudha a-dro dhe dra bynag ha na'n annies nebonan rag acheson pynag.’

⁶⁴Pan welas y guhudhoryon an enor a veu res dhodho herwydh an gwarnyans, ha'y weles gwiskys yn purpur, i a fias oll dhe'n fo.

⁶⁵Yndella an myghtern a'n enoras ha'y skrifa yn mysk y gynsa kowetha, hag a'n gwrug pennhembrenkyas ha governour an ranndir.

⁶⁶Ha Yonathan a dhehwelis dhe Yerusalem yn kres hag yn lowena.

⁶⁷Y'n kans, pymp ha tri-ugensves blydhen,[22] Demetrius mab Demetrius a dheuth a Kreta dhe vro y dasow.

⁶⁸Pan glewas Aleksander hemma, duwon meur a'n jevo hag ev a dhehwelis dhe Antiogh.

⁶⁹Demetrius a ordenas Apollonius governour Kelesyria, hag ev a guntellas lu bras hag a gampyas erbynn Yamnia. Ena ev a dhannvonas an messaj a hol dhe Yonathan an arghoferyas:

⁷⁰‘Ty yn unnsel a sevis er agan pynn, ha my re beu dres yn ges ha disenor ha ty yw an skila. Prag yth omgemmerydh awtorita warnan y'n vro venydhyek?

⁷¹Mara'th eus trest y'th lu, diyskynn dhe'n plen rag dos er agan pynn, ha kesstrivyn an eyl erbynn y gila ena, rag yma genev nerth an sitys.

⁷²Govynn ha dysk piw ov ha piw yw an re erell usi orth ow gweres. Tus a lever dhis na yllydh sevel a-ragon, rag dha dasow a veu fesys diwweyth yn aga bro aga honan.

⁷³Ha lemmyn ny yllydh sevel orth ow marghoglu ha lu a'n par ma y'n plen, ma nag eus na men na bilienn na tyller vytholl dhodho may hyllir fia.’

⁷⁴Pan glewas Yonathan geryow Apollonius, movyes veu y brys. Ev a dhewisas deg mil wour hag ev eth dhiworth Yerusalem, ha Simon y vroder a'n junyas rag y weres.

⁷⁵Ev a gampyas erbynn Yoppa, mes tus an sita a dhegeas hy yetow, rag yth esa dhe Apollonius savla-goelyadoryon yn Yoppa.

⁷⁶Ytho i omsettyas orti, ha tus an sita a borthas own hag i a igoras an yetow ha Yonathan a gavas maystri war Yoppa.

⁷⁷Pan glewas Apollonius hemma, ev a guntellas tri mil a'n marghoglu ha lu bras, hag ev a geskerdhas dhe Azotus par dell ve ev ow mos pella. Y'n keth termyn ma yth eth yn-rag y'n plen, rag ev a'n jevo para bras a'n marghoglu, hag y fydhya ynno.

⁷⁸Yonathan a'n siwyas bys Azotus, ha'n luyow a vatalyas.

⁷⁹Apollonius re assa mil a'n marghoglu yn-dann gel a-dryv dhedha.

⁸⁰Yonathan a gonvedhas bos kontrewaytyans a-dryv dhodho, rag i a wrug kylgh oll a-dro dhodho hag a dewli sethow orta a'n bora dhe'n dohajydh.

⁸¹Mes y gasoryon a sevi fast, dell arghsa Yonathan, ha mergh an eskerens dheuth ha bos skwith.

⁸²Ena Simon a ledyas y lu yn-rag hag a vatalyas orth bagas an eskar (rag an marghoglu o heb nerth); fethys vons ganso hag i a fias dhe'n fo,

⁸³An marghoglu a veu skoellys a-les y'n plen. I a fias dhe Azotus hag a hwilas skovva yn tempel Beth-dagon, aga idol.

⁸⁴Mes Yonathan a loskas Azotus ha'n trevow yn hy hyrghynn ha'ga ravna; ha tempel Dagon ha'n re re fisa ynno ev a loskas gans tan.

⁸⁵Myns an re a goedhas der an kledha, ha'n re leskys hag i yn few, a dheuth dhe eth mil wour.

⁸⁶Ena Yonathan eth alena hag a gampyas erbynn Askalon, ha tus an sita a dheuth yn-mes rag y vetya gans meuredh bras.

⁸⁷Yonathan ha'n re esa ganso a dhehwelis dhe Yerusalem gans preydh meur.

⁸⁸Pan glewas Aleksander an myghtern a'n taklow ma, ev a enoras Yonathan hwath moy,

⁸⁹hag ev a dhannvonas dhodho brocha a owr, par dell yw an us y ri dhe gerens myghternedh. Ev a ros dhodho ynwedh Ekron ha'n tir yn hy hyrghynn avel eretons.