Read Kernewek 1 Makkabeyon 11 Bible Online

1 Makkabeyon 11 - Kernewek bible

1 Makkabeyon 11

¹Myghtern Ejyp a guntellas lu bras, diniver avel tewes an morrep, ha lies gorhel; hag ev a assayas kavoes maystri war ruvaneth Aleksander dre doell ha'y heworra dh'y ruvaneth y honan.

²Ev eth yn-mes dhe Syria gans geryow a gres, ha tus an sitys a igoras aga yetow dhodho hag i eth dhe vetya ganso, rag Aleksander an myghtern re's arghsa ma's mettyens ganso, rag yth o Ptolemi hwegron Aleksander.

³Pan entras Ptolemi an sitys, ev a settyas bagas a soudoryon yn pub sita.

⁴Pan nesas ev dhe Azotus i a dhiskwedhas dhodho tempel Dagon kowlleskys, hag Azotus ha'y mestrevow diswrys, ha'n korfow skoellys a-les, ha korfow goleskys leskys gans Yonathan y'n vresel, rag i re's gorrsa yn bernyow ryb y hyns.

⁵I a dherivas dhe'n myghtern ynwedh an pyth re wrussa Yonathan, rag tewlel an blam warnodho, mes an myghtern a dewi.

⁶Yonathan a vetyas gans an myghtern yn Yoppa gans meuredh, hag i a salusis an eyl y gila hag a spenas an nos ena.

⁷Ha Yonathan eth gans an myghtern bys y'n avon henwys Elewtherus; ena ev a dhehwelis dhe Yerusalem.

⁸Myghtern Ptolome a gavas maystri war sitys an morrep bys yn Selewkia ryb an mor, hag ev a besyas tewlel drogow erbynn Aleksander.

⁹Ev a dhannvonas kannasow dhe Demetrius an myghtern, ow leverel, ‘Deus, gwren kevambos an eyl gans y gila, hag y rov dhis yn demmedhyans ow myrgh hag a veu gwreg Aleksander, ha ty a reyn war ruvaneth dha das.

¹⁰Rag lemmyn edrek a'm beus a ri ow myrgh, rag ev re hwilas ow ladha.’

¹¹Ev a gablas Aleksander yndella, drefenn ev dhe hwansa war-lergh y ruvaneth.

¹²Ytho ev a gemmeras y vyrgh anodho ha'y ri dhe Demetrius. Estrenhes o ev dhiworth Aleksaner, ha'ga eskarogeth o apert.

¹³Ena Ptolome a entras Antiogh hag ev a worras diw gurun war y benn, kurunyow Ejyp hag Asia.

¹⁴Yth esa Aleksander an myghtern yn Silisia y'n termyn na, drefenn bos tus an ranndir na ow rebellya.

¹⁵Aleksander a glewas hemma hag ev a dheuth er y bynn yn batel. Ptolemi a ledyas y lu yn-mes ha'y vetya gans leuv krev ha'y fesya

¹⁶Aleksander a fias dhe Arabia rag kavoes difresyans, ha Ptolome a dryghis.

¹⁷Ha Zabdiel an Arab a dhibennas Aleksander hag a dhannvonas an penn dhe Ptolome.

¹⁸Mes myghtern Ptolome a verwis tri dydh a-wosa, ha'n gasoryon yn y dhinasow a veu ledhys gans tus an dinasow.

¹⁹Ytho yth eth Demetrius ha bos myghtern y'n kans, seyth ha tri-ugensves blydhen.[23]

²⁰Y'n dydhyow na Yonathan a ledyas tus Yudi yn-mes rag omsettya orth an tour yn Yerusalem, hag ev a dhrehevis lies jynn-esedhva er hy fynn

²¹Mes tus dhilagha a gasa aga henedhel eth dhe'n myghtern ha derivas dhodho Yonathan dhe omsettya a-dro dhe'n tour.

²²Pan glewas hemma ev a sorras ha kettell y'n klewas yth eth yn-mes hag y teuth dhe Ptolemais; hag ev a skrifas dhe Yonathan na pessya owth omsettya, mes ma'n mettya rag omgusulyans yn Ptolemais skonna galla.

²³Pan glewas Yonathan hemma ev a erghis pesya an omsettyans; hag ev a dhewisas re a henavogyon Ysrael ha re a'n oferysi. Owth omworra yn peryll,

²⁴ev eth dhe'n myghtern yn Ptolemais, ow kemmeres arghans hag owr ha dillas ha lies ro arall. Hag ev a gavas y favour.

²⁵Kyn pesyas nebes tus dhilagha a'n genedhel gul krodhvol warnodho,

²⁶an myghtern a dhyghtyas ganso par dell re dhyghtsa ganso y ragresegydhyon; ev a'n ughelhas a-rag oll y gowetha.

²⁷Ev a'n fasthas avel arghoferyas hag yn kemmys enor ha dell y'n jevia kyns, ha'n gwrug may fe aswonnys avel onan a'y gowetha.

²⁸Ena Yonathan a bysis an myghtern may hwrella Yudi keffrys ha'n tri ranndir a Samaria rydh a'n trubyt, hag ev a ambosas dhodho tri hans talent.

²⁹An myghtern a assentyas, hag a skrifas lyther dhe Yonathan a-dro dhe oll an traow ma dell siw:

³⁰‘Myghtern Demetrius dhe Yonathan y vroder ha dhe genedhel an Yedhewon, salusyans.

³¹Henn yw dasskrif a'n lyther a skrifsyn y'th kever dhe Lasthenes agan kar, ha ni re'n skrifas dhiso ynwedh, rag may hylli godhvos an pyth usi ynno.

³²“Myghtern Demetrius dhe Lasthenes y das, salusyans.

³³Dhe genedhel an Yedhewon, yw agan kowetha hag a gollenow aga deverow dhyn, dhedha ni re erviras may hwryllyn da, drefenn an bolonjedh da re dhiskwedhons dhyn.

³⁴Ni re fasthas dhedha pow Yudi ha'n tri ranndir Afairema ha Lydda ha Rathamin, yw treusworrys lemmyn dhe Yudi dhiworth Samaria, war-barth gans oll an tiryow kevogas, rag les oll an re a sakrifis yn Yerusalem, yn le an tollow ryel a gavas an myghtern anedha pub blydhen, a drevas an tir hag a froeth an gwydh.

³⁵Hag alemma rag an talasow erell a dal bos res dhyn a'n degedhow, ha'n tollow a dal bos res dhyn, ha'n pyttow-hoelan, ha tollow an gurun a dal bos res dhyn — ni a's rydhha dhiworth oll an re ma.

³⁶Ha ny vydh travyth a'n re ma defendys a'n termyn ma bys vykken.

³⁷Ytho lemmyn gwayt may hwrylli dasskrif a hemma, ha bedhes res dhe Yonathan ha bedhes gorrys yn tyller hewel war an menydh sans.” ’

³⁸Pan welas Demetrius an myghtern bos an tir kosel a-ragdho ha nag esa enebieth orto, ev a wordhellos oll y soudoryon, pubonan dh'y dyller y honan, marnas an soudoryon estren re gavsa dhiworth ynysow an Jentilys. Ytho oll an soudoryon re servsa y dasow a'n kasas.

³⁹Neb unn Tryfo re bia skoedhyer Aleksander kyns; ev a wodhya bos oll an gasoryon ow krodhvolas war Demetrius. Rag hemma ev eth dhe Imalkue an Arab, esa ow maga Antioghus, mab yowynk Aleksander,

⁴⁰hag ev a ynnias warnodho yn fen may taskorra Antioghus dhodho rag mayth ella ha bos myghtern yn le y das. Dres henna ev a dherivas dhe Imalkue an pyth re wrussa Demetrius hag a-dro dhe'n kas a's tevo soudoryon Demetrius orto; hag ev a besyas ena lies dydh.

⁴¹Lemmyn Yonathan a dhannvonas dhe Demetrius an myghtern may kemmerra yn-mes soudoryon an tour dhiworth Yerusalem, ha soudoryon y'n dinasow krev, rag i dhe besya batalyas orth Ysrael.

⁴²Ytho Demetrius a dhannvonas an messaj ma dhe Yonathan, ‘Ny vydh an traow ma yn unnsel a wrav ragos ha'th kenedhel, mes y rov enor meur warnas ha'th kenedhel, mar kavav an termyn gwiw.

⁴³Ytho da a wredh mar tannvenydh gwer a'm gweres, rag oll ow soudoryon re rebellyas.’

⁴⁴Ytho Yonathan a dhannvonas dhodho tri mil wour krev dhodho dhe Antiogh, ha pan dheuthons dhe'n myghtern, an myghtern a lowenhas a'ga devedhyans.

⁴⁵Ena tus an sita a omguntellas yn kres an sita, bys y'n niver a hwegh ugens mil, ha hwans a's tevo a ladha an myghtern.

⁴⁶Mes an myghtern a fias y'n palys. Ena tus an sita a gemmeras stretys meur an sita hag a dhallathas omladh.

⁴⁷Ytho an myghtern a elwis an Yedhewon dh'y weres, hag i oll a dheuth dhodho hag ena i a omlesas der an sita; hag i a ladhas y'n jydh na a-dro dhe gans mil.

⁴⁸I a worras tan y'n sita ha sesya preydh meur y'n jydh na, hag i a sawyas an myghtern.

⁴⁹Pan welas tus an sita an Yedhewon dhe gavoes maystri war an sita par dell vynnens, aga hardhder a fyllis hag i a grias dhe'n myghtern ow pysi,

⁵⁰‘Gront dhyn kres, ha gwra mayth hettho an Yedhewon aga omsettyans er agan pynn hag erbynn agan sita.’

⁵¹Hag i a dewlis aga arvow dhe'n leur hag a wrug kres. Ytho an Yedhewon a waynyas glori yn golok an myghtern hag oll an bobel yn y ruvaneth hag i a dhehwelis dhe Yerusalem gans meur a breydh.

⁵²Ytho Demetrius a esedhas war dron y ruvaneth, ha'n tir o kosel a-ragdho.

⁵³Mes Demetrius a naghas y ambos a-dro dhe oll re lavarsa; ev eth ha bos estren dhe Yonathan ha ny attylis an favours re beu gwrys ragdho mes ev a'n gwaskas fest yn tynn.

⁵⁴Wosa hemma Tryfo a dhehwelis, ha ganso an maw yowynk, Antioghus, neb a dhallathas reynya hag a omwiskas an gurun.

⁵⁵Oll an soudoryon hag a wrug Demetrius aga tewlel dhe-ves a omguntellas a-dro dhodho hag i a vatalyas orth Demetrius, hag ev a fias dhe'n fo hag ev a veu fethys.

⁵⁶Tyfo a gachyas an olifanses ha kavoes maystri war Antiogh.

⁵⁷Ena an Antioghus yowynk a skrifas dhe Yonathan ow leverel, ‘My a'th fast avel arghoferyas ha'th settya war an peswar ranndir, hag y'th hwrav onan a gowetha an myghtern.’

⁵⁸Hag ev a dhannvonas dhodho lestri a owr ha daffar moes, ha grontya dhodho an gwir a eva a hanafow a owr ha dhe omwiska yn purpur ha dhe wiska bokyl a owr.

⁵⁹Ev a apoyntyas Simon y vroder governour dhiworth Skeul Tyr bys yn oryon Ejyp.

⁶⁰Ena Yonathan eth yn-rag hag a vyajyas dres an avon hag yn mysk an sitys, hag oll lu Syria a omguntellas dhodho avel keffrysysi. Pan dheuth dhe Askalon, tus an sita a'n degemmeras gans enor meur.

⁶¹Alena ev a dhibarthas dhe Gaza mes tus an sita a'n degeas yn-mes. Ytho ev a omsettyas a-dro dhedhi ha leski hy mestrevow gans tan, ha'ga ravna.

⁶²Ena pobel Gaza a bledyas gans Yonathan hag ev a ros dhedha ambosow a gres, ha kemmeres mebyon aga rewloryon avel goestlow ha'ga dannvon dhe Yerusalem. Hag ev a dremenas der an pow bys Damaskus.

⁶³Yonathan a glewas soedhogyon Demetrius dhe dhos dhe Kadesh yn Galile gans lu bras ow mynnes y remova a'y soedh.

⁶⁴Ev eth rag metya gansa, mes ev a asas y vroder Simon yn Yudi.

⁶⁵Simon a gampyas a-rag Beth-sur hag a omsettyas er hy fynn lies dydh ha'y stroetha.

⁶⁶Ena i a'n pysis may hwrontyo ambosow a gres, hag ev a'n gwrug. Ev a's removas alena, hag a gemmeras an sita hag a settyas bagas a soudoryon warnedhi.

⁶⁷Yonathan ha'y lu a gampyas ryb dowrow Gennesaret. Myttin a-varr i a geskerdhas dhe blen Hasor,

⁶⁸hag otta, lu an estrenyon a'n metyas y'n plen; i re settyas kontrewaytyans er y bynn y'n menydhyow, mes i aga honan a'n metyas fas orth fas.

⁶⁹Ena an dus esa y'n kontrewaytyans a dheuth a'ga thylleryow hag a junyas y'n vatel.

⁷⁰Oll an dus esa gans Yonathan a fias dhe'n fo; nyns esa nebonan vytholl gesys marnas Mattathias mab Absalom ha Yudas mab Kalfi, ledyoryon soudoryon an lu.

⁷¹Yonathan a skwardyas y dhillas ha gorra doust war y benn, hag a bysis.

⁷²Ena ev a dreylyas arta dhedha rag batalyas hag a's fethas, hag i a fias dhe'n fo.

⁷³Pan welas hemma y soudoryon esa ow fia, i a dhehwelis dhodho ha junya ganso ow helghya bys Kadesh, bys kamp an eskar, hag ena i a gampyas.

⁷⁴A-dro dhe dri mil wour a'n Jentilys a goedhas y'n jydh na. Ha Yonathan a dhehwelis dhe Yerusalem.