Read Kernewek 1 Makkabeyon 12 Bible Online

1 Makkabeyon 12 - Kernewek bible

1 Makkabeyon 12

¹Ytho pan wodhya Yonathan an termyn dhe vos da ragdho, ev a dhewisas gwer ha'ga dannvon dhe Rom dhe fastya ha nowydhhe an kowethyans gansa.

²Ynwedh ev a dhannvonas lytherow gans an keth negys dhe'n Spartanys ha dhe dylleryow erell.

³Ytho i eth dhe Rom hag a entras yn chi an senedh ha leverel, ‘Yonathan an arghoferyas ha'n genedhel Yedhowek re'gan dannvonas dhe nowydhhe an kowethyans ha'n keffrysyans avel kyns.’

⁴Ha'n Romanyon a ros lytherow dhedha dhe'n dus yn pub le, orth aga fysi dh'aga dannvon yn saw war aga hyns dhe bow Yuda.

⁵Hemm yw dasskrif an lyther a skrifas Yonathan dhe'n Spartanys:

⁶‘Yonathan an arghoferyas, senedh an genedhel, an oferysi, ha'n re erell a bobel an Yedhewon dh'aga breder an Spartanys, salusyans.

⁷Seulabrys y'n termyn tremenys lyther a veu dannvenys dhe Onias an arghoferyas dhiworth Arias, hag o myghtern yn agas mysk, ow leverel hwi dhe vos agan breder, par dell dhiskwa an dasskrif usi a-woeles.

⁸Onias a wolkommas an gannas gans enor, hag a dhegemmeras an lyther, esa ynno derivas kler a geffrysyans hag a gowethyans.

⁹Ytho kyn na'gan beus edhomm a'n traow ma, pan y'gan beus avel kennerth an lyvrow sans usi yn agan diwleuv,

¹⁰ni re omgemmeras may tannvennyn rag nowydhhe agan brederedh ha kowethyans, ma na ven ni gyllys estrenyon dhywgh, rag termyn hir re dremenas a-ban dhannvensowgh agas lyther dhyn.

¹¹Rakhenna ni a berth kov ahanowgh pup-prys, keffrys yn agan goelyow hag yn dydhyow gwiw erell, ow perthi kov ahanowgh y'n sakrifisow a offrynnyn hag yn agan pysadow, dell yw gwiw hag ewn perthi kov a vrederedh.

¹²Ha ni a lowenha yn agas glori.

¹³Mes ni agan honan, lies galar ha lies bresel re'gan kylghyas; an vyghternedh yn agan kyrghynn re vatalyas orthyn.

¹⁴Ny vynnsyn agas trobla, na'gan keffrysysi ha kowetha erell gans an breselyow ma,

¹⁵rag ni a'gan beus an gweres a dheu a Nev rag agan gweres; ha ni re beu delivrys a'gan eskerens ha'gan eskerens a veu iselhes.

¹⁶Ytho ni re dhewisas Numenius mab Antioghus hag Antipater mab Yason, ha ni re's dannvonas dhe Rom rag nowydhhe agan kynsa kowethyans ha keffrysyans gansa.

¹⁷Ni re's erghis mos dhywgh hwi ynwedh ha'gas salusi ha ri dhywgh an lyther ahanan a-dro dhe nowydhheans agan brederedh.

¹⁸Ha lemmyn ni a'gas pys dannvon dhyn gorthyp dhe hemma.’

¹⁹Hemm yw dasskrif a'n lyther a dhannvonsons dhe Onias.

²⁰‘Arius, myghtern Sparta, dhe Onias an arghoferyas, salusyans.

²¹Kevys re beu yn skrif a-dro dhe'n Spartanys ha'n Yedhewon i dhe vos breder, hag i dhe vos a deylu Abraham.

²²Ha hemma godhvedhys genen lemmyn, skrifewgh dhyn ni a'gas pys, a-dro dh'agas siwena.

²³Dh'agan parth ni, ni a skrif dhywgh agas chatel ha'gas pythow dhe vos dhyn, ha'gan re ni dhe vos dhywgh. Ytho ni a ergh dh'agan kannasow derivas dhywgh yndella.’

²⁴Yonathan a glewas kaslewydhyon Demetrius dhe dhehweles gans lu brassa ages kyns, rag batalyas orto.

²⁵Ytho ev a geskerdhas dhiworth Yerusalem hag a's metyas yn bro Hamath, rag na rolla dhedha chons vytholl dredho mayth omsettya yn y vro y honan.

²⁶Ev a dhannvonas aspioryon dh'aga hamp, hag i a dhehwelis hag a dherivas dhodho an eskerens dhe vos arayys rag may hallens koedha war an Yedhewon y'n nos.

²⁷Ytho pan sedhas an howl, Yonathan a worhemmynnis dh'y dus bos hewoel ha may kaffens aga arvow rybdha, rag may fens parys der an nos rag batel; hag ev a worras savleow-goelyadoryon yn kyrghynn an kamp.

²⁸Pan glewas an eskerens bos Yonathan ha'y wer parys dhe'n vatel, own a's tevo hag i a borthas euth yn aga holonn, ytho i a enowis tanyow yn aga hamp ha kildenna.[24]

²⁹Mes ny'n godhya Yonathan ha'y dus kyns myttin, rag i a welas an tanyow ow leski.

³⁰Ena Yonathan a's helghyas, mes ny dremenas dresta, drefenn i dhe dreusi an avon Elewtherus.

³¹Ytho Yonathan a dreylyas a-denewen erbynn an Arabyon yw henwys Zabadeanys, hag ev a's gweskis ha'ga ravna.

³²Ena ev a dhisevis an kamp hag yth eth dhe Damaskus, ha keskerdhes der oll an pow.

³³Simon eth yn-mes ynwedh ha keskerdhes der an tir bys Askalon ha'n dinasow a-ogas. Ev a dreylyas a-denewen dhe Yoppa hag ev a's kemmeras distowgh,

³⁴rag ev re glewsa i dhe vos parys dhe ri an dinas dhe dus Demetrius. Hag ev a worras bagas a soudoryon ena rag y witha.

³⁵Pan dhehwelis Yonathan ev a guntellas henavogyon an bobel hag y tewlis towl gansa may trehaffens dinasow yn Yudi,

³⁶may trehaffens fosow hwath ughella, ha may trehaffens fos ughel ynter an tour ha'n sita rag hy diberth rag ma na alla soudoryon an tour na prena na gwertha.

³⁷Ytho i a omguntellas dhe dhastrehevel an sita; rann an fos war an keynres a'n est re goedhsa, hag ev a ewnheas an rann o henwys Kafenatha.

³⁸Simon a dhastrehevis Adida y'n Shefela; ev a'n keras hag a worras yetow gans barrys.

³⁹Tryfo a hwilas bos myghtern Asia ha gwiska an gurun, hag ystynn y leuv erbynn Antioghus an myghtern.

⁴⁰Own a'n jevo na rolla Yonathan kummyas dhodho a wul yndella, mes martesen batalyas orto, ytho ev a besyas assaya y dhalghenna ha'y ladha, hag ev a geskerdhas yn-mes ha dos dhe Beth-shan.

⁴¹Yonathan eth yn-mes rag metya orto gans dew-ugens mil gasor flour, hag y teuth dhe Beth-shan.

⁴²Pan welas Tyfo y tothya gans lu bras, own a'n jevo a ystynn y leuv er y bynn.

⁴³Ytho ev a'n degemmeras gans enor hag a'n kommendyas dhe oll y gowetha ha'y soudoryon may fons gostydh dhodho par dell viens dhodho y honan.

⁴⁴Ena yn-medh ev dhe Yonathan, ‘Prag y skwithsys oll an bobel ma, pan nag eson ow kwerrya?

⁴⁵Dannvon i dhe-ves dh'aga thre ha dewis ragos nebes tus dhe wortas genes, ha deus genev dhe Ptolemais. My a's daskorr dhis keffrys ha'n dinasow erell ha remenant an soudoryon hag oll an soedhogyon, hag my a dreyl ha mos tre. Rag hemma yw an reson ow bos omma.’

⁴⁶Yonathan a drestyas ynno hag y hwrug dell leveris; ev a dhannvonas y soudoryon dhe-ves hag i a dhehwelis dhe bow Yuda.

⁴⁷Ev a withas ganso y honan tri mil wour hag anedha ev a asas dew vil yn Galile ha mil eth ganso.

⁴⁸Mes pan entras Yonathan yn Ptolemais, tus Ptolemais a dhegeas an yetow ha'y dhalghenna, hag oll an re re entersa ganso a ladhsons gans an kledha.

⁴⁹Tryfo a dhannvonas troeslu ha marghoglu bys yn Galile hag y'n plen bras rag diswul oll tus Yonathan.

⁵⁰I a gonvedhas bos Yonathan dalghennys ha gyllys dhe goll war-barth ha'y dus; mes i a gennerthas an eyl y gila, hag i a geskerdhi yn aray stroeth, parys rag batel.

⁵¹Pan wodhya an re esa orth aga siwya i dhe omladh rag aga bewnans, i a gildennas.

⁵²Ytho i oll dheuth dhe bow Yuda yn saw, hag i a gynis a-barth Yonathan ha'y gowetha hag i a borthas own bras; hag oll Ysrael a gynis yn town.

⁵³An Jentilys yn aga hyrghynn a hwilas aga diswul, rag yn-medhons, ‘Ny's teves naneyl ledyer na gwereser. Lemmyn ytho gwerryn orta ha defendyn pub kovadh anedha dhiworth mab-den.’