Read Kernewek 1 Makkabeyon 13 Bible Online

1 Makkabeyon 13 - Kernewek bible

1 Makkabeyon 13

¹Simon a glewas Tryfo dhe guntelles lu bras rag omsettya yn pow Yuda ha'y dhistrui,

²hag ev a welas bos an bobel ow krena gans own. Ytho ev eth yn-bann dhe Yerusalem ha kuntell an bobel war-barth.

³Ev a's kennerthas, ow leverel, ‘Hwi agas honan a woer an traow meur re wrussyn, my ha'm breder ha chi ow thas rag an laghys ha rag an sentri; hwi a woer ynwedh an breselyow ha'n kaletteryow re welsyn.

⁴Drefenn hemma, oll ow breder re verwis a-barth Ysrael, ha nyns eus gesys marnas my ow honan.

⁵Ha lemmyn pell re bo dhiworthiv sparya ow bewnans yn prys pynag a ahwer, rag nyns ov gwell ages ow breder.

⁶Mes my a dal dial a-barth ow henedhel ha'n sentri ha'gas gwragedh ha fleghes, rag oll an kenedhlow re omguntellas war-barth yn aga eskarogeth rag agan diswul.’

⁷Spyrys an bobel a veu enowys arta pan glewsons an geryow ma,

⁸hag i a worthybis gans lev ughel, ‘Ty yw agan ledyer yn le Yudas ha'th broder Yonathan.

⁹Omladh yn agan batelyow, ha pypynag a leverydh dhyn, ni a'n gwra.’

¹⁰Ytho ev a guntellas oll an gasoryon ha fyski dhe gowlwul fosow Yerusalem, hag ev a's keras a bub tu.

¹¹Ev a dhannvonas Yonathan mab Absalom dhe Yoppa, ha ganso lu bras; ev a fesyas hy thrigoryon hag a besyas ena.

¹²Ena Tryfo a asas Ptolemais gans lu bras rag omsettya yn pow Yuda, hag yth esa Yonathan ganso yn-dann with.

¹³Simon a gampyas yn Adida a-dal an plen.

¹⁴Tryfo a glewas Simon dhe sevel yn le y vroder, ha'y vos porposys dhe vatalyas ganso, ytho ev a dhannvonas kannasow dhodho, ha leverel,

¹⁵‘Yth yw rag an arghans a dela dha vroder dhe'n arghow, a-dro dhe'n soedhow a gevi, y hwrussyn y synsi.

¹⁶Dannvon ytho lemmyn kans talent a arghans ha dew a'y vebyon avel goestlow, rag na wrella rebellya er agan pynn pan vo delivrys, ha ni a'n delirv.’

¹⁷Simon a wodhya i dhe gewsel yn unn doella, mes ev a dhannvonas dhe gavoes an arghans ha'n vebyon, rag na wrella eskarogeth veur yn mysk an bobel, neb a alsa leverel,

¹⁸‘Yonathan a verwis rag ny vynnas Simon dannvon an arghans ha'n vebyon.’

¹⁹Ytho ev a dhannvonas an vebyon ha'n kans talent mes Tryfo a dorras y ambos ha ny dhelivras Yonathan.

²⁰Wosa hemma Tryfo a dheuth rag omsettya y'n vro ha'y dhiswul, hag ev eth a-dro war an fordh dhe Adora. Mes Simon ha'y lu a besyas keskerdhes a-dal dhodho dhe bub le mayth e ev.

²¹Lemmyn an dus y'n tour a besyas dannvon kannasow dhe Tryfo, owth ynnia warnodho dos dhedha war fordh an gwylvos, ha dannvon boes.

²²Ytho Tryfo a bareusis oll y varghoglu rag mos, mes y'n nos na yth esa ergh meur, ha ny allsons mos drefenn an ergh. Ytho ev a omdennas ha mos bys yn Gilead.

²³Pan nesas dhe Baskama, ev a ladhas Yonathan, hag ev a veu ynkleudhys ena,

²⁴Ena Tryfo a dreylyas hag a dhehwelis dh'y bow y honan.

²⁵Simon a dhannvonas, ha kemmeres eskern y vroder Yonathan, ha'y ynkleudhyas yn Modein, sita y dasow.

²⁶Oll Ysrael a oelas war y lergh gans drem meur ha kyni ragdho lies dydh.

²⁷Simon a dhrehevis men-kov war vedh y das ha'y vreder, hag ev a'n gwrug ughel rag may haller y weles, gans men leven yn-rag hag a-dryv.

²⁸Ev a dhrehevis ynwedh seyth pyramyd, an eyl a-dal y gila, rag y das ha'y vamm ha'y beswar broder.

²⁹Rag an pyramydys ev a formyas savla fethus, ow trehevel oll a-derdro kolovenyow bras, ha war an kolovenyow ev a worras arvwisk avel kovadh bys vykken, ha ryb an a arvwisk y feu gorholyon kervys rag may fens gwelys gans oll an re a woel y'n mor.

³⁰Hemm yw an bedh a dhrehevis ev yn Modein; ev a bes bys y'n jydh hedhyw.

³¹Tryfo a dhyghtyas an myghtern yowynk Antioghus gans trayturi; ev a'n ladhas,

³²hag yth eth ha bos myghtern yn y le, owth omwiska gans kurun Asia; hag ev a dhros anfeusi bras war an tir.

³³Mes Simon a dhastrehevis dinasow Yudi hag a wrug fosow oll a-derdro gans touryow ughel ha fosow bras ha yetow ha barrys; hag ev a worras boes a-ji dhe'n dinasow.

³⁴Simon a dhewisas gwer ha'ga dannvon dhe Demetrius an myghtern gans pysadow may rolla difresyans a drubyt dhe'n tir, rag ny wrug Tryfo travyth marnas pylla.

³⁵Demetrius an myghtern a dhannvonas dhodho gorthyp faveradow, hag a skrifas lyther dhodho dell siw:

³⁶‘Myghtern Demetrius dhe Simon an arghoferyas ha koweth myghternedh, ha dhe henavogyon ha kenedhel an Yedhewon, salusyans.

³⁷Ni re dhegemmeras an gurun a owr ha'n skorrenn a balm a dhannvensowgh, ha parys on dhe wul kres kemmyn genowgh ha dhe skrifa dh'agan soedhogyon rag may rollens difresyans a'n trubyt.

³⁸Oll an grontys re resyn dhywgh a bes, ha bedhes agas maystri.

³⁹Ni a av peghosow pynag gwrys dre wall ha peghosow pynag gwrys kyns lemmyn, ha ni a dhefend dhe-ves toll an gurun a dylowgh; ha ny vydh kuntellys na fella toll arall pynag re beu kuntellys yn Yerusalem.

⁴⁰Ha mars eus re ahanowgh a vydh gwiw dhe omrolya yn mysk an re a-dro dhyn, bedhes yndella omrolys, ha bedhes kres yntredhon.’

⁴¹Y'n kans ha deg ha tri-ugensves blydhen[25] yew an Jentilys a veu kemmerys dhe-ves dhiworth Ysrael,

⁴²ha'n bobel a dhallathas skrifa yn aga skrifennow hag yn aga hevambosow: ‘Yn kynsa blydhen Simon an arghoferyas meur, ha kaslewydh ha ledyer an Yedhewon.’

⁴³Y'n dydhyow na Simon a gampyas erbynn Gazara ha'y hylghya gans kasoryon. Ev a wrug jynn-esedhva; ev a'n dros dhe'n sita hag a weskis unn tour ha'y gemmeres.

⁴⁴An dus a-ji dhe'n jynn-esedhva a lammas y'n sita, hag yth esa tervans meur y'n sita.

⁴⁵An dus esa y'n sita gans an gwragedh ha'n fleghes, eth yn-bann war an fos skwardys aga dillas, hag i a grias gans lev ughel, ow pysi Simon a wul kres gansa;

⁴⁶yn-medhons, ‘Na'gan dyght herwydh agan gweythresow drog, mes herwydh dha versi.’

⁴⁷Yndella Simon a akordyas gansa hag astel omladh gansa. Mes ev a's tewlis yn-mes a'n sita hag a lanhas an chiow, ynna mayth esa an idolys, hag ena ev a entras ynni gans hymnys ha gans gormel.

⁴⁸Ev a dhefendyas yn-mes oll an avlander, hag a worras ynni oll an re hag a veu gostydh dhe'n lagha. Ev a grevhas ynwedh hy herweythyow hag ynni ev a dhrehevis chi ragdho y honan.

⁴⁹An re esa y'n tour yn Yerusalem a veu lettys rag mos dhe-ves ha rag mos a-ji dhe brena ha dhe wertha y'n vro. Ytho fest nownek ens, ha lies anedha a verwis drefenn divoetter.

⁵⁰Ena i a grias war Simon may hwrella kres gansa, hag ev a'n gwrug. Ena ev a's tewlis alena hag a lanhas an tour a'n defolans.

⁵¹Y'n tressa dydh warn ugens a'n nessa mis, y'n kans hag unnek ha tri-ugensves blydhen,[26] an Yedhewon a entras ynno gans gormel ha palmys, ha gans sowtris, ha gans symbalys, ha gans telynnow, ha gans hymnys ha gans kanow, drefenn bos eskar meur brewys ha tewlys yn-mes a Ysrael.

⁵²Simon a ordenas an jydh ma dhe vos solempnys yn pub blydhen gans lowena. Ev a grevhas kerweythyow menydh an tempel ryb an tour, hag yth esa ev y honan ha'y wer trigys ena.

⁵³Simon a welas bos y vab Yowann tevys dhe oes, ytho ev a'n gwrug hembrenkyas an luyow oll; hag yth esa trigys yn Gazara.