Read Kernewek 1 Makkabeyon 14 Bible Online

1 Makkabeyon 14 - Kernewek bible

1 Makkabeyon 14

¹Y'n kans, dewdhek ha tri-ugensves blydhen[27] Demetrius an myghtern a guntellas y gasoryon hag a geskerdhas bys yn Media rag kavoes gweres, rag may halla ev gwerrya erbynn Tryfo.

²Pan glewas Arsakes myghtern Persia ha Media, Demetrius dhe dhos a-ji dh'y oryon, ev a dhannvonas onan a'y gaslewydhyon dh'y dhalghenna yn few.

³An kaslewydh eth hag a fethas lu Demetrius, ha'y dhalghenna, hag y'n dros dhe Arsakes, neb a'n gorras yn-dann with.

⁴An tir a'n jeva powes oll dydhyow Simon. Ev a hwithras dader y genedhel; y rewl a veu plegadow dhedha, dell veu ynwedh an enor diskwedhys dhodho oll y dhydhyow.

⁵Rag kuruna oll y enor ev a gemmeras Yoppa avel porth hag a igoras fordh dhe ynysow an mor.

⁶Ev a gressyas oryon y genedhel, Hag a gavas maystri kowal war an pow.

⁷Ev a guntellas kethyon bals; ev a reynyas war Gazara ha war Beth-sur ha war an tour, hag ev a removas an avlander dhiworto, ha nyns esa nagonan dhe sevel er y bynn.

⁸I a wonedhi aga thir yn kres; an dor a ri y drevas, ha gwydh an plenys a ri aga froeth.

⁹Henavogyon a esedha y'n stretys; i a gewsi war-barth a-dro dhe daklow da, ha'n yonkoryon a omwiskas yn dillas breselek fethus.

¹⁰Ev a brovias boes dhe'n trevow hag a ros dhedha maynys defens, ha'n bri anodho a lesas dhe bennow an norvys.

¹¹Ev a fastyas kres y'n tir, hag Ysrael a lowenhas gans lowender meur.

¹²Peub a esedhas yn-dann y winbrenn y honan ha'y figbrenn y honan, ha nyns esa nagonan dh'aga ownekhe.

¹³Nyns esa nagonan gesys y'n pow dhe werrya er aga fynn, ha'n vyghternedh a veu brewys y'n dydhyow na.

¹⁴Ev a grevhas oll an re uvel a'y bobel; ev a hwilas an lagha, hag a dhefendyas dhe-ves an re dhilagha ha'n re dhrog.

¹⁵Ev a wrug an sentri gloryus, hag ev a geworras dhe lestri an sentri.

¹⁶Klewys veu yn Rom ha maga pell avel Sparta, Yonathan dhe verwel ha trist yn fen yth ens.

¹⁷Pan glewsons bos y vroder gyllys arghoferyas yn y le, hag ev dhe vos ow reynya war an tir ha war an trevow ynno,

¹⁸i a skrifas dhodho war leghennow a vrons rag nowydhhe ganso an kowethyans ha'n keffrysyans re fastsens gans y vreder Yudas ha Yonathan;

¹⁹ha'n re ma a veu lennys a-rag an kuntelles yn Yerusalem.

²⁰Hemm yw dasskrif a'n lyther a dhannvonas an Spartanys: ‘Rewloryon ha sita an Spartanys dhe'n arghoferyas Simon ha dhe'n henavogyon ha'n oferysi ha dhe re erell a bobel an Yedhewon, agan breder, salusyans.

²¹An kannasow a veu dannvenys dh'agan pobel re dherivas dhyn a-dro dh'agas glori hag enor, ha ni a lowenhas yn aga devedhyans.

²²Ni re skrifas an pyth a lavarsons yn kovnotyansow an kuntelles poblek, dell siw, “Numenius mab Antioghus hag Antipater mab Yason, kannasow an Yedhewon re dheuth dhyn rag nowydhhe aga howethyans genen.

²³Plegadow re beu gans an bobel degemmeres an wer ma gans enor ha gorra dasskrif aga geryow y'n kovskrifennow poblek rag ma's teffo pobel an Spartanys rekord anedha. Hag i re dhannvonas dasskrif a hemma dhe Simon an arghoferyas.” ’

²⁴Wosa hemma Simon a dhannvonas Numenius dhe Rom gans skoes bras a owr, ha'y boester mil vina,[28] rag fastya an kevambos gans an Romanyon.

²⁵Pan glewas an bobel an traow ma yn-medhons, ‘Fatell yllyn ni aswonn grasow dhe Simon ha dh'y vebyon?

²⁶Rag ev ha'y vreder ha chi y das re sevis krev, hag i re fesyas eskerens Ysrael, ha fastya rydhses an genedhel.’

²⁷Ytho i a'n gravyas war leghennow a vrons ha'y worra war golovenyow war venydh Sion. Hemm yw dasskrif a'n pyth a skrifsons, ‘Y'n etegves dydh a Elul, y'n kans dewdhek ha tri-ugensves blydhen,[29] yw tressa blydhen Simon, an arghoferyas meur yn Asaramel,

²⁸y'n kuntelles bras a oferysi ha pobel ha rewloryon an genedhel, ha henavogyon an vro, an pyth a hol a veu dyllys dhyn:

²⁹‘Drefenn breselyow dhe hwarvos yn fenowgh y'n tir, Simon mab Mattathias, oferyas a vebyon Yoarib, ha'y vreder, a omros yn beryll hag a sevis erbynn eskerens aga henedhel rag may fe aga sentri ha'n lagha gwithys saw; hag i a dhug glori meur dh'aga henedhel.

³⁰Yonathan a guntellas aga henedhel war-barth, hag yth eth ha bos aga arghoferyas, hag a veu kuntellys dh'y bobel.

³¹Pan erviras aga eskerens omsettya yn aga bro hag ystynn aga leuv war aga sentri,

³²ena Simon a sevis hag a werryas a-barth y genedhel. Ev a spenas sommow bras a'y arghans y honan; ev a arvas gwer lu y genedhel hag a dylis gobrow dhedha.

³³Ev a geras trevow Yudi ha Beth-sur war oryon Yudi, may fia arvow an eskerens gwithys ynni kyns, hag ev a worras ena bagas a soudoryon yedhowek.

³⁴Ynwedh ev a geras Yoppa, usi ryb an mor, ha Gazara usi war oryon Azotus, mayth esa an eskerens trigys kyns. Ev a worras Yedhewon ena hag a brovias pup-tra a dela y gavoes rag aga dastrehevyans.

³⁵‘An bobel a welas lelder Simon ha'n glori re erviras y waynya a-barth y genedhel, hag y'n gwrussons aga ledyer hag arghoferyas, drefenn ev dhe wul oll an traow ma ha rag an ewnder ha'n lelduri re withsa orth y wlaskor. Ev a hwila yn pub fordh mayth ughelhaho y bobel.

³⁶Yn y dhydhyow pup-tra a siwenis yn y dhiwla, bys may feu an Jentilys fesys dhiworth aga bro, hag ynwedh an re esa yn sita Davydh yn Yerusalem, hag re dhrehavsa tour ragdha aga honan mayth ens anodho ow tefola oll kyrghynn an sentri, ow kul damaj meur dh'y lander.

³⁷Ev a worras Yedhewon ynni ha'y hera rag sawder an pow ha'n sita, hag ev a dhrehevis fosow Yerusalem ughella.

³⁸‘Drefenn an traow ma, myghtern Demetrius a'n fastyas avel an arghoferyas,

³⁹hag a'n gwrug onan a'y gowetha, hag a ros dhodho enorys ughel.

⁴⁰Rag ev re glewsa an Yedhewon dhe vos gelwys kowetha, keffrysysi ha breder gans an Romanyon, ha'n Romanyon dhe gemmeres kannasow Simon gans enor.

⁴¹‘An Yedhewon ha'ga oferysi re erviras may fo Simon aga ledyer ha'ga arghoferyas bys vykken, bys pan saffo profoes len,

⁴²ha may fo aga kaslewydh ha ma'n jeffo charj a'n sentri hag apoyntya soedhogyon war oll y oberennow ha war an tir ha war an arvow ha war an dinasow ha ma'n jeffo maystri war an sentri,

⁴³ha may fo oll gostydh dhodho ha may fo pub kevambos y'n vro skrifys yn y hanow, ha may fo gwiskys yn purpur ha gwiska owr.

⁴⁴‘Ny vydh kummyas naneyl dhe'n bobel na dhe'n oferysi dhe nagha onan vytholl a'n taklow ma, po dhe leverel erbynn an pyth a lever ev, po dhe elwel kuntelles y'n vro heb y gummyas, po dhe vos gwiskys yn purpur po dhe wiska bokyl a owr.

⁴⁵Piwpynag a wrello konter dhe'n taklow ma po a skonnyo neppyth anedha a vydh gwiw dhe vos kessydhys.’

⁴⁶Da o gans oll an bobel grontya dhe Simon an gwir dhe omdhoen herwydh an geryow ma.

⁴⁷Ytho Simon a assentyas ha da o ganso bos arghoferyas, ha kaslewydh hag ethnargh an Yedhewon ha'n oferysi, ha may fo gwithyas dhedha i oll.

⁴⁸Hag i a worhemmynnis may fo an skrifenn ma gravys war leghennow a vrons, ha gorrys yn tyller hewel, a-ji dhe oryon an sentri,

⁴⁹ha may hworrer dasskrifow anedha y'n dresorva, rag ma's teffa i Simon ha'y vebyon.