Read Kernewek 1 Makkabeyon 15 Bible Online

1 Makkabeyon 15 - Kernewek bible

1 Makkabeyon 15

¹Antioghus, mab myghtern Demetrius, a dhannvonas lyther dhiworth ynysow an mor dhe Simon, oferyas hag ethnargh an Yedhewon, ha dhe oll an genedhel;

²y synsas o dell siw: ‘Myghtern Antioghus dhe Simon arghoferyas hag ethnargh ha dhe genedhel an Yedhewon, salusyans.

³Rag nebes bilens dhe gavoes maystri war wlaskor agan tasow, my a vynn lemmyn ma'm bo titel y'n wlaskor, rag ma's daswrilliv par dell vedha, ha my re guntellas bagas bras a arvethesigyon ha darbari gorholyon-bresel.

⁴My a vynn tira y'n pow rag mayth ylliv erbynn an re re dhiswrug agan pow ha gwastya lies sita y'm ruvaneth.

⁵Lemmyn ytho my a fast dhis oll an difresyansow toll re ros dhis an vyghternedh kyns, ha livrans a bub talas ma'th liversons i anedha.

⁶My a wront dhis kummyas dhe wruthyl dha vathow dha honan avel mona rag dha wlaskor,

⁷ha my a wront rydhses dhe Yerusalem ha'n sentri. Oll an arvow re dharbarsys ha'n dinasow re dhrehevsys hag a'th eus a vydh dhiso jy.

⁸Pub kendon a dylydh dhe'n dresorva ryel a vydh defendys ragos alemma rag ha bys vykken.

⁹Pan y'gan bo arta maystri war agan ruvaneth, ni a'th enor yn feur, ha'th kenedhel ha'n tempel, rag may fo agas glori apert yn oll an norvys.’

¹⁰Y'n kans peswardhek ha tri-ugensves blydhen[30] Antioghus eth yn-mes hag a omsettyas yn tir y dasow. Oll an soudoryon a dheuth dhodho bys ma nag esa marnas nebes gans Tryfo.

¹¹Antioghus a'n helghyas, ha Tryfo a dheuth yn y fo dhe Dor, usi ryb an mor,

¹²rag y hwodhya drogow dhe dhos warnodho, ha'y soudoryon dh'y asa.

¹³Yndella Antioghus a gampyas erbynn Dor, hag yth esa ganso hwegh ugens mil a gasoryon hag eth mil marghoglu.

¹⁴Ev a gylghyas an dre, ha'n gorholyon a vatalyas a'n mor; ev a stroethas an dre dhiworth an tir ha'n mor; ha ny asas dhe nebonan naneyl mos anedhi nag entra ynni.

¹⁵Numenius ha'n re ganso a dheuth dhiworth Rom, gans lytherow dhe'n vyghternedh ha'n broyow, ynna may feu skrifys dell siw:

¹⁶‘Lukius, konsul an Romanyon dhe'n myghtern Ptolome, salusyansow.

¹⁷Deuva kannasow an Yedhewon avel agan kowetha ha'gan keffrysysi rag nowydhhe agan kowethyans koth ha'gan keffrysyans. Dannvenys viens gans an arghoferyas Simon ha gans an bobel yedhowek

¹⁸ha re dhugons gansa skoes owrek ha'y boester unn mil vina.

¹⁹Ytho ni re erviras may skriffyn dhe'n vyghternedh ha dhe'n broyow na hwillons gul drog dhedha na batalyas orta nag orth aga sitys nag orth aga bro, ynwedh na wrellons keffrysyans gans an re a vatel er aga fynn.

²⁰Ha da yth hevelis dhyn degemmeres an skoes anedha.

²¹Ytho mar kwrug nebes bilens fia dhis dhiworth aga thir, daskorr i dhe'n arghoferyas Simon, rag ma's kessytthyo herwydh aga lagha.’

²²An konsul a skrifas an keth tra dhe Demetrius an myghtern ha dhe Attalus ha dhe Ariarathes ha dhe Arsakes,

²³ha dhe oll an tiryow, ha dhe Sampsames, ha dhe'n Spartanys, ha dhe Delos, ha dhe Myndos, ha dhe Sikyon, ha dhe Karia, ha dhe Samos, ha dhe Pamfylia, ha dhe Lykia, ha dhe Halikarnassus, ha dhe Rhodes, ha dhe Faselis, ha dhe Kos, ha dhe Side, ha dhe Aradus ha dhe Gortyna ha dhe Knidus ha dhe Syprus ha dhe Kyrene.

²⁴I a dhannvonas ynwedh dasskrif an traow ma dhe Simon.

²⁵Antioghus an myghtern a gyrghynnas Dor dhe'n nessa prys, ow tewlel y soudoryon orti heb lett; ev a wrug jynnow-esedhva, ha degea Tryfo a-bervedh ynni hag a'n lettyas nag ella yn-mes nag entra ynni.

²⁶Simon a dhannvonas dhe Antioghus dew vil a gasoryon flour rag batalyas ragdho, hag arghans hag owr ha kals a dhaffar breselek.

²⁷Mes ev a naghas aga degemmeres hag a dhiswrug oll an kevambosow re wrussa gans Simon, hag yth eth ha bos estrenhes dhiworto.

²⁸Ev a dhannvonas dhodho Athenobius, onan a'y gowetha, rag omgusulya ganso, ow leverel dhodho, ‘Ty a'th eus maystri war Yoppa ha war Gazara ha war an tour yn Yerusalem; sitys yth yns a'm ruvaneth vy.

²⁹Ty re wastyas aga thir, ty re wrug damaj meur y'n pow, ha ty re gemmeras lies le yn ow ruvaneth.

³⁰Lemmyn, daskorr an sitys re gemmersys hag arghans an trubyt a'n tylleryow re fethsys usi a-ves dhe oryon Yudi,

³¹poken tal dhymmo vy pymp kans talent a arghans rag an diswrians gwrys genes, ha pymp kans talent moy rag trubyt an sitys. Poken ni dheu ha gwerrya er dha bynn.’

³²Ytho Athenobius, koweth an myghtern, a dheuth dhe Yerusalem, ha pan welas splannder Simon, ha'n bord gans hy flatyow a owr hag a arghans, ha'y veuredh bras, marth a'n jevo. Pan dherivas dhodho messaj an myghtern,

³³Simon a worthybis dhodho, ‘Ny gemmersyn tir estren na sesya pyth estren, saw unnsel eretons agan tasow, re bia kemmerys yn anewn gans agan eskerens.

³⁴Ha lemmyn ha genen ni an chons, ni a syns yn fyrv eretons agan tasow.

³⁵Ha dha worholedh a-dro dhe Yoppa ha Gazara, i re bia ow kul damaj bras yn mysk an bobel ha dh'agan tir, ha ragdha y ren dhis kans talent.’ Ny worthybis Athenobius dhodho ger vyth,

³⁶mes ev a dhehwelis yn konnar dhe'n myghtern hag a dherivas dhodho an geryow ma, hag ynwedh splannder Simon hag oll re welsa. Ha fest serrys o an myghtern.

³⁷Tryfo eth a-bervedh yn worhel hag y fias dhe Orthosia.

³⁸Ena an myghtern a apoyntyas Kendebeus kaslewydh an vorva, hag a ros dhodho soudoryon a droeslu hag a varghoglu.

³⁹Ev a erghis dhodho kampya erbynn Yudi, ha may trehaffa Kedron ha kera hy yetys, ha gwerrya erbynn hy fobel; mes an myghtern a helghyas Tryfo

⁴⁰Ytho Kendebeus a dheuth dhe Yamnia hag a dhallathas arvedh hy fobel hag omsettya yn Yudi ha kemmeres an bobel avel kethyon ha'ga ladha.

⁴¹Ev a dhrehevis Kedron hag a worras marghogyon ha kasoryon ena, rag mayth ellens yn-mes ha patrolya fordhow Yudi, par dell arghsa an myghtern dhodho.