Read Kernewek 1 Makkabeyon 16 Bible Online

1 Makkabeyon 16 - Kernewek bible

1 Makkabeyon 16

¹Yowann eth yn-bann a Gazara, hag ev a dherivas dh'y das Simon an pyth re wrug Kendebeus.

²Simon a elwis y dhew vab kottha Yudas ha Yowann, hag a leveris dhedha: ‘Ow breder ha my ha chi ow thas re vatalyas breselyow Ysrael a-dhia'gan yowynkneth bys y'n jydh hedhyw, ha traow re siwenis yn agan diwleuv, ow sawya Ysrael lieskweyth.

³Mes lemmyn gyllys koth ov, mes hwi dre versi Nev yw tevys dhe oes. Kemmerewgh ow le ha le ow broder, ha kewgh yn-mes hag omledhewgh a-barth agan kenedhel, ha bedhes an gweres hag a dheu a Nev genowgh.’

⁴Ytho Yowann a dhewisas yn-mes a'n pow ugens mil gasor ha marghoglu, hag i a geskerdhas erbynn Kendebeus. I a spenas an nos yn Modein.

⁵Myttin a-varr i a sevis hag a geskerdhas bys y'n plen, le mayth esa lu bras ow tos er aga fynn, troeslu ha marghoglu; hag yth esa keynres yntredha.

⁶Ena ev ha'y lu a sevis yn aray er aga fynn. Ev a welas bos dhe'n soudoryon own a dreusi an keynres, ytho ev a dreusis yn kynsa, ha pan wrug an wer y weles, i a dreusis war y lergh.

⁷Ena ev a rannas an lu hag a worras an marghoglu yn kres an troeslu, rag marghoglu an eskerens o pur lies.

⁸I a sonas an hirgern, ha Kendebeus ha'y lu a veu fesys; lies anedha a goedhas goliys ha'n remenant a fias bys y'n dinas.

⁹Y'n termyn na Yudas broder Yowann a veu goliys, mes Yowann a's helghyas bys pan dheuth Kendebeus dhe Kedron, re bia drehevys ganso.

¹⁰I a fias ynwedh y'n touryow esa yn prasow Azotus, ha Yowann a's loskas gans tan, hag a-dro dhe dhew vil anedha a goedhas. Ena ev a dhehwelis dhe Yudi yn saw.

¹¹Lemmyn Ptolemi mab Abubus re bia apoyntys governour war blen Yeriko; ev a'n jevo gwithva vras a arghans hag a owr,

¹²rag ev o deuv an arghoferyas.

¹³Y golonn a veu ughelhes; ev a vynnas kavoes maystri war an pow, hag y hwrug towlow traytus erbynn Simon ha'y vebyon, rag ma's tiswrella.

¹⁴Lemmyn yth esa Simon ow kul tro hwithrans a drevow an pow hag ow tyghtya aga edhommow, hag yth eth yn-nans dhe Yeriko gans y vebyon Mattathias ha Yudas, y'n kans seytek ha tri-ugensves blydhen,[31] y'n unnegves mis, hemm yw an mis Shebat.

¹⁵Mab Abubus a's degemmeras yn fals y'n dinas byghan yw gelwys Dok, re dhrehevis ev; ev a ros dhedha gwledh vras, hag a gudhas gwer ena.

¹⁶Pan o Simon ha'y vebyon medhow, Ptolemi ha'y dus a sevis ha kemmeres aga arvow; i a stevyas war Simon yn hel an wledh ha'y ladha war-barth gans y dhew vab ha re a'y wesyon.

¹⁷Ytho ev a wrug ober a drayturi meur hag a attylis drog rag da.

¹⁸Ena Ptolemi a skrifas derivas a-dro dhe'n traow ma ha'y dhannvon dhe'n myghtern, orth y bysi may tannvonna kasoryon dhodho rag y weres, ha may taskorra dhodho an pow ha'n sitys.

¹⁹Ev a dhannvonas kasoryon erell dhe Gazara rag diswul Yowann; ev a dhannvonas lytherow dhe'n gaptenyon, owth ynnia warnedha junya ganso, rag may rolla dhedha arghans hag owr ha rohow.

²⁰Hag ev a dhannvonas erell rag kemmeres Yerusalem ha menydh an tempel.

²¹Mes nebonan a boenyas kyns ha derivas dhe Yowann yn Gazara y das ha'y vreder dhe verwel, hag ‘Ev re dhannvonas tus dhe'th ladha jy ynwedh’.

²²Pan glewas hemma fest dyegrys o; ev a settyas dalghenn y'n wer re dhothya rag y dhiswul, ha'ga ladha; rag ev a wodhya i dhe hwilas y dhiswul.

²³Remenant gweythresow Yowann, y vreselyow ha'n oberow brav a wrug ev, ha drehevyans an fos a wrug ev, ha'y wriansow,

²⁴skrifys yns yn kovadhow y arghoferyaseth, a-dhia'n termyn may feu gyllys arghoferyas wosa y das.