Read Kernewek 1 Makkabeyon 2 Bible Online

1 Makkabeyon 2 - Kernewek bible

1 Makkabeyon 2

¹Y'n dydhyow na Mattathias mab Yowann mab Simeon, oferyas a vebyon Yoarib, a asas Yerusalem ha triga yn Modein.

²Ev a'n jeves pymp mab, Yowann henwys Gaddi,

⁶ha Yonathan henwys Affus. Ev a welas an blasfemiow gwrys yn Yuda ha Yerusalem,

⁷hag yn-medh ev, ‘Go-vy! Prag y feuv genys dhe weles hemma, diswrians ow fobel, diswrians an sita sans, ha triga ena pan veu res dhe'n eskerens, an sentri yn leuv estrenyon?

⁸Gyllys yw hy thempel avel gour heb enor,

⁹hy lestri fethus re beu degys dhe-ves yn divroedh. Hy babanes re beu ledhys yn hy stretow, hy gwer yowynk gans kledha an eskar.

¹⁰Py gwlaskor eus na eritas hy palesyow na synsis hy freydh?

¹¹Oll hy afinans re beu kemmerys dhe-ves; nyns yw hi rydh na fella, gyllys yw hi dhe gethes.

¹²Hag otta! Agan tyller sans, agan tekter, agan glori, re beu difeythys; an Jentilys re'n disakras.

¹³Prag y tegoedh dhyn bewa pella?’

¹⁴Ha Mattathias ha'y vebyon a skwardyas aga dillas, omwiska yn yskar ha kyni meur.

¹⁵Ena soedhogyon an myghtern esa ow konstryna tus dhe forsakya aga kryjyans a dheuth dhe sita Modein rag gul dhedha offrynna sakrifis.

¹⁶Lies a Ysrael a dheuth dhe vetya gansa; ha Mattathias ha'y vebyon a dheuth ynwedh.

¹⁷Ena soedhogyon an myghtern a gewsis dhe Mattathias dell siw: ‘Ty yw ledyer, enorys hag a vri y'n sita ma, ha skoedhys gans mebyon ha breder.

¹⁸Lemmyn ytho bydh an kynsa dhe dhos ha gul an pyth a worhemmynn an myghtern, dell wrug oll an kenedhlow ha gwer Yuda ha'n re yw gesys yn Yerusalem. Ena ty ha'th vebyon a vydh niverys yn mysk kowetha an myghtern, ha ty ha'th vebyon a vydh enorys gans arghans hag owr ha lies ro.’

¹⁹Mes Mattathias a worthybis ha leverel, gans lev ughel: ‘Kynth yw pub kenedhel hag a vew yn-dann rewl an myghtern gostydh dhodho, ha re dhewisas may hwrellons y worhemmynnow, ow kasa pub huni kryjyans y dasow,

²⁰byttegyns my ha'm mebyon ha'm breder a vew war-lergh kevambos agan tasow.

²¹Bedhes pell ahanan gasa an lagha ha'n ordenansow.

²²Ny vydhyn gostydh dhe eryow an myghtern dre dreylya dhe denewen naneyl dhe'n barth dhyghow na dhe'n barth kledh.’

²³Pan dhiwedhas kewsel an geryow ma, gwer Yedhow a dheuth yn-rag a-wel oll, rag sakrifia war an alter yn Modein, herwydh gorhemmynn an myghtern,

²⁴Pan y'n gwelas Mattathias, ev a loskas gans diwysykter ha'y dhiwloneth a grenas. Yn y gonnar gwiryon ev a boenyas ha'y ladha war an alter.

²⁵Dhe'n keth termyn ma ev a ladhas soedhek an myghtern esa orth aga honstryna dhe sakrifia, hag ev a dorras an alter dhe'n dor.

²⁶Yndella ev a loskas gans diwysykter a-barth an lagha, par dell wrug Finehas erbynn Zimri mab Salu.

²⁷Ena Mattathias a grias gans lev ughel, ‘Myns yw diwysyk a-barth an lagha hag a skoedh an kevambos, des ev yn-mes genev!’

²⁸Ena ev ha'y vebyon a fias dhe'n fo dhe'n menydhyow hag a asas pup-tra a's tevo y'n sita.

²⁹Ena lies esa ow hwilas gwiryonedh ha gwirvreus eth yn-nans dhe'n gwylvos dhe vewa ena,

³⁰i, aga mebyon, aga gwragedh, ha'ga chatel, drefenn drogow dhe vos kales warnedha.

³¹Ha derivys veu dhe soedhogyon an myghtern, ha dhe'n gasoryon yn Yerusalem, sita Davydh, bos an wer re skonyas gorhemmynn an myghtern gyllys dhe'n skovvaow y'n gwylvos.

³²Lies a's chasyas ha tremena dresta; i a gampyas a-dal dhedha hag ombareusi rag kas er aga fynn dydh sabot.

³³I a leveris dhedha, ‘Lowr a hemma! Dewgh yn-mes ha gwrewgh dell worhemmynn an myghtern, ha hwi a vew.’

³⁴Mes i a leveris, ‘Ny vynnyn dos yn-mes na ny wren an pyth a worhemmynn an myghtern, ow tisakra an sabot.’

³⁵Ena an eskar a fyskas dhe settya warnedha.

³⁶Mes ny worthybsons dhedha na tewlel men orta na degea aga skovvaow,

³⁷rag yn-medhons, ‘Merwyn ni oll yn agan sempledh; nev ha nor a dheg dustuni ragon hwi dh'agan ladha yn kammhynsek.’

³⁸Ytho i a settyas warnedha y'n sabot, hag i a verwis, gans aga gwragedh, ha'ga fleghes, ha'ga chatel, bys y'n myns a vil dus.

³⁹Pan y'n klewas Mattathias ha'y gowetha, i a gynis yn town war aga lergh.

⁴⁰Ha peub a leveris dh'y gentrevek, ‘Mar kwren par dell wrug agan breder ha nagha gwerrya gans an Jentilys rag agan bewnans ha'gan ordenansow, i a'gan distru dhiwar an norvys.’

⁴¹Ytho i a erviras y'n jydh na: ‘Gwerryn ni erbynn pub den hag a dheu dhe settya warnan y'n sabot; na verwyn dell vawrsons agan breder yn aga skovvaow.’

⁴²Ena bagas a Hasideanys a junyas gansa, kasoryon alloesek a Ysrael, pub onan anedha a ombrofyas a'y vodh a-barth an lagha.

⁴³Hag oll an fowesigyon dhiworth an troblow a junyas gansa ha keworra dh'aga nerth.

⁴⁴I a furvyas lu, hag a weskis peghadoryon dhe'n dor yn aga sorr, ha tus dhilagha yn aga honnar; an remenant a fias dhe'n Jentilys rag sawder.

⁴⁵Mattathias ha'y gowetha eth a-derdro ha terri an alteryow;

⁴⁶gans fors i a drodroghas oll an vebyon antrodreghys a gavsons a-ji dhe oryon Ysrael.

⁴⁷I a helghyas war-lergh an dus valgh, ha'n ober a siwenis yn aga diwla.

⁴⁸I a sawyas an lagha dhiworth diwdhorn an Jentilys ha'n vyghternedh, ha ny asens byskweth may kwaynnya an peghador an maystri.

⁴⁹An dydhyow a dheuth nes rag Mattathias dhe verwel, hag y leveris dh'y vebyon: ‘Balghder ha skorn gallas krev lemmyn; termyn a dhiswrians ha sorr bras yw.

⁵⁰Ytho, ow fleghes, diskwedhewgh diwysykter a-barth an lagha, ha rewgh agas bewnans a-barth kevambos agan tasow.

⁵¹‘Perthewgh kov a weythresow an tasow, a wrens yn aga henedhow; ha ty a dhegemmer enor meur ha hanow heb diwedh.

⁵²A ny veu Abraham kevys lel pan veu prevys, ha hemma a veu reknys dhodho avel ewnder?

⁵³Yosep yn termyn y ahwer a withas an gorhemmynn, hag a dheuth ha bos arloedh Ejyp.

⁵⁴Finehas agan hendas, drefenn ev dhe vos fest diwysyk, a gavas an kevambos a oferyaseth heb diwedh.

⁵⁵Yoshua, drefenn ev dhe gowlwul an gorhemmynn, a dheuth ha bos breusyas yn Ysrael.

⁵⁶Kaleb, drefenn ev dhe destifia y'n guntelles, a gavas eretons y'n tir.

⁵⁷Davydh, drefenn ev dhe vos len, a eritas tron an wlaskor bys vykken.

⁵⁸Elias, drefenn y dhiwysykter bras a-barth an lagha, a veu kemmerys yn-bann dhe nev.

⁵⁹Hanania, Azaria, ha Mishael a grysi hag a veu sawys a'n flamm.

⁶⁰Daniel, drefenn y sempledh, a veu delivrys a anow an lewyon.

⁶¹‘Yndella prederewgh, a unn henedh dhe'n nessa, na fyll a nerth myns a drestyo ynno.

⁶²Na berthewgh own a eryow peghador, rag gyllys vydh y splannder dhe gawgh ha pryves.

⁶³Hedhyw y fydh ughelhes, mes a-vorow ny vydh kevys, drefenn ev dhe dhehweles dhe'n doust, ha'y dowlow a verow.

⁶⁴Ow fleghes, bedhewgh kolonnek hag omgrevhewgh y'n lagha, rag dredhi hwi a'gas bydh enor.

⁶⁵‘Otta Simon agas broder; my a woer ev dhe vos gour a gusul. Goslowewgh orto pup-prys; ev a vydh agas tas.

⁶⁶Yudas Makkabeus re beu kasor galloesek a'y yowynkneth; ev a ergh an lu ragowgh ha batalyas orth an poblow.

⁶⁷Kuntellyewgh dhywgh kemmys a with an lagha, ha kemmerewgh dial rag an droktra re beu gwrys dh'agas pobel.

⁶⁸Attelewgh dhe'n Jentilys yn leun, ha koelewgh orth gorhemmynnow an lagha.’

⁶⁹Ena ev a's bennigas hag a veu kuntellys dh'y dasow.

⁷⁰Ev a verwis y'n hweghves ha seyth-ugensves blydhen,[5] hag a veu ynkleudhys yn bedh y dasow yn Modein. Hag oll Ysrael a gyni war y lergh gans drem bras.