Read Kernewek 1 Makkabeyon 3 Bible Online

1 Makkabeyon 3 - Kernewek bible

1 Makkabeyon 3

¹Ena Yudas y vab, henwys Makkabeus, a sevis yn-bann yn y le.

²Oll y vreder hag oll re junsa gans y das a'n gweresas; yn lowenek yth esens ow patalyas a-barth Ysrael.

³Ev a gressyas glori y bobel. Avel kowr ev a wiskas y lurik; ev a omwrogysas gans arvwisk a vresel hag a vatalyas, ow kwitha an kamp gans y gledha.

⁴Avel lew o yn y weythresow, avel lewik owth usa war-lergh preydh.

⁵Ev a helghyas an dus dhilagha; ev a loskas an re esa ow trobla y bobel.

⁶Tus dhilagha a gildennas rag own anodho; oll oberoryon anlaghedh o konfondys; ha delivrans a siwenis yn y leuv.

⁷Ev a hwerowhas lies myghtern, mes ev a lowenhas Yakob gans y weythresow, ha'y govadh yw bennigys bys vykken.

⁸Ev a dremenas dre sitys Yuda; ev a dhistruis an re dhidhuw yn-mes a'n tir; ev a dreylyas sorr dhiworth Ysrael.

⁹Gerys-da o bys yn pennow an norvys; ev a guntellas war-barth an re esa ow merwel.

¹⁰Apollonius a guntellas war-barth Jentilys ha lu bras a Samaria rag omladh erbynn Ysrael.

¹¹Pan wodhya Yudas anodho, ev eth yn-mes dh'y vetya, hag ev a'n gweskis ha'y ladha. Lies a veu goliys hag a goedhas, ha'n re erell a fias dhe'n fo.

¹²Ena i a synsis aga freydhyow, ha Yudas a gemmeras kledha Apollonius, hag yth esa owth olahd ganso dre remenant y vewnans.

¹³Pan glewas Seron, kaslewydh lu Syria Yudas dhe guntelles routh vras, bagas a dus lel hag a wortas ganso ha mos dhe vatalyas,

¹⁴ev a leveris, ‘My a wra may fiv gerys-da, ha kavoes enor y'n wlaskor. My a vatal erbynn Yudas ha'y gowetha, hag a skornyas gorhemmynn an myghtern.’

¹⁵Ena ev a dhallathas kaskyrgh, ha lu krev a dus dhidhuw eth yn-bann ganso rag y weres, rag tyli dial war an Ysraelysi.

¹⁶Pan nesas dhe volgh Beth-horon, Yudas eth yn-mes dhe vetya orto gans bagas byghan.

¹⁷Mes pan welsons an lu ow tos rag metya orta, yn-medhons dhe Yudas, ‘Fatell yllyn ni, nebes dell on, batalyas orth routh mar veur ha krev? Ha skwith glan yth on, rag ny dhyb'syn travyth hedhyw.’

¹⁸Yudas a worthybis, ‘Lies a yll bos kyrghynnys yn es gans nebes, rag yn golok Nev nyns eus dyffrans yntra sawya gans lies po gans nebes.

¹⁹Ny dheu trygh yn batel dre vraster an lu, mes nerth a dheu dhiworth Nev.

²⁰I a dheu er agan pynn yn goeth meur ha yn anlaghedh rag agan distrui ni ha'gan gwragedh ha'gan fleghes, ha rag agan ravna,

²¹mes yth eson owth omladh a-barth agan bewnans ha'gan laghys.

²²Ev y honan a's skwatt a-ragon, ha hwi, na berthewgh own anedha.’

²³Kettell worfennas kewsel, ev a lemmis warnedha distowgh, ha Seron ha'y lu a veu skwattys a-ragdho.

²⁴I a's chasyas war-nans yn bolgh Beth-horon bys y'n plen; eth kans anedha a goedhas, ha'n re erell a fias dhe bow an Filistysi.

²⁵Ena tus a dhallathas perthi own a Yudas ha'y vreder, hag euth a goedhas war an Jentilys yn aga hyrghynn.

²⁶Y er-da a dheuth dhe dhiwskovarn an myghtern, hag yth esa an Jentilys ow kewsel a vatelyow Yudas.

²⁷Pan glewas myghtern Antioghus an derivadow ma, fest serrys o; hag ev a dhannvonas ha kuntelles oll nerthow y wlaskor, lu fest krev.

²⁸Ev a igoras y arghow ha ri gobrow unn vlydhen dh'y soudoryon hag erghi dhedha bos parys rag pub edhomm.

²⁹Ena ev a welas bos gorfennys an arghans yn y dresorva, ha tollow an tir dhe vos byghan drefenn an strifow ha'n droglamm dres ganso war an tir dre dhefendya an laghys re bia a-dhia'n dydhyow a-varra.

³⁰Prederus o na'n jeffo kemmys arghasow kepar ha dell y'n jevo kyns rag y gostow ha rag an rohow a ri yn hel moy es an vyghternedh kyns.

³¹Pur benndegys o; hag ev a erviras mos dhe Persia ha kemmeres trubyt an ranndiryow na ha kuntelles arghasow pals.

³²Ev a asas Lysias, den a vri a linyeth ryel, war negysyow an myghtern a'n avon Ewfrates bys yn oryon Ejyp;

³³hag ynwedh ev a'n apoyntyas dhe witha war Antioghus y vab bys pan dhehwella.

³⁴Hag ev a dhelivras dhodho hanter a'y lu war-barth gans an olifanses, hag a ros dhodho kevarwoedhyans a-dro dhe oll a vynna ev dhe vos gwrys, hag yn arbennik a-dro dhe drigoryon Yudi ha Yerusalem.

³⁵Y tegoedho dhe Lysias dannvon lu er aga fynn rag aga hisya ha distrui nerth Ysrael ha remenant Yerusalem, ha dilea an kov anedha a'n tyller.

³⁶Y tegoedho dhodho ynwedh trevesiga estrenyon yn aga ranndir oll, ha lesranna aga thir.

³⁷Ena an myghtern a gyrghas an hanter gesys a'y gasoryon hag eth a Antiogh y bennsita y'n seythves ha seyth-ugensves blydhen.[6] Ev a dreusis an avon Ewfrates hag yth eth der an ughella rannvroyow.

³⁸Lysias a dhewisas Ptolomi mab Dorymenes, ha Nikanor ha Gorgias, tus nerthek yn mysk kowetha an myghtern,

³⁹hag a dhannvonas gansa dew-ugens mil a'n troeslu ha seyth mil a'n marghoglu rag mones yn pow Yuda ha'y dhistrui, par dell arghsa an myghtern.

⁴⁰Ytho i eth dhe-ves gans aga lu oll, ha pan ens devedhys i a gampyas yn kyrghynn Emmaus y'n plen.

⁴¹Pan glewas gwikoryon an ranndir pyth o leverys anedha, i a dhros shour a arghans hag owr, ha kargharow, hag yth ethons dhe'n gamp rag kavoes an Ysraelysi avel kethyon. Ha soudoryon dhiworth Syria ha pow an Filistysi a junyas gansa.

⁴²Lemmyn Yudas ha'y vreder a welas drogow dhe ynkressya ha'n soudoryon dhe gampya yn aga oryon. I a wodhya ynwedh an pyth re bia gorhemmynnys gans an myghtern rag kowldhistruyans an bobel.

⁴³Mes yn-medhons an eyl dh'y gila, ‘Ewnyn ni diswrians agan pobel, hag omladh a-barth agan pobel ha'n sentri.’

⁴⁴An gemmynieth a veu kuntellys war-barth dhe ombareusi rag batel, ha dhe bysi tregeredh ha truedh.

⁴⁵Anannedhys o Yerusalem avel gwylvos; nyns e onan vytholl a'y fleghes naneyl dhe-ves nag a-ji, trettys yn-dann droes o an sentri, hag yth esa mebyon an estrenyon y'n tour; annedh o rag an Jentilys. Joy o kemmerys dhiworth Yakob; An bib ha'n sowtri a fyllis.

⁴⁶Ytho i a omguntellas ha mos dhe Mispa, a-dal Yerusalem, drefenn bos dhe Ysrael seulabrys tyller rag pysi yn Mispa.

⁴⁷I a benysas y'n jydh na, hag a wiskas saghlenn hag a skattras lusu war aga fenn, hag a skwardyas aga dillas.

⁴⁸Hag i a igoras lyver an lagha rag govynn kevarwoedhyans, par dell o us an Jentilys govynn orth imajys aga duwow.

⁴⁹Dres henna i a dhros dillas oferyaseth ha'n kynsa froeth ha'n degedhow, hag i a dhros an Nazirysi re worfennsa aga dydhyow;

⁵⁰hag i a grias yn ughel dhe Nev ow leverel, ‘Pandr'a wren gans an re ma? Ple hwren ni aga doen?

⁵¹Trettys yw dha sentri dhe'n dor ha disakrys, ha'th oferysi a gyn yn uvelder

⁵²Hag otta, an Jentilys yw omguntellys er agan pynn rag agan distrui; ty a woer an pyth a dewlons orthyn.

⁵³Fatell yllyn ni sevel orta, mar ny'gan gweresydh?’

⁵⁴Ena i a sonas an hirgern ha garma gans garm ughel.

⁵⁵Wosa hemma Yudas a apoyntyas ledyoryon an bobel, soedhogyon war vilyow ha kansow ha hanter kansow ha degow.

⁵⁶Hag y leveris dhe'n re esa ow trehevel chiow, po a veu ambosys dhe dhemmedhi, po yth esens ow plansa gwinlannow, po yth ens ownek, may tehwellens peub dh'y dre, herwydh an lagha.

⁵⁷Ena an lu a gerdhas dhe-ves ha kampya a'n dhyghowbarth dhe Emmaus.

⁵⁸Ena Yudas a leveris, ‘Omwrogysiwgh ha bedhewgh hardh. Bedhewgh parys myttin a-varr rag batalyas orth an Jentilys re omguntellas er agan pynn rag agan distrui ni ha'gan sentri.

⁵⁹Gwell yw dhyn merwel yn batel ages gweles anfeus agan kenedhel ha'gan sentri.

⁶⁰Mes dell vo y vodh yn nev, yndella y hwra ev.’