Read Kernewek 1 Makkabeyon 4 Bible Online

1 Makkabeyon 4 - Kernewek bible

1 Makkabeyon 4

¹Gorgias a ledyas pymp mil wour ha mil varghek dhewisys, ha'n lu ma eth yn-mes y'n nos

²dhe goedha war gamp an Yedhewon ha'ga gweskel distowgh. Gwer dhiworth an tour o y gevarwoedhoryon.

³Mes Yudas a glewas anodho, hag ev ha'y gasoryon eth yn-mes rag gweskel lu an myghtern yn Emmaus,

⁵Gorgias a entras a-ji dhe gamp Yudas y'n nos, mes ny gavas nagonan ena, ytho ev a's hwilas y'n breow, rag y leveris, ‘Yma an re ma ow fia dhiworthyn.’

⁶Orth tardh an jydh Yudas a omdhiskwedhas y'n plen gans tri mil wour, mes ny's tevo arvwisk na kledhedhyow dell y's tevo hwans anedha.

⁷I a welas kamp an Jentilys, krev ha kerys, gans marghoglu yn kylgh a-dro dhedhi; ha'n wer ma o dyskys yn bresel.

⁸Mes Yudas a leveris dhe'n wer esa ganso, ‘Na berthewgh own a'ga myns, ha na skruthewgh pan omsettyons.

⁹Perthewgh kov fatell veu agan tasow sawys y'n Mor Rudh, pan y's helghyas Faro ha'y lu.

¹⁰Ha lemmyn kriyn dhe Nev rag may hwodhvyn mara'gan faver ha perthi kov a'y gevambos gans agan tasow ha brewi an lu ma a-ragon hedhyw.

¹¹Ena an Jentilys oll a wodhvydh bos onan hag a dhaspren ha sawya Ysrael.’

¹²An estrenyon a dhrehevis aga dewlagas war-vann hag a's gwelas dell esons ow tos er aga fynn.

¹³Ytho i eth yn-mes a'n kamp dhe vatalyas. Ena an gasoryon gans Yudas a sonas aga hirgern,

¹⁴hag entra y'n gas gansa. An Jentilys a veu brewys hag a fias dhe'n plen,

¹⁵hag oll an re esa a-dhelergh a goedhas der an kledha. I a's chasyas bys yn Gazara, ha bys yn plenys Idumea, hag Azotus ha Yamnia; hag a-dro dhe dri mil anedha a goedhas.

¹⁶Ena Yudas ha'y gasoryon a dhehwelis dhiworth aga chasya.

¹⁷Ena y leveris dhe'n bobel, ‘Na vedhewgh kraf war-lergh preydh, rag yma batel a-ragon;

¹⁸yma Gorgias ha'y lu ogas dhyn y'n breow. Mes sevewgh lemmyn orth agan eskerens hag omledhewgh orta; hag a-wosa synsiwgh an preydh yn kolonnek.’

¹⁹Pan esa Yudas hwath ow tiwedha y areth, bagas a omdhiskwedhas ow tos yn-mes a'n breow rag aspia.

²⁰I a welas aga lu dhe vos fesys, ha'n Yedhewon dhe vos ow leski an kamp, rag an mog a veu gwelys a dhiskwedhas an pyth re hwarvia.

²¹Pan aswonnsons hemma, fest ownek ens, ha pan welsons ynwedh lu Yudas yn aray y'n plen rag batalyas,

²²i oll a fias dhe'n fo yn tir an Filistysi.

²³Ena Yudas a dhehwelis rag ravna an kamp, hag i a gemmeras meur a owr hag a arghans, hag a gweth liwek yn glas hag yn purpur morek ha rychys meur

²⁴Pan esens ow tehweles i a gana hymnys, ha benniga Nev, ‘Rag ev yw da, rag y dregeredh a dhur bys vykken.’

²⁵Yndella Ysrael a'n jevo delivrans meur y'n jydh na.

²⁶Re a'n estrenyon a dhienkas eth ha derivas dhe Lysias oll re hwarva.

²⁷Pan y'n klewas penndegys o ha digennerthys, rag ny hwarvia dhe Ysrael par dell dowlsa, na nyns o gyllys traow dell re worhemmynnsa an myghtern dhodho.

²⁸Y'n nessa blydhen ev a guntellas tri-ugens mil a wer dhewisys a'n troeslu, ha pymp mil a'n marghoglu rag aga fetha.

²⁹I a dheuth bys yn Idumea ha kampya yn Beth-sur, ha Yudas a's dyerbynnas gans deg mil wour.

³⁰Pan welas bos an lu krev, ev a bysis ow leverel, ‘Bennigys osta, A Selwador Ysrael, neb a skwattyas omsettyans an kasor nerthek dre leuv dha was Davydh, hag a ros lu an Filistysi yn diwdhorn Yonathan mab Sowl, hag yn diwdhorn deger y arvow.

³¹Ytho dege an lu ma a-ji dre leuv dha bobel Ysrael, ha bedhens methek a'ga hasoryon ha'ga marghoglu

³²Gwra aga lenwel a gilgieth, gwra dhe volder aga nerth teudhi; krenens yn aga diswrians.

³³Gwra aga gweskel dhe'n dor gans kledha an re a'th kar; ha re'th wormelens oll hag a aswonn dha hanow gans hymnys.’

³⁴Ena an dhew du a omsettyas, ha pymp mil wour a lu Lysias a goedhas; i a goedhas hag i owth omladh.

³⁵Pan welas Lysias fethans y gasoryon ha kolonnekter lu Yudas, ha fatell ens parys po dhe vewa po dhe verwel, ev eth dhe Antiogh hag arveth soudoryon arvethesik rag omsettya yn Yudi arta gans lu hwath brassa.

³⁶Ena Yudas ha'y vreder a leveris, ‘Otta! skwattys yw agan eskerens; deun yn-bann dhe lanhe an sentri ha'y sakra.’

³⁷Ytho an lu kowal a omguntellas ha mos yn-bann dhe venydh Sion.

³⁸I a welas an sentri ynyal, an alter defolys, ha'n yetow leskys. Y'n klosyow i a welas plansow tevys kepar hag yn prysk, po kepar ha war onan a'n menydhyow. I a welas ynwedh chambouryow an oferysi diswrys.

³⁹Ena i a y skwardyas aga dillas ha kyni gans drem meur, hag i a skattras lusu warnedha aga honan.

⁴⁰I a goedhas gans aga fas war an dor. I a sonas an arwoedh war an hirgern, hag a grias dhe Nev.

⁴¹Ena Yudas a erghis dhe wer omladh erbynn an re y'n tour bys pan ve an sentri glanhes.

⁴²Ev a dhewisas oferysi dhinamm, lel dhe'n lagha,

⁴³hag i a lanhas an sentri hag a worras dhe-ves an veyn defolys bys yn tyller avlan.

⁴⁴I a omgusulyas pandr'a dhe wul gans alter an offrynnow leskys, re beu defolys,

⁴⁵hag i a dybis may fedha an gwella towl hy distrui, ma na dhrolla mewl warnedha, rag an Jentilys re'n defolsa. Ytho i a dennas an alter dhe'n dor,

⁴⁶ha gorra an veyn dhe denewen yn tyller gwiw war vre an tempel bys pan dheffa profoes dhe ervira a-dro dhedha

⁴⁷Ena i a gemmeras meyn anhakkys, war-lergh an lagha, ha drehevel alter nowydh haval dhe'n kynsa.

⁴⁸Ynwedh i a dhrehevis an sentri arta ha pervedh an tempel, hag i a sakras an klosyow.

⁴⁹I a wrug lestri sans nowydh, hag a dhug an kantoler, an alter a ynkys ha'n voes y'n tempel.

⁵⁰Ena i a loskas ynkys war an alter, hag enowi an lugern war an kantoler, dhe ri golow y'n tempel.

⁵¹I a worras an bara war an voes ha kregi an kroglennow yn-bann. Yndella i a worfennas oll an ober a omgemmersens.

⁵²Myttin a-varr y'n pympes dydh warn ugens a'n nawves mis, yw an mis Kislev, y'n kans, ethves blydhen ha dew-ugens,[7]

⁵³i a sevis hag offrynna sakrifis herwydh an lagha, war an alter nowydh a wrussens.

⁵⁴Poran yn pennbloedh an jydh ma'n defolsa an Jentilys, y feu sakrys gans kanow ha telynnow ha sowtris ha symbalys.

⁵⁵Oll an bobel a goedhas war aga fas ha gordhya ha benniga Nev, neb re wrug dhedha siweni.

⁵⁶I a woelyas sakrans an alter eth dydh hag offrynna offrynnow leskys gans lowender; i a offrynnas offrynn kres ha grasyans.

⁵⁷I a afinas tal an tempel gans kurunyow owrek ha boklers byghan; i a dhaswrug an yetow ha'n chambouryow rag an oferysi, hag i a wrug darasow ragdha.

⁵⁸Yth esa lowender meur yn mysk an bobel, ha gorrys dhe-ves o mewl an Jentilys.

⁵⁹Ena Yudas ha'y vreder ha'n kuntelles oll a Ysrael a erviras may hwoeller dydhyow sakrans an alter yn pub blydhen, dhe'n keth seson na, gans lowender ha joy, eth dydh, ow talleth a-dhia'n pympes dydh warn ugens a'n mis Kislev.

⁶⁰Y'n termyn na i a geras menydh Sion gans fosow ughel ha touryow krev a-derdro rag na dheffa an Jentilys ha'ga threttya dhe'n dor dell wrussens kyns.

⁶¹Hag ev a worras soudoryon ena rag hy gwitha. Ynwedh ev a geras Beth-sur, rag hy gwitha, ma's teffa an bobel dinas a-dal Idumea.