Read Kernewek 1 Makkabeyon 5 Bible Online

1 Makkabeyon 5 - Kernewek bible

1 Makkabeyon 5

¹Pan glewas an Jentilys oll a-derdro, an alter dhe vos drehevys ha'n sentri dhe vos sakrys par dell vedha kyns, fest serrys vons,

²hag i a erviras diswul agh Yakob esa trigys yn aga mysk. Ytho i a dhallathas ladha ha distrui yn mysk an bobel.

³Mes Yudas a werryas orth mebyon Esaw yn Idumea, yn Akrabattene, drefenn i dhe gontrewaytya Ysrael. Ev a's gweskis gans strekys poes ha'ga uvelhe ha'ga ravna.

⁴Ev a borthas kov ynwedh a sherewneth mebyon Bean, neb o antell ha maglenn dhe'n bobel, orth aga hontrewaytya war an fordhow meur.

⁵Degeys vons ganso yn aga thouryow, hag ev a gampyas er aga fynn; ev a dos aga leun dhistrui, hag ev a loskas gans tan aga thouryow hag oll an re esa ynna.

⁶Ena ev a dreusis rag omsettya erbynn an Ammonysi, le may kavas bagas krev, ha tus pals ha Timothi aga ledyer.

⁷Ev a vatalyas fest yn fenowgh orta ha brewys ens a-ragdho; hag ev a's gweskis dhe'n dor.

⁸Ev a gemmeras ynwedh Yazer ha'y threvow; ena ev a dhehwelis dhe Yudi.

⁹An Jentilys yn Gilead a omguntellas erbynn an Ysraelysi esa yn aga thir, rag aga distrui. Mes i a fias dhe dhinas Dathema,

¹⁰hag a dhannvonas dhe Yudas ha'y vreder lyther, ow leverel, ‘An Jentilys usi yn agan kyrghynn re omguntellas er agan pynn rag agan distrui.

¹¹Ymons owth ombareusi may teffons ha kemmeres an dinas may fisyn dhodho hag yma Timothi ow ledya aga lu.

¹²Ytho dewgh dh'agan delivra dhiworth aga diwleuv, rag lies ahanan re goedhas,

¹³ha'gan breder oll hag a veu yn ranndir Tobias re beu ledhys; an eskerens re gemmeras aga gwragedh ha'ga fleghes ha'ga gwara, hag i re dhistruis a-dro dhe vil wour ena.’

¹⁴Yth esens ow lenna an lyther pan dheuth kannasow erell dhiworth Galile, skwardys aga dillas, a dheuth dhiworth Galile, hag i a dherivas dell siw:

¹⁵‘Tus dhiworth Ptolemais, Tyr, Sidon hag oll Galile an Jentilys re omguntellas rag agan kowlladha’

¹⁶Pan glewas Yudas ha'n bobel an geryow ma, kuntelles bras a veu gelwys war-barth may fe ervirys pandr'a wrens a-barth aga breder esa yn ahwer ha hag yn-dann omsettyans gans eskerens.

¹⁷Yudas a leveris dhe Simon y vroder, ‘Dewis gwer ragos ha ke ha deliver dha vreder yn Galile; my ha'm broder Yonathan a dhe Gilead.’

¹⁸Mes ev a asas Yosep mab Zekaria, hag Azaria, ledyer an bobel, gans remenant a'n lu yn Yudi rag hy gwitha,

¹⁹hag y ros dhedha an gorhemmynn ma, ‘Kemmerewgh charj war an bobel ma, mes na vatelewgh gans an Jentilys bys pan dhehwellyn.’

²⁰Tri mil wour a veu rynnys dhe Simon mayth ellen dhe Galile, hag eth mil wour dhe Yudas rag Gilead.

²¹Ytho Simon eth dhe Galile, hag ev a vatalyas lieskweyth erbynn an Jentilys, ha'n Jentilys a veu brewys a-ragdho.

²²Ev a's helghyas bys yet Ptolemais, ha kemmys ha tri mil wour a'n Jentilys a goedhas, hag ev a gemmeras aga preydh.

²³Ena ev a gemmeras Yedhewon Galile hag Arbatta, gans aga gwragedh ha'ga fleghes, hag oll a bewens, hag y's ledyas dhe Yudi gans lowender meur.

²⁴Yudas Makkabeus ha Yonathan y vroder a dreusis an Yordan ha kerdhes tri dydh y'n gwylvos.

²⁵I a dhyerbynnas tus a Nabatea neb a's metyas yn kres, hag i a dherivas dhedha oll re hwarva dh'aga breder yn Gilead.

²⁶‘Lies anedha re beu degeys yn Bosra ha Bezer, yn Alema ha Kaspo, Maked ha Karnaym’ — oll an sitys ma o kerys ha bras —

²⁷‘ha re anedha re beu degeys a-bervedh yn sitys erell a Gilead; yma an estren owth ombareusi mayth omsettyo war an dinasow a-vorow ha sesya ha distrui oll an dus ma a-ji dhe unn jydh.’

²⁸Yudas ha'y lu a dreylyas war-dhelergh fest yn skav war fordh an gwylvos dhe Bosra; ev a gemmeras an sita hag a ladhas pub gorreydh gans min an kledha; ena ev a synsis oll aga freydh ha'y leski hi gans tan.

²⁹Ev eth alena yn nos, hag yth ethons yn-rag bys dinas Dathema.

³⁰Myttin a-varr, i viras yn-bann, hag otta tus dhiniver ow toen skeulyow ha jynnow-esedhva rag kemmeres an dinas, hag omsettya erbynn an dus ynni.

³¹Pan welas Yudas an gas dhe vos dallethys ha kri an sita dhe sevel dhe nev gans hirgern ha garmow ughel,

³²yn-medh ev dhe wer an lu, ‘Omledhewgh y'n jydh ma a-barth agas breder.’

³³Ena av a dheuth a-dryv dhedha yn teyr bagas, hag i a hwythas aga hirgern ha kria yn ughel yn pysadow.

³⁴Pan aswonnis lu Timothi y vos Makkabeus, i a fias dhe'n fo a-ragdho, hag ev a's gweskis gans strekys poes. Kemmys hag eth mil anedha a goedhas an jydh na.

³⁵Alena ev a dreylyas a-denewen dhe Maafa[8] hag ev a omladhas er hy fynn ha'y hemmeres; ev a ladhas pub gorreydh ynni, hag ev a gemmeres hy freydh, ha'y leski gans tan.

³⁶Alena ev a geskerdhas yn-rag ha kemmeres Kasfo, Maked ha Bosor, ha'n sitys erell a Gilead.

³⁷Wosa an traow ma Timothi a guntellas lu arall hag a gampyas a-dal Rafon, a'n tu arall dhe'n keynres.

³⁸Yudas a dhannvonas tus rag aspia an kamp, hag i a dherivas dhodho, ‘Oll an Jentilys yn agan kyrghynn re omguntellas dhodho; ost pur vras yw.

³⁹Ynwedh i re wobrenas Arabyon rag aga gweres, hag ymons ow kampya a'n tu arall dhe'n keynres, parys dhe dhos ha dhe vatalyas orthis.’ Ytho Yudas eth dh'aga dyerbynna.

⁴⁰Pan esa Yudas ha'y lu ow tos nes dhe'n keynres a dhowr, Timothi a leveris dhe soedhogyon y lu, ‘Mar treus ev dhyn yn kynsa, ny yllyn sevel orto, rag ev yn sur a wra agan fetha.

⁴¹Mes mar omdhiskwedh ownek ha kampya a'n tu arall dhe'n avon, ni a dreus dhodho ha'y fetha.’

⁴²Pan dheuth Yudas nes dhe'n keynres a dhowr, ev a settyas soedhogyon an lu ryb an keynres hag a worhemmynnis dhedha, ‘Gwaytyewgh na gampyo denvyth, mes gwrewgh dhedha oll entra dhe'n gas.’

⁴³Ena ev a dreusis orto yn kynsa, ha'n lu dien a'n holyas; an Jentilys a dorras aga aray a-ragdho; hag i oll a dewlis aga arvow dhe-ves hag a fias dhe'n sentri yn Karnaym.

⁴⁴Ev a gemmeras an sita hag a loskas an sentri gans tan war-barth gans peub esa a-bervedh ynna. Yndella Karnaym a veu fethys; ny's tevo sevel a-rag Yudas na fella.

⁴⁵Ena Yudas a guntellas oll an Ysraelysi esa yn Gilead, an re vyghan ha'n re vras, gans aga gwragedh ha'ga fleghes ha'ga daffar, bagas pur vras, rag mayth ellens dhe bow Yuda.

⁴⁶I a dheuth dhe Efron, sita fest bras ha krev war an fordh, ha ny allsons mos a-dro dhedhi naneyl a-dhyghow nag a-gledh; res o dhedha mos dredhi.

⁴⁷Mes tus an sita a's lettyas na entrons hag a stoppyas an yetow gans meyn.

⁴⁸Yudas a dhannvonas dhedha gans geryow kres, ‘Gesiwgh ni dhe dremena der agas tir ha dhe hedhes dh'agan tir ni. Ny wra nagonan drog dhywgh; lemen ni a dremen war droes.’ Mes i a naghas igeri dhodho.

⁴⁹Ena Yudas a worhemmynnis may fo gwarnyans dhe'n lu may kampya peub y'n tyller mayth esa.

⁵⁰Ytho gwer an lu a gampyas, hag ev a werryas erbynn an sita der oll an jydh ha der oll an nos, ha'n sita a veu delivrys yn y dhiwleuv.

⁵¹Ev a dhistruis pub gorreydh gans min an kledha, ha diwreydhya an sita ha kemmeres preydh anedhi. Ena ev a dremenas der an sita war gorfow an re ledhys.

⁵²I a dreusis an Yordan dhe'n plen bras a-dal Beth-shan,

⁵³ha Yudas a besyas ow kennertha an dreynyoryon hag ow kolonna an dus der oll an fordh bys pan hedhas dhe bow Yuda.

⁵⁴Ytho i eth yn-bann dhe venydh Sion gans lowender ha joy, hag i a offrynnas offrynnow leskys, rag i dhe dhehweles yn saw; ny goedhsa onan vytholl anedha.

⁵⁵Ytho pan esa Yudas ha Yonathan yn Gilead, ha Simon y vroder yn Galile a-rag Ptolemais,

⁵⁶Yosep mab Zakaria, hag Azaria, routers an lu, a glewas a'ga gweythresow hardh hag a'n vresel vrav re werrsens.

⁵⁷Ytho y lavarsons, ‘Gwren ni hanow ragon ni agan honan ynwedh; deun ha gwerrya erbynn an Jentilys yn agan kyrghynn.’

⁵⁸Ytho i a dhellos gorhemmynnow dhe wer an lu esa gansa, hag i a geskerdhas erbynn Yamnia.

⁵⁹Gorgias ha'y wer a dheuth yn-mes rag gwerrya er aga fynn yn kas.

⁶⁰Ena Yosep hag Azaria a veu fesys hag a veu chasys bys oryon Yudi; kemmys ha dhew vil a bobel Ysrael a goedhas y'n jydh na.

⁶¹Yndella an bobel a borthas fethans meur, rag, ow tybi may hwrellens gweythres brav, ny woslowsons orth Yudas ha'y vreder.

⁶²Mes nyns ens rann a deylu an keth wer na, dredha may feu res delivrans dhe Ysrael.

⁶³An gour Yudas ha'y vreder a veu enorys yn fen yn oll Ysrael hag yn mysk oll an Jentilys, plepynag mayth o klewys aga hanow.

⁶⁴Tus a omguntellas dhedha hag a's gormolas.

⁶⁵Ena Yudas ha'y vreder eth yn-mes hag a omladhas erbynn mebyon Esaw y'n tir a'n dhyghowbarth. Ev a weskis Hebron ha'y threvow hag a dennas dhe'n dor hy herweythyow hag a loskas hy thouryow a-derdro.

⁶⁶Ena ev a geskerdhas dhe-ves rag mos yn pow an Filistysi, hag a dremenas dre Marisa.

⁶⁷Y'n jydh na re a'n oferysi hag a's teves hwans dhe wul gweythres brav, a goedhas yn bresel, rag yth ethons dhe'n vatel yn anfur.

⁶⁸Mes Yudas a dreylyas a-denewen dhe Azotus yn pow an Filistysi; ev a dennas dhe'n dor aga alteryow ha leski gans tan an imajys gravys a'ga duwow; ev a byllas an sitys hag ena ev a dhehwelis dhe bow Yuda.