Read Kernewek 1 Makkabeyon 6 Bible Online

1 Makkabeyon 6 - Kernewek bible

1 Makkabeyon 6

¹Yth esa myghtern Antioghus ow mos der an ughella ranndiryow pan glewas bos Elymais yn Persia sita a vri drefenn hy rychys yn arghans hag owr.

²Hy thempel o fest rych, hag ynno boklers owrek, lurigow, hag arvow gesys ena gans Aleksander mab Felip, myghtern Masedonia, an kynsa a reynyas war an Grekys.

³Ytho ev a dheuth hag a assayas kemmeres an sita ha'y ravna, mes ny'n jevo y wul, drefenn bos y dowl godhvedhys dhe dus an sita

⁴hag i a sevis orto yn batel. Yndella ev a fias alena yn galar meur rag dehweles dhe Babylon.

⁵Ena nebonan a dheuth dhodho yn Persia hag a dherivas bos fethys an luyow re alsa dhe bow Yuda,

⁶ha Lysias dhe vos di yn kynsa gans lu krev, mes ev dhe dreylya ha fia dhe'n fo a-rag an Yedhewon; ha'n Yedhewon dhe vones ha bos krev gans an arvow, proviansow ha preydhyow pals re gemmersens dhiworth an luyow re droghsons dhe'n dor;

⁷hag i dhe denna dhe'n dor an dra gasadow re dhrehavsa war an alter yn Yerusalem, hag i dhe dhrehevel fosow ughel a-dro dhe'n sentri par dell vedha kyns, hag ynwedh kera Beth-sur, y sita ev.

⁸Pan glewas an myghtern an nowodhow ma sowdhenys veu ha kryghyllys fest. Ev eth dh'y weli ha gyllys klav o gans ahwer, drefenn na hwarvia traow ragdho dell dowlsa.

⁹Y feu ena lies dydh, rag ahwer down a'n synsi heb lett, hag ev a dybis y vos ow merwel.

¹⁰Ytho ev a elwis y gowetha hag yn-medh ev dhedha, ‘Kosk re dhibarthas a'm dewlagas ha trogh yw ow holonn gans prederow.

¹¹My a leveris dhymmo vy ow honan, “Pana ahwer ov vy devedhys dhodho! Hag yn pana liv meur ov vy beudhys! Rag hegar en ha meurgerys y'm galloes.”

¹²Mes lemmyn my a perth kov a oll an drogoberow a wrug yn Yerusalem. My a gemmeras oll an lestri a arghans hag a owr esa ena; ha heb ken my a dhannvonas dhe dhistrui trigoryon Yuda.

¹³My a woer y vos drefenn hemma yth yw devedhys warnav an drogow ma; hag otta, yth esov ow merwel a ahwer down yn bro astranj.’

¹⁴Ena ev a elwis war Felip, onan a'y gowetha ha'y wrug rewler war oll y wlaskor.

¹⁵Ev a ros dhodho an diadem ha'y bows ha'n bysow-sel, gans awtorita dhe dhyski Antioghus y vab ha'y vaga rag may fe myghtern.

¹⁶An myghtern a verwis ena y'n kans, naw ha dew-ugensves blydhen.[9]

¹⁷Pan glewas Lysias bos an myghtern marow, Antioghus a worras mab an myghtern war an se dhe reynya. Lysias re'n magsa a-dhia y vabses; hag ev a'n henwis Ewpator.

¹⁸Yn kettermyn an re y'n tour a besyas stroetha an Ysraelysi yn kyrghynn an sentri. Yth esens owth assaya gul drogow yn pub fordh, ha skoedhya an Jentilys.

¹⁹Ytho Yudas a erviras aga distrui, hag ev a guntellas oll an bobel dhe worra esedhva a-dro dhedha.

²⁰I a omguntellas hag omsettya a-dro dhe'n tour y'n kans ha deg ha dew-ugensves blydhen,[10] hag ev a dhrehevis tylleryow rag tenna ha jynnow-esedhva.

²¹Mes re anedha a dhienkas a'n esedhva, ha re a'n Ysraelysi dhidhuw a junyas gansa.

²²I eth dhe'n myghtern ha leverel, ‘Pes termyn y fyllydh gul gwirvreus ha diella agan breder?

²³Lowen vedhen ow servya dha das, ow kerdhes war-lergh y eryow hag owth holya y worhemmynnow.

²⁴Rag hemma mebyon agan bobel a omsettyas orth an tour hag i eth ha bos eskarek dhyn; dres hemma, i re ladhas kemmys ahanas re gachsons, hag i re byllas agan pythow.

²⁵Ha nyns yw er agan pynn yn unnsel i dhe ystynn aga diwleuv, mes ynwedh erbynn oll an tiryow war aga oryon.

²⁶Hag otta, i re gampyas hedhyw a-dro dhe'n tour yn Yerusalem rag y gemmeres; i re geras keffrys an sentri ha Beth-sur;

²⁷ha marnas ty dh'aga lettya, i a wra traow hwath brassa ha ny yllydh aga lesta.’

²⁸An myghtern a'n jevo sorr meur pan glewas hemma. Ev a guntellas oll y gowetha, kaslewydhyon y lu, ha'n re yn awtorita.

²⁹Arvethesigyon a dheuth dhodho a wlaskordhow erell hag a ynysow an moryow.

³⁰Niver y luyow o kans mil a droeslu, ugens mil a varghoglu ha dewdhek olifans warn ugens, prevys yn bresel.

³¹I a dheuth der Idumea hag a gampyas erbynn Beth-sur, ha batalyas lies dydh ha gul jynnow-esedhva; mes an Yedhewon eth yn-mes hag a loskas an re ma gans tan, hag a vatalyas yn fen.

³²Ena Yudas a geskerdhas dhiworth an tour hag a gampyas yn Beth-zakaria, a-dal kamp an myghtern.

³³Myttin a-varr an myghtern a sevis, ha wosa keskerdh uskis gans y lu war an fordh dhe Beth-zakaria, y lu a veu settys yn aray rag an vatel, hag i a hwythas an hirgern.

³⁴I a dhiskwedhas dhe'n olifanses sugen grappys ha morennow dh'aga pareusi rag an vatel.

³⁵Hag i a rannas an bestes yn mysk an bagasow a gasoryon; ryb pub best i a worras mil wour, ervys gans kaspowsyow ha gans basnettow a vrons war aga fenn; ha pymp kans marghek dewisys a veu apoyntys dhe bub best.

³⁶I a sevis yn aga tyller dhe gyns plepynag mayth esa an best; plepynag mayth ella ev, i eth ganso, ha nevra ny'n gasens.

³⁷War an olifanses yth esa touryow a brenn, krev ha gorherys; grogysys ens war pub best gans herness arbennik, ha war bubonan yth esa peswar gour ervys owth omladh alena, hag ynwedh y lewyer eyndek.

³⁸Remenant an marghoglu a veu gorrys a bub tu war dhew denewen an lu dhe arvedh an eskar, hag i aga honan gwithys gans an bagasow a gasoryon.

³⁹Pan wre an howl splanna war an skoesow a owr hag a vrons, an breow o enowys gansa hag a derlentri avel faglennow ow flammya.

⁴⁰Rann a lu an myghtern o lesys war an breow ughel hag yth esa re anedha war an plen, hag i eth yn-rag yn sawder hag yn aray da.

⁴¹Kemmys a glewo an tros hag a veu gwrys gans keskerdhes an routh ha gans son aga arvow ow kweskel war-barth, a grena, rag an lu o fest bras.

⁴²Mes Yudas ha'y lu a dheuth nes dhe'n vatel, ha hwegh kans gour a lu an myghtern a goedhas.

⁴³Eleazar, henwys Avaran, a welas bos onan a'n bestes darbarys gans arvwisk ryel. Ughella o ages oll an bestes erell, hag ev a dhesevas an myghtern dhe vos warnodho.

⁴⁴Ytho ev a ros y vewnans rag may sawya y bobel, ha may kaffa ragdho y honan hanow heb fin.

⁴⁵Ev a boenyas ynter an bagasow a gasoryon rag mayth hettha dhodho; ev a ladhas tus dhe'n dyghow ha dhe'n kledh, hag i a dhibarthas a-ragdho dhe'n dhew du.

⁴⁶Ev eth yn-dann an olifans, ha'y wana alena hag a'n ladhas, mes an olifans a goedhas dhe'n leur warnodho hag ena ev a verwis.

⁴⁷Pan welas an Yedhewon an nerth ryel hag omsettyans tynn an luyow, i a gildennas.

⁴⁸Re a lu an myghtern eth yn-bann dhe Yerusalem er aga fynn, ha'n myghtern a gampyas yn Yudi ha war venydh Sion.

⁴⁹Ev a wrug kres gans tus Beth-sur, hag i a asas an sita, drefenn na's tevo sosten ena dredho may saffens yn esedhva, drefenn y vos blydhen sabotek dhe'n tir.

⁵⁰Ytho an myghtern a gemmeras Beth-sur hag ev a worras gwithysi rag hy synsi.

⁵¹Ena ev a gampyas a-rag an sentri lies dydh. Ev a dhrehevis tylleryow rag tenna ha jynnow-esedhva, ha jynnow-hurlya rag tewlel tan ha meyn, jynnow rag tewlel sethow ha jynnow-hurlya.

⁵²Ha gans hemma an Yedhewon a wrug jynnow bresel erbynn aga jynnow i, hag i a vatalyas lies dydh.

⁵³Mes ny's tevo boes y'n lestri, rag y feu an seythves blydhen; an re a gavas sawder yn Yudi dhiworth an Jentilys re dhyb'sa remenant an provians re bia gesys.

⁵⁴Nyns o marnas nebes gwer gesys y'n sentri, drefenn divoetter dhe wul maystri warnedha, hag i re beu skattrys, peub dh'y dyller y honan.

⁵⁵Ena Lysias a glewas bos Felip, neb re bia apoyntys gans myghtern Antioghus, hag ev hwath yn few, rag may fakka y vab dhe vos myghtern,

⁵⁶re dhehwelsa a Persia hag a Media gans an gasoryon o gyllys gans an myghtern hag yth esa ev owth assaya dalghenna maystri war an rewl.

⁵⁷Ytho distowgh ev a worhemmynnis omdenna, hag yn-medh ev dhe'n myghtern, dhe soedhogyon an lu ha dhe'n wer, ‘Dydh ha dydh yth en ha bos gwanna, agan boes yw skant, an tyller mayth omledhyn er y bynn yw krev, ha negys an wlaskor yw stroeth warnan.

⁵⁸Lemmyn gwren akordya gans an dus ma, ha gul kres gansa ha gans oll aga henedhel,

⁵⁹hag assentya ma's bewons herwydh aga laghys dell wrens kyns, rag yth o drefenn aga laghys a dhiswrussyn ni, i dhe serri ha dhe wul oll an traow ma.’

⁶⁰An areth ma a blesyas an myghtern ha'n routers hag ev a dhannvonas dhe'n Yedhewon profyans a gres hag i a'n degemmeras.

⁶¹Ytho an myghtern ha'n gaslewydhyon a ros dhedha aga thi. War an ambosow ma an Yedhewon a asas an dinas.

⁶²Mes pan entras an myghtern menydh Sion hag a welas fatell o an dinas mar grev, ev a dorras an ti re wrussa hag a worhemmynnis may fo terrys an fos yn-nans oll a-derdro.

⁶³Ena yth eth yn unn fyski hag a dhehwelis dhe Antiogh. Ev a gavas Felip ow kwarthevya war an sita, mes ev a vatalyas orto hag a gemmeras an sita dre nerth.