Read Kernewek 1 Makkabeyon 7 Bible Online

1 Makkabeyon 7 - Kernewek bible

1 Makkabeyon 7

¹Y'n kans unnek ha dew-ugensves blydhen[11] Demetrius mab Selewkus eth yn-mes dhiworth Rom, ha goelya gans nebes gwer dhe sita ryb an mor hag ena ev a dhallathas reynya.

²Ha pan esa owth entra dhe balys ryel y dasow, an lu a dhalghennas Antioghus ha Lysias dh'aga dri dhodho.

³Mes pan veu an gweythres aswonnys dhodho yn-medh ev, ‘Na gesiwgh my dhe weles aga fasow!’

⁴Ytho an lu a's ladhas, ha Demetrius a esedhas war dron y wlaskor.

⁵Ena y teuth dhodho oll an wer dhilagha ha didhuw a Ysrael; ledys vons gans Alkimus, a'n jevo hwans dhe vos ha bos arghoferyas.

⁶I a dhug dhe'n myghtern an kuhudhans ma: ‘Yudas ha'y vreder re ladhas oll a'gas kowetha, ha re'gan herdhyas yn-mes a'gan tir.

⁷Ytho dannvon gour may trestydh ynno; es ev ha gweles oll an diswrians a dhros Yudas warnan ha war dir an myghtern, ha gwres ev aga hessydhya i hag oll an re a's gweres’

⁸Yndella an myghtern a dhewisas Bagghides, onan a gowetha an myghtern, governour an ranndir Dres-an-Avon, gour meur y'n wlaskor, ha lel dhe'n myghtern.

⁹Ev a'n dannvonas, ha ganso an Alkimus, didhuw dell o, neb a'n gwrug arghoferyas; hag ev a worhemmynnis dhodho may tallfa dial war an Ysraelysi.

¹⁰Ytho i a geskerdhas dhe-ves hag a dheuth gans lu bras dhe bow Yuda; hag ev a dhannvonas kannasow dhe Yudas ha'y vreder gans geryow kres, yn fals.

¹¹Mes ny goelsons orth aga geryow, rag i a welas i dhe dhos gans lu bras.

¹²Ena bagas a skribys a omdhiskwedhas a-rag Alkimus ha Bagghides rag pysi ma's teffa gwirvreus.

¹³An Hasideanys o an kynsa yn mysk an Ysraelysi ow pysi kres dhiworta,

¹⁴rag i a leveris, ‘Oferyas a linyeth Aron re dheuva gans an lu, ha ny wra dregynn dhyn.’

¹⁵Hag Alkimus a gewsis geryow kres dhedha hag ev a dos dhedha an ti ma, ‘Ny hwilyn drog dhywgh hwi na dh'agas gowetha.’

¹⁶Yndella i a drestyas ynno, mes ev a dhalghennas tri-ugens anedha hag a's ladhas a-ji dhe unn jydh, herwydh an ger a veu skrifys,

¹⁷‘Kig ha goes agas syns i a skoellyas oll a-dro dhe Yerusalem, ha nyns esa nagonan dh'aga ynkleudhyas.’

¹⁸Ena own hag euth anedha a goedhas war oll an bobel, rag y lavarsons, ‘Nyns eus na gwiryonedh na gwirvreus ynna, rag i re naghas an akord ha'n ti a dosons.’

¹⁹Ena Bagghides eth dhiworth Yerusalem hag a gampyas yn Beth-zayth. Ev a dhannvonas ha settya dalghenn yn lies a'n wer re gilfias dhodho, ha re a'n bobel, ha'ga ladha hag a's tewlis yn puth bras.

²⁰Ev a settyas Alkimus war an tir ha gasa ganso soudoryon rag y weres; ena Bagghides a dhehwelis dhe'n myghtern.

²¹Alkimus a strivyas mayth ella ha bos an arghoferyas,

²²hag oll re esa ow trobla aga fobel a junyas ganso. I a's tevo maystri war bow Yuda hag a wrug damaj meur yn Ysrael.

²³Yudas a welas oll an drog re wrussa Alkimus ha'n re esa ganso yn mysk an Ysraelysi, moy o ages dell wrussa an Jentilys.

²⁴Ytho ev eth der oll rannow Yudi a-derdro, ha tyli dial war an dus re gilfias, ha'ga lettya nag ellens y'n mes bys y'n pow.

²⁵Pan welas Alkimus bos Yudas ha'n re esa ganso gyllys ha bos krev, ha pan wodhya na ylli ev sevel er aga fynn, ev a dhehwelis dhe'n myghtern hag a dhug kuhudhans a daklow drog er aga fynn.

²⁶Ena an myghtern a dhannvonas Nikanor, onan a'y bennsevigyon enorys, neb a gasa ha hatya Ysrael, ha gorhemmynna dhodho distrui an bobel.

²⁷Nikanor a dheuth dhe Yerusalem gans lu bras hag a dhannvonas dhe Yudas ha'y vreder an messaj ma a gres, yn fals.

²⁸‘Bynner re bo omladh yntra my ha ty; yth av gans nebes gwer dhe'th weles, ganow orth ganow yn kres.’

²⁹Ytho ev a dheuth dhe Yudas hag i a salusyas yn eyl y gila yn kres. Mes an eskerens o parys dhe gibya Yudas.

³⁰Godhvedhys veu dhe Yudas y tothya Nikanor dhodho gans fals vynnas, hag own bras a berthi anodho, ha ny vynna metya orto arta.

³¹Pan wodhva Nikanor y dowl dhe vos diskwedhys, yth eth yn-mes rag metya erbynn Yudas yn batel ogas dhe Kafar-salama.

³²A-dro dhe bymp kans gour a lu Nikanor a goedhas, ha'n remenant a fias dhe sita Davydh.

³³Wosa an darvosow ma Nikanor eth yn-bann dhe venydh Sion. Re a'n oferysi a dheuth yn-mes a'n sentri, hag ynwedh nebes a henavogyon an bobel dh'y salusi yn kres ha rag diskwedhes dhodho an offrynn leskys esa ow pos offrynnys rag an myghtern,

³⁴Mes ev a wrug ges anedha ha hwerthin orta ha'ga defola, ow postya,

³⁵hag yn sorr ev a dos ti, ‘Marnas Yudas ha'y lu dhe vos delivrys yn ow diwleuv a-dhistowgh, my a lesk an chi ma pan dhehwelav yn kres.’ Hag yth eth yn-mes yn sorr meur.

³⁶Ena an oferysi a entras ha sevel a-rag an alter hag a-rag an tempel hag i a oelas hag a leveris,

³⁷‘Ty a dhewisas may fe an chi ma gelwys gans dha hanow, ha may fe ev chi a bysi hag a aspysadow rag dha bobel.

³⁸Tal dial war an den ma ha war y lu, ha koedhens gans an kledha; porth kov a'ga blasfemiow, ha na as i dhe vewa na fella.’

³⁹Ytho Nikanor eth yn-mes a Yerusalem hag a gampyas yn Beth-horon, ha lu Syria a junyas ganso.

⁴⁰Yudas a gampyas yn Adasa gans tri mil wour. Ena Yudas a bysis hag a leveris,

⁴¹‘Pan gewsis kannasow an myghtern[12] blasfemi, dha el eth yn-rag hag a weskis dhe'n dor kans mil ha pymp ha peswar-ugens a'y soudoryon.

⁴²Ytho skwatt an lu ma ynwedh a-ragon y'n jydh ma, ha dyskes an re erell Nikanor dhe gewsel yn trog erbynn dha sentri, ha breus ev herwydh y dhroktra ma.’

⁴³An luyow a vetyas yn batel yn trydhegves dydh an mis Adar. Lu Nikanor a veu skwardys hag ev y honan a veu an kynsa ow koedha y'n vatel.

⁴⁴Pan welas lu Nikanor ev dhe goedha, i a dewlis aga arvow dhe'n dor ha fia.

⁴⁵An Yedhewon a's chasyas bys Gazara, pellder kerdh unn jydh a Adasa, ow hwytha aga hirgern avel galow dhe vatel.

⁴⁶Tus a dheuth yn-mes a oll an trevow a Yudi a-derdro, hag i a omsettyas erbynn aga thenwennow, ha'ga herdhya war-tu ha'ga holyoryon, hag i oll a goedhas gans an kledha; ny veu onan vytholl gesys.

⁴⁷Ena an Yedhewon a gemmeras an arvow ha'n preydh; i a dhibennas Nikanor ha treghi an leuv dyghow dhiworto re ystynnsa mar valgh, ha'ga dri ha'ga displetya a-dal Yerusalem.

⁴⁸An bobel a lowenhas gans lowender meur hag a woelyas an jydh na avel dydh a heudhder bras.

⁴⁹Hag i a erviras may fe an jydh na solempnys pub blydhen y'n trydhegves dydh a Adar.

⁵⁰Ytho pow Yuda a'n jevo powes nebes dydhyow.