Read Kernewek 1 Makkabeyon 8 Bible Online

1 Makkabeyon 8 - Kernewek bible

1 Makkabeyon 8

¹Yudas a glewas a vri an Romanyon, i dhe vos fest krev, hag i dhe favera kemmys a wrug kevambos gansa, i dhe ambosa kowethyans dhe'n re a dheuth dhedha,

²hag i dhe vos fest krev. Tus a gewsis dhodho a'ga breselyow, hag a'ga gwrythyow yth esens orth aga gul yn mysk an Galyon ha fatell y's fethsens ha'ga gorra yn-dann drubyt,

³ha pandr'a wrussens yn pow Spayn rag may kaffens maystri war an owregi ha'n arghansegi ena,

⁴ha fatell gavsens maystri war oll an ranndir der aga thowlow ha perthyans, kyn fe an tyller fest pell anedha; hag ynwedh war an vyghternedh hag a dheuth er aga fynn dhiworth pennow an norvys, bys ma's brewsons ha'ga gweskel gans strokosow bras; an remenant a dela an trubyt pub blydhen.

⁵Felip ha Perseus myghtern Kittim,[13] ha'n re erell a sevis er aga fynn, i a's brewis yn batel hag a's fethas.

⁶Ynwedh i a fethas Antioghus Veur, myghtern Asia, neb eth yn-mes rag batalyas orta gans kans olifans hag ugens, ha gans marghoglu ha charettow ha lu fest bras. Ev a veu brewys gansa;

⁷i a'n kemmeras bew hag a worhemmynnis may tallfa ev, ha'n re a vedha ow reynya war y lergh ynwedh, trubyt poes, ha may rollens goestlow ha mayth hepkorrens re a'ga gwella ranndiryow,

⁸bro Eynda ha Media ha Lydia. An re ma a gavsons dhiworto ha'ga ri dhe Ewmenes an myghtern.

⁹An Grekys a dewlis towl a dhos rag aga distrui,

¹⁰mes hemma eth ha bos godhvedhys dhedha hag i a dhannvonas pennhembrenkyas er aga fynn, ha batalyas orta. Lies anedha a veu goliys hag a goedhas, ha'n Romanyon a gemmeras aga gwragedh ha'ga fleghes avel kethyon; i a's pyllas, ha fetha aga thir, ha tenna dhe'n dor aga dinasow, hag a's gwrug kethyon bys y'n jydh ma.

¹¹Remenant an gwlaskordhow ha'n ynysow, kemmys a savsens orta bythkweth, i a dhistruis ha kemmeres yn kethneth;

¹²mes gans aga howetha ha gans an re a fydhyas ynna i a withas kowethyans. I a fethas myghternedh ogas ha pell, ha kemmys a glewas a'ga bri a borthas own anedha.

¹³Myns a vynnons gweres ha gul myghternedh y hwrons myghternedh, ha myns a vynnons i a worr yn-mes aga thronys; hag yndella i re dheuth ha bos pur nerthek.

¹⁴Byttegyns yn despit dhe hemma oll, ny wiskas nagonan anedha diadem nag omwiska yn purpur avel arwoedh a woeth,

¹⁵mes i re dhrehevis ragdha aga honan chi senedh, ha pub dydh tri hans hag ugens a senedhoryon a omgusul prest a-dro dhe'n bobel rag aga governa yn ta.

¹⁶Pub blydhen i a drest yn unn den dh'aga rewlya ha dhe routya oll aga thir; i oll a woslow orth an unn den ma, ha nyns eus atti nag avi vytholl yn aga mysk.

¹⁷Yndella Yudas a dhewisas Ewpolemus mab Yowann mab Akkos, ha Yason mab Eleazar, hag a's dannvonas dhe Rom rag gul kowethyans ha keffrysyans,

¹⁸ha rag omdhelivra dhiworth an yew, rag i a welas bos gwlaskor an Grekys ow kul Ysrael kethyon yn tien.

¹⁹I eth dhe Rom, vyaj pur bell, hag i eth a-ji dhe ji an senedh ha leverel,

²⁰‘Yudas henwys Makkabeus ynwedh, ha'y vreder ha pobel an Yedhewon re'gan dannvonas dhywgh rag gul keffrysyans ha kres genowgh, rag may fen omrolys avel agas keffrysysi ha kowetha.’

²¹An gusul a veu plegadow gansa;

²²ha hemm yw dasskrif an lyther a skrifsons war leghennow a vrons hag a dhannvonsons dhe Yerusalem may fe gansa avel kovadh a gres ha keffrysyans.

²³‘Bedhes siwena gans an Romanyon ha gans kenedhel an Yedhewon yn mor hag yn tir bys vykken, ha bedhes kledha hag eskar pell dhiworta.

²⁴Mar teu bresel yn kynsa dhe Rom po dhe onan pynag a'ga heffrysysi yn aga mestrynses oll,

²⁵ena kenedhel an Yedhewon a wra oberi avel aga heffrysysi a leun golonn, dell dhiskwettho an prysweyth dhedha.

²⁶Ha dhe'n eskerens a vresel, ny rons na provia naneyl greun nag arvow, naneyl arghans na gorholyon, dell re erviras Rom, ha res vydh dhedha gwitha aga ambosow, heb degemmeres pewasow vytholl yn attal.

²⁷Yn keth vaner, mar teu bresel yn kynsa dhe wlaskor an Yedhewon, an Romanyon a wra oberi yn lowen avel aga heffrysysi, dell dhiskwettho an prysweyth dhedha,

²⁸Ha dhe'n eskerens ny rons na provia naneyl greun nag arvow, naneyl arghans na gorholyon, dell re erviras Rom, ha res vydh dhedha gwitha aga ambosow, heb degemmeres pewasow vytholl yn attal.

²⁹War-lergh an ambosow ma an Romanyon a wra kevambos gans pobel an Yedhewon.

³⁰Wosa an ambosow ma dhe vos gwrys, mar mynn an dhew vagas ervira keworra neppyth po y dhefendya dhe-ves, i a'n gwra war-lergh aga husul aga honan, ha pub keworrans po defendyans dhe-ves a vydh laghel.

³¹‘Hag a-dro dhe'n dhrokoleth usi myghtern Demetrius orth hy gul orta, ni re skrifas dhodho dell siw, “Prag y hwrussys jy dha yew poes war agan kowetha ha keffrysysi an Yedhewon?

³²Ytho mar pysons gweres arta er dha bynn, ni a dhefend aga gwiryow hag a vatal orthis yn mor hag yn tir.” ’