Read Kernewek 1 Makkabeyon 9 Bible Online

1 Makkabeyon 9 - Kernewek bible

1 Makkabeyon 9

¹Demetrius, pan glewas Nikanor ha'y lu dhe goedha yn batel, a dhannvonas Bagghides hag Alkimus yn pow Yuda an nessa prys, ha gansa askell dhyghow an lu.

²I a gerdhas war an fordh a led dhe Gilgal hag i a gampyas erbynn Mesoloth yn Arbela, hag i a's kemmeras ha ladha tus pals

³Y'n kynsa mis y'n kans ha dew ha dew-ugensves blydhen[14] i a gampyas erbynn Yerusalem;

⁴hag alena i a geskerdhas dhe Berea gans ugens mil a'n droeslu ha dew vil a'n marghoglu.

⁵Lemmyn yth esa Yudas ow kampya yn Elasa, ha ganso yth esa tri mil wour dewisys.

⁶Pan welsons myns bras an lu, own meur a's tevo, ha lies anedha a slynkyas dhe-ves a'n kamp, bys pan nag esa gesys moy es eth kans gour.

⁷Pan welas Yudas y lu dhe slynkya dhe-ves, hag yth esa an vatel orth y waska, ev a veu brewys yn spyrys, rag ny'n jevo spas rag ma's kuntella.

⁸Gyllys digolonnek o, mes y leveris dhe'n remenant, ‘Sevyn ha deun erbynn agan eskerens. Martesen y hyllyn batalyas orta.’

⁹I a assayas y gusulya na'n gwrella, ow leverel, ‘Nyns on ni abel; sawyn agan bewnans agan honan lemmyn, ha dehwelyn a-wosa gans agan breder ha batalyas orta; re nebes yth on.’

¹⁰Mes Yudas a leveris, ‘Pell re bo dhiworthyn gul yndella, ow fia anedha. Mars yw devedhys agan termyn, merwyn brav a-barth agan breder heb gasa acheson vytholl may fo kuhudhans erbynn agan enor.’

¹¹Ena lu Bagghides a geskerdhas a'n kamp hag a sevis yn aray erbynn an eskar. An marghoglu a veu rynnys yntra dew bara, ha'n dowlbrennyoryon ha'n sethoryon eth a-rag an lu, par dell wrug oll an benngasoryon.

¹²Yth esa Bagghides war an askell dhyghow. Gans an marghoglu war an dhew denewen, an troeslu eth yn-rag ha'n hirgern ow seni; ha'n dus esa gans Yudas a sonas aga hirgern ynwedh.

¹³An dor a grysyas gans tros an luyow, ha'n vatel a gonneri a vyttin bys gorthugher.

¹⁴Yudas a welas bos Bagghides ha nerth y lu a'n tu dyghow; ena oll an dus kolonnek eth ganso,

¹⁵hag i a vrewis an askell dhyghow, hag ev a's chasyas bys venydh Azotus.

¹⁶Pan welas an re esa war an askell gledh bos an askell dhyghow brewys, i a dreylyas hag a holyas yn ogas war-lergh Yudas ha'n re ganso.

¹⁷An vatel o gyllys tynn, ha lies a'n eyl tu ha'y gila a veu goliys hag a goedhas.

¹⁸Yudas ynwedh a goedhas, ha'n remenant a fias dhe'n fo.

¹⁹Ena Yonathan ha Simon a gemmeras Yudas aga broder ha'y ynkleudhyas yn bedh aga thasow yn Modein,

²⁰hag i a oelas ragdho. Hag oll Ysrael a gynyas meur ragdho, orth y alari lies dydh, hag i a leveris,

²¹‘Ass yw koedhys an galloesek, selwador Ysrael!’

²²Gweythresow erell Yudas ha'y vreselyow ha'n oberow brav a wrug ev, ha'y vrastereth, ny vons skrifys, mes pur lies ens.

²³Wosa mernans Yudas an re dhilagha a dheuth yn-mes yn pub rann a Ysrael, hag oll an oberoryon a gammhynseth a sevis yn-bann.

²⁴Y'n dydhyow na divoetter pur vras a hwarva, ha pobel an vro a gilfias dhe'n eskerens.

²⁵Bagghides a dhewisas an re dhidhuw hag a's gwrug rewloryon war an pow.

²⁶I a hwilas ha helghya kowetha Yudas, ha'ga dri dhe Bagghides hag ev a dylis dial warnedha, hag a wrug ges anedha.

²⁷Ena yth esa ahwer meur yn Ysrael, a'n sort na via godhvedhys a-dhia'n termyn mayth astelas an brofoesi omdhiskwedhes yn aga mysk.

²⁸Ena oll kowetha Yudas a omguntellas ha leverel dhe Yonathan,

²⁹‘A-dhia vernans dha vroder Yudas ny veu nagonan a'y bar rag mos erbynn agan eskerens ha Bagghides, ha rag dyghtya gans an re agan kenedhel a'gan kas.

³⁰Ytho lemmyn ni re'th tewisas dhe gavoes y tyller avel agan rewler ha ledyer, rag batalyas ragon ni.’

³¹Ha Yonathan a assentyas dhe vos ledyer hag ev a gavas tyller Yudas y vroder.

³²Pan wodhva Bagghides bos henna an kas, ev a hwilas y ladha.

³³Mes Yonathan ha Simon, y vroder, hag oll esa gansa a glewas yn y gever, hag y fisons dhe wylvos Tekoa ha kampya orth dowr poll Asfar.

³⁴Bagghides a dhiskudhas hemma y'n sabot, hag ev hag oll y lu a dreusis an Yordan.

³⁵Ha Yonathan a dhannvonas y vroder avel ledyer an routh hag y pysis tus Nabatea, an re o y gowetha, may rollens kummyas dhe witha gansa an myns bras a fardellow o dhedha.

³⁶Mes an Yambrysi a dheuth yn-mes a Medeba hag a gibyas Yowann ha pup-tra esa ganso hag omdenna gansa.

³⁷Wosa an traow ma i a dherivas dhe Yonathan ha dhe Simon y vroder, ‘Yma an Yambrysi ow solempnya demmedhyans bras, hag yth esons ow tri an venyn bries, myrgh onan a'n ugheloryon veur a Kanan, dhiworth Nadabath gans hembrenkysi pals.’

³⁸Ow perthi kov a woes Yowann aga broder, i eth yn-bann hag omgudha yn-dann gudhans an menydh.

³⁹I a dhrehevis aga dewlagas ha mires, ha gweles keskerdh tervansus gans meur a fardellow, ha'n gour pries a dheuth yn-mes gans y gowetha ha'y vreder rag metya orta gans tabouryow ha menestrouthi ha gans arvow pals.

⁴⁰Ena i a boenyas warnedha dhiworth an kontrewaytyans ha dalleth aga ladha. Lies a veu goliys hag a goedhas, ha'n remenant a fias dhe'n menydh; hag i a gemmeras aga gwara oll.

⁴¹Yndellma an demmedhyans a veu treylys dhe alar, ha son an menestrouthi dhe gynvann.

⁴²Ha pan dalviens dial yn tien a woes aga broder, i a dhehwelis dhe geunegi an Yordan.

⁴³Pan glewas Bagghides a henna, ev a dheuth gans bagas bras krev yn dydh an sabot dhe lannow an Yordan.

⁴⁴Ha Yonathan a leveris dhe'n re esa ganso, ‘Sevyn lemmyn hag omledhyn rag agan bewnans, rag y'n jydh hedhyw nyns yw traow dell vedhens de ha dygynsete.

⁴⁵Rag otta! yma an vatel a-ragon, hag a-dryv dhyn yma dowr an Yordan, gans keunegi ha prysk dhe'n dhew denewen; nyns eus tyller dhe dreylya.

⁴⁶Germewgh lemmyn dhe Nev may fowgh delivrys dhiworth diwla agan eskerens.’

⁴⁷Ytho an vatel a dhallathas ha Yonathan a ystynnas y leuv dhe weskel Bagghides, mes ev a dhienkas dhiworto ha mos dhe'n delergh

⁴⁸Ena Yonathan ha'n re esa ganso a lammas y'n Yordan ha neuvya dhe'n lann arall, ha ny dreusis an eskerens an Yordan war aga lergh.

⁴⁹Hag a-dro dhe vil a wer Bagghides a goedhas an jydh na.

⁵⁰Ena Bagghides a dhehwelis dhe Yerusalem hag a dhrehevis sitys kerys yn Yudi: an kerweythyow yn Yeriko, Emmaus, Beth-horon, Bethel, Timnath-farathon, ha Tefon, gans fosow ughel ha yetow ha barrys.

⁵¹Ev a worras ynwedh kasoryon ynna rag arvedh Ysrael.

⁵²Ev a geras ynwedh an sita Beth-sur, ha Gazara, ha'n tour, hag ynna ev a worras kasoryon ha gwithvaow a voes.

⁵³Hag ev a gemmeras mebyon ledyoryon an pow avel goestlow hag a's gorras yn-dann with y'n tour yn Yerusalem.

⁵⁴Y'n kans ha trydhek ha dew-ugensves blydhen,[15] y'n nessa mis, Alkimus a worhemmynnis may fe fos klos a-bervedh an sentri terrys dhe'n dor. Yndella ev a dorras dhe'n leur ober an brofoesi.

⁵⁵Mes ny wrug marnas dalleth hy therri dhe'n dor, rag y'n prys na Alkimus a veu gweskys, ha'y ober a veu lettys, rag tegys veu y anow ha palsyes veu bys na ylli na fella leverel ger na gorhemmynn a-dro dhe'n chi.

⁵⁶Hag Alkimus a verwis y'n termyn na yn payn meur.

⁵⁷Pan wodhva Bagghides bos Alkimus marow ev a dhehwelis dhe'n myghtern ha pow Yuda a's tevo powes diw vlydhen.

⁵⁸Ena oll an re dhilagha a wrug towl hag a leveris, ‘Otta! Yma Yonathan ha'y dus ow pywa yn kosel hag yn fydhyans. Ytho dren ni Bagghides arta, hag ev a's dalghenn oll anedha a-ji dhe unn nos.’

⁵⁹Hag yth ethons hag omgusulya ganso.

⁶⁰Ev a dhallathas dos gans lu krev, hag a dhannvonas lytherow yn-dann gel dhe oll y geffrysysi yn Yudi, orth aga gorhemmynn may talghennens Yonathan ha'n re ganso, mes ny allsons y wul drefenn aga thowl a deuth ha bos godhvedhys.

⁶¹Hag gwer Yonathan[16] a dhalghennas a-dro dhe hanter kans gour a'n pow o ledyoryon y'n trayturi, hag i a's ladhas.

⁶²Ena Yonathan ha'n re ganso, ha Simon, a omdennas dhe Beth-basi y'n gwylvos; ev a dhastrehevis an rannow anedhi re bia terrys yn-nans, hag i a's keras.

⁶³Pan glewas Bagghides hemma, ev a guntellas oll y lu hag a dhannvonas gorhemmynnow dhe dus Yudi.

⁶⁴Ena ev a dheuth ha kampya erbynn Beth-basi; ev a vatalyas orti lies dydh hag ev a wrug lies jynn-esedhva.

⁶⁵Mes Yonathan a asas Simon y vroder y'n sita, hag ev eth yn-mes dhe'n pow, gans niver byghan a wer.

⁶⁶Ev a elwis war[17] Omdomera ha'y vreder ha mebyon Fasiron yn aga thyldow dh'y junya.

⁶⁷Ena ev a dhallathas gweskel hag yth eth y'n vatel gans y gasoryon; ha Simon ha'n re ganso eth yn-mes a'n sita hag a worras tan y'n jynnow-esedhva.

⁶⁸I a vatalyas orth Bagghides, hag ev a veu brewys gansa. I a'n gwaskas yn fen, rag y dowl ha'y eskerdh re bia euver.

⁶⁹Ytho sorr meur a'n jevo orth an wer dhilagha re'n kusulsa may teffa y'n vro, hag ev a ladhas lies anedha. Ena ev a erviras mos dh'y bow y honan.

⁷⁰Pan glewas Yonathan hemma, ev a dhannvonas kannasow dhe Bagghides[18] rag gul kres ganso ha dhe gavoes delivrans an gethyon.

⁷¹Ev a assentyas hag a wrug par dell leveris; hag ev a dos dhe Yonathan na hwilla y aperya hedre vewa.

⁷²Ev a dhaskorras dhodho an gethyon re gemmersa kyns a bow Yuda; ena ev a dreylyas hag eth dh'y bow y honan, ha ny dheuth na fella yn aga thir.

⁷³Yndella an kledha a hedhis dhiworth Ysrael. Yonathan a drigas yn Mikmash. Hag ev a dhallathas breusi an bobel, hag ev a dhistruis an re dhidhuw yn-mes a Ysrael.