Read Kernewek 2 Makkabeyon 1 Bible Online

2 Makkabeyon 1 - Kernewek bible

2 Makkabeyon 1

¹An Yedhewon yn Yerusalem ha'n re yn pow Yudi, dhe'n vreder, an Yedhewon yn Ejyp, salusyans ha kres da.

²Re wrello Duw da dhywgh ha re govhaho y gevambos gans Abraham hag Ysak ha Yakob, y wesyon lel.

³Re rollo kolonn dhywgh oll dh'y wordhya ha gul y vodh gans kolonn grev ha spyrys bolonjedhek.

⁴Re igorro agas kolonnow yn y lagha ha'y worhemmynnow, ha re dhrollo kres.

⁵Re glewvo agas pysadow ha bos unnverhes dhywgh, ha na'gas eskasso yn termyn anken.

⁶Ha lemmyn yth eson ow pysi ragowgh omma.

⁷Yn reyn Demetrius, y'n vlydhen kans naw ha tri-ugens,[1] ni an Yedhewon a skrifas dhywgh y'n ahwer hag y'n barras a dheuth warnan y'n blydhynyow na wosa Yason ha'y gowetha dhe dreylya war-dhelergh dhiworth an tir sans ha'n ruvaneth

⁸ha leski an porth ha skoellya goes gwiryon. Ni a bysis war an Arloedh ha ni a veu klewys, ha ni a offrynnas sakrifis hag offrynn greun, ha ni a wolowis an lugern hag araya an torthow.

⁹Ha lemmyn gwaytyewgh gwitha goel an skovvaow. Skrifys y'n mis Kislev, y'n vlydhen kans peswar ha peswar-ugens.[2]

¹⁰Tus Yerusalem ha Yudi, ha'n senedh ha Yudas, dhe Aristobulus, dyskador myghtern Ptolemi, a deylu an oferysi untys, ha dhe'n Yedhewon yn Ejyp, salusyans ha yeghes da.

¹¹Wosa bos delivrys gans Duw a beryllow meur ni a rass dhodho yn feur, avel tus arayys erbynn myghtern,

¹²rag ev a fesyas an re a omladhas erbynn an sita sans.

¹³Pan dheuth an hembrenkyas dhe Persia gans lu a heveli antryghadow, i a veu treghys dhe demmyn yn tempel Nanea dre doell devnydhys gans oferysi Nanea.

¹⁴Dre ragskeus bos ow mynnes hy demmedhi, Antioghus a dheuth dhe'n tyller ha'y gowetha ganso, dhe gemmeres moyha rann y dresor yn argovrow.

¹⁵Wosa oferysi tempel Nanea dhe settya yn-mes an tresoryow, Antioghus a dheuth gans boghes tus a-ji dhe oryon an sentri; kettell dheuth a-ji i a dhegeas an tempel.

¹⁶Owth igeri daras kelys y'n nen, i a dewlis meyn ha gweskel an hembrenkyas. I a droghas dhe-ves aga eseli ha'ga fennow ha'ga thewlel dhe'n dus a-ves.

¹⁷Bennigys yn pub fordh re bo agan Duw re dhug barn war an re dhidhuw.

¹⁸Rag ni dhe vos ow solempnya purheans an tempel y'n pympes dydh warn ugens a vis Kislev, ni a grysi bos res agas gwarnya, rag may solempnyowgh hwi ynwedh goel an skovvaow, kepar dell solempnyowgh goel an tan a veu res dhyn pan offrynnas Nehemia sakrifisow, neb a dhrehevis an tempel ha'n alter.

¹⁹Rag pan veu ledys agan tasow yn keth dhe Persia, oferysi sansel a'n termyn na a gemmeras rann a dan an alter ha'y gudha yn kevrinek yn kow dowrargh sygh, le ma'n gwithsons yn sawder yn tyller anaswonnys dhe dus oll.

²⁰Mes wosa lies blydhen dhe dremena, pan o plegadow dhe Dhuw, Nehemia, wosa bos dannvenys gans myghtern Persia, a dhannvonas diyskynnysi an oferysi re gudhsa an tan dh'y dhaskavoes. Ha pan dherivsons dhyn na gavsons tan marnas lin tew, ev a worhemmynnis ma'n tennens yn-mes ha'y dhri.

²¹Pan veu pareusys an taklow rag an sakrifisow, Nehemia a worhemmynnis dhe'n oferysi skoellya an lin war an prenn ha war an taklow gorrys warnodho.

²²Pan veu hemma gwrys, ha termyn re dremensa, ha pan splannas an howl hag o kudhys kyns gans kommol, tan meur a dhewis, may feu aneth dhe beub.

²³An oferysi a wrug pysadow, i hag oll esa ena, ha'n sakrifis ow leski, Yonathan a ledyas, ha'n re erell a worthybis, par dell wrug Nehemia.

²⁴An pysadow o herwydh an maner ma: ‘A Arloedh, Arloedh Duw, Kreador pup-tra, ty yw ownek ha nerthek hag ewn ha tregeredhus, ty unnsel yw an myghtern ha kuv,

²⁵ty unnsel yw hel, ty unnsel yw ewnhynsek hag ollgalloesek ha bythkwethek. Ty a selow Ysrael a bub drog; ty a dhewisas an tasow ha'ga sakra.

²⁶Kemmer an sakrifis ma a-barth dha bobel Ysrael ha gwith dha rann ha'y sakra.

²⁷Kuntell war-barth agan pobel skattrys, rydhha an re yw kethyon yn mysk an Jentilys, mir war an re yw deneghys ha dispresys, ha godhvydhes an Jentilys dha vos agan Duw.

²⁸Kessydh an re a arwask hag yw tont gans balghder.

²⁹Plans dha bobel y'th tyller sans, dell ambosas Moyses.’

³⁰Ena an oferysi a ganas an hymnys.

³¹Wosa bos kowlleskys taklow an sakrifis, Nehemia a worhemmynnis may fe diverys war veyn meur an lin o gesys.

³²Pan veu hemma gwrys, flamm a dhewis; mes pan dhastewynnas golow a-dhiworth an alter, difeudhys veu.

³³Pan dheuth an mater ma dhe vos godhvedhys, ha derivys veu dhe vyghtern an Persianys, an lin dhe omdhiskwedhas y'n tyller may kudhas an oferysi dhivres an tan, ganso may losksa Nehemia ha'y geskowetha taklow an sakrifis,

³⁴an myghtern a hwithras an mater, ha keas an tyller ha'y wul tyller sans.

³⁵An myghtern a dhegemmeras gobrow meur dhiworth an tyller ma, hag ev a's rannas gans an dus faverys ganso.

³⁶Nehemia ha'y geskowetha a henwis hemma 'nefthar' hag a styr purheans, mes gans an moyha rann a dus yth yw gelwys naftha.