Read Kernewek 2 Makkabeyon 12 Bible Online

2 Makkabeyon 12 - Kernewek bible

2 Makkabeyon 12

¹Pan veu gwrys an kevambos ma, Lysias a dhehwelis dhe'n myghtern, ha'n Yedhewon a omros aga honan dh'aga ammeth.

²Mes re an wovernours yn tylleryow divers, Timothi hag Apollonius mab Gennaeus, keffrys ha Hieronymus ha Demofon, hag ynwedh Nikanor kapten an soudoryon arvethys a Syprus, ny's gassons dhe vewa kosel hag yn kres.

³Ha tus a Yoppa a wrug gwrians ansans: i a elwis an Yedhewon esa trigys yn aga mysk dhe vos, gans aga gwragedh ha fleghes, war skathow re bareussens par dell nag esa drogvrys orth an Yedhewon;

⁴hemma a veu gwrys dre ragalev poblek an sita. Pan akseptsons, drefenn bos hwans dhedha bewa yn kres ha heb gogrysi travyth, tus Yoppa a's kemmeras yn-mes war an mor ha'ga beudhi, dhe'n lyha dew kans.

⁵Pan glewas Yudas a'n fellder gwrys dh'y geswlasoryon, ev a worhemmynnis dh'y wer,

⁶hag ow kelwel war Dhuw, an barner ewnhynsek, ev a omsettyas war voldroryon y neshevin. Ev a worras tan dhe'n porth nosweyth, leski an skathow ha gorladha an re a hwilsa skovva ena.

⁷Ena drefenn bos degeys yetow an sita, ev a gildennas, ow mynnes dehweles ha diwreydhya kemmynieth kowal Yoppa.

⁸Mes pan glewas bos hwans dhe bobel Yamnia y'n keth fordh distrui an Yedhewon esa trigys yn aga mysk,

⁹ev a omsettyas war bobel Yamnia yn nos ynwedh ha gorra tan y'n porth ha'n lu lestri, may feu gwelys golow an flammow yn Yerusalem, dew kans stadion ha dew-ugens alena.

¹⁰Pan vons gyllys alena moy es mildir, war aga heskerdh erbynn Timothi, pymp mil Arab dhe'n lyha gans pymp kans marghek a omsettyas warnedha.

¹¹Wosa batel gales, Yudas ha'y gowetha, gans gweres Duw, o budhek. An nomadyon fethys a bysis Yudas a ri y leuv dhyghow dhedha, owth ambos ri dhodho chatel ha'ga gweres y bobel yn fordhow erell.

¹²Yudas, owth aswonn i dhe vos dhe les yn lies fordh, a wrontyas dhedha kres; ha wosa degemmeres y ambosow i a dhehwelis dh'aga tyldow.

¹³Ev a omsettyas arta war neb unn sita o kerys yn krev gans kerweyth ha fosow, hag annedhys gans poblow a genedhlow divers. Hy hanow o Kaspin.

¹⁴An re esa a-ji, ow fydhya yn krevder an fosow hag yn provians aga boesow, a faras fest yn tiskortes dhe Yudas ha'y dus, ow karma orta ha'ga kabla ha leverel geryow ansans.

¹⁵Mes Yudas ha'y dus, ow kelwel war Sovran meur an bys, neb a dhomhwelis Yeriko yn dydhyow Yoshua heb hor'bennow na jynnow-bresel, a fyskas yn konneryek war an fosow.

¹⁶I a gemmeras an sita dre vodh Duw, ha ladha niverow heb rekna, mayth heveli lynn kevogas, kwarter mildir hy les, ow fenna gans goes.

¹⁷Wosa omdenna seyth kans stadion ha hanter-kans alena, i a dheuth dhe Karaks, dhe'n Yedhewon yw gelwys Toubianys.

¹⁸Ny gavsons Timothi y'n ranndir na, rag ev re dhibarthsa alena kyns henna heb kowlwul travyth, kyn hassa yn unn tyller bagas a soudoryon pur grev.

¹⁹Dositheus ha Sosipater, neb o kaptenyon yn-dann Makkabeus, eth yn-rag ha distrui an re a via gesys gans Timothi y'n dinas, moy es deg mil wour.

²⁰Mes Makkabeus a arayas y lu yn parsellow, ha settya gwer war an parsellow, ha fyski war-lergh Timothi, neb a'n jevo kans hag ugens mil droesek ha dew vil ha pymp kans marghek.

²¹Pan dhyskas Timothi bos Yudas ow tos nes, ev a dhannvonas an benynes ha'n fardellow dhe dyller gelwys Karnaym; rag an tyller na o kales dhe worra esedhva warnodho ha kales hedhas dhodho drefenn kulder an fordhow di.

²²Mes pan omdhiskwedhas kynsa parsell Yudas, euth hag own a dheuth war an eskar orth an omdhiskwedhyans dhedha anodho Ev neb a wel pup-tra. Yn aga fo i a fistenas sket yn pub tu, may fons goliys yn fenowgh gans aga gwer aga honan ha gwenys gans pigow agas kledhedhyow aga honan.

²³Yudas a jassyas war aga lergh war gamm, ow korra an beghadoryon dhe'n kledha, ha distrui bys yn deg mil warn ugens anedha.

²⁴Timothi y honan a goedhas yn leuv tus Dositheus ha Sosipater. Gans gil meur ev a's pysis dh'y asa mos dhe wari, drefenn bos ganso avel prisnoryon kerens a'n brassa rann anedha, ha'n vreder a nebes, ma na vedha diskwedhes dhedha mersi.

²⁵Ha pan afydhsa gans lies ger y ambos solem dh'aga restorya heb pystik, i a'n gasas dhe vos, rag sawya aga neshevin.

²⁶Ena Yudas eth yn-mes erbynn Karnaym ha tempel Atargatis, ha ladha pymp mil warn ugens a dus.

²⁷Wosa aga gorra yn deray ha'ga distrui, ev a geskerdhas ynwedh erbynn Efron, sita gerys le mayth esa trigys Lysias gans routh veur a bobel a bub kenedhlogeth. Gwer yowynk krev a sevis a-rag an fosow ha'ga defendya war gamm; hag yth esa ena proviansow meur a jynnow-bresel ha deghesennow.

²⁸Mes an Yedhewon a elwis war an Sovran neb a vrew galloes y eskerens gans y nerth, hag i a gemmeras an sita yn aga leuv, ha ladha pymp mil warn ugens anedha esa a-ji.

²⁹Alena i a fyskas dhe Skythopolis usi hwegh kans stadion a Yerusalem.

³⁰Mes pan dhustunias an Yedhewon trigys ena pobel Skythopolis dhe dhiskwedhes bolonjedh da dhedha ha'ga dyghtya yn kuv yn termyn aga anfeus,

³¹i a rassas dhedha owth ynnia warnedha bos kowethek dh'aga henedhel y'n termyn a dho ynwedh. Ena i eth dhe Yerusalem rag bos goel an seythunyow ow tos nes.

³²Wosa an goel gelwys Penkost, i a fyskas erbynn Gorgias, governour Idumea,

³³neb a dheuth yn-mes gans tri mil droesek ha peswar mil varghek.

³⁴Hag y hwarva yn aga omladh war-barth nebes an Yedhewon a goedhas.

³⁵Mes neb unn Dositheus, onan a wer Bakenor, esa ow marghogeth hag o gour krev, a gachyas Gorgias hag ow talghenna y vantell yth esa orth y dhraylya dhe-ves dre nerth y vregh, ow mynnes kemmeres an gour milligys yn few, pan dheuth onan a varghogyon Thrakia warnodho ha treghi y vregh yn-mes; ytho Gorgias a dhienkas ha fia dhe Marisa.

³⁶Drefenn bos Esdris ha'y dus owth omladh termyn hir ha gyllys skwith, Yudas a elwis war an Arloedh dhe omdhiskwedhes avel aga heffrysyas ha'ga hembrenkyas yn batel.

³⁷Ena yn y vammyeth ev a dhrehevis garm an vatel, gans hymnys; ena ev a omdheghesas erbynn tus Gorgias heb i dh'y arwodhvos, ha'ga gorra dhe'n fo.

³⁸Ena Yudas a guntellas y lu ha mos dhe sita Adullam. Yth esa an seythves dydh ow nesa, hag i a omlanhas herwydh an usadow, ha gwitha an sabot ena.

³⁹Ternos, dell via res, Yudas ha'y dus eth dhe gemmeres korfow an re a goedhsa ha'ga dri dhe wrowedha gans aga neshevin yn bedhow aga thasow.

⁴⁰Ena yn-dann grys peub a'n re varow i a gavas soenellow sakrys a idolyow Yamnia, yw difennys gans an lagha an Yedhewon dh'aga gwiska. Ha kler o dhe bubonan bos hemma an skila may koedhas an wer.

⁴¹Ytho i oll a vennigas fordhow an Arloedh, an Breusyas gwiryon, a dhisklos an taklow yw kudhys;

⁴²hag i a dreylyas dhe bysadow, ow pysi may fe leun dhileys an pegh re bia gwrys. Yudas nobyl a ynnias war an bobel omwitha rydh a begh, rag i re welsa gans aga lagasow aga honan an pyth a hwarvia yn siwyans pegh an re a goedhsa.

⁴³Ynwedh ev a guntellas mona dhiworth oll y wer, sommenn a dhew vil dhraghma arghans, ha'y dhannvon dhe Yerusalem dhe brovia offrynn pegh. Hag ow kul hemma ev a oberas yn pur dha hag yn enorys, ow kul vri a'n dasserghyans.

⁴⁴Rag mar ny wayttya an re a goedhsa sevel arta, y fia euver ha foll dhe bysi rag an re varow.

⁴⁵Mes mars esa ow mires orth an gober splann yw parys rag an re a gosk yn sansoleth, yth o preder sansel ha grassyes. Rakhenna ev a wrug dehwelyans rag an re varow, may fens livrys a'ga fegh.