Read Kernewek 2 Makkabeyon 13 Bible Online

2 Makkabeyon 13 - Kernewek bible

2 Makkabeyon 13

¹Y'n vlydhen kans naw ha dew-ugens,[8] ger a dheuth dhe Yudas ha'y dus bos Antioghus Ewpator ow tos gans lu meur erbynn Yudi,

²ha ganso Lysias, y withyas ha gwalader an governans. Hwath pella, yth esa dhedha lu grek a gans ha deg mil droesek, pymp mil ha tri hans marghek, dew olifans warn ugens ha tri hans charett ervys gans fylghyer.

³Menelaus a junyas gansa ynwedh ha gans falsuri pur ev a ynnias war Antioghus mos yn-rag, kammenn drefenn yeghes y wlas, mes drefenn ev dhe brederi y fedha fastys yn y soedh.

⁴Mes Myghtern an vyghternedh a dhifunas sorr Antioghus erbynn an bilen ma; ha pan dhiskwedhas Lysias dhodho bos an gour ma dhe gabla rag oll an poenvos, ev a worhemmynnis dhodho y gemmeres dhe Berea ha'y worra dhe'n mernans der an vaner usadow y'n tyller na.

⁵Rag yma tour ena, hanter-kans kevelin yn ughelder, leun a lusu, hag a'n jeves amal oll a-dro hag a bub tu a dhiyskynn yn serth dhe'n lusu.

⁶Ena i oll a herdh dhe dhistruans nebonan yw kablus a dhisakrans po galweythyow erell.

⁷Gans tenkys a'n par ma y hwarva may ferwis Menelaus dilagha, hwath heb ynkleudhyans y'n dor.

⁸Ha hemm o ewn yn tien; drefenn ev dhe wul lies pegh erbynn an alter mayth yw sans y dan ha'y lusu, ev a dhegemmeras y vernans y honan yn lusu.

⁹Yth esa an myghtern ow tos gans balghder barbarus dhe dhiskwedhes dhe'n Yedhewon taklow gweth yn feur es dell via gwrys yn termyn y das.

¹⁰Mes pan glewas Yudas hemma, ev a worhemmynnis dhe'n bobel gelwel war an Arloedh dydh ha nos, lemmyn moy es yn termyn vyth arall, may hweresso an re esa war verr spys dhe gelli aga lagha ha'ga gwlas ha'ga thempel sans,

¹¹ha na assa an bobel, re dhallathsa diskwitha rag tekken, koedha yn leuv an kenedhlow kablus.

¹²Ytho pan wrussons oll hemma war-barth ha pysi an Arloedh tregeredhus gans oelva ha penys ha growedha gans aga fas war an dor tri dydh heb hedhi, Yudas a ynnias warnedha ha gorhemmynna dhedha sevel parys.

¹³Wosa omgusulya yn privedh gans an henavogyon, ev a erviras kerdhes yn-mes ha previ an mater gans gweres Duw kyns lu an myghtern dhe entra Yudi ha bos perghennek an sita.

¹⁴Ytho, ow kommyttya an ervirans dhe Greador an bys hag owth ynnia war y luyow omladh yn hardh dhe'n mernans rag laghys an tempel, an sita, ha les an gemmynieth, ev a gampyas ogas dhe Modein.

¹⁵Ev a ros dh'y dus an ger-arwoedh ‘Budhogoleth Duw’, hag ow tewis lu a'n wer yowynk hartha, ev a omsettyas war dylda an myghtern yn nos ha ladha y'n kamp a-dro dhe dhew vil wour. Ev a wanas an penn-olifans ha'y lewyer.

¹⁶Wostiwedh i a lenwis an kamp gans euth ha tervans ha kildenna yn trygh.

¹⁷Hemma a hwarva poran orth dydh-tardh, drefenn gweres an Arloedh dhe vos skoes dhodho.

¹⁸An myghtern, wosa blasa bedhekter an Yedhewon, a assayas towl dhe hwithra aga savleow.

¹⁹Ev eth erbynn Beth-sur, kastell krev a'n Yedhewon: mes ev a veu treylys dhe-ves; ev a omsettyas arta, hag a veu fethys.

²⁰Yudas a dhannvonas dhe'n re esa a-ji pypynag o res.

²¹Mes Rhodokus, souder a renkow an Yedhewon, a ros derivadow kevrinek dhe'n eskar; ev a veu helghys, kechys ha gorrys yn prison.

²²An myghtern a negysyas an eyl weyth gans an bobel yn Beth-sur; ev a ros ha degemmeres ambosow, kildenna, omsettya erbynn Yudas ha'y dus hag a veu fethys.

²³Ev a glewas Felip, neb a via gesys avel gwalader an governans, dhe rebellya yn Antiogh; reudhys o, hag ev a elwis an Yedhewon, plegya dh'aga gorholedhow, ha gul ti dhe enora oll aga gwiryow. Ev a wrug akord gansa hag offrynna sakrifis, enora an sentri ha diskwedhes helder dhe'n tyller sans.

²⁴Ev a dhegemmeras Makkabeus yn hegar. Ena ev a apoyntyas Hegemonides avel governour an ranndir a Ptolemais bys Gerar,

²⁵ha mos dhe Ptolemais y honan. Tus Ptolemais o serrys gans an kevambos; yn hwir mar gonneryek ens may fynnens dilea y ambosow.

²⁶Lysias eth dhe'n arethva, ow kul an gwella defens a ylli. Ev a's perswadyas, aga hoselhe, ha gwaynya aga bolonjedh da, ha dehweles dhe Antiogh. Yndellma y happyas omsettyans ha kildennans an myghtern.