Read Kernewek 2 Makkabeyon 2 Bible Online

2 Makkabeyon 2 - Kernewek bible

2 Makkabeyon 2

¹Y'n kovadhow y kevir an profoes Yeremia dhe worhemmynna dhe'n re esa ow pos divres kemmeres rann a'n tan, dell veu kampoellys;

²ha'n profoes wosa ri dhedha an lagha, a dhyskas an re esa ow pos divres ma na ankoffens ordenansow an Arloedh, ha na vens ledys yn sowdhan yn aga brys ow kweles delowyow owr hag arghans ha'ga afinans.

³Ha gans geryow kehaval erell ev a ynnias warnedha, na dhibartha an lagha dhiworth aga holonnow.

⁴Ynwedh y'n keth kovadh yth erghis an profoes, wosa degemmeres dargan, an tabernakel ha'n argh dhe holya ganso, hag ev eth yn-mes dhe'n menydh may hwrussa Moyses mos ha gweles eretons Duw.

⁵Yeremia a dheuth ha kavoes annedh yn fow, hag ev a dhros di an tabernakel ha'n argh hag alter an ynkys; ena ev a geas an entrans.

⁶Re anedha hag a dhothya ganso a dhehwelis rag merkya an hyns, mes ny yllens y drovya.

⁷Pan dheuth Yeremia dhe wodhvos hemma, ev a's keredhis, ow leverel: ‘An tyller ma a worta anaswonnys bys pan guntell Duw y bobel war-barth ha diskwedhes y dregeredh.

⁸Ena an Arloedh a dhiskudh an taklow ma, ha golewder an Arloedh ha'n gommolenn a omdhiskwedh, par dell veu gwelys yn termyn Moyses, ha dell wovynnas Solomon may fo an tyller sakrys yn arbennik.’

⁹Disklerys veu ynwedh, Solomon yn y furneth dhe offrynna sakrifis rag sakrans ha kowlwrians an tempel.

¹⁰Par dell bysis Moyses dhe'n Arloedh, ha tan a dhiyskynnsa a nev ha kowlleski an sakrifisow, yndella ynwedh Solomon a bysis, ha'n tan a dhiyskynnas ha kowlleski an offrynnow leskys.

¹¹Ha Moyses a leveris, ‘Ny veu an ofrynn pegh dybrys, rag kowlleskys veu.’

¹²Yndella Solomon ynwedh a solempnyas an eth dydh.

¹³An keth taklow ma yw derivys yn kovadhow ha kovyow Nehemia. Par dell fondyas lyverva ha kuntell lyvrow a-dro dhe'n vyghternedh ha'n brofoesi, ha skrifow Davydh, ha lytherow an vyghternedh a-dro dhe rohow sakrys,

¹⁴y'n keth vaner ma Yudas ynwedh a guntellas oll an lyvrow re bia kellys drefenn an vresel re dhothya warnan, hag ymons yn agan perghennogeth.

¹⁵Ytho mars eus edhomm dhywgh anedha, dannvenewgh tus dh'aga hyrghes ragowgh.

¹⁶Ytho, a-ban on parys dhe solempnya an purheans, ni a skrif dhywgh. Da via ytho mar kwitthewgh an dydhyow ma.

¹⁷Duw yth yw neb re sawyas oll y bobel ha daskorr an eretons dhyn ni oll, ha'n myghternses ha'n oferyaseth ha'n sakrans,

¹⁸dell ambosas der y lagha. Govenek a'gan beus Duw dhe dhiskwedhes tregeredh warnan skon ha'gan kuntell a bub tyller yn-dann nev dhe'n tyller sans, rag ev a'gan livras a dhrogow meur ha purhe an tyller.

¹⁹Hwedhel Yudas Makkabeus ha'y vreder, ha purheans an tempel meur, ha sakrans an alter,

²⁰ha'n breselyow erbynn Antioghus Epifanes ha'y vab Ewpator,

²¹ha'n gwelesigethow a dheuth a nev dhe'n re a omladhas yn hardh rag yedhowieth, kynth o byghan aga niver, neb a gemmeras an tir oll ha helghya an routhow barbarus,

²²ha daswaynya perghennogeth a'n tempel, gerys-da dres oll an bys, ha livra an sita, hag asver an laghow esa yn peryll a vos dileys, ha'n Arloedh gans kuvder meur ow tos ha bos grassyes dhedha —

²³oll an taklow ma, settys yn-mes gans Yason a Kyrene yn pymp lyver, ni a assay berrhe yn unn lyver.

²⁴Rag my a welas an liv a rivow ynna ha'n kaletter dhe'n re a vynn mires yn derivadow istorek, drefenn myns meur an devnydh.

²⁵Ni re assayas plesya an re a vynn redya, dh'y wul es dhe'n re a vynn kevenna, ha bos dhe les dhe bub redyer.

²⁶An lavur a verrhe re omgemmersyn, nyns yw mater skav, mes onan a hwys ha koll kosk,

²⁷par dell nag yw es dhe neb a bareus gwledh ha hwilas prow re erell. Byttegyns rag surhe grasyans a lies ni a omgemmer an lavur yn lowen,

²⁸ow kasa dhe'n awtour y honan charj a'n manylyon poran, ha lavurya dhe holya elvennow an berrheans.

²⁹Rag dell vydh res dhe'n pennser gul vri a'n drehevyans oll, ny vydh res dhe neb a omgemmer y bayntyans ha'y afinans prederi marnas a'n pyth yw gwiw rag y dekheans; yndellma dhe'm breus vy yw an kas genen ni.

³⁰Yth yw dever an kynsa awtour sevel war an dor, dadhla taklow a bub tenewen, hag omdrobla gans an manylyon,

³¹mes neb a dhaswra an derivas a dal bos gesys dhe strivya rag berrheans ha goheles dyghtyans hir.

³²Omma ytho ni a dhalleth agan derivas, heb keworra namoy dhe'n pyth re beu leverys; rag y fia foll hirhe an raglavar ha treghi berr an istori y honan.