Read Kernewek 2 Makkabeyon 3 Bible Online

2 Makkabeyon 3 - Kernewek bible

2 Makkabeyon 3

¹Pan o an sita sans annedhys yn kres perfydh, ha'n laghow gwithys fest yn ta, drefenn sansoleth an arghoferyas Onias ha'y gas a dhrog,

²an vyghternedh aga honan a enoras an tyller hag afina an tempel gans rohow a'n gwella;

³hwath bys may porthas Selewkus myghtern Asia a'y dalasow y honan oll an kostow rag servis an sakrifisow.

⁴Mes unn Simon, a loeth Benyamin, neb re bia apoyntys kapten an tempel, a dhadhlas gans an arghoferyas a-dro dhe venystrans marghas an sita.

⁵A-ban na ylli gwarthevya war Onias, ev eth dhe Apollonius mab Tarsus, neb o governour Kelesyria ha Fenikia y'n termyn na,

⁶ha derivas dhodho bos an dresorva yn Yerusalem leun a sommow mona diniver, ma na yllys bos reknys myns an arghasow, ha nag ens ow tesedha gans akont an sakrifisow; mes y hyllys aga doen yn-dann awtorita an myghtern.

⁷Pan vetyas Apollonius gans an myghtern, ev a dhiskudhas dhodho an pyth a glewsa a-dro dhe'n arghans. An myghtern a dhewisas Heliodorus y bennvenyster, ha'y dhannvon gans gorhemmynnow dhe dhri dhodho an arghans ragleverys.

⁸Heliodorus eth yn-kerdh distowgh war y vyaj gans an ragskeus a wul tro hwithrans a'n sitys a Kelesyria ha Fenikia, mes yn gwiryonedh dhe gowlwul towl an myghtern.

⁹Pan dheuth dhe Yerusalem, ha wosa bos wolkommys yn kuv gans arghoferyas an sita, ev a gewsis a-dro dhe'n disklosyans re bia gwrys, ha derivas prag y tothya, ha govynn mars o an traow ma gwir.

¹⁰An arghoferyas a leveris dhodho bos nebes arghasow gorrys a-denewen rag gwedhwesow hag omdhivasow,

¹¹hag ynwedh pythow Hyrkanus mab Tobias, gour a reowta meur. Ny veu an mater par dell lavarsa Simon didhuw; an sommenn gowal o peswar kans talent a arghans, ha dew gans talent a owr.

¹²Hag yn-medh ev nag o possybyl mann dregynn dhe vos gwrys dhe'n dus re goelsa yn sansoleth an tyller, hag yn meneghi antorradow an tempel, enorys der an bys oll.

¹³Mes Heliodorus, drefenn gorhemmynnow an myghtern dhodho, a leveris bos res dri an arghans yn neb kas yn tresorva an myghtern.

¹⁴Ytho ev a apoyntyas dydh ha mos a-ji dhe gevarwoedha hwithrans an arghasow ma. Y feu ahwer nag o byghan der an sita oll.

¹⁵An oferysi a goedhas dhe'n dor a-rag an alter yn aga dillas oferyasek ha gelwel war-tu ha nev, war ev neb re wrug lagha a-dro dhe taklow gorrys yn arghow, ma's gwittho saw rag an re a's gorras ena.

¹⁶Seul a welas semlans an arghoferyas o trogh y golonn, rag y fas ha treylyans y liw a dhiskwedhas angoes y enev.

¹⁷Rag euth ha kren an korf re dhothya war an gour, hag apert o an dolor a'n jevo yn y golonn dhe'n re a viras orto.

¹⁸Ynwedh tus a fistenas yn-mes a'ga chiow yn routhow rag gul pysadow kemmyn drefenn bos an tyller sans dhe vos dres yn disenor.

¹⁹Benynes, grogysys gans yskar yn-dann aga bronnow lomm, a dheuth y'n stretow yn routhow. Re a'n benynes yowynk gwithys a-ji a boenyas dhe'n darasow, ha re anedha dhe'n tohow, ha re erell a gykis yn-mes a'n fenestri.

²⁰Hag owth ystynn aga diwleuv tu ha nev, peub a wrug aspysadow.

²¹Truedhek o gweles an routh a bub eghenn koedhys dhe'n dor, ha gweles own an arghoferyas yn y angoes meur.

²²Pan esens ow kelwel war an Arloedh Ollgalloesek rag gwitha saw ha sur an arghasow rag an re a's gorras ena,

²³Heliodorus a besyas gul an pyth re bia ervirys.

²⁴Mes pan dheuth dhe'n dresorva gans y withysi, poran y'n termyn na Rewler an spyrysyon ha pub galloes a wrug diskwedhyans meur may feu sowdhenys gans nerth Duw oll an re re bia hardh lowr dhe dhos ganso, hag i a glamderas gans euth.

²⁵Rag yth omdhiskwedhas dhedha margh, splann y herness, ha marghek grysel y wedh war y geyn; ev a fyskas yn konneryek erbynn Heliodorus ha gweskel orto gans y garnow a-rag. Marghek an welesigeth o wiskys yn leun-arvwisk a owr.

²⁶Dew wour yowynk a omdhiskwedhas dhodho ynwedh, marthys krev, a dekter gloryus, ha gwiskys yn splann. I a sevi a bub tenewen anodho ha'y gastiga heb lett, ow ri lies skwatt warnodho.

²⁷Heliodorus a goedhas a-dhesempis dhe'n leur ha tewlder down a dheuth warnodho. I a'n kemmeras yn-bann, ha'y worra war ravath,

²⁸ha'y dhoen dhe-ves — an den ma re entersa nammnygen an dresorva ragleverys gans koskordh meur ha'y withysi oll mes lemmyn heb galloes omweres. I a aswonnis yn kler sovraneth Duw.

²⁹Ev a wrowedhas ena dilavar, drefenn an gwrians duwel ha heb govenek vytholl a dhelivrans.

³⁰Yth esen ow kormel an Arloedh rag an ober barthusek a wrug yn y dyller sans y honan. Ha'n tempel, o lenwys a own hag ankres termyn berr kyns, a veu lenwys gans heudh ha lowender, drefenn an Arloedh Ollgalloesek lemmyn dhe omdhiskwedhes.

³¹Hag yn skon re a gowetha Heliodorus a bysis Onias dhe elwel war an Ughella may hwrontya bewnans dhe'n gour a'y wrowedh orth y dhiwettha anall.

³²Ytho an arghoferyas, ow perthi own an myghtern dhe gammdybi bos trayson gwrys dhe Heliodorus gans an Yedhewon, a offrynnas sakrifis rag yeghes an gour.

³³Pan esa an arghoferyas ow kul dehwelyans, an keth dew wour yowynk a omdhiskwedhas arta dhe Heliodorus gwiskys y'n keth dillas, hag i a sevis ha leverel, ‘Bydh synsys meur dhe Onias an arghoferyas, a-ban wrontyas an Arloedh dhis dha vewnans a'y wovis.

³⁴Ha ty, neb re beu kastigys gans nev, gwayt derivas dhe beub nerth meuredhek Duw.’ Wosa leverel hemma i eth mes a wel.

³⁵Ena Heliodorus a offrynnas sakrifis dhe'n Arloedh ha gul ambosow meur dhe Selwyas y vewnans, ha wosa leverel farwell dhe Onias, ev a geskerdhas gans y soudoryon dhe'n myghtern.

³⁶Ev a dhustunias dhe beub a-dro dhe wriansow an Duw ughella, hag a welas gans y lagas y honan.

³⁷Pan wovynnas an myghtern orth Heliodorus py par den a vedha gwiw dhe dhannvon war negys arall dhe Yerusalem, ev a worthybis,

³⁸‘Mara'th eus eskar po braser erbynn dha wovernans, dannvon ev ena, rag ty a'n daskemmer kastigys yn leun, mar tienk gans y vewnans; rag y'n tyller na, heb dhout, yma neb nerth arbennik a Dhuw.

³⁹Rag ev neb a'n jeves y drigva yn nev a woel war an tyller na y honan, ha dri gweres dhodho, hag ev a wysk ha distrui an re a dheu dh'y bystiga.’

⁴⁰Hemm o siwyans hwedhel Heliodorus ha gwithyans an dresorva.