Read Kernewek 2 Makkabeyon 4 Bible Online

2 Makkabeyon 4 - Kernewek bible

2 Makkabeyon 4

¹An Simon ragleverys, neb re rossa derivadow a-dro dhe'n arghans erbynn y wlas y honan, a sklandras Onias, ow leverel ev dhe vos ev neb re ynnisa war Heliodorus ha bos kaws gwir an anfeus.

²Ev a vedhas henwel avel braser erbynn an governans an gour o masoberer a'n sita, difresyas y geswlasoryon, ha diwysyk rag an laghow.

³An kas a dheuth ha bos mar vras may feu gwrys moldransow gans onan a holyoryon len Simon,

⁴Onias a welas peryll a'n kenkians ma, ha bos Apollonius mab Menestheus, governour Kelesyria ha Fenikia, ow kluwhe atti Simon.

⁵Ytho ev eth dhe'n myghtern, heb kuhudha y geswlasoryon mes ow mires orth les oll an bobel, ha poblek ha privedh.

⁶Rag ev a welas na dheffa dhe studh hebask arta negysyow an stat heb ragbreder an myghtern, ha na hettha Simon y follenep.

⁷Pan verwis Selewkus, hag Antioghus, gelwys Epifanes, a gemmeras an vyghterneth, Yason broder Onias a gavas an arghoferyaseth dre legras,

⁸owth ambosa dhe'n myghtern yn petishyon tri hans ha tri-ugens talent a arghans ha peswar-ugens talent a fenten arall.

⁹Dres hemma ev a ambosas pe kans ha hanter-kans moy mar pe res kummyas dhe fondya yn-dann y awtorita gymnasium rag adhyskans gwer yowynk, ha dhe govskrifa tus Yerusalem avel Antioghysi.

¹⁰Pan assentyas an myghtern ha Yason a dheuth yn y soedh, ev a dreylyas y geswlasoryon dhe fordh a vewnans grek.

¹¹Ev a worras a-denewen an gwiryow ryel rag Yedhewon, grontys dre Yowann tas Ewpolemus, neb eth avel lyskannas rag selya kowethyans ha keffrysyans gans an Romanyon. Ev a dhistruis an fordhow laghel a vewnans ha kommendya devosow nowydh konter dhe'n lagha.

¹²Toeth da ev a fastyas gymnasium poran orth troes tour an sita, hag ev dhynyas bryntinna an wer yowynk gwiska an petasus.[3]

¹³Hellenieth a dheuth dhe'n pella prykk dre gressyans fordhow estren, drefenn drogedh outrayus Yason didhuw, na veu arghoferyas gwir vytholl,

¹⁴ma na veu an oferysi na fella lel dh'aga servis orth an alter. Ow tispresya an sentri ha logh a-dro dhe'n sakrifisow, i a fistenas dhe gemmeres rann yn gweythresow anlaghel an palaestra wosa klewes an sinell rag tewlel an diskus,

¹⁵heb gul vri a'n enors settys gans aga thasow mes ow synsi enorys grek gwella oll.

¹⁶Drefenn hemma anfeusi poes a dheuth warnedha, ha'n re a garens hag a vynnens gul war aga lergh yn tien a dheuth ha bos aga eskerens ha'ga hessydhya.

¹⁷Nyns yw tra skav kammdremena erbynn lagha Duw — dell vydh klerhes gans hwarvosow a-wosa.

¹⁸Pan esa an gwariow pympblydhenyek ow pos synsys yn Tyr yn lok an myghtern,

¹⁹an Yason vil a dhannvonas kannasow, dewisys avel burjysi Antiogh dhiworth Yerusalem, dhe dhoen tri hans draghma arghans rag sakrifis dhe Herkules. Hwath degoryon an arghans a grysi nag o gwiw y dhevnydhya rag sakrifis, mes gwell via y spena rag porpos arall.

²⁰Ytho kyn fynnas an dannvoner an arghans ma dhe vos devnydhys rag sakrifis dhe Herkules, dre ervirans an dhegoryon y feu devnydhys rag drehevel gorholyon roevel teyr-res.

²¹Pan veu Apollonius mab Menestheus dannvenys dhe Ejyp rag kurunans Filometor avel myghtern, Antioghus a dhyskas Filometor dhe vos ha bos eskarek dh'y les. Ytho ev a ombareusis rag y sawder y honan, ha mos dhe Yoppa, hag ena ev a besyas dhe Yerusalem.

²²Ev a veu wolkommys gans ryelder meur gans Yason ha'n sita, ha degemmerys a-ji gans faglennow ha garmow. Ena ev a geskerdhas gans y lu bys yn Fenikia.

²³Teyr blydhen a-wosa Yason a dhannvonas Menelaus broder an Simon ragleverys dhe dhoen mona dhe'n myghtern ha dhe gollenwel erviransow war negysyow a res.

²⁴Mes ev, pan veu dres yn lok an myghtern, a'n gormolas gans semlans a awtorita, ha kavoes an arghoferyaseth ragdho y honan, ow profya tri hans talent a arghans moy es Yason.

²⁵Wosa degemmeres gorhemmynn an myghtern ev a dhehwelis heb dri teythi gwiw dhe'n arghoferyaseth, mes ganso temper poeth a durant fell ha konnar goedhvil gwyls.

²⁶Ytho Yason, wosa diswul y vroder y honan, a veu diswrys gans gour arall, hag ev a veu fesys avel fowesik bys yn pow Ammon.

²⁷Kyn pesyas Menelaus yn y soedh, ny beas bythkweyth an arghans ambosys dhe'n myghtern.

²⁸Pan besyas Sostratus, kapten an tour, govynn talas — rag kuntell an doll o y dhever — an dhew a veu gelwys a-rag an myghtern drefenn an dra ma.

²⁹Menelaus a asas Lysimaghus y vroder y honan avel isarghoferyas, ha Sostratus a asas Krates, kapten soudoryon Syprus.

³⁰Y'n tor' ma, tus Tarsus ha Mallus a rebellyas, drefenn bos res aga sitys dhe Antioghis, iswreg an myghtern.

³¹Ytho an myghtern eth yn unn fyski dhe dhiserri an ahwer, ow kasa yn y le Andronikus, onan a'n soedhogyon ughel.

³²Mes Menelaus, ow tybi bos ganso chons gwiw, a ladras re a lestri owr an tempel ha'ga ri dhe Andronikus; lestri erell, dell hwarva, ev re werthsa dhe Tyr ha sitys kevogas.

³³Pan dhyskas Onias yn leun an taklow ma, ev a omdennas dhe dyller a veneghi yn Dafne, ogas dhe Antiogh, ha'y guhudha.

³⁴Rakhenna Menelaus, ow kemmeres Andronikus dhe denewen, a ynnias warnodho ladha Onias. Andronikus a dheuth dhe Onias, ha porposys dhe wul toell, ev a dhos tiow ow ri dhodho y leuv dhyghow; hag yn spit dh'y wogrys ev a'n dynyas dhe dhos yn-mes a'n meneghi; ena, heb gul vri a wirvreus, ev a'n ladhas dison.

³⁵Rakhenna nyns o duwenys ha displesys an Yedhewon hepken, mes ynwedh lies a genedhlow erell, drefenn moldrans anewn an gour.

³⁶Pan dhehwelis an myghtern a-dhiworth ranndir Silisia, Yedhewon an sita a elwis warnodho a-dro dhe voldrans anresnadow Onias, ha'n Grekys ynwedh o kevrennek gansa yn aga has a'n hager-ober.

³⁷Ytho Antioghus o duwenys yn y golonn ha lenwys a druedh, hag a oelas drefenn temprans ha fara da an den marow.

³⁸Y gonnar a dhewis, ha distowgh ev a dhestryppyas goen purpur Andronikus, ha terri y dhillas a-dhiwarno; ena ev a'n hembronkas a-dro dhe oll an sita dhe'n keth tyller may hwrug an outray erbynn Onias, hag ena ev a ladhas an moldrer. Yndellma an Arloedh a attylis dhodho gans an kessydhyans a dhendilas.

³⁹Pan via gwrys lies disakrans y'n sita gans Lysimaghus, skoedhys gans Menelaus, ha pan veu lesys an derivas a-dro, an bobel a omguntellas erbynn Lysimaghus, drefenn bos meur a'n lestri a owr ledrys seulabrys.

⁴⁰Rag bos routhow an werin amovys lemmyn ha lenwys a sorr, Lysimaghus a ervys a-dro dhe dri mil dhen ha lonchya omsettyans anewn, hembrenkys gans neb unn Awranus, den avonsys yn y vlydhynyow, ha nag o le avonsys yn follenep.

⁴¹Mes pan welas an Yedhewon bos Lysimaghus owth omsettya er aga fynn, re anedha a gemmeras meyn, re a gemmeras fustow a brenn, ha re erell dornasow lusu, ha'ga thewlel oll war-barth yn hwyls orth Lysimaghus ha'y dus.

⁴²Yndellma i a bystigas meur anedha, ha ladha re, ha fesya oll an remenant; lader an tempel y honan i a ladhas ogas dhe'n dresorva.

⁴³Kuhudhansow a veu dres erbynn Menelaus a-dro dhe'n hwarvos ma.

⁴⁴Pan dheuth an myghtern dhe Tyr, tri den dannvenys gans an senedh a bledyas an ken a-ragdho.

⁴⁵Mes Menelaus, fethys dell o lemmyn, a ambosas falswober meur dhe Ptolomeus mab Dorymenes dhe dhynya an myghtern.

⁴⁶Ytho Ptolomeus, ow kemmeres an myghtern a-denewen yn portal, par dell o rag ayr yagh, a wrug dhe'n myghtern treylya y vrys.

⁴⁷Menelaus, kaws an ahwer oll, ev a livras a bub charj er y bynn, mes ev a dhannvonas dhe'n mernans an wer anfeusik neb a via rydhhes andhampnys mar pledsens hwath a-rag Skythysi.

⁴⁸Ha'n re re gewssa rag an sita ha'n bobel ha'n lestri sans a wodhevis hware kessydhyans anewn.

⁴⁹Ytho hwath an Tyrysi, ow tiskwedhes aga has a'n drogober, a brovias ragdha ynkleudhyans splann.

⁵⁰Mes Menelaus, drefenn krefni an re yn galloes, a besyas bos yn y soedh, owth ynkressya yn atti, wosa dos ha bos an arghvraser erbynn y geswlasoryon.