Read Kernewek 2 Makkabeyon 5 Bible Online

2 Makkabeyon 5 - Kernewek bible

2 Makkabeyon 5

¹A-dro dhe'n termyn ma Antioghus a bareusis y nessa kaskyrgh erbynn Ejyp.

²Hag y hwarva, rag ogas ha dew-ugens dydh, yth omdhiskwedhas war oll an sita, marghogyon yn dillas a vrosweyth owr ow poenya der an ayr, yn luyow leun ervys gans guwow ha gans kledhedhyow tennys,

³ha luyow marghogyon arayys yn aga rewyow, owth omladh ha gorthomladh an eyl erbynn y gila, palster a wuwow, ow tenna kledhedhyow, ow tewlel sethow, dewynn tegynnow owr, hag arvwisk a bub eghenn.

⁴Ytho pubonan a bysis an welesigeth dhe vos koel dha.

⁵Pan veu kyhwedhlys bos marow Antioghus, Yason a gemmeras na le es mil wour ha gul omsettyans war an sita. Pan veu fesys an soudoryon war an fos ha'n sita wortiwedh ogas daskemmerys, Menelaus a fias arta a-ji dhe'n tour.

⁶Mes Yason a besyas ladha y geswlasoryon y honan yn tibita, heb aswonn bos siwena orth kost an neshevin an brassa falladow; ev a dhesevas an vudhogoleth dhe vos gwaynys war y eskerens a-der war y geswlasoryon.

⁷Ny wrug ev, byttegyns, gwaynya maystri a'n governans; y'n diwedh ny'n jeva marnas diras a'y dhroktowl, hag ev a fias arta dhe bow an Ammonysi.

⁸Wor'tiwedh ev a'n jeva diwedh galarek. Kuhudhys a-rag Aretas rewler an Arabyon, ow fia a sita dhe sita, helghys gans pub den oll, kesys avel negedhys erbynn an laghow, ha kasadow avel eskar dh'y vro ha dh'y geswlasoryon, ev a veu fesys bys yn Ejyp.

⁹Ena ev neb a fesyas lies a'ga thir aga honan yn divroedh a verwis yn tir estren, wosa mos yn-bann bys yn pow an Lakedemonysi ha govenek dhodho kavoes gweres drefenn aga bos neshevin.

¹⁰Ev neb re dowlsa lies yn-mes dhe wrowedha heb bedh ny'n jeva nagonan dhe gyni ragdho; ny'n jeva ynkleudhyans a eghenn vyth na tyller yn bedh y dasow.

¹¹Pan dheuth dhe'n myghtern nowodhow a'n pyth a hwarva, ev a dybis bos Yudi ow rebellya. Ytho konneryek y vrys, ev a asas Ejyp ha kemmeres an sita dre nerth arvow.

¹²Ev a worhemmynnis dh'y soudoryon treghi dhe'n dor pubonan a vetsons, ha ladha an re a dhienkas dh'aga chiow.

¹³Ena yth esa ladhva a yowynk ha hen, distruyans mebyon, benynes ha fleghes, ha difeudhans mowesi yowynk ha babanes.

¹⁴A-ji dhe dri dydh peswar-ugens mil a veu distruys, dew-ugens mil yn omladh, ha dhe'n lyha kemmys gwerthys yn kethneth dell via ledhys.

¹⁵Ny veu na hwath lowen, mes Antioghus a vedhas entra y'n sansa tempel y'n bys, gidys gans Menelaus neb re bia traytour dhe'n laghow ha dh'y vro.

¹⁶Ev a gemmeras an lestri sans gans y dhiwleuv dhefolys, ha ri dhe-ves gans diwleuv ansans an rohow sakrys gwrys gans myghternedh erell rag moghhe glori hag enor an tyller.

¹⁷Antioghus o goethus yn y spyrys, ha ny brederis bos serrys an Arloedh rag pols drefenn peghosow an re esa trigys y'n sita, ha bos hemma an skila na wre vri a'n tyller sans.

¹⁸Mes mar ny hwarva aga bos omvyskys yn lies pegh, an den ma a vedha kastigys ha treylys a'y wrians diswar kettell dheuth yn-rag, kepar dell veu Heliodorus, a veu dannvenys gans Selewkus dhe hwithra an dresorva.

¹⁹Mes ny dhewisas an Arloedh an genedhel a-barth an tyller sans, mes an tyller a-barth an genedhel.

²⁰Ytho an tyller y honan a gevrennas y'n anfeus a goedhas war an genedhel, hag a-wosa ev a gemmeras rann yn y feus da; ha'n pyth o eskesys yn sorr an Ughella a veu daskorrys arta yn oll y wolewder pan veu unnverhes an Arloedh meur

²¹Ytho Antioghus a dhug etek kans talent a-dhiworth an tempel, ha fyski bys yn Antiogh, ow tybi yn y valghder y hylli goelya war an tir ha kerdhes war an mor, drefenn y vrys howtyn.

²²Ev a asas governours dhe arwaska an bobel: yn Yerusalem, Felip, genesik a Frygia, hag yn gnas moy barbarus es an den a'n apoyntyas;

²³hag yn Gerizim, Andronikus; ha keffrys Menelaus, gweth ages an re erell, neb a lordyas war y geswlasoryon. Yn y atti war-tu an Yedhewon,

²⁴Antioghus a dhannvonas Apollonius, kapten an Mysianys, gans lu a dew vil warn ugens, ha gorhemmynn dhodho ladha pub gour tevys dhe oes ha gwertha an benynes ha'n vebyon avel kethyon.

²⁵Pan dheuth an gour ma yn Yerusalem, ev a omwrug bos den a gres ha gortos bys yn dydh sans an sabot; ena ow kavoes nag esa an Yedhewon owth oberi, ev a erghis dh'y soudoryon kemmeres aga arvow yn-bann ha keskerdhes.

²⁶Ev a worras dhe'n kledha pubonan a dheuth yn-mes dh'aga gweles; ena ev a fyskas y'n sita gans y vreselysi ervys ha ladha niverow meur a dus.

²⁷Mes Yudas Makkabeus, gans naw arall po a-dro, a dhienkas dhe'n gwylvos, ha triga y'n menydhyow avel an enyvales gwyls gans y gowetha; i a besyas bewa orth losow hepken, rag omwitha dhiworth defolans.