Read Kernewek 2 Makkabeyon 9 Bible Online

2 Makkabeyon 9 - Kernewek bible

2 Makkabeyon 9

¹A-dro dhe'n termyn na, dell hwarva, Antioghus re gildennsa yn disenor a bow Persia.

²Ev re dhothya a-ji dhe sita henwys Persepolis hag assaya bylla an templow ha gul maystri war an sita. Ytho an bobel a fistenas dhe omdhefendya gans arvow, hag Antioghus ha'y lu a veu fethys, may feu Antioghus gorrys dhe'n fo gans an annedhysi ha kila gans meth.

³Pan esa ogas dhe Ekbatana nowodhow a dheuth dhodho a'n pyth a hwarva dhe Nikanor ha luyow Timothi.

⁴Kwoffys gans konnar, ev a dybi diella war an Yedhewon an pystik gwrys gans an re a'n gorras dhe'n fo; ytho ev a worhemmynnis dh'y jaretter lewya heb hedhi bys pan worfenna an vyaj. Mes barn nev a'n siwyas! Rag yn y valghder ev a leveris, ‘Pan dhov di my a wra Yerusalem ynkleudhva gemmyn dhe'n Yedhewon.’

⁵Mes an Arloedh neb a wel pup-tra, Duw Ysrael, a'n gweskis gans pla anwelys, na yllys y yaghhe. Kettell astelas y gows gloes a'n kemmeras y'n kolodhyon heb difresyans dhodho, ha gans torment gluw pervedhel;

⁶ha pur ewn o henna, rag ev dhe dormentya kolodhyon tus erell gans lies torment ankoth.

⁷Byttegyns ny astelas y donteth kammenn vyth, mes hwath moy lenwys veu a valghder, owth anella tan yn y sorr erbynn an Yedhewon, hag ow ri arghadow dhe lewya hwath uskissa. Hag yndella y hwarva ev dhe goedha yn-mes a'y jaret dell esa ow fyski yn-rag, hag a feu an koedh mar gales may paynyas pub esel a'y gorf.

⁸Ytho ev, neb a grysi termyn berr kyns yn y valghder a-ugh studh mab-den ev dhe alloes gorhemmynna dhe donnow an mor, hag a dybi ev dhe alloes poesa an menydhyow ughel yn mantol, a veu tewlys dhe'n dor ha degys yn gravath, ow kul galloes Duw hewel dhe beub.

⁹Hag yndellma pryves a hesyas war gorf an gour ansans, hag ev hwath yn few yn angoes ha gloes y gig a bedras, ha drefenn an fler oll an lu a dhivlasas orth y besogeth.

¹⁰Drefenn an fler anporthadow ny ylli denvyth doen an gour re gryssa termyn berr kyns y hylli tochya ster an nev.

¹¹Ena ytho, terrys y spyrys, ev a dhallathas gasa y valghder ha dos dh'y skians yn-dann skorja Duw, rag y vos tormentys gans payn pub pols.

¹²Ha pan na allas perthi y fler y honan, ev a leveris an geryow ma, ‘Ewn yw bos gostydh dhe Dhuw; ny dal dhe dhenses marwel tybi y vos par dhe Dhuw.’

¹³Ena an gwas kasadow a wrug ambos orth an Arloedh, neb na vynnas kemmeres truedh warnodho na fella, ow leverel,

¹⁴ev dhe livra an sita sans may fia ow fistena dhedhi dh'y levna dhe'n leur ha gul ynkleudhva gemmyn;

¹⁵ha'n Yedhewon, na vreusi gwiw dhe vos ynkleudhys, mes dhe vos tewlys yn-mes gans aga fleghes rag an goedhviles ha'n ydhyn dh'aga dybri, ev a's gwre oll par dhe vurjysi Athenys;

¹⁶ha'n sentri sans a byllsa seulabrys, ev a vedha orth hy afina gans offrynnow a'n tekka; ha daskorra oll an lestri sans, gans lies moy; ha provia an kostow rag an sakrifisow a'y arghasow y honan;

¹⁷ha keffrys ha hemma ev a vedha ow tos ha bos Yedhow y honan, ha mos dhe bub tyller annedhys dhe dheklarya galloes an Arloedh.

¹⁸Mes pan na lehas y wodhevyansow yn fordh vytholl, rag barn Duw re dhothya yn ewn warnodho, ev a hepkorras pub govenek ragdho ev y honan ha skrifa dhe'n Yedhewon an lyther a siw, yn furv aspysadow, war-lergh an vaner ma.

¹⁹‘Dh'y vurjysi wiw Yedhowek, Antioghus aga myghtern ha kaslewydh a dhannvon gorhemmynnadow kolonnek ha bolonjedh da rag aga yeghes ha siwena.

²⁰Re bo hwi ha'gas fleghes yn poynt da, ha'gas negysyow par dell vynnowgh. Dell usi ow govenek y'n nev,

²¹my a berth kov gans hegaredh a'gas enor dhymm ha'gas bodh da. Pan dhehwelis a ranndir Persia, my a wodhevis kleves ankensi, ha barna bos edhomm prederi orth sawder kemmyn pubonan.

²²Nyns ov digolonnek y'm yeghes, rag govenek bras a'm beus diank a'm kleves,

²³mes owth ombrederi ow thas ynwedh, pan esa owth hembronk lu y'n tiryow ughel dhe apoyntya her,

²⁴ma na ve troblys tus an wlaskor, mar hwarva neppyth anwaytys po mar teuth nowodhow anfeusik, rag i dhe wodhvos dhe biw y fedha gesys an governans.

²⁵Keffrys my a gonvedh fatell wra an bennsevigyon y'n ordiryow ha kentrevogyon ow gwlaskor pesya hwilas chonsyow ha gortos dhe weles pandr'a hwer. Ytho my re apoyntyas ow mab Antioghus dhe vos myghtern, neb a fydhis ynno ha'y gommendya dhe'n brassa rann ahanowgh pan fyskas dhe'n rannvroyow ughella; ha my re skrifas dhodho an pyth yw skrifys omma.

²⁶My a ynni warnowgh ytho ha'gas pysi perthi kov a'n difresow re wrug vy dhywgh yn kemmyn, hag onan hag onan, ha may pessyo pub den lel dhymmo vy ha dhe'm mab.

²⁷Rag my yw sur ev dhe holya ow brys ha'gas dyghtya gans temprans ha kuvder.’

²⁸Ytho an moldrer ha blasfemer, wosa godhevel duwon a'n moyha tynn, par dell dhyghtsa re erell, a dheuth dhe dhiwedh y vewnans dre denkys truedhek, yn mysk an menydhyow yn tir estren.

²⁹Ha Felip, onan a'y lyswesyon, a dhug y gorf dhe dre; ena, owth owna mab Antioghus, ev a gildennas dhe Ptolemi Filometor yn Ejyp.