Read Kernewek 2 Esdras 1 Bible Online

2 Esdras 1 - Kernewek bible

2 Esdras 1

¹Lyver[1] an profoes Ezra, mab Seraya, mab Azaria, mab Hilkia, mab Shallum, mab Sadok, mab Ahitub,[2]

²mab Ahiya, mab Finehas, mab Eli, mab Amaria, mab Azaria, mab Merayoth, mab Arna, mab Uzzi, mab Borith, mab Abishua, mab Finehas, mab Eleazar,

³mab Aron, a loeth Levi, a veu keth yn rannvro an Medys, yn reyn Artakserkses myghtern an Persianys.

⁴Ger an Arloedh a dheuth dhymm, ow leverel,

⁵‘Ke, ha diskwedh dhe'm pobel aga hammweythresow, ha dh'aga mebyon an drogoberow a wrussons er ow fynn, may teriffons dhe fleghes aga fleghes,

⁶y hwrug peghosow aga thasow kressya ynna, rag i re'm ankovas, hag offrynna dhe dhuwow astranj.

⁷A nyns yw my neb a's dros yn-mes a bow Ejyp, yn-mes a'n chi a gethneth? Mes i re'm gwrug dhe serri, ha despitya ow husulyow.

⁸Torr ytho an gols a'th penn, ha towl pub droktra warnedha, rag nyns ens i gostydh dhe'm lagha; pobel a rebellyans yns.

⁹Pes termyn y hwrav vy aga ferthi, may hwrugavy dhedha kemmys dader?

¹⁰Lies myghtern a dhomhwelis a'ga govis; my a weskis Faro war-barth gans y servysi ha'y lu kowal.

¹¹My re dhistruis pub kenedhel a-ragdha, hag y'n howldrevel my re skattras an poblow a dhiw rannvro, Tyr ha Sidon, ha ladha oll aga eskerens.

¹²‘Ty kows dhedha ytho, ha lavar, Yndellma y lever an Arloedh :

¹³Sur, my yth o neb a'gas hembronkas der an mor, ha wrug fordhow saw ragowgh; my a ros Moyses dhywgh avel ledyer, hag Aron avel oferyas.

¹⁴My a brovias golow dhywgh dre goloven a dan, ha gul marthusyon bras yn agas mysk. Mes hwi re'm ankovas, yn-medh an Arloedh.

¹⁵‘Yndellma y lever an Arloedh Ollgalloesek: An rynki a veu tokyn dhywgh; my a ros dhywgh kampow dh'agas gwitha saw, hag ynna hwi a grodhvolas.

¹⁶Ny lowenhasowgh y'm hanow vy drefenn distruyans agas eskerens, mes bys y'n jydh hedhyw hwi a grodhvol heb hedhi.

¹⁷Ple'ma an masoberow a wrug vy dhywgh? Pan y'gas bo nown ha syghes y'n gwylvos, a ni wrussowgh kria dhymm

¹⁸ow leverel, “Prag y'gan dresys bys y'n gwylvos ma, dh'agan ladha? Gwell via ragon servya an Ejyptianys, es merwel y'n gwylvos ma.”

¹⁹Grevys veuv orth agas hanasow, ha my a ros dhywgh manna rag boes; hwi a dhybris bara eledh.

²⁰Pan y'gas bo syghes, a ny dorras vy an garrek, ha dowrow pals a frosas yn-mes? Rag an toemmder my a'gas kudhas gans del gwydh.

²¹My a rannas an tiryow feyth dhywgh, my a fesyas an Kananysi, an Perizzysi ha'n Filistysi a-ragowgh. Pandr'a moy a allav vy y wul ragowgh? yn-medh an Arloedh.

²²Yndellma y lever an Arloedh Ollgalloesek: Pan esowgh y'n gwylvos, orth an gover hwerow, ha dhywgh syghes, ow plasfemya ow hanow,

²³ny dhros vy tan warnowgh drefenn dha blasfemiow, mes ow korra prenn y'n dowr, my a wrug an avon hweg.

²⁴‘Pandr'a wrav dhis, Yakob? Ny vynnsys ow obaya, Yuda. My a dreyl dhe genedhlow erell, ha ri ow hanow dhedha, may hwitthons ow ordenansow.

²⁵Rag hwi dhe'm forsakya vy, my a wra agas forsakya hwi. Pan bysowgh tregeredh ahanav, ny rov dhywgh tregeredh.

²⁶Pan elwowgh warnav, ny wrav agas klewes; rag hwi re dhefolas agas diwleuv gans goes, ha'gas troes a fisten dhe wul denladh.

²⁷Yth yw kepar dell wrussiwgh forsakya agas honan, a-der ow forsakya vy, yn-medh an Arloedh..

²⁸‘Yndellma y lever an Arloedh Ollgalloesek: A ny wrugavy pysi ragowgh kepar dell wra tas pysi rag y vebyon, kepar ha mamm rag hy myrghes, ha mammeth rag hy fleghes,

²⁹rag may fewgh ow fobel, ha my dhe vos agas Duw; may fewgh hwi ow fleghes, ha my dhe vos agas tas?

³⁰My a'gas kuntellas kepar dell guntell yar hy yerigow yn-dann hy eskelli. Mes lemmyn, pandr'a wrav dhywgh? My a'gas tewl yn-mes a-dhiworth ow fas.

³¹Pan dhrowgh offrynnow dhymm, my a dreyl ow fas a-dhiworthowgh; rag my re skonyas agas dy' goelyow, agas loeryow nowydh, ha trodreghyansow an kig.

³²My a dhannvonas ow gwesyon an brofoesi, mes hwi a's kemmeras ha'ga ladha, ha terri aga horfow dhe temmyn; my a wovynn aga goes orthowgh, yn-medh an Arloedh.

³³‘Yndellma y lever an Arloedh Ollgalloesek: Agas chi yw forsakys; my a'gas tewl dhe-ves kepar dell wra an gwyns tewlel kala';

³⁴ha ny wra agas mebyon dineythi fleghes, rag i re dhispresyas ow gorhemmynn, ha gul an dra yw drog y'm golok.

³⁵My a re agas chiow dhe bobel a dheu, a wra ow krysi kyn na'm klewsons; an re ma a wra an pyth a worhemmynnis, kyn na dhiskwedhis vy arwoedhyow dhedha.

³⁶Kyn na welsons profoesi, i a govha aga dyskans a'n dydhyow koth.

³⁷My a elow yn test grasow an bobel a dheu, may hwra aga fleghes lowenha yn joy. Kyn na'm gwelsons gans lagasow an korf, hwath i a grys an taklow a leveris.

³⁸‘Ha lemmyn, a das,[3] mir gans goeth, ha gwel an bobel usi ow tos dhiworth an howldrevel.

³⁹Dhedha my a re avel hembrenkysi Abraham, Ysak ha Yakob, ha Hosea hag Amos ha Mika ha Yoel hag Obadia ha Yona,

⁴⁰ha Nahum, ha Habakkuk, Sefania, Haggay, Zekaria ha Malaki, neb yw henwys ynwedh kannas an Arloedh.