Read Kernewek 2 Esdras 10 Bible Online

2 Esdras 10 - Kernewek bible

2 Esdras 10

¹‘Mes pan eth ow mab a-ji dh'y jambour, ev a goedhas yn farow.

²Ytho ni oll a dhifeudhis agan lugern, hag oll ow hentrevogyon a assayas ow honfortya; ytho my a dewis bys yn gorthugher an nessa dydh.

³Wosa i dhe worfenna ow honfortya, rag my dhe dewi, my a sevis y'n nos ha fia, ha dos y'n park ma, dell welydh.

⁴Ha lemmyn ny vynnav dehweles y'n sita, mes pesya omma, heb naneyl dybri boes nag eva, mes ow kyni heb hedhi bys pan verwiv.’

⁵Ena my a asas ow ombrederow hag a worthybis dhedha yn sorr, ow leverel,

⁶‘A ty, moy gokki es benynes oll, a ny welydh agan kynvann, ha'n taklow a hwarva dhyn?

⁷Rag Sion, an vamm ahanan ni oll, yw yn tristyns bras, hag uvelhes yn town.

⁸Res yw kyni lemmyn, rag yth eson ni oll ow kyni; ha bos trist, rag ni oll yw trist. Nyns osta trist marnas rag unn mab.

⁹Govynn orth an nor, hag ev a lever dhis, hi yw neb a dhegoedh kyni, drefenn an niver bras a veu genys ynni.

¹⁰A-dhia'n dalleth tus oll a veu genys anedha, hag erell a vydh ow tos; hag otta, nammnag oll a gerdh bys yn koll, ha routh anedha a dheu dhe dhistruyans.

¹¹Piw ytho y tegoedh dhodho kyni moy, hi neb a gollas routh mar vras, po ty usi ow kalari rag onan?

¹²Mes mar leverydh dhymm, “Nyns yw ow hynvann vy kepar ha kynvann an nor, rag my re gollas frut ow thorr, a dhineythis gans gloesow;

¹³mes rag an nor, yth yw war-lergh fordh an nor, an routh a-lemmyn a dhe-ves y'n keth fordh dell dheuth”;

¹⁴ena my a lever dhis, kepar dell dhineythsys gans angoes, yn kettella an nor re dhaskorras y frut a'n dalleth dhodho ev neb a'n gwrug.

¹⁵Lemmyn ytho, gwith dha dristyns dhiso jy dha honan, ha porth yn kolonnek an taklow a dheuth warnas.

¹⁶Rag mar aswonnydh ervirans Duw dhe vos ewn, yn termyn ty a dhegemmer dha vab, ha ty a vydh enorys yn mysk benynes.

¹⁷Ytho ke a-ji dhe'n sita dhe'th wour.’ Yn-medh hi dhymm,

¹⁸‘Ny wrav henna, na nyns av a-ji dhe'n sita, mes my a verow omma.’

¹⁹My a gewsis arta dhedhi,

²⁰‘Na wra henna, mes siw ow husul: rag pygemmys yw eskerens Sion? ha bydh konfortys drefenn dolor Yerusalem.

²¹Rag ty a wel fatell veu agan sentri forsakys, ha'gan alter terrys dhe'n dor, ha'gan tempel distruys;

²²agan telynn re beu uvelhes, agan hymna re dewis, agan lowena re dhiwedhas; golow agan kantolbrenn re beu difeudhys, argh agan kevambos re beu pyllys, agan taklow sans re beu defolys, ha'n hanow a veu gelwys warnan nammna veu disakrys; agan fleghes re wodhevis bismer, agan oferysi re beu leskys, agan Levysi res eth dhe-ves yn kethneth, agan gwyrghesow re beu defolys, ha'gan benynes re beu ravnys; agan tus wiryon re beu degys dhe-ves, ha'gan fleghigow re beu tewlys mes, agan gwer yowynk res eth yn kethneth ha'gan gwer alloesek re beu gwrys dinerth.

²³Ha'n pyth yw an gwettha oll, sel Sion re gollas hy glori, ha re beu daskorrys yn diwleuv an re a wra agan kasa.

²⁴Ty ytho shak dhe-ves dha dristyns bras ha gorr dhe denewen dha dholors pals, may kemmerro an Galloesek truedh ahanas arta, ha may rollo an Ughella powes dhis ha'th difres a'th lavuryow.’

²⁵Pan esen ow kewsel gensi, otta, hy fas a splannas yn pur dromm, ha'y fisment a lughesis, ma'm beu own anedhi, ha my a omwovynnas pandr'a ve hemma.

²⁶Desempis hi a dhellos kri bras leun a own, may kryghyllis an dor drefenn an son.

²⁷My a viras, hag otta ny veu ena an venyn a welis vy na fella, mes yth esa sita ow pos drehevys, ha tyller bras a omdhiskwedhas dhiworth an selyow. Own a'm beu, ha my a grias gans lev ughel, ha leverel,

²⁸‘Ple'ma an el Uriel neb a dheuth dhymm yn kynsa? Rag ev a veu neb a'm dros bys yn oll an sowdhan bras ma; ow diwedh yw treylys dhe bodredhes, ha'm pysadow dhe geredh.’

²⁹Pan esen ow kewsel an geryow ma, otta, y teuth dhymm an el a dheuth dhymm yn kynsa, ha mires orthiv.

³⁰Yth esen ow krowedha kepar ha korf marow, ha'm skians re bia kemmerys dhe-ves. Ev a synsis ow leuv dhyghow ha'm konfortya, ha'm settya war ow threys. Yn-medh ev dhymm,

³¹‘Pandr'a hwer dhis? Prag yth osta sowdhenys, ha prag yth yw dha skians ha prederow dha golonn sowdhenys?’

³²Yn-medhav, ‘Rag ty a'm forsakyas yn tien. My a wrug war-lergh dha eryow ha mos y'n park, hag otta, my a welas, hag a wel lemmyn, taklow na allav aga derivas.’

³³Yn-medh ev dhymm, ‘Sav yn-bann avel gour, ha my a'n styr dhis.’

³⁴Yn-medhav, ‘Kows, ow arloedh, saw na wra ow forsakya, ma na verwiv yn euver.

³⁵Rag my re welas taklow na wodhvev, ha klewes taklow nag esov orth aga konvedhes.

³⁶Po yw ow brys toellys, ha'm enev ow koska?

³⁷Lemmyn ytho, my a'th pys, diskwedh dhymm styr an welesigeth ma.’ Ev a worthybis dhymm,

³⁸‘Goslow orthiv, ha my a dhysk dhis, ha leverel dhis a-dro dhe'n taklow a ownydh; rag an Ughella re dhiskudhas dhis lies kevrin.

³⁹Ev re welas dha fordh wiryon, rag ty o trist heb hedhi rag dha bobel, ha ty a gynis yn feur war Sion.

⁴⁰Hemma ytho yw styr an welesigeth. An venyn a welsys nammnygen,

⁴¹neb a welsys ow kyni, ha ty a dhallathas hy honfortya,

⁴²(mes lemmyn ny welydh furv an venyn, mes yth omdhiskwedhas dhis sita ow pos drehevys),

⁴³ha neb a dherivas dhis a-dro dhe anfeus hy mab: hemm yw an gwir styryans.

⁴⁴An venyn a welsys yw Sion, a welydh lemmyn avel sita ow pos drehevys.

⁴⁵An reson hi dhe leverel dhis hy bos anvap deg blydhen warn ugens yw, rag y feu tri mil vlydhen pan na veu offrynnow hwath gwrys ynni.

⁴⁶Ha wosa tri mil vlydhen Solomon a dhrehevis an sita, hag offrynna offrynnow; henn yw an termyn may tineythis an anvap mab.

⁴⁷Pan leveris hi dhis hi dh'y vaga gans rach, hemm yw an termyn may feu Yerusalem annedhys.

⁴⁸Pan leveris hi dhis “Ow mab a verwis hag ev ow mos a-berth yn y jambour”, hag anfeus dhe dhos warnedhi, henn yw an terroes a veu gwrys dhe Yerusalem.

⁴⁹Otta, ty a welas hy hevelep, fatell gynis rag hy vab, ha ty a dhallathas hy honfortya rag an taklow a hwarva. An re ma yw an taklow yw res aga diskudha dhis.

⁵⁰‘Lemmyn an Ughella, ow kweles ty dhe vos trist a'n enev, hag ow kodhav rygdhi a leun golonn, re dhiskwedhas dhis splannder hy glori, ha'y semlans teg.

⁵¹Rag an reson ma my a leveris dhis bos res ty dhe wortos y'n park, tyller le na via chi drehevys.

⁵²Rag my a wodhva, an Ughella dhe vos ow talleth diskwedhes an taklow ma dhis.

⁵³Ytho my a leveris dhis, res yw dhis mos y'n park, le na via sel a dhrehevyans vytholl.

⁵⁴Rag ny yll drehevyans vytholl a vab-den pesya yn tyller may fydh sita an Ughella diskudhys.

⁵⁵‘Ty ytho, na borth own, ha na as dha golonn dhe vos dyegrys; mes deus a-bervedh ha gwel splannder ha braster an drehevyans, kemmys dell yll dha dhewlagas y weles.

⁵⁶Wosa henna ty a glew, kemmys dell yll dha dhiwskovarn y glewes.

⁵⁷Rag moy gwynnvys os es lies, ha ty re beu gelwys dhe vos gans an Ughella, dell na veu gelwys marnas boghes tus.

⁵⁸Mes gorta omma bys nos a-vorow,

⁵⁹ha'n Ughella a dhiskwedh dhis gwelesigethow an taklow a vydh ev ow kul dhe'n re yw trigys y'n nor y'n dydhyow diwettha.’ Ytho my a goskas an nos na ha ternos, kepar dell leveris dhymm.