Read Kernewek 2 Esdras 11 Bible Online

2 Esdras 11 - Kernewek bible

2 Esdras 11

¹Y'n nessa nos my a welas hunros, hag otta, er a dheuth yn-bann dhiworth an mor, may feu dhodho dewdhek askell bluvennek ha tri fenn

²My a viras, hag otta ev a lesas y eskelli dres oll an nor, hag oll gwynsow nev a hwythas warnodho, ha'n kommol a guntellas a-dro dhodho.

³My a viras, hag yn-mes a'y eskelli y tevis eskelli a-dal dhedha, mes y fons gwrys byghan ha munys.

⁴Yth esa y bennow ow powes yn kosel; an penn y'n kres o brassa es an pennow erell, mes yth esa ev ynwedh ow powes gansa.

⁵My a viras, hag otta yth esa an er ow nija gans y eskelli, hag ev a reynyas war an nor ha war an re trigys ynno.

⁶My a welas, fatell o pup-tra yn-dann nev gostydh dhodho, ha ny wre nagonan y gontradia — nagonan a'n kreaturs war an nor.

⁷My a viras, hag otta an er a yskynnas war y ewines, ow leverel,

⁸‘Na woelyewgh hwi oll y'n keth termyn. Koskes pubonan yn y dyller, ha goelyewgh an eyl wosa y gila,

⁹mes bedhes an pennow gwithys dhe'n diwedh.’

¹⁰My a viras, hag otta nyns esa an lev ow tos dhiworth y bennow, mes yn-mes a gres y gorf.

¹¹My a reknas y eskelli a-dal, hag otta, yth ens i eth.

¹²My viras, hag otta, unn askell a yskynnas a'n barth dhyghow, ha hi a reynyas war oll an nor.

¹³Ha pan esa ow reynya, hy diwedh a dheuth, hag yth eth dhe goll, ha ny veu gwelys hy thyller. Ena an nessa a yskynnas ha reynya, ha hi a besyas reynya termyn hir.

¹⁴Pan esa ow reynya, hy diwedh ynwedh a dheuth, hag yth eth dhe goll avel an kynsa.

¹⁵Hag otta, lev a dheuth mes, ow leverel dhe'n askell,

¹⁶‘Klew, ty neb re reynyas war an nor oll an termyn ma. My a dheriv hemma dhis, kyns ty dhe dhalleth mos dhe goll.

¹⁷War dha lergh, ny wra nagonan reynya termyn mar hir, na hwath hanter an termyn.’

¹⁸Ena an tressa askell a omdhrehevis ha synsi rewl avel an eskelli kyns, ha hi ynwedh eth dhe goll.

¹⁹Hag yndella y feu gans oll an eskelli erell an eyl wosa hy ben; yth esens ow synsi rewl hag ena ny vons gwelys arta.

²⁰My a viras, hag otta y'n termyn ow siwya yth esa eskelli owth omdhrehevel, i ynwedh a'n barth dhyghow, dhe synsi rewl. Re anedha a synsi rewl, mes yth ethons dhe goll desempis;

²¹hag yth esa re erell owth omdhrehevel, mes ny yllens synsi rewl.

²²Wosa an taklow ma, my a viras, hag ott an dewdhek askell ha diw a'n eskelli byghan res eth dhe goll,

²³ha ny veu travyth gesys war gorf an er marnas an tri fenn esa ow powes yn kosel, ha hwegh askell vyghan.

²⁴My a viras, hag otta diw a'n eskelli byghan a veu diberthys, hag i a veu gesys yn-dann an penn a-dhyghowbarth, mes peder anedha a veu gesys yn aga thyller.

²⁵My a viras, hag otta yth esa an eskelli byghan ma ow tewlel towl dhe omdhrehevel ha synsi rewl.

²⁶My a viras, hag otta onan a veu drehevys yn-bann, mes desempis yth eth mes a wel;

²⁷ha nessa ynwedh, ha skaffa es an kynsa yth eth mes a wel.

²⁸My a viras, hag otta yth esa an dhiw a veu gesys ow tewlel towl dhe synsi rewl aga honan.

²⁹Pan esens i ow tewlel towl, onan a'n pennow esa ow powes yn kosel, an penn y'n kres, a dhifunas. Hemma a veu brassa es an dhew benn arall.

³⁰My a viras fatell veu an dhew benn kesunys ganso,

³¹hag ott, an penn a dreylyas gans an re esa ganso, ha dybri an dhiw askell byghan esa ow tewlel towl dhe reynya.

³²Mes an penn ma a waynyas maystri war oll an nor ha lordya war an re trigys ynno gans meur kompressans. Y feu dhodho galloes war an norvys oll, moy es oll an eskelli a veu kyns.

³³My a viras wosa hemma, hag ott an penn y'n kres eth mes a wel desempis, kepar ha'n eskelli erell.

³⁴Mes y feu gesys dew benn, a reynyas yn kepar maner war an nor ha war an re trigys ynno.

³⁵My a viras, hag ott an penn a-dhyghowbarth a dhybris an penn a-gledhbarth.

³⁶Ena my a glewas lev ow leverel dhymm, ‘Mir a-ragos ha preder an pyth welydh.’

³⁷My a viras, hag otta neppyth kepar ha lew difun hag owth usa yn-mes a'n goeswik. My a glewas fatell dhellos lev mab-den dhe'n er, ha leverel,

³⁸‘Klew, ha my a gews orthis. An Ughella a lever dhis,

³⁹“A nyns osta jy an diwettha a'n peswar best a wrugavy aga kreatya dhe reynya y'm bys, dredha may teffa diwedh ow thermynyow?

⁴⁰Ty, an peswora neb re dheuth, re fethas oll an bestes a dheuth kyns, ha ty re synsis rewl war an bys gans euth bras, ha war oll an norvys gans an gwettha kompressans. Hag i[10] a annedhis oll an norvys termyn mar hir gans toell.

⁴¹Ty re vreusis an norvys, a-der gans gwirder;

⁴²rag ty re blagyas an re hwar ha pystiga an re gosel. Ty re gasas an re a gews an gwir, ha kara gowleverysi; ty re dhistruis annedhow an re a dheg frut, ha terri dhe'n dor fosow an re na wrug dregynn dhis.

⁴³Dha donteth re dheuth yn-bann bys y'n Ughella, ha'th woeth bys y'n Galloesek.

⁴⁴An Ughella re viras orth y dermynyow, hag otta diwedhys yns, ha kowlwrys yw y oesow.

⁴⁵Rakhenna, ty er, ty a dhe goll, ha'th eskelli euthyk, ha'th eskelli byghan pur dhrog, dha bennow spitus, dha ewines pur dhrog, hag oll dha gorf koeg.

⁴⁶Ena an norvys oll a vydh difresys ha hebaskhes, delivrys dhiworth dha nell, ha may fo dhe'n norvys govenek y'n vreus, hag yn y dregeredh ev neb a'n gwrug.” ’