Read Kernewek 2 Esdras 12 Bible Online

2 Esdras 12 - Kernewek bible

2 Esdras 12

¹Pan esa an lew ow kewsel an geryow ma dhe'n er, my a viras,

²hag ott an penn a veu gesys galsa mes a wel. An peder askell a wrussa tremena dhodho, a sevis dhe reynya, mes aga reyn a veu gwann ha leun a dervans.

³My a viras, hag otta yth esens i ynwedh ow mos mes a-wel, hag yth esa oll korf an er gans tan, ha'n nor a veu dyegrys bras. Ena my a dhifunas pur benndegys y'm brys hag yn own meur, ha my a leveris dhe'm spyrys,

⁴‘Ty re dhros hemma warnav, ow hwilas fordhow an Ughella.

⁵Yth ov vy hwath skwith y'm enev ha pur wann y'm spyrys, ha nyns eus ynnov nerth vytholl, drefenn an own meur a veu dhymm an nos ma.

⁶Lemmyn ytho my a bys an Ughella, may hwrello ow honfortya bys y'n diwedh.’

⁷Yn-medhav, ‘A Arloedh galloesek, mar kevis gras y'th wolok, mars ov ewnhes genes moy es re erell, ha mar teuth ow pysadow yn-bann yn hwir a-rag dha fas,

⁸gwra ow honfortya, ha diskwedh dhymm, dha was, an styryans ha'n dielvennans a'n welesigeth euthyk ma, dhe dhri konfort leun dhe'm enev.

⁹Rag ty re'm synsis wordhi may fo diskwedhys dhymm diwedh an termynyow, ha'n termynyow diwettha.’ Yn-medh ev dhymm,

¹⁰‘Hemm yw styryans an welesigeth ma a welsys.

¹¹An er a welsys ow mos yn-bann dhiworth an mor yw an peswora gwlaskor a veu gwelys yn gwelesigeth Daniel dha vroder.

¹²Mes ny veu styrys dhodho, dell wrav vy po dell wrugavy y styrya dhis.

¹³An dydhyow a dheu pan sev gwlaskor war an nor, hag y fydh moy euthyk es oll an gwlaskordhow a veu kyns.

¹⁴Ynni dewdhek myghtern a vydh ow reynya, onan wosa y gila.

¹⁵An nessa anedha ow talleth reynya a syns an rewl termyn hirra es nagonan arall a'n dewdhek.

¹⁶Hemm yw styryans an dewdhek askell a welsys.

¹⁷‘A-dro dhe'n lev a glewsys ow kewsel dhiworth kres y gorf, a-der dhiworth y bennow, hemm yw an styryans.

¹⁸Yn kres termyn y reyn y sord strifow nag yns byghan, hag y fydh an wlaskor yn peryll a goedha. Ny goedh y'n termyn na, mes y fydh ow taskavoes hy hynsa nerth.

¹⁹Ha pan welsys an eth askell vyghan ow klena orth y eskelli, hemm yw an styryans.

²⁰Eth myghtern a sev ynno, may fydh aga thermynyow anpoesek ha'n blydhynyow skav.

²¹Pan vydh kres an termyn ow tos nes, peswar anedha a vydh gwithys bys y'n termyn may fydh diwedh an vyghterneth ow tos nes, mes dew a vydh gwithys bys y'n diwedh.

²²‘A-dro dhe'n tri fenn a welsys ow powes yn kosel,

²³hemm yw an styryans. Y'n y dhydhyow diwettha an Ughella a drehav tri myghtern, hag i a nowydhha lies tra ynni, hag i a gyv maystri war an nor

²⁴ha war an re trigys ynno, gans moy kompressans es oll an re a veu kyns. Rakhenna gelwys yns pennow an er,

²⁵rag i a vydh an re a gowlwra y weythresow drog, ha gorfenna y dhiwettha gwriansow.

²⁶A-dro dhe'n penn bras a welsys ow mos mes a wel, onan a'n vyghternedh a verow yn y weli, mes gans tormentys.

²⁷A-dro dhe'n dhew a veu gesys, an kledha a's devor.

²⁸Rag onan anedha a vydh devorys gans kledha an arall yw ganso, mes y'n diwettha dydhyow ev ynwedh a goedh dre an kledha.

²⁹‘A-dro dhe'n dhiw askell vyghan a welsys ow tremena dhe'n penn usi y'n barth dhyghow,

³⁰hemm yw an styryans. I yth yw an re a wrug an Ughella aga gwitha bys yn diwedh an er; hemm o an reyn gwann ha leun a dervans

³¹dell welsys. An lew a welsys ow tifuna yn-mes a'n goeswik hag owth usa, hag ow kewsel orth an er, ha'y geredhi rag y anewnder, hag a-dro dhe oll y lavarow a glewsys,

³²hemm yw an Untys, neb a wrug an Ughella y witha bys yn diwedh an dydhyow, neb a sev dhiworth agh Davydh, neb a dheu ha kewsel[11] dhedha. Ev a's keredh rag aga gweythresow didhuw, ha rag aga anewnderyow, hag ev a dhisplet a-ragdha aga gweythresow arvedhus.

³³Rag yn kynsa ev a's dre yn few a-rag y vreus, ha'ga heredhi, ena aga distrui.

³⁴Mes gans mersi ev a dhelirv remenant ow fobel, an re a veu sawys y'm oryon, hag ev a re dhedha lowena bys pan dheu an diwedh, dydh breus, a gewsis orthis anodho y'n dalleth.

³⁵Hemm yw an hunros a welsys, ha'n re ma yw y styryans.

³⁶Ty unnsel yw wordhi dhe dhyski an kevrin ma a'n Ughella.

³⁷Ytho skrif yn lyver oll an taklow ma a welsys, ha'ga gorra yn tyller kudhys;

³⁸ha ty a's dysk dhe'n dus fur yn mysk dha bobel, may hwodhes y hyll aga kolonn konvedhes ha gwitha an kevrinyow ma.

³⁹Mes ty worta omma seyth dydh moy, may fo diskwedhys dhis pypynag a vydh orth bodh an Ughella dhe dhiskwedhes dhis.’ Ena ev a omdennas dhiworthiv.

⁴⁰Pan welas oll an bobel an seyth dydh dhe vos passys, ha ny dhehwelsen vy y'n sita, i oll a omguntellas war-barth, byghan ha bras, ha leverel dhymm,

⁴¹‘Fatell wrussyn pegha er dha bynn, ha py kamm a wrussyn dhis, ty dh'agan forsakya, hag esedha y'n tyller ma?

⁴²Rag yn-mes a'n brofoesi oll ty unnsel yw gesys dhyn, kepar ha bagas a grappys, ha kepar ha lugarn yn tyller tewl, ha kepar ha porth rag gorhel gwithys saw dhiworth annawel.

⁴³A nyns yw lowr an droglammow a wrug agan tochya?

⁴⁴Mar kwredh agan forsakya, pygemmys gwell via ragon mar pen ni ynwedh leskys y'n tan a loskas Sion.

⁴⁵Rag nyns on ni gwell es an re a verwis ena.’ Hag i a oelas gans lev ughel. Ena my a worthybis dhedha,

⁴⁶‘Bydh kolonnek, Ysrael; ha na vydh trist, chi Yakob.

⁴⁷Rag an Ughella a berth kov ahanowgh, ha ny wra a'n Galloesek agas ankevi yn agas strif.

⁴⁸Rag ny wrugavy agas forsakya, na omdenna dhiworthowgh, mes my re dheuth y'n tyller ma dhe bysi rag ynyalder Sion, ha dhe hwilas tregeredh, drefenn uvelheans agan[12] sentri.

⁴⁹Lemmyn ytho kewgh tre pubonan ahanowgh, ha my a dheu dhywgh wosa an dydhyow ma.’

⁵⁰Ytho an bobel eth yn-rag dhe'n sita, dell leveris vy dhedha.

⁵¹Mes my a besyas esedha y'n park seyth dydh, dell y'm gorhemmynnis an el; ha ny dhybris marnas bleujyow an gwel; losow o ow boes y'n dydhyow na.