Read Kernewek 2 Esdras 14 Bible Online

2 Esdras 14 - Kernewek bible

2 Esdras 14

¹Y'n tressa dydh, yth esen owth esedha yn-dann dherwenn,

²hag otta, lev a dheuth dhiworth bos a-dal dhymm ha leverel, ‘Ezra, Ezra!’ Yn-medhav ‘Ottavy, Arloedh’, ha my a sevis war ow threys. Yn-medh ev dhymm,

³‘My a omdhiskwedhas y'n bos ha kewsel dhe Moyses, pan esa ow fobel yn kethneth yn Ejyp,

⁴ha my a'n dannvonas, ha ledya ow fobel yn-mes a Ejyp; ha my a'n dros yn-bann dhe venydh Sinay, ha'y witha genev lies dydh.

⁵My a dherivas dhodho marthusyon pals, ha diskwedhes dhodho kevrinyow an termynyow ha termynyow an diwedh. My a ros gorhemmynn dhodho, ow leverel,

⁶Dyllo an geryow ma yn apert, ha kudh an re erell.

⁷Ha lemmyn my a lever dhis:

⁸Gwith y'th kolonn an toknys a dhiskwedhis ha'n gwelesigethow a welsys, ha'n styryansow a glewsys;

⁹rag ty a vydh kemmerys dhe-ves dhiworth tus, hag alemma rag ty a drig gans ow Mab ha gans an re haval dhis, bys yn diwedh an termynyow.

¹⁰Rag an bys re gollas y yowynkneth, hag yma an termynyow ow talleth bos koth.

¹¹An bys yw rynnys yn dewdhek rann, ha naw rann re dremenas, ha hanter an degves rann.

¹²Nyns eus marnas diw ow kortos, war-barth gans hanter an degves rann.

¹³Lemmyn ytho kempenn dha ji, ha keredh dha bobel; konfort an re uvel anedha; ha lemmyn nagh an bewnans legrys.

¹⁴Gorr dhiworthis prederow marwel; tewl dhe-ves dhiworthis an beghyow denel, ha diwisk dhiworthis dha gnas wann; gorr dhe denewen an prederow an moyha beghus dhis, ha fysk dhe fia dhiworth an termynyow ma.

¹⁵Rag drogow gweth es an re a welsys a vydh gwrys.

¹⁶Rag dhe voy an bys a dheu ha bos gwann dre gothni, dhe voy y hwra drogow kressya war y drigoryon.

¹⁷Yth a gwirder pell dhe-ves, ha gowegneth a dheu nes. Rag an er a welsys y'n gwelesigeth a fysk seulabrys dhe dhos.’

¹⁸My a worthybis, ‘A wrav vy kewsel a-ragos, Arloedh?

¹⁹Rag yth av dell worhemmynnsys dhymm. My a geredh an bobel yw bew lemmyn; mes piw a warn an re a vydh genys a-wosa?

²⁰An bys a wrowedh yn tewlder, ha'n re trigys ynno yw heb golow.

²¹Rag dha lagha yw leskys, ha ny woer denvyth an taklow re beu gwrys genes, po a vydh gwrys.

²²Ytho mar kevis gras y'th wolok, dannvon an spyrys sans ynnov, ha my a skrif pup-tra a hwarva y'n bys a'n dalleth, a veu skrifys y'th lagha, may hallo tus trovya an hyns, ha may fewo an re a vynn bewa y'n dydhyow diwettha.’

²³Ev a worthybis dhymm, ‘Ke ha kuntell an bobel ha leverel dhedha, na'th hwillons dewgens dydh.

²⁴Mes ty, darbar dhis lies legh-skrifa, ha kemmer genes Sarea, Selemia, Ethanus hag Asiel, pymp a veu dyskys dhe skrifa uskis.

²⁵Ena deus omma, ha my a enow lugarn a gonvedhes y'th kolonn, na vydh difeudhys bys pan vo gorfennys an pyth a dhallethsys y skrifa.

²⁶Ha wosa gorfenna, dyllo rann a'n taklow yn apert, ha dyllo rann yn-dann gel dhe'n tus fur. A-vorow y'n eur ma ty a dhalleth skrifa.’

²⁷Ena my eth yn-rag, dell worhemmynnis dhymm, ha gelwel oll an bobel war-barth, ha leverel,

²⁸‘Klew, A Ysrael, an geryow ma.

²⁹Y'n dalleth agan tasow a veu alyons yn Ejyp, hag i a veu delivrys alena.

³⁰I a dhegemmeras an lagha a vewnans; mes ny's gwithsons, ha hwi ynwedh war aga lergh re gammdremenas er hy fynn.

³¹An tir a veu res dhywgh avel eretons yn tir Sion, mes hwi ha'gas tasow a wrug sherewneth, ha ny withsowgh an fordhow a worhemmynnis an Ughella dhywgh.

³²Ha rag y vos breusyas ewn, wosa termyn ev a gemmeras dhiworthowgh an pyth a rosa.

³³Ha lemmyn yth esowgh hwi omma, hag yma agas breder yn agas mysk.

³⁴Rakhenna mar kwithowgh rewl war agas brys ha dyskybla agas kolonn, hwi a vydh gwithys bew, ha wosa mernans hwi a gyv tregeredh.

³⁵Rag an vreus a dheu wosa mernans, pan vydhyn dasvewys, hag ena henwyn an re ewn a vydh apert, ha gweythresow an debeles a vydh diskudhys.

³⁶Mes na dhes denvyth dhymm lemmyn, na'm hwilas dew-ugens dydh.’

³⁷Ytho my a gemmeras an pymp gour, dell worhemmynnis dhymm, ha ni eth yn-mes dhe'n gwel ha gortos ena.

³⁸Ha ternos, otta lev a'm gelwis ow leverel, ‘Ezra, igor dha anow hag yv an pyth a rov dhis dh'y eva.’

³⁹Ytho my a igoras ow ganow, hag otta hanaf leun a veu ystynnys dhymm; leun o a neppyth avel dowr, mes y liw o avel liw tan.

⁴⁰My a'n kemmeras hag eva, ha kettell evis, ow holonn a dhiveris konvedhes, ha furneth a gressyas y'm bronn, rag yth esa ow spyrys ow perthi kov anodho,

⁴¹ha'm ganow a veu igerys ha ny veu degeys na fella.

⁴²Mes an Ughella a ros konvedhes dhe'n pymp gour, hag onan wosa y gila i a skrifas an taklow a veu leverys, gans lytherennow na wodhvons. I a esedhas dew-ugens dydh, ow skrifa der an jydh,

⁴³hag ow dybri bara y'n nos. Mes yth esen vy ow kewsel dydhweyth, ha ny dewis nosweyth.

⁴⁴Ytho y'n dew-ugens dydh y feu skrifys peswardhek lyver ha peswar-ugens.

⁴⁵Pan veu an dew-ugens dydh kowlwrys, an Ughella a gewsis, ow leverel, ‘Dyllo yn apert an kynsa lyvrow a skrifsys, ha gas keffrys dhe'n re wiw ha'n re anwiw aga lenna;

⁴⁶mes gwith an deg ha tri-ugens diwettha dhe vos res dhe'n re fur a'n bobel.

⁴⁷Rag ynna i yma gover a gonvedhes, hag avon a skians.’

⁴⁸Hag yndella y hwrugavy.