Read Kernewek 2 Esdras 15 Bible Online

2 Esdras 15 - Kernewek bible

2 Esdras 15

¹Kows yn skovornow ow fobel an geryow a brofoesans a worrav yn dha anow, yn-medh an Arloedh,

²ha gul dhedha bos skrifys war baper; rag yth yns i lel ha gwir.

³Na borth own a'n brasow er dha bynn, ha na vydh troblys gans diskryjyans an re a gews er dha bynn.

⁴Rag pubonan na grys a verow yn y diskryjyans.

⁵Otta, yn-medh an Arloedh, my a dhre drogow war oll an norvys, kledha ha divoetter ha mernans ha terroes,

⁶rag sherewneth re lesas der oll an nor, ha'ga drogoberow yw kowlwrys.

⁷Rakhenna, yn-medh an Arloedh,

⁸ny dawav na fella a-dro dh'aga sherewneth dhidhuw a wrons, na ny wrav vy aga godhav yn aga oberow anewn. Goes divlam ha gwiryon a gri dhymm, hag enevow an re ewn a gri heb hedhi.

⁹Yn sur my a dal dial warnedha, yn-medh an Arloedh, ha my a gemmer warnav vy begh oll an goes gwiryon.

¹⁰Ott ow fobel yw haval dhe flokk ledys dhe'n ladhva; ny wrav vy aga gasa dhe driga pella yn pow Ejyp,

¹¹mes my a's dre yn-mes gans leuv grev ha bregh ystynnys, ha my a wysk Ejyp gans pla avel kyns, ha distrui oll y dir.

¹²Kynes Ejyp ha'y selyow, drefenn an pla a weskel hag a skorjya a wra Duw y dri warnodho.

¹³Kynes an diogyon a wonedh an dor rag bos aga has ow fyllel ha'ga gwydh ow pos distruys gans kleves losk ha keser, ha gans annawel euthyk.

¹⁴Go-i an bys ha'n re trigys ynno!

¹⁵Rag an kledha ha'ga distruyans a dheu nes, ha kenedhel a sev dhe werrya erbynn kenedhel, gans kledhedhyow yn aga diwla.

¹⁶Rag y fydh ankres yn mysk tus; i a hwila fetha an eyl y gila, hag yn aga nerth ny's teves revrons rag aga myghtern na rag an chyf a'ga gwer veur.

¹⁷Den a'n jevydh hwans dhe vos yn sita, mes ny yll,

¹⁸rag bos an sitys yn tervysk drefenn balghder; an chiow a vydh distruys, ha'n dus ow perthi own.

¹⁹Drefenn tanowder bara ha galar meur, ny'n jevydh den piteth rag y gentrevek, mes ev a omsett erbynn aga chiow gans an kledha, ha pylla aga fythow, drefenn an nown, ha galar meur.

²⁰Ott my a elow war-barth oll myghternedh an nor dhe dreylya dhymm, yn-medh Duw, dhiworth an howldrevel ha'n dyghow ha'n est ha Lebanon; dhe dreylya ha dhe dhaskorr an taklow a rosons dhedha.

²¹Kepar dell wrons i dhe'm re dhewisys bys y'n jydh hedhyw, yndella y hwrav vy, hag attyli yn aga askra. Yndellma y lever an Arloedh Duw:

²²Ny spar ow leuv dhyghow an beghadoryon ha ny hedh ow kledha dhiworth an re a skoell goes gwiryon war an dor.

²³Yth a tan yn-mes a'y sorr, ha devorya selyow an nor, ha peghadoryon avel kala' leskys.

²⁴Go-i na withsons ow gorhemmynnow, yn-medh an Arloedh.

²⁵Ny wrav vy aga sparya. Ke dhe-ves, hwi vebyon negedhys! Na dhefolewgh ow sentri.

²⁶Rag Duw a aswonn an re a begh er y bynn, ha rakhenna ev a's daskorr dhe'n mernans ha dhe ladhva.

²⁷Rag lemmyn plagys re dheuth war an norvys, ha hwi a worta ynna; ny wra Duw agas delivra, rag hwi re beghas er y bynn.

²⁸Otta gwelesigeth euthyk, owth omdhiskwedhes dhiworth an est!

²⁹Kenedhlow dragones Arabia a dheu yn-mes yn charettow pals, hag a-dhia gynsa dydh aga herdh, aga thythyans a vydh klewys war an nor, may perth own pubonan a's klew.

³⁰Ynwedh an Karmonysi a yn-mes a'n goeswik yn sorr bras avel badhes gwyls, hag i a jun yn batel er aga fynn, ha gans aga dyns i a wast rann a diredh an Assyrianys.

³¹Hag ena an dragones a dheu ha bos hwath kreffa, ow perthi kov a'ga genesigeth; ha mar treylyons ha kesunya yn omsettyans gans oll aga nerth erbynn an Karmonysi,

³²ena an re ma a vydh gorrys yn deray, ha gwrys taw gansa aga nerth, ha treylya ha fia.

³³Hag a diredh an Assyrianys eskar ow kontrewaytya a omsett er aga fynn, ha ladha onan anedha; hag y fydh own ha kren yn aga lu hag ansurneth yn mysk aga myghternedh.

³⁴Otta kommol dhiworth an howldrevel, ha dhiworth an kledh bys y'n dyghow! Aga semlans yw pur euthyk, leun a sorr hag annawel.

³⁵I wysk an eyl erbynn y gila, ha diveri annawel bras war an dor, war-barth gans aga annawel aga honan; hag y fydh goes dhiworth an kledha bys yn torr margh

³⁶ha mordhos den ha garr kowrvargh.

³⁷Hag y fydh own ha kren meur war an nor; an re a wel an sorr na a's tevydh euth, ha kren a sett dalghenn ynna.

³⁸Ena kommol annawel tewl a vydh drehevys dhiworth an dyghow, ha dhiworth an kledh, ha rann arall dhiworth an howlsedhes.

³⁹Mes gwynsow dhiworth an howldrevel a vydh kreffa es an kommol a veu drehevys yn sorr, ha'ga distrui; ha'n annawel esa ow tistrui dre wyns an howldrevel a vydh chasys dhe'n dyghow ha'n howlsedhes.

⁴⁰Kommol bras ha krev, leun a sorr hag annawel, a yskynn ha distrui oll an nor ha'n re trigys ynno, ha diveri annawel euthyk war bub tyller ughel hag ardhek,

⁴¹tan ha keser ha kledhedhyow nijys ha dowrow pals, may fydh oll an parkow hag oll an goverow lenwys gans lanwes an dowrow na.

⁴²I a derr dhe'n dor sitys ha fosow, menydhyow ha breow, gwydh an koeswigow ha goera ha greun an prasow.

⁴³I a dremen war gamm dhe Babylon ha'y howldhistrui.

⁴⁴I a dheu bys dhedhi hag omsettya a-dro dhedhi; i a dhever warnedhi an annawel hag oll y sorr; ena an doust ha'n mog a yskynn bys yn nev, hag oll an re usi a-dro dhedhi a's kyn.

⁴⁵Ha'n re yw gesys a vydh kethyon dhe'n re a's distru.

⁴⁶Ha ty, Asia, kevrennek yn splannder Babylon ha'y glori,

⁴⁷go-jy, druan! Rag ty re wrug dha honan haval dhedhi; ty re afinas dha vyrghes rag fornikashyon, dhe blesya dha garoryon ha dhe vostya ynna; i re beu hwansek pup-prys dhe wul fornikashyon genes.

⁴⁸Ty a wrug war-lergh an hora hegas yn oll hy gweythresow ha'y dismygyansow. Rakhenna Duw a lever:

⁴⁹My a dhannvon drogow warnas, gwedhowses ha boghosogneth, divoetter ha kledha ha pla dhe dhistrui dha jiow, ow tri defolans ha mernans.

⁵⁰Glori dha nerth a vydh desyghys avel bleujenn, pan dhrehav an toemmder a vydh dannvenys warnas.

⁵¹Ty a vydh gwann ha boghosek, plagys ha skorjys gans goliow, ma na yllydh na fella degemmeres dha garoryon grev.

⁵²A vien vy mar avius er dha bynn, yn-medh an Arloedh,

⁵³mar ny wrelles ladha ow re dhewisys pup-prys, ow lowenhe hag ow takya diwleuv, hag ow kewsel a-dro dh'aga mernans, ha ty medhow?

⁵⁴Afin semlans dha fas!

⁵⁵Yma gober hora y'th varrlenn; rakhenna ty a dhegemmer attal.

⁵⁶Par dell wredh dhe'm re dhewisys, yn-medh an Arloedh, yndella re wrello Duw dhiso jy, ha'th taskorra yn drogow.

⁵⁷Dha fleghes a verow a nown, ha ty a goedh der an kledha; dha sitys a vydh dileys, hag oll dha dus usi y'n gwel igor a goedh der an kledha.

⁵⁸An re usi yn menydhyow a verow rag nown, ow dybri aga hig aga honan, hag owth eva aga goes aga honan, rag esow a vara ha syghes rag dowr.

⁵⁹Ty a vydh truan dres tus erell, hag arta ty a dhegemmer drogow.

⁶⁰Tremenysi ow mos dresti a wysk an sita hegas, ha dilea neb rann a'th tiredh hag a'th glori, pan dhehwelons dhiworth Babylonia.

⁶¹Ty a vydh terrys dhe'n dor gansa avel sowl, hag i a vydh avel tan ragos.

⁶²I a'th tevor, ty ha'th sitys, dha diredh ha'th venydhyow; i a lesk oll dha goeswigow ha'th wydh ow toen frut.

⁶³I a dheg dha fleghes dhe-ves avel kethwesyon, i a byll dha rychys ha distrui glori dha fas.