Read Kernewek 2 Esdras 16 Bible Online

2 Esdras 16 - Kernewek bible

2 Esdras 16

¹Go-jy, Babylon hag Asia! Go-jy, Ejyp ha Syria!

²Omwrogysiwgh gans yskar, ha blew gever, hag oelewgh rag agas fleghes, ha kynewgh ragdha; rag dha dhistruyans re dheuth nes.

³An kledha re beu dannvenys er agas pynn, ha piw a yll y dreylya dhe-ves?

⁴Tan re beu dannvenys er agas pynn, ha piw a yll y dhifeudhi?

⁵Terroesow re beu dannvenys er agas pynn, ha piw a yll aga chasya dhe-ves?

⁶A yllir chasya dhe-ves lew nownek y'n koes, po difeudhi tan y'n sowl wosa ev dhe dhalleth leski?

⁷A yllir treylya seth wosa hy bos tennys gans sether krev?

⁸An Arloedh Duw a dhannvon drogow, ha piw a yll aga chasya dhe-ves?

⁹Tan a yn-mes a'y sorr, ha piw eus neb a yll y dhifeudhi?

¹⁰Ev a wra lughesennow dhe lughesi, piw na berth own? Ev a vydh ow tarenna, ha piw na'n jevydh euth?

¹¹An Arloedh a wodros, ha piw na vydh euthegys glan yn y lok?

¹²An dor ha'y selyow a gren, an mor yw shakys dhiworth y dhownderyow, ha'y donnow ha'ga fuskes yw troblys a-rag fas an Arloedh ha glori y nerth.

¹³Rag krev yw y leuv dhyghow a bleg an warak, ha lymm yw an sethow a wra ev aga thenna, ha wosa bos dannvenys dhe benn pella an norvys ny fyllons dhe dhrehedhes.

¹⁴Terroesow yw dannvenys mes, ha ny dhehwelons arta bys pan dhons dres oll an norvys.

¹⁵An tan re dhewis, ha ny vydh difeudhys bys pan gowllesk selyow an norvys.

¹⁶Kepar dell na dhehwel seth yw tennys gans sether krev, yn kettella ny dhehwel arta an terroesow yw dannvenys war an norvys.

¹⁷Go-vy, go-vy! Piw a'm delirv y'n dydhyow na?

¹⁸Dalleth govisyon, ha kynvann meur; dalleth divoetter, hag y fydh lies ow mos dhe goll; dalleth breselyow, ha'n potestas a berth own; dalleth drogow, ha tus a gren. Pandr'a wrons pan dheu an drogow?[13]

¹⁹Divoetter ha pla, govisyon hag angoes, yw dannvenys avel skorjys rag kessydhyans mab-den.[14]

²⁰Mes spit dhe oll an taklow ma ny dreylyons dhiworth aga hammweythresow, na nevra ny berthons kov a'n skorjys.

²¹Boesow a vydh mar isel aga bris may fydh tus ow tybi kres dhe vos surhes ragdha; ena drogow a wra bleujyowa dres an nor — kledha, divoetter, ha deray meur.

²²Lies a'n re usi trigys y'n nor a dhe goll dre dhivoetter; ha'n re gesys gans an divoetter a verow der an kledha.

²³An re varow a vydh tewlys yn-mes avel kawgh, ha ny vydh denvyth dh'aga honfortya; rag an nor a vydh forsakys, ha'n sitys a vydh terrys dhe'n dor.

²⁴Ny vydh denvyth gesys dhe wonedha an dor, na dhe worra has ynno.

²⁵An gwydh a dheg frut, mes piw a'n kuntell?

²⁶An grappys a vydh adhves, mes piw a's trett?

²⁷Den a yeun dhe weles den arall, po hwath dhe glewes y lev.

²⁸Rag deg a vydh gesys yn-mes a sita; ha dew yn-mes a'n park, an re a omgelas yn kelliow tew hag yn folsyow an karregi.

²⁹Kepar hag yn lowarth a olewbrennyer, teyr po peder olewenn yw gesys war wydhenn;

³⁰po kepar ha pan vydh gwinlann kuntellys, re a'n bagasow yw gesys gans an re a hwila gans rach der an winlann,

³¹yn kettella y'n dydhyow na tri po peswar a vydh gesys gans an re a hwila yn aga chiow gans an kledha.

³²An dor a vydh forsakys, ha ny vydh y barkow erys, ha'y fordhow ha'y hynsyow a vydh gordevys gans spedhas, rag ny gerdh deves dredha.

³³Gwyrghesow a gyn, rag nyns eus dhedha gwer bries; aga myrghes a gyn, rag nyns eus dhedha gweres.

³⁴Aga gwer bries a vydh ledhys yn bresel, ha'ga gwer a dhe goll dre dhivoetter.

³⁵Goslowewgh orth an taklow ma, ha'ga honvedhes, hwi gwesyon an Arloedh.

³⁶Hemm yw ger an Arloedh; degemmer e, ha na dhiskrysiwgh an pyth a wra an Arloedh y leverel.

³⁷An terroesow a dheu nes, ha nyns yns delatys.

³⁸Kepar dell wra benyn veghyek, y'n nawves mis pan dheu termyn hy gwelivos nes, kavoes paynys bras a-dro dh'y thorr dew po tri our kyns, mes pan dheu an flogh yn-mes a'n dorr, ny vydh delatys pols vyth,

³⁹yn kettella ny vydh delatys an terroesow ow tos war an dor, ha'n bys a gyn, ha gloesow a'n dalghenn a bub tu.

⁴⁰Klewewgh ow geryow, ow fobel; ombareusiwgh rag batel, hag yn mysk an drogow bedhewgh avel alyons war an nor.

⁴¹Neb a werth, bedhes avello ev neb a fi; ha neb a bren, bedhes avello ev neb a gyll.

⁴²Neb a genwerth, bedhes avello ev neb na wayn budh; hag ev neb a dhrehav chi, bedhes avel nebonan na vydh trigys ynno.

⁴³Neb a has, bedhes avello ev neb na vys; neb a skether, bedhes avello ev neb na yll kuntell an grappys.

⁴⁴An re a dhemmedh, bedhens avel an re na's tevydh fleghes; ha'n re na dhemmedh, bedhens avel an re yw gwedhow.

⁴⁵Yndella an re a lavur, a lavur yn euver.

⁴⁶Estrenyon a guntell aga frut, ha pylla aga substans, domhwel aga chiow, ha kemmeres aga mebyon avel kethyon; rag yn kethneth y tineythons aga fleghes.

⁴⁷Nyns yw arghans an arghansoryon marnas preydh; dhe voy yth afinons aga sitys, aga chiow, ha'ga horfow aga honan,

⁴⁸dhe voy y fydhav serrys orta drefenn aga feghosow, yn-medh an Arloedh.

⁴⁹Kepar dell wra benyn pur wordhi ha mas kasa hora,

⁵⁰yn kettella y hwra ewnder kasa sherewneth pan omafin, hag ev a's kuhudh fas orth fas pan dheu an pledyas dhe hwithra pub peghes war an nor.

⁵¹Rakhenna na vydh avelli hi na'y gweythresow.

⁵²Rag otta, wosa pols byghan sherewneth a vydh degys dhe-ves dhiworth an norvys, ha gwirvreus a reyn warnan.

⁵³Na leveres peghador na wrug ev pegha; rag Duw a lesk kolennow a dan war benn neb a lever, ‘Ny beghis a-rag Duw ha'y glori.’

⁵⁴Otta, Duw a aswonn oll oberow tus, aga dismygyansow ha'ga frederow ha'ga holonnow.

⁵⁵Ev a leveris, ‘Bedhes an nor’, hag y feu gwrys, ha ‘Bedhes an nev’, hag y feu gwrys.

⁵⁶Orth y er an ster a veu fastys yn aga thylleryow, hag ev a woer niver an ster.

⁵⁷Ev a hwither an islonk ha'y dresoryow; ev re vusuras an mor ha pyth eus ynno;

⁵⁸ev re stroethas an mor yn mysk an dowrow; ha der y er ev re grogas an nor a-ugh an dowrow.

⁵⁹Ev re lesas an nev avel fyrmament, ha'y fastya a-ugh an dowrow;

⁶⁰ev re worras fentynyow dowrow y'n gwylvos, ha lynnyn war wartha an menydhyow, dhe dhannvon avonyow dhiworth an ughelderyow dhe dhowrhe an dor.

⁶¹Ev a wrug mab-den, ha gorra kolonn yn kres y gorf; ev a worras ynno spyrys ha bewnans ha konvedhes

⁶²ha'n spyrys a Dhuw Ollgalloesek, neb a wrug pup-tra, hag a hwither taklow kudhys yn tylleryow kudhys.

⁶³Yn sur ev a woer agas dismygyansow ha'n pyth a brederowgh yn agas kolonnow. Go-i an re a begh hag a vynn keles aga feghosow!

⁶⁴An Arloedh a hwither gans rach oll aga oberow, hag a wra ges ahanowgh hwi oll.

⁶⁵Hwi a vydh shamys pan dheu agas peghosow yn-mes a-rag tus, ha'gas drogoberow a sev avel agas kuhudhoryon y'n jydh na.

⁶⁶Pandr'a wrewgh? po fatell yllowgh keles agas peghosow a-rag an Arloedh ha'y glori?

⁶⁷Otta, Duw yw an breusyas; perthewgh own anodho. Gesiwgh agas peghosow, hag ankevewgh agas drogoberow, ha na wrewgh aga hommyttya nevra namoy; yndella Duw a'gas hembronk yn-rag ha'gas delivra dhiworth pub anken.

⁶⁸Rag otta, sorr routh veur a dhew warnowgh, hag i a dhrayl dhe-ves re ahanowgh, hag i a wra dhywgh dybri boes sakrifiys dhe idolys.

⁶⁹I a wra ges a'n re a assent dhe dhybri, hag a wra bismer anedha ha'ga dispresya, hag i a's trett yn-dann dreys.

⁷⁰Rag yn lies tyller hag yn sitys ogas dhedha y fydh rebellyans bras erbynn an re a berth own a'n Arloedh.

⁷¹I a vydh avel muskogyon, ha ny sparyons denvyth, mes i a byll hag a dhistru an re a bes ow perthi own a'n Arloedh.

⁷²Rag i a dhistru hag a byll aga substans, ha'ga chasya yn-mes a'ga chiow.

⁷³Ena y fydh apert, y feu ow re dhewisys prevys, kepar dell yw owr prevys y'n tan.

⁷⁴Goslowewgh, ow re dhewisys, yn-medh an Arloedh; dydhyow anken yw devedhys lemmyn, mes my a'gas delirv dhiworta.

⁷⁵Na berthewgh own na dout, rag Duw yw agas kevarwoedher.

⁷⁶Hwi neb a with ow gorhemmynnow ha'm ordenansow, yn-medh an Arloedh Duw, na wres agas peghosow agas beghya, na'gas drogoberow agas fetha.

⁷⁷Go-i an re yw tegys gans aga feghosow, ha fethys gans aga drogoberow! Yth ons kepar ha park yw tegys gans prysk, ha'y droe'lergh yw gordevys gans spern, ma na yll denvyth tremena dredho;[15]

⁷⁸degeys yw, ha daskorrys dhe vos konsumys gans tan.