Read Kernewek 2 Esdras 2 Bible Online

2 Esdras 2 - Kernewek bible

2 Esdras 2

¹‘Yndellma y lever an Arloedh: My a dhros an bobel ma yn-mes a gethneth, ha ri dhedha ow gorhemmynnow dre ow gwesyon an brofoesi; ny vynnsons goslowes orta, mes i a wrug ow husulyow euver.

²An vamm a's dineythis a lever dhedha, “Ke, ow fleghes, rag gwedhwes ov vy ha forsakys.

³My a'gas magas gans lowena, mes gans galar ha tristyns my re'gas kollas, rag hwi re beghas a-rag an Arloedh Duw, ha gul an dra yw drog y'm golok.

⁴Mes lemmyn, pandr'a allav vy y wul ragowgh? Gwedhwes ov ha forsakys. Ke ow fleghes, ha pysiwgh mersi dhiworth an Arloedh.”

⁵My a'th elow, a das,[4] yn test war-barth gans mamm an fleghes ma, rag ny vynnsons gwitha ow hevambos,

⁶may trylli warnedha deray, ha gul dh'aga mamm bos pyllys, ma na vo dhedha henedh.

⁷Bedhens skattrys yn mysk an kenedhlow, bedhes aga henwyn dileys dhiworth an norvys, rag i re dhespityas ow hevambos.

⁸‘Go-jy, Assyria, neb a gel ynnos an re anewn! A genedhel dhrog, porth kov a'n pyth a wrugavy dhe Sodom ha Gomorra,

⁹may krowedh aga thir yn-dann bellennow a byg ha graghellow a lusu. Yndellma y hwrav dhe'n re na woslowons orthiv, yn-medh an Arloedh Ollgalloesek.’

¹⁰Yndellma y lever an Arloedh dhe Ezra: ‘Lavar dhe'm pobel y rov dhedha gwlaskor Yerusalem, a vynnsen hy ri dhe Ysrael.

¹¹Ha my a gemmer ragov aga glori, ha ri dhedha an trigvaow heb diwedh, a dharbarsen dhe Ysrael.

¹²An wydhenn a vewnans a re dhedha odour hweg, ha ny lavuryons, na ny vydhons skwith.

¹³Kewgh, ha hwi a dhegemmer; pysiwgh may fo agas dydhyow boghes. An wlaskor yw parys ragowgh seulabrys. Bedhewgh hewoel.

¹⁴Gelwewgh, gelwewgh nev ha nor yn test, rag my re dhileas an drog ha kreatya da; rag my a vew, yn-medh an Arloedh.

¹⁵‘A vamm, byrl dha fleghes, hembronk i yn-mes gans lowena dell wra an golomm; krevha aga threys, rag my re'th tewisas, yn-medh an Arloedh.

¹⁶Ha my a dhrehav an re varow arta dhiworth aga thylleryow, ha'ga hembronk yn-mes a'ga bedhow, rag my a aswonn ow hanow ynna.

¹⁷Na borth own, ty vamm fleghes, rag my re'th tewisas, yn-medh an Arloedh.

¹⁸My a dhannvon gweres dhis, ow gwesyon Ysay ha Yeremia. War-lergh aga husul my re sakras ha pareusi ragos dewdhek gwydhenn beghys gans frut divers,

¹⁹ha'n keth niver a fentynyow, ow tinewi leth ha mel, ha seyth menydh bras ha dhedha ros ha lili; dredha my a lenow dha fleghes a lowena.

²⁰‘Gwith gwiryow an wedhwes, provi gwirvreus dhe'n flogh heb tas, ro dhe'n boghosek, defend an omdhivas, dillas an den noeth,

²¹gwith an re drogh ha gwann, na wra ges a dhen evredhek, defend an mans, ha gas dhe'n dall kavoes gwelesigeth kler ahanav.

²²Gwith an den koth ha'n den yowynk saw a-ji dhe'th fosow;

²³pan gevydh an re varow, gwra aga ynkleudhyas ha merk an bedh, ha my a re dhis an kynsa tyller y'm dasserghyans.

²⁴Gorta ha bydh kosel, ow fobel, rag dha bowes a dheu.

²⁵‘Mag dha fleghes, ty vammeth dha; krevha aga threys.

²⁶Dha wesyon a res vy dhis — ny wra nagonan anedha mos dhe goll, rag my a's rekwir a-dhiworth dha niver.

²⁷Na vydh prederus, rag pan dheu dydh an galar ha'n angoes, re erell a oel ha bos trist, mes ty a vydh lowen ha kavoes palster.

²⁸An kenedhlow a berth avi orthis, mes ny yllons gul travyth er dha bynn, yn-medh an Arloedh.

²⁹Ow diwleuv a'th kudh, ma na wello dha fleghes ifarn.

³⁰‘Lowenha, a vamm, war-barth gans dha fleghes, rag my a'th telirv, yn-medh an Arloedh.

³¹Porth kov a'th fleghes a gosk, rag my a's dre yn-mes dhiworth kudhvaow an nor, ha diskwedhes tregeredh dhedha; rag tregeredhus ov, yn-medh an Arloedh Ollgalloesek.

³²Byrl dha fleghes bys pan dhov ha diskwedhes tregeredh dhedha; rag ow fentynyow a fenn, ha ny fyll ow gras.’

³³My, Ezra a dhegemmeras gorhemmynn dhiworth an Arloedh yn menydh Horeb, my dhe vos bys yn Ysrael. Mes pan dheuth vy dhedha i a'm skonyas, ha despitya gorhemmynn an Arloedh.

³⁴Ytho my a lever dhywgh, hwi genedhlow a glew hag a gonvedh, ‘Gwaytyewgh agas Bugel. Ev a re dhywgh powes bys vykken; rag ogas yw ev neb a dheu yn diwedh an oesow.

³⁵Bedhewgh parys rag pewas an wlaskor, rag golow heb hedhi a splann warnowgh bys vykken.

³⁶Fiewgh dhiworth skeus an oes ma, degemmerewgh lowena agas glori; my a elow ow Selwyas yn test.

³⁷Degemmerewgh an pyth kommendys dhywgh gans an Arloedh, ha bedhewgh lowen, ow ri gras dhodho ev, neb re'gas gelwis dhe'n gwlaskordhow nevek.

³⁸Drehevewgh, sevewgh yn-bann ha gwelewgh y niver an re a veu selys yn gwledh an Arloedh.

³⁹An re a dhibarthas dhiworth skeus an oes ma re dhegemmeras dillas gloryus dhiworth an Arloedh.

⁴⁰Kemmer dha niver, a Sion, ha dege a-bervedh dha dus yw dillasys yn gwynn, a gollenwis lagha an Arloedh.

⁴¹Niver dha fleghes a yeunsys war aga lergh, yw kollenwys; pys galloes an Arloedh may fo dha bobel sanshes, neb a veu gelwys a-dhiworth an dalleth.’

⁴²My, Ezra, a welas yn menydh Sion routh vras na yllis hy nivera, hag yth esens i oll ow kormel an Arloedh gans kanow.

⁴³Yn aga mysk yth esa den yowynk, a ughelder bras, ughella agessa i oll, ha war an penn a bubonan anedha ev a worras kurun. Mes my a veu synsys gans an merkyl.

⁴⁴Ena my a wovynnas orth an el, ‘Piw yw an re ma, arloedh?’

⁴⁵Ev a worthybis dhymm, ‘Yth yns i an re a dhiwiskas dillas marwel, ha gwiska dillas anvarwel, owth avowa hanow Duw. Lemmyn yth esons ow pos kurunys, hag i a dhegemmer palmow.’

⁴⁶Ena yn-medhav dhe'n el, ‘Piw yw an den yowynk na, neb usi ow korra kurunyow warnedha, hag ow ri palmow yn aga diwleuv?’

⁴⁷Ev a worthybis dhymm, ‘Ev yw Mab Duw, neb a aswonnsons y'n bys.’ Ytho my a dhallathas aga gormel, rag i dhe sevel mar golonnek a-barth hanow an Arloedh.

⁴⁸Ena yn-medh an el dhymm, ‘Ke, ha derivas dhe'm pobel ass yw bras ha lies marthusyon an Arloedh Duw re welsys.’