Read Kernewek 2 Esdras 3 Bible Online

2 Esdras 3 - Kernewek bible

2 Esdras 3

¹Y'n degves blydhen warn ugens wosa distruyans an sita, yth esen vy yn Babylon, my Salathiel, neb yw henwys ynwedh Ezra. Troblys veuv, ha my ow krowedha war ow gweli, ha'm prederow a dheuth yn-bann y'm kolonn,

²rag my a welas diboblans Sion, ha palster trigoryon Babylon.

³Amovys bras veu ow spyrys, ha my a dhallathas kewsel geryow ownek dhe'n Ughella,

⁴ow leverel, ‘A Arloedh ow Mester, a ny gewssys y'n dalleth, pan blenssys an nor, ha henna heb gweres, ha gorhemmynna dhe'n doust,

⁵hag y ros dhis Adam, korf divew? Mes ev a veu ober dha dhiwleuv, ha ty a anellas ynno anall bewnans, hag ev a veu gwrys bew a-ragos.

⁶Ha ty a'n ledyas yn paradhis, a blansas dha leuv dhyghow kyns an norvys dhe omdhiskwedhes.

⁷Ha dhodho ty a ros dha worhemmynn; mes ev a gammdremenas er y bynn, ha dison ty a apoyntyas mernans ragdho ha rag y henedhow. Anodho y feu dineythys kenedhlow ha loethow, poblow ha kordhow heb niver.

⁸Ha pub kenedhel a gerdhas war-lergh hy mynnas hy honan, hag a wrug taklow didhuw a-ragos, ha nagha dha worhemmynnow, ha ny wrussys aga lettya.

⁹Mes arta, yn y dermyn, ty a dhros an liv war drigoryon an norvys ha'ga distrui.

¹⁰Ha'n keth tenkys a dheuth warnedha oll; kepar dell dheuth mernans dhe Adam, yndella y teuth an liv warnedha i.

¹¹Mes ty a asas onan anedha, Noy ha'y ji, hag oll an re ewn a dhiyskynnas dhiworto.

¹²‘Pan dhallathas trigoryon an nor kressya, i a gavas mebyon ha poblow ha kenedhlow pals, hag i a dhallathas arta bos moy didhuw es an re gyns.

¹³Ha pan esens ow kul anewnder a-ragos, ty a dhewisas onan yn-mes anedha, Abraham y hanow.

¹⁴Ty a'n karas, ha dhodho y honan, nosweyth yn-dann gel, ty a dhiskwedhas diwedh an termynyow.

¹⁵Ty a wrug ganso kevambos bys vykken, ha leverel dhodho, na wrusses nevra forsakya y has; ha ty a ros dhodho Ysak, Yakob hag Esaw.

¹⁶Ha ty a dhewisas ragos Yakob, mes Esaw ty a skonyas, ha Yakob a dheuth ha bos routh veur.

¹⁷‘Ha pan hembrenksys y has yn-mes a Ejyp, ty a's dros yn-bann dhe venydh Sinay.

¹⁸Ty a blegyas an nevow ha shakya an nor, ha gul dhe'n islonk krena, ha trobla an oes na.

¹⁹Dha wolewder a dremenas der an peder yet a dan, dorgrys, gwyns ha rew, dhe ri an lagha dhe has Yakob, ha'th worhemmynn dhe henedh Ysrael.

²⁰Mes ny gemmersys dhiworta aga holonn dhrog,

²¹Rag an kynsa Adam, beghys gans kolonn dhrog, a gammdremenas, ha tryghys veu, kepar dell veu oll an re a veu genys anodho.

²²Yndella gwannder a veu gwrys fast; ha'n lagha a veu yn kolonn an bobel, war-barth gans an debel wreydhenn. Ytho an pyth o da eth dhe-ves, mes an drog a wortas.

²³‘Ytho an termynyow a dremenas, ha'n blydhynyow a dheuth dhe dhiwedh, ha ty a dhrehevis ragos gwas, Davydh y hanow.

²⁴Ty a worhemmynnis dhodho drehevel sita rag dha hanow, hag ynni offrynna offrynnow dhis, yn-mes a'n taklow esa dhis dha honan.

²⁵Henna a veu gwrys dre vlydhynyow pals; ena trigoryon an sita eth yn sowdhan,

²⁶hag yn pup-tra i a wrug kepar dell wrug Adam hag oll y henedhow; rag i ynwedh a's tevo kolonn dhrog.

²⁷Ytho ty a dhelivras an sita dhe'th eskerens.

²⁸‘Ena yn-medhav y'm kolonn, Yw gweythresow trigoryon Babylon gwell, ha rakhenna yma dhedha mestrynses war Sion?

²⁹Rag pan dheuth vy omma my a welas taklow didhuw heb niver, ha'm enev a welas drogoberoryon pals y'n deg blydhen warn ugens ma. Ytho ow holonn a'm fyllis,

³⁰rag my re welas fatell berthydh peghadoryon, ha sparya tus didhuw; ha ty re dhistruis dha bobel ha gwitha dha eskerens, heb y veneges,

³¹ha ny dhiskwedhsys dhe dhenvyth fatell yllir gasa an fordh ma. A wra Babylon gweythresow gwell es Sion?

³²Po a wrug kenedhel arall dha aswonn marnas Ysrael?

³³Mes ny omdhiskwedhas aga fewas, ha ny dhug aga lavur frut. Rag my re dravalyas ogas ha pell der an kenedhlow ha gweles aga rychys, kyn na berthons kov a'th worhemmynnow.

³⁴Lemmyn ytho gwra poesa y'n vantol agan drogoberow ni, ha'n re a drigoryon an norvys; ha kevys vydh yn py fordh yth ynklin an vantol.

³⁵Pan na beghas trigoryon an norvys y'th wolok jy? Po py kenedhel re withas dha worhemmynnow mar dha?

³⁶Ty a yll kavoes nebes tus hag a withas dha worhemmynnow, mes kenedhlow ny yllydh aga havoes.’