Read Kernewek 2 Esdras 5 Bible Online

2 Esdras 5 - Kernewek bible

2 Esdras 5

¹‘Mes a-dro dhe'n toknys, ott, an dydhyow a dheu, pan vydh trigoryon an norvys kemmerys gans euth bras, ha'n fordh a wirder a vydh kelys, ha'n tir a vydh anvap a fydh.

²Anewnder a vydh ynkressys dres pup-tra a welydh, ha dres pup-tra a glewsys kyns.

³An wlas a welydh lemmyn ow rewlya an bys a vydh difeyth heb fordh, ha tus a'n gwel forsakys.

⁴Mes mar pydh an Ughella ow krontya dhis dhe vewa, ty a wel wosa an tressa termyn an howl distowgh dhe splanna arta nosweyth, ha'n loer dydhweyth.

⁵Goes a dhever yn-mes a brenn, ha'n men a dhyllo y lev; an poblow a vydh troblys, ha'n ster a goedh.

⁶Ha myghtern a reyn nag yw gwaytys gans trigoryon an nor, ha'n ydhyn a nij dhe-ves war-barth.

⁷Mor Sodom a dewl puskes yn-mes, ha nebonan nag yw aswonnys gans lies a re y lev y'n nos, ha peub oll a glew y lev.

⁸Y fydh deray yn lies le, ha tan a vydh dannvenys mes yn fenowgh; bestes gwyls a wander yn-mes a'ga thylleryow usadow, benynes yn aga amseryow a dhineyth euthviles.

⁹Hyli a vydh kevys y'n dowr hweg, ha kowetha a dhistru an eyl y gila; ena reson a omgel, ha konvedhes a omdenn bys yn y jambour;

¹⁰hwilys vydh gans lies mes ny vydh kevys, hag anewnder ha difyk omrewl a vydh lieshes war an nor.

¹¹Unn wlas a wovynn orth hy hentrevek, “A wrug ewnder po nebonan ow kul ewnder tremena dredhos?” Ha hi a worthyp “Na.”

¹²Y'n termyn na, tus a wayt mes ny gevons; i a lavur mes ny vydh kompoesys aga fordhow.

¹³An re ma yw an toknys may ma kummyas dhymm dhe leverel dhis, ha mar pysydh arta hag oela kepar ha lemmyn, ha gul penys seyth dydh, ty a glew taklow hwath brassa.’

¹⁴Ena my a dhifunas, ha'm korf a dhegrenas yn feur, ha'm enev a veu mar droblys, may klamderas.

¹⁵Mes an el neb re dhothya ha kewsel genev a'm synsis ha'm konfortya, ha'm settya war ow threys.

¹⁶Lemmyn yn nessa nos, Faltiel, ledyer an bobel a dheuth dhymm ha leverel, ‘Ple'th esesta, ha prag yth yw dha fas trist?

¹⁷Po na wodhes Ysrael dhe vos gorrys y'th charj yn tir aga divroedh?

¹⁸Yn-sol ytho ha deber bara, ha na wra agan forsakya, kepar ha bugel a forsak y flokk yn dalghenn bleydhi fell.’

¹⁹Ena yn-medhav dhodho, ‘Omdenn a-dhiworthiv, ha na dheus nes dhymm kyns penn seyth dydh, hag ena ty a yll dos dhymm.’ Ev a glewas an pyth a leveris vy, hag a omdennas dhiworthiv.

²⁰Ytho my a wrug penys seyth dydh, ow kyni hag owth oela, dell worhemmynnis dhymm Uriel an el.

²¹Wosa seyth dydh, prederow ow holonn a veu pur veghus arta dhymm.

²²Ena ow enev a dhaskavas an spyrys a gonvedhes, ha my a dhallathas arta kewsel geryow yn golok an Ughella.

²³Yn-medhav, ‘A Arloedh ow Mester, yn-mes a bub koeswik a'n nor, hag yn-mes a oll an gwydh anodho ty re dhewisas unn gwinbrenn,

²⁴hag yn-mes a oll tiryow an norvys ty re dhewisas ragos unn splatt, hag yn-mes a oll bleujennow an bys ty re dhewisas ragos unn lili,

²⁵hag yn-mes a oll downderyow an mor ty re lenwis ragos unn avon, hag yn-mes a oll an sitys drehevys ty re sanshas ragos Sion,

²⁶hag yn-mes a oll ydhyn kreatys ty re henwis ragos unn golommenn, hag yn-mes a oll an flokkys kreatys ty re brovias ragos unn dhavas,

²⁷hag yn-mes a oll an lies pobel ty re gavas ragos unn bobel; ha dhe'n bobel ma, a gersys, ty a ros lagha kommendys gans peub.

²⁸Ha lemmyn, Arloedh, prag y taskorrsys an unn dhe'n lies, ha disenora an unn wreydhenn dres an re erell, ha skattra dha unn bobel yn mysk lies?

²⁹Ha'n re a veu erbynn dha ambosow re drettyas war an re a fydhyas y'th kevambosow.

³⁰Mar kesydh dha bobel kemmys, dre dha leuv jy dha honan y tegoedh aga hessydhya.’

³¹Wosa my dhe gewsel an geryow ma, y feu dannvenys dhymm an el neb a dheuth dhymm an kynsa nos.

³²Yn-medh ev dhymm, ‘Goslow orthiv ha my a dhysk dhis; gwra vri ahanav, ha my a geworr moy a-ragos.’

³³Yn-medhav, ‘Kows, ow arloedh.’ Yn-medh ev dhymm, ‘Yth osta pur droblys y'th vrys a-dro dhe Ysrael. A wredh y gara moy agesso ev neb a'n gwrug?’

³⁴Yn-medhav, ‘Na, arloedh, mes my a gewsis rag pur anken; rag pub eur ow diwloneth a'm torment, owth assaya konvedhes fordh an Ughella, ha hwilas neb rann a'y vreus.’

³⁵Yn-medh ev dhymm, ‘Ny yllydh.’ Yn-medhav, ‘Prag na, arloedh? Prag ytho y feuv genys? Po prag na veu torr ow mamm ow bedh, ma na wellen vy lavur Yakob ha skwithter pobel Ysrael?’

³⁶Yn-medh ev dhymm, ‘Reken ragov niver an re nag yw devedhys hwath, ha kuntell ragov an glawennow skattrys, ha gwra dhe'n bleujennow gwedhrys bleujyowa ragov arta;

³⁷igor ragov an chambouryow degeys, ha doro mes ragov an gwynsow yw klos ynna, po diskwedh dhymm an imaj a lev; hag ena my a styr dhis an lavur a hwilydh konvedhes.’

³⁸Yn-medhav, ‘A arloedh ow mester, piw eus neb a yll godhvos an taklow ma, marnas nag yw y drigva gans mab-den?

³⁹Mes my, heb furneth ov, ha fatell allav kewsel a-dro dhe'n taklow ma a wovynnsys orthiv anedha?’

⁴⁰Yn-medh ev dhymm, ‘Kepar dell na yllydh gul onan vyth a'n taklow a gewsis vy anedha, yn kettella ny yllydh diskudha ow breus, nag amkan an gerensa a ambosis vy dhe'm pobel.’

⁴¹Yn-medhav, ‘Mes, A arloedh, yma y'th charj an re yw bew y'n diwedh; mes pandr'a wra an re a veu bew kyns ow thermyn vy, po ni agan honan, po an re a dheu war agan lergh?’

⁴²Yn-medh ev dhymm, ‘My a wra hevelebi ow breus dhe gylgh; kepar dell na vydh an re dhiwettha re helergh, yn kettella ny vydh an re gynsa re a-varr.’

⁴³Ena my a worthybis, ‘A ny allsesta kreatya y'n keth termyn oll an re a veu kreatys, ha neb yw a-lemmyn, ha neb a vydh, may tiskwetthes dha vreus dhe skonna?’

⁴⁴Ev a worthybis dhymm, ‘Ny yll an kreashyon fistena moy es an Kreador, na ny yll an bys synsi yn unn prys an re re beu kreatys ynno.’

⁴⁵Yn-medhav, ‘Fatell leversys dhe'th was ty dhe ri bewnans yn sur yn unn prys dhe'th kreashyon? Ytho mar pydh oll kreaturs bew yn unn prys, ha'n kreashyon a yll aga sostena, y hallsa hwath lemmyn aga sostena oll war-barth yn unn prys.’

⁴⁶Yn-medh ev dhymm, ‘Govynn orth torr benyn, ha lavar dhedhi, “Mar tineythydh deg flogh, prag yth yw onan war-lergh an arall?” Govynn orti ytho dineythi deg yn unn prys.’

⁴⁷Yn-medhav, ‘Ny yll hi gul henna, mes res yw dhe bubonan bos yn y dermyn y honan.’

⁴⁸Yn-medh ev dhymm, ‘My ynwedh re ros torr an nor dhe'n re yw hesys ynno a dermyn dhe dermyn.

⁴⁹Rag par dell na wra fleghik dineythi, ha ny dhineyth na fella benyn neb a dheuth ha bos koth, yn kettella my re ros an keth rewl dhe'n bys a wrugavy y greatya.’

⁵⁰Ena my a wovynnas, ‘A-ban resys dhymm an chons, gas my dhe gewsel a-ragos. Yw agan mamm hwath yowynk, may kewssys dhymm anedhi? Po yw hi lemmyn ow tos nes dhe gothni?’

⁵¹Ev a worthybis dhymm, ‘Govynn orth benyn usi ow tineythi fleghes, ha hi a lever dhis.

⁵²Lavar dhedhi, “Prag yth yw an re a dhineythsys a-gynsow dihaval dhe'n re a dhineythsys kyns, mes byghanna aga ughelder?”

⁵³Ha hi hy honan a worthyp dhis, “An re genys yn nerth yowynkses yw dihaval dhe'n re genys yn termyn kothni, pan fyll an dorr.”

⁵⁴Rakhenna preder, ty ynwedh: hwi yw byghanna agas ughelder es an re kyns agas termyn,

⁵⁵ha'n re a dheu war agas lergh a vydh byghanna agesowgh, rag yma an kreashyon ow mos ha bos koth seulabrys, hag ow passya nerth yowynkses.’

⁵⁶Yn-medhav, ‘Arloedh, my a'th pys, mar kevis vy gras y'th wolok, diskwedh dhe'th was dre biw y fydhydh ow vysytya dha greashyon.’