Read Kernewek 2 Esdras 6 Bible Online

2 Esdras 6 - Kernewek bible

2 Esdras 6

¹Yn-medh ev dhymm, ‘Y'n dalleth a gylgh an norvys, kyns bos porthow an bys settys yn-bann, ha kyns an gwynsow dhe omguntell ha hwytha,

²ha kyns grommyans an taran dhe seni, ha kyns lughesennow dhe splanna, ha kyns bos selyow paradhis fastys,

³ha kyns bos gwelys an bleujennow teg, ha kyns bos kuntellys war-barth an luyow diniver a eledh,

⁴ha kyns bos drehevys yn-bann ughelderyow an ayr, ha kyns bos musuryow an fyrmament henwys, ha kyns bos skavell-droes Sion fastys,

⁵ha kyns an blydhynyow a-lemmyn devisys, ha kyns bos difennys dismygyansow peghadoryon an oes ma, ha kyns bos sel gorrys war an re a with fydh avel tresor dhedha aga honan —

⁶ena my a brederis, ha'n taklow ma a veu gwrys dredhov vy ow honan a-der dre arall; kepar dell vydh an diwedh dredhov vy a-der dre arall.’

⁷My a worthybis, ‘Pandr'a vydh rannans an termynyow? po p'eur fydh diwedh an kynsa oes, po dalleth an oes a siw?’

⁸Yn-medh ev dhymm, ‘A-dhia Abraham bys Ysak; drefenn dhiworto y feu genys Yakob hag Esaw, rag leuv Yakob a synsi seudhel Esaw a'n dalleth.

⁹Lemmyn Esaw yw diwedh an oes ma, ha Yakob yw dalleth an oes a siw.

¹⁰Diwedh den yw an seudhel, ha dalleth den yw an leuv; ynter an seudhel ha'n leuv na hwila travyth arall, Ezra!’

¹¹My a worthybis, ‘Arloedh ow mester, mar kevis vy gras y'th wolok,

¹²diskwedh dhe'th was diwedh dha doknys may tiskwedhsys dhymm rann anedha nyhewer.’

¹³Ev a worthybis, ‘Sav yn-bann war dha dreys, ha ty a glew lev ughel ow tasseni.

¹⁴Ha mar pydh kryghyllys an tyller may sevydh

¹⁵ha'n lev ow kewsel, na borth own; rag an lev yw a-dro dhe'n diwedh, ha selyow an bys a gonvedh

¹⁶an kows dhe vos a-dro dhedha aga honan. I a gren hag a vydh kryghyllys, rag i a woer y koedh dh'aga diwedh bos chanjys.’

¹⁷Pan glewis vy hemma, my a sevis yn-bann war ow threys ha goslowes, hag otta, yth esa lev ow kewsel, ha'y son a veu avel an son a dhowrow meur.

¹⁸Y leveris, ‘Otta, an dydhyow a dheu, pan dhallathav dos nes dhe vysytya trigoryon an nor,

¹⁹pan hwilav dhiworth an dhrogoberoryon kessydhyans aga drogober, pan vydh uvelheans Sion kewerys,

²⁰ha pan vydh sel gorrys war an oes usi ow tremena, ena my a dhiskwedh an toknys ma: an lyvrow a vydh igerys a-rag an fyrmament, ha peub oll a'n gwel y'n keth prys.

²¹Fleghes unn bloedh a gews gans aga lev, ha benynes gans flogh a dhineyth fleghes a-varr, y'n tressa po an peswora mis, ha'n re ma a vew ha terlemmel.

²²Dison tylleryow a veu hesys a omdhiskwedh kepar ha na vons hesys, ha dison skiberyow leun a vydh kevys gwag;

²³an hirgorn a sen, ha pan wra peub oll y glewes dison i a vydh dyegrys.

²⁴Y'n eur na, y hwra kowetha gwerrya erbynn kowetha avel eskerens, ha'n nor ha'y drigoryon a vydh dyegrys, ha dowrhynsyow an fentynyow a sev, ma na dewragons yn tri our.

²⁵‘Piwpynag a vo gesys dhiworth oll an taklow a dharganis dhis a vydh selwys, hag ev a wel ow selwyans ha diwedh ow bys.

²⁶Hag i a wel an dus kemmerys, an re na dastyas mernans a-dhia aga genesigeth; ha kolonn an drigoryon a vydh chanjys, ha treylys yn brys arall.

²⁷Rag droktra a vydh dileys, ha toell a vydh difeudhys;

²⁸fydh a florysh, ha legras a vydh fethys, ha'n gwir, re beu seuladhydh heb frut, a vydh diskwedhys.’

²⁹Pan esa ow kewsel orthiv, ott, an tyller mayth esen vy ow sevel a dhallathas leska tamm ha tamm.

³⁰Yn-medh ev dhymm, ‘My re dheuth dhe dhiskwedhes dhis an taklow ma an nos ma.

³¹Ytho mar pysydh arta ow penys, my a dhiskler dhis taklow brassa ages an re ma,

³²rag dha lev re beu klewys a-rag an Ughella; an Galloesek re welas dha wiryonedh, hag ev re verkyas an chastita re withsys a-dhia dha yowynkneth.

³³Rakhenna ev a'm dannvonas dhe dhiskwedhes dhis oll an taklow ma, ha dhe leverel dhis: “Trest, ha na borth own.

³⁴Na fisten dhe brederi taklow euver a-dro dhe'n termynyow passys; ena ny fyskydh yn tibreder a-dro dhe'n termynyow diwettha.” ’

³⁵Wosa hemma, my a oelas arta ha gul penys seyth dydh y'n keth vaner, dhe gewera an teyr seythun a veu leverys dhymm.

³⁶Ena y'n ethves nos ow holonn o troblys ynnov arta, ha my a dhallathas kewsel yn golok an Ughella.

³⁷Pur yntanus o ow spyrys, ha duwenik o ow enev.

³⁸Yn-medhav, ‘Arloedh, ty a leveris yn dalleth an kreashyon, y'n kynsa dydh, “Bedhes nev ha nor”, ha'th er a gowlwrug an ober.

³⁹Ena yth esa an spyrys ow nija, hag yth esa tewolgow ha taw oll a-dro; nyns esa son lev mab-den hwath ena.

⁴⁰Ena ty a erghis may fe dewynn a wolewder dres yn-mes a'th tresorvaow, may fe gwelys dha oberow.

⁴¹Arta, y'n nessa dydh ty a greatyas spyrys an fyrmament hag erghi dhodho may fe rynnys, ha gul dibarth ynter an dowrow, mayth ella unn rann yn-bann, ha'n rann arall triga a-woeles.

⁴²Y'n tressa dydh ty a erghis may fe an dowrow kuntellys war-barth yn seythves rann an nor; hwegh rann ty a syghas ha'ga gwitha, may fe rann anedha plynsys ha gonedhys, ha bos servabyl a-ragos.

⁴³Rag dha er eth yn-mes, ha'n ober a veu gwrys hware.

⁴⁴A-dhesempis lanwes frut diniver a dheuth yn-mes, ha taklow sawrek a bub sort, ha bleujennow a liw heb par, hag odours marthys hweg. An re ma a veu gwrys y'n tressa dydh.

⁴⁵Y'n peswora dydh ty a erghis may fe gwrys splannder an howl, golow an loer, ha'n ster yn aga aray;

⁴⁶ha ty a erghis dhedha servya mab-den a vynnsys y greatya.

⁴⁷Y'n pympes dydh ty a leveris dhe'n seythves rann, may fia an dowr kuntelles war-barth, dhe dhri yn-mes kreaturs bew, ydhyn ha puskes; hag yndella y feu gwrys.

⁴⁸An dowr avlavar ha divew a dhros yn-mes kreaturs bew, dell o erghys dhodho, may tisklerrya oll an kenedhlow dha oberow marthys.

⁴⁹Ena ty a withas dew groadur: onan anedha ty a henwis Behemoth ha'n nessa Leviathan.

⁵⁰Ty a dhibarthas an eyl dhiworth y gila, rag ny ylli an seythves rann, may feu an dowr kuntellys ynni, synsi aga dew.

⁵¹Ha ty a ros dhe Behemoth onan a'n rannow a via syghys y'n tressa dydh, dhe driga ynni, ple'ma mil venydh;

⁵²mes dhe Leviathan ty a ros an seythves rann, an rann lyb. Ha ty re's gwithas dhe vos dybrys gans piwpynag a vynnydh, ha peskweyth y fynnydh.

⁵³Y'n hweghves dydh ty a erghis dhe'n dor dhe dhri yn-mes a-ragos chatel, bestes gwyls ha pryves;

⁵⁴ha dres an re ma ty a worras Adam, avel rewler war bup-tra a wrussys; ha dhiworto ni oll re dheuth, an bobel a dhewissys.

⁵⁵‘My re gewsis oll hemma, Arloedh, rag ty a leveris y feu ragon ni y hwrussys an bys.

⁵⁶Mes ty a leveris nag yw travyth an kenedhlow erell genys a Adam, mes avel trew ons, ha ty re hevelebis aga flenteth dhe dhryppenn dhiworth kelorn.

⁵⁷Ha lemmyn, Arloedh, ott, an kenedhlow ma, reknys avel travyth, a'gan rewl ha'gan devorya.

⁵⁸Mes ni dha bobel, a elwsys dha gynsa-genys, dha unn-dhineythys, an moyha diwysyk ragos, ha'n moyha kerys, re beu res yn aga diwla.

⁵⁹Mar peu an bys kreatys ragon ni, prag na bewon agan bys avel eretons? Pygemmys prys y fydh yndella?’