Read Kernewek 2 Esdras 8 Bible Online

2 Esdras 8 - Kernewek bible

2 Esdras 8

¹Ev a worthybis dhymm, ‘An Ughella a wrug an bys ma rag lies, mes rag boghes yw an bys a dheu.

²Mes my a lever dhis parabolenn, Ezra. Govynn orth an nor, hag ev a lever dhis ev dhe ri myns meur a bri, mayth yw lestri priweyth gwrys, mes boghes doust may teu owr dhiworto; yndella yw fordh an bys a-lemmyn.

³Lies re beu kreatys, mes ny vydh selwys marnas boghes.’

⁴My a worthybis, ‘Rakhenna, ow enev, yv dha walgh a gonvedhes, ha devor furneth.

⁵Rag ny dheuthys y'n bys dhe'th vodh dha honan,[9] hag erbynn dha vodh ty a dhiberth, rag ny veu res dhis marnas termyn kott dhe vewa.

⁶A Arloedh a-ughon, gront dhe'th was may pyssyn a-ragos, ha ro dhyn has yn agan kolonn, ha gonisogeth yn agan konvedhes may fo frut anodho, may hallo pub den legrys kavoes bewnans.

⁷Rag nyns eus marnas ty dha honan, ha ni yw ober dha dhiwleuv, dell leversys.

⁸‘Ha rag ty dhe ri bewnans dhe'n korf yw gwrys lemmyn yn torr an vamm, ha keworra dhodho eseli, an pyth a greatsys yw gwithys saw yn tan ha dowr, ha naw mis an dorr a wodhev dha groadur formys ynni.

⁹Mes an pyth a with ha'n pyth yw gwithys aga dew yw gwithys gans dha with jy. Ha pan dhaskorr an dorr arta an pyth a veu formys ynni,

¹⁰ty re worhemmynnis may fo leth proviys dhiworth an eseli, henn yw dhiworth an dhiwvronn, frut an bronnow,

¹¹may fo megys an pyth a veu formys rag termyn; ha wosa henna ty a'n syns y'th tregeredh.

¹²Ty re'n magas y'th ewnder, ha'y dhyski y'th lagha, ha'y geredhi y'th furneth.

¹³Ty a'n gorr dhe'n mernans avel dha greashyon, ha'y vewhe avel dha ober.

¹⁴Ytho mar tistruydh yn skav nebonan a formsys gans lavur mar vras, prag y feu kreatys?

¹⁵‘Ha lemmyn my a lever hemma: A-dro dhe vab-den oll, ty a woer an gwella; mes my a gews a'th pobel mayth ov vy grevys ragdha,

¹⁶hag a-dro dhe'th eretons may hwrav vy kyni ragdha, hag a-dro dhe Ysrael mayth ov vy trist ragdha, hag a-dro dhe has Yakob mayth ov vy troblys ragdha.

¹⁷Rakhenna my a bys a-ragos ragov vy ow honan ha ragdha i, rag my a wel fatell on ni koedhys, trigoryon an tir.

¹⁸Mes my re glewas y teu an vreus yn skon.

¹⁹Ytho klew ov lev, ha konvedh ow geryow, ha my a gews a-ragos.’ Dalleth geryow pysadow Ezra kyns ev dhe vos kemmerys yn-bann.

²⁰‘A Arloedh, ty neb yw trigys bys vykken, ha'th tewlagas yw ughelhes hag yma dha jambouryow y'n ayr,

²¹ha'th tron yw dres musur ha'th glori dres konvedhes; y sev a-ragos ow krena luyow an eledh,

²²hag orth dha worhemmynn treylys yns dhe wyns ha tan; sur yw dha er, fyrv yw dha lavarow, hag euthyk yw dha arghadow;

²³dha wolok a sygh an downderyow ha'th sorr a wra dhe'n menydhyow teudhi dhe-ves, ha'th wirder yw fastys bys vykken:

²⁴klew, Arloedh, pysadow dha was, ha gans dha dhiwskovarn degemmer gorholedh dha groadur; klew ow geryow.

²⁵Rag hedre vewiv my a gews, ha hedre vo genev konvedhes my a worthyp.

²⁶Na vir orth kammweythresow dha bobel, mes orth an re a'th serv yn lelder.

²⁷Na vir orth attentys an re dhidhuw, mes orth an re a with dha dhustuniow gans dolor.

²⁸Na breder a'n re a vewas yn trog a-ragos, mes porth kov a'n re a aswonnis own ahanas a'ga bodh.

²⁹Na vynn distrui an re vewas avel an bestes, mes mir orth an re a dhyskas dha lagha yn splann.

³⁰Na sorr gans an re yw breusys dhe vos gweth es bestes, mes kar an re a drestyas pup-prys y'th glori.

³¹Rag ni ha'gan tasow re siwyas hynsyow drog, mes yth yw drefenn ni peghadoryon y fydhydh gelwys truedhek.

³²Rag mar mynnsys kemmeres truedh ahanan, na'gan beus oberow gwirvreus, ena ty a vydh gelwys truedhek.

³³An re ewn ytho, rag bos dhedha oberow pals gwithys genes, a dhegemmer pewas yn-mes a'ga oberow aga honan.

³⁴Mes pyth yw mab-den may serrydh ganso, po agh podredhek rag ty dhe vos mar hwerow er y bynn?

³⁵Rag yn gwir, nyns eus denvyth yn mysk an re a veu genys na omdhug yn tidhuw; hag yn mysk an re a veu yn few na gammwrug.

³⁶Rag yn henna yth yw dha ewnder ha'th tader diskwedhys, pan os truedhek dhe'n re nag eus dhedha substans a oberow da.’

³⁷Ev a worthybis dhymm, ‘Nebes taklow ty re worthybis yn ewn, ha herwydh dhe eryow yndella y fydh.

³⁸Rag yn hwir ny wrav vri a'n re a beghas, na'ga mernans, na'ga breus, na'ga dampnyans;

³⁹mes my a lowenha war wrians an re wiryon, hag ynwedh war aga fergherinses, aga selwyans, ha'n pewas a dhegemmerons.

⁴⁰Dell glewis vy ytho, yndella y fydh.

⁴¹Rag dell wra an tiek hasa meur a has war an tir ha plansa lies gwydhenn, mes ny dheu yn-bann yn y seson pup-tra a veu hesys, na ny wra pup-tra a veu plynsys gwreydhya; yndella ynwedh yth yw gans an re a veu hesys y'n bys: ny vydh pubonan anedha selwys.’

⁴²My a worthybis, ‘Mar kevis gras, gas vy dhe gewsel.

⁴³Dell yll has an tiek fyllel tevi, rag ny dhegemmeras glaw dhiworthis y'n seson, po mar pydh distruys gans re a law, pedri a wra.

⁴⁴Mes mab-den, formys gans dha dhiwleuv, ha gelwys imaj ahanas, rag yth osta haval dhodho, may hwrussys pup-tra ragdho ev — a'n gwrussys haval dhe has tiek?

⁴⁵Na sorr genen, mes kemmer truedh a'th pobel, rag truedhek os a'th kreashyon.’

⁴⁶Ev a worthybis dhymm, ‘An taklow a-lemmyn yw rag an bobel a-lemmyn, ha taklow a dheu rag an termyn a dheu.

⁴⁷Rag pell osta a alloes kara ow kreashyon moy es dell wrav vy y gara. Mes ty re hevelebis dha honan yn fenowgh dhe'n re gammhynsek; na wra yndella.

⁴⁸Mes hwath yn hemma marthys os yn golok an Ughella,

⁴⁹rag ty dhe omuvelhe, dell dhelledh ragos, ha ny omwrussys yn mysk an re wiryon. Ytho dhe voy y fydhydh glorifiys.

⁵⁰Rag lies tra anfeus a vydh gwrys dhe'n re yw trigys y'n bys, rag i re gerdhas yn goeth meur.

⁵¹Mes ty preder ragos jy dha honan, ha hwila an glori gwithys rag an re avelos;

⁵²ragowgh hwi yw paradhis igerys, an wydhenn a vewnans yw plynsys, an oes a dheu yw pareusys, palster yw proviys, sita yw drehevys, powes yw apoyntys, dader yw fastys ha furneth gwrys perfydh kyns.

⁵³Gwreydhenn droktra yw keys dhiworthowgh gans sel, gwannder yw pellhes dhiworthowgh, hag ankow yw kudhys; ifarn re fias, ha podredhes yw ankevys.

⁵⁴Dolors re dremenas dhe-ves, hag y'n diwedh tresor anvarwoleth yw diskwedhys.

⁵⁵Rakhenna na wovynn pella a-dro dhe'n routh usi ow mos dhe goll.

⁵⁶Rag i a gavas aga rydhses, mes i a dhispresyas an Ughella, ha skornya y lagha, hag i a forsakyas y fordhow.

⁵⁷Hwath pella i re drettyas an re wiryon yn-dann dreys,

⁵⁸ha leverel yn aga holonn nag eus Duw, kyn hwodhyens y ferwons

⁵⁹Rag kepar dell y'gas worta hwi an taklow ragleverys, yndella syghes ha payn yw parys ragdha i. Rag ny vynnas an Ughella mab-den dhe vos distruys;

⁶⁰mes an re a veu kreatys aga honan re dhefolas y hanow ev neb a'n gwrug, ha ny aswonnsons gras dhodho ev neb a bareusis bewnans ragdha lemmyn.

⁶¹Hemm yw prag y teu ow breus nes lemmyn;

⁶²ny dhiskwedhis hemma dhe bubonan, marnas dhiso jy, ha nebes re avelos.’ Ena my a worthybis,

⁶³‘Arloedh, ty re dhiskwedhas dhymm lemmyn meur a'n toknys a wredh y'n termynyow diwettha, mes ny dhiskwedhsys p'eur y's gwredh.’