Read Kernewek 2 Esdras 9 Bible Online

2 Esdras 9 - Kernewek bible

2 Esdras 9

¹Ev a worthybis dhymm, ‘Musur y'th vrys gans rach, ha pan welydh re a'n toknys ragleverys dhe dremena,

²ena ty a gonvedh henna dhe vos an keth termyn pan vydh an Ughella ow talleth vysytya an bys a greatyas.

³Ytho pan omdhiskwedh y'n bys dorgrysyow, tervans poblow, brasow kenedhlow, hokyans ledyoryon, deray pennsevigyon,

⁴ena ty a gonvedh an re ma dhe vos an pyth a gewsis an Ughella anedha a-dhia'n dydhyow kyns, a-dhia'n dalleth.

⁵Kepar dell eus dhe bup-tra a veu gwrys y'n bys dalleth ha diwedh apert,

⁶yndella ynwedh yw termynyow an Ughella: an dallethow yw apert yn marthusyon hag oberow galloesek, ha'n diwedh yn gweythresow ha toknys.

⁷‘Pubonan neb a vydh selwys hag a yll skapya der y oberow y honan, po der an fydh may krysis ynni,

⁸a vydh gwithys saw dhiworth an peryllow ragleverys, hag ev a wel ow selwyans y'm tir hag a-ji dhe'm oryon, a wrugavy aga sanshe ragov ow honan a'n dalleth.

⁹Ena sowdhenys vydh an re a debeldhyghtyas ow fordhow, ha'n re a's skonyas gans bismer a drig yn tormentys.

¹⁰Rag myns na'm aswonnis yn aga bewnans, hag a dhegemmeras ow bennathow,

¹¹ha myns a skornyas ow lagha pan esa rydhses hwath dhedha,

¹²ha ny's konvedhsons pan esa hwath dhedha chons a edrega, mes i a's dispresyas — wosa mernans, y koedh dhedha y aswonn gans torment.

¹³Na vydh hwansek ytho dhe wodhvos fatell vydh an re dhidhuw tormentys, mes govynn fatell vydh an re wiryon selwys; dhedha i yw an bys, ha ragdha i an bys a veu gwrys.’

¹⁴My a worthybis,

¹⁵‘Dell leveris vy kyns, ha leverel lemmyn, ha'y leverel a-wosa, yma moy ow mos dhe goll ages an re a vydh selwys,

¹⁶kepar dell yw tonn brassa ages dryppenn a dhowr.’

¹⁷Ev a worthybis, ‘Kepar dell yw an gwel, yndella ynwedh yw an has; ha kepar dell yw an bleujyow, yndella ynwedh yw an liwyow; ha kepar dell yw an lavur, yndella ynwedh yw an askorr; ha kepar dell yw an tiek, yndella ynwedh yw an leur-drushya.

¹⁸Kyns an bys dhe vos kreatys rag tus dhe vewa ynno, pan esen vy orth y bareusi rag an re trigys ynno lemmyn, ny gewsis denvyth er ow fynn,

¹⁹rag nyns esa denvyth yn few. Mes lemmyn an re kreatys y'n bys ma, spit dhe voes na fyll ha lagha na yll bos doutys, yw podredhek yn aga hynsyow drog.

²⁰Ytho my a brederis a'm bys, hag otta, galsa dhe goll; ha'm norvys, hag otta, yth esa yn peryll drefenn towlow drog an re a dhothya ynno.

²¹My a welas hemma, ha skant ny yllis sparya denvyth; mes my a withas ragov ow honan unn grappa yn-mes a vagas, hag unn plans yn-mes a goeswik vras.

²²Ytho gas an routh dhe vos dhe goll neb a veu genys yn euver, mes gas dhe'm grappa bos gwithys, ha'm plans; rag gans lavur bras my a's gwrug perfydh.

²³‘Byttegyns y koedh dhis gortos hwath seyth dydh moy. Na hepkorr boes ynna,

²⁴mes ke yn park a vleujyow le na veu chi drehevys ynno, ha deber unnsel bleujyow an park; na wra tastya kig nag eva gwin, mes bleujyow heb ken,

²⁵ha gwra pysadow heb hedhi dhe'n Ughella. Ena my a dheu ha kewsel genes.’

²⁶Ytho my eth yn-rag, kepar dell leveris dhymm, bys yn park gelwys Ardat; ha my a esedhas ena yn mysk an bleujyow, ha dybri rann a losowys an park, ha'n voes na a veu lowr ragov.

²⁷Wosa eth dydh, ha my esedhys war an gwels, ow holonn a veu troblys arta a-berth ynnov, avel kyns.

²⁸Ena ow ganow a veu igerys, ha my a dhallathas kewsel a-rag an Ughella:

²⁹‘A Arloedh, ty a dhiskwedhas dha honan dhymm, dh'aga thasow y'n gwylvos pan dheuthons yn-mes a Ejyp, ha pan dheuthons bys yn gwylvos na via trettys, ha difrut; ha ty a leveris dhedha,

³⁰“Klew vy, ty Ysrael, ha goslow orth ow geryow, a has Yakob.

³¹Rag my a has ow lagha ynnowgh, ha hi a dheg frut ynnowgh, ha hwi a vydh glorifiys dredhi bys vykken.”

³²Rag kyn tegemmeras agan tasow an lagha, ny's siwsons na ny withsons an ordenansow. Mes nyns eth frut an lagha dhe goll, ha ny yllis, rag dhiso jy y feu.

³³Mes an re a's degemmeras eth dhe goll, rag ny withsons an pyth a via hesys ynna.

³⁴Hag ott, an usadow yw, pan dhegemmer an dor has, po an mor gorhel, po neb lester boes po diwes, ha pan vo distruys an pyth a veu hesys po lonchys po gorrys a-ji,

³⁵distruys yns; mes an taklow a veu ynna yw gesys; mes genen ni nyns yw yndella.

³⁶Rag ni, degemmeroryon an lagha, a dhe goll dre beghes, hag ynwedh agan kolonn, an lester a's synsis.

³⁷Mes nyns a dhe goll an lagha hy honan, mes hi a bes yn hy glori.’

³⁸Pan esen ow kewsel an taklow ma y'm kolonn, my a viras a-dro, ha gweles benyn a-dhyghowbarth, hag otta, yth esa ow kyni hag owth oela gans lev ughel, grevys meur yn hy enev; hy dillas o skwardys, hag yth esa lusu war hy fenn,

³⁹Ena my a dewlis a-denewen an prederow a lenwi ow brys, ha treylya dhedhi ha leverel,

⁴⁰‘Prag yth esosta owth oela, ha prag yth osta grevys y'th enev?’

⁴¹Yn-medh hi dhymm, ‘Gas my ow honan, ow arloedh, mayth oelliv ha keworra dhe'm dolor, rag hwerow meur ov y'm enev, hag uvelhes yn feur.’

⁴²Yn-medhav dhedhi, ‘Pandr'a hwarva? Lavar dhymm.’ Yn-medh hi dhymm,

⁴³My dha vaghteth a veu anvap, heb flogh, kyn feu dhymm gour deg blydhen warn ugens.

⁴⁴Pub eur ha pub dydh y'n deg blydhen warn ugens na my a bysis war an Ughella.

⁴⁵Wosa deg blydhen warn ugens Duw a woslowas dhe'th vaghteth, ha mires war ow uvelder, ha gul vri a'm galar, hag ev a ros dhymm mab. My a gavas lowena veur warnodho, ha'm gour ha'm kentrevogyon ynwedh; ha ni a ros enor bras dhe'n Galloesek.

⁴⁶My a'n magas gans meur a rach.

⁴⁷Wosa ev dhe devi my a dheuth dhe gavoes gwreg ragdho, ha my a settyas dydh rag an demmedhyans.