Read Kernewek Matthew 1 Bible Online

Matthew 1 - Kernewek bible

Matthew 1

¹Lyver linyeth Yesu Krist mab Davydh mab Abraham.

²Abraham a dhineythis Ysak, hag Ysak a dhineythis Yakob, ha Yakob a dhineythis Yuda ha'y vreder ev,

³ha Yuda a dhineythis Peres ha Zera a Thamar, ha Peres a dhineythis Hesron, ha Hesron a dhineythis Aram,

⁴hag Aram a dhineythis Amminadab, hag Amminadab a dhineythis Nahshon, ha Nahshon a dhineythis Salmon,

⁵ha Salmon a dhineythis Boaz a Rahab, ha Boaz a dhineythis Obed[1] a Ruth, hag Obed a dhineythis Yesse,

⁶ha Yesse a dhineythis Davydh an myghtern. Ha Davydh a dhineythis Solomon a wreg Urri,

⁷ha Solomon a dhineythis Roboam, ha Roboam a dhineythis Abia, hag Abia a dhineythis Asaf,[2]

⁸hag Asaf a dhineythis Yehoshafat, ha Yehoshafat a dhineythis Yoram, ha Yoram a dhineythis Uzzia,

⁹hag Uzzia a dhineythis Yoatham, ha Yoatham a dhineythis Ahaz, hag Ahaz a dhineythis Hezekia,

¹⁰ha Hezekia a dhineythis Manasse, ha Manasse a dhineythis Amos,[3] hag Amos a dhineythis Yosia,

¹¹ha Yosia a dhineythis Yekonia ha'y vreder ev yn prys aga divroans dhe Babylon.

¹²Ha wosa an divroans dhe Babylon Yekonia a dhineythis Shealtiel, ha Shealtiel a dhineythis Zerubbabel,

¹³ha Zerubbabel a dhineythis Abiud, hag Abiud a dhineythis Elyakim, hag Elyakim a dhineythis Azor,

¹⁴hag Azor a dhineythis Sadok, ha Sadok a dhineythis Akim, hag Akim a dhineythis Eliud,

¹⁵hag Eliud a dhineythis Eleazar, hag Eleazar a dhineythis Matthan, ha Matthan a dhineythis Yakob,

¹⁶ha Yakob a dhineythis Yosep gour Maria, may feu gensi dineythys Yesu, yw gelwys Krist.

¹⁷Ytho oll an henedhow a Abraham bys Davydh o peswardhek henedh, hag a Davydh bys an divroans dhe Babylon o peswardhek henedh, hag a'n divroans dhe Babylon bys Krist o peswardhek henedh.

¹⁸Dineythyans Yesu Krist o yndellma. Pan via y vamm Maria ambosys dhe Yosep, kyns i dhe dhos war-barth, yth omgavas owth omdhoen der an Spyrys Sans.

¹⁹Ha Yosep hy gour, a-ban o den ewnhynsek, ha ny vynni gul bismer dhedhi, a erviras hy gorra a-denewen yn-dann gel.

²⁰Hag ev owth ombrederi a-dro dhe'n taklow ma, awotta, el an Arloedh a omdhiskwedhas dhodho dre hunros, ow leverel, ‘Yosep mab Davydh, na borth own a gemmeres Maria yn gwreg dhis; rag an pyth usi omdhegys ynni yw der an Spyrys Sans.

²¹Ha hi a dhineyth mab, ha ty a'n henow Yesu; rag ev a saw y bobel dhiworth aga feghosow.’

²²Oll henna yw hwarvedhys may fo kollenwys an dra kewsys gans an Arloedh der an profoes, ow leverel,

²³‘Awotta, an wyrghes a wra omdhoen ha dineythi mab hag i a'n henow Emmanuel’, yw dhe styrya, Genen ni Duw.

²⁴Ha Yosep pan dhifunas a'y gosk a wrug par dell worhemmynnsa dhodho el an Arloedh hag a gemmeras y wreg dhodho ev,

²⁵ha ny's aswonnis bys pan dhineythis hi mab;[4] hag ev a'n henwis Yesu.