Read Kernewek Matthew 10 Bible Online

Matthew 10 - Kernewek bible

Matthew 10

¹Ena ev a elwis y dhewdhek abostol hag a ros dhedha galloes war spyrysyon avlan rag aga thewlel yn-mes ha yaghhe pub eghenn a gleves ha dises.

²Ottomma henwyn an dewdhek abostol: an kynsa, Simon, neb yw gelwys Peder, hag Androw y vroder, Jamys mab Zebede ha Yowann y vroder,

³Felip ha Bertyl, Tommas ha Matthew an toller, Jamys mab Alfeus, ha Thaddeus,

⁴Simon an Kananyas ha Yudas Skaryoth, neb a'n traytas.

⁵An dewdhek ma Yesu a's dannvonas yn-mes ow ri charj dhedha ha leverel, ‘Na wrewgh mos yn fordh an Jentilys na dhe sita vydh a'n Samaritanys;

⁶mes kyns oll ewgh dhe dheves kellys chi Ysrael.

⁷Ha hwi war agas hyns, pregewthewgh ow leverel, “Gwlaskor nev re dheuth nes.”

⁸Yaghhewgh an glevyon, drehevewgh an re varow, glanhewgh an glavorogyon, tewlewgh yn-mes an dhywolow; heb kost y tegemmersowgh, rewgh heb kost.

⁹Na hwilewgh kavoes nag owr nag arghans na brest yn agas grogysyow,

¹⁰na skryp rag an hyns, na diw bows nag eskisyow na lorgh vytholl; rag an oberwas a dhervynn y voes.

¹¹Hag yn py sita bynag po tre yth yllowgh, hwilewgh godhvos piw yw gwiw ena; hag ena trigewgh bys pan yllowgh yn-kerdh.

¹²Ha hwi ow mos a-bervedh yn chi, salusewgh ev;

¹³ha mars yw gwiw an chi, gwres agas kres dos warnodho, mes mar nyns yw gwiw, dehweles agas kres dhywgh hwi.

¹⁴Ha piwpynag na'gas degemmerro po na woslowo agas geryow, pan yllowgh yn-mes a'n chi po a'n sita na, shakyewgh an doust dhiworth agas treys.

¹⁵Yn hwir y lavarav dhywgh, esya vydh hi dhe bow Sodom ha Gomorra dydh breus ages dhe'n sita na.

¹⁶‘Awotta, my a'gas dannvon yn-mes avel deves yn mysk bleydhi; rakhenna bedhewgh fur avel serf ha gwiryon avel kelemmi.

¹⁷Mes omwithewgh rag tus; rag i a'gas daskorr dhe gonselyow ha'gas skorjya yn aga synagys;

¹⁸ha hwi a vydh dres a-rag governours ha myghternedh a'm govis vy yn dustuni dhedha ha dhe'n Jentilys.

¹⁹Mes pan wrons agas daskorr na vedhewgh prederus fatell po pandr'a leverowgh; rag y fydh res dhywgh y'n eur na an dra y koedh dhywgh y leverel;

²⁰rag nyns yw hwi a gews mes Spyrys agas Tas neb a gews ynnowgh.

²¹Broder a dhaskorr broder dhe'n mernans ha'n tas y flogh, ha fleghes a sev erbynn kerens ha gul dhedha bos ledhys.

²²Ha hwi a vydh kesys gans pub den oll a-barth ow hanow, mes neb a dhhhhur bys y'n diwedh, ev a vydh selwys.

²³Pan y'gas helghyons y'n sita ma, fiewgh dhe onan arall; rag yn hwir y lavarav dhywgh, ny worfennowgh tremena dre sitys Ysrael kyns bos devedhys Mab an den.

²⁴‘Nyns yw dyskybel a-ugh y vester na kethwas a-ugh y arloedh.

²⁵Lowr yw dhe'n dyskybel y vos avel y vester, ha'n kethwas avel y arloedh. Mar kalwsons mester an chi Belzebul, pygemmys moy y vayni ev?

²⁶‘Rakhenna na berthewgh own anedha; rag nyns eus travyth kudhys na vo diskudhys, po kelys na vo aswonnys.

²⁷An dra a dherivav dhywgh y'n tewlder henna leverewgh y'n golow, ha'n dra a glewowgh hwystrys y'n skovarn gwrewgh y arma war bennow an chiow.

²⁸Ha na berthewgh own a'n re a ladh an korf, mes na yll ladha an enev; mes kyns oll perthewgh own a neb a yll diswul ha'n enev ha'n korf yn ifarn.[29]

²⁹A nyns yw dew olvan gwerthys a unn ferdhynn?[30] Mes nyns eus nagonan anedha a goedh dhe'n leur heb bodh agas Tas.

³⁰Ha hwi — pub blewenn a'gas penn yw niverys.

³¹Na berthewgh own ytho; hwi a dal moy ages lies golvan.

³²‘Piwpynag ytho a'm aswonn a-rag tus, an keth den na my a'n aswonn a-rag ow Thas eus y'n nevow;

³³ha piwpynag a'm denagh a-rag tus, my ynwedh a'n denagh ev a-rag ow Thas eus y'n nevow.

³⁴‘Na dybewgh ow bos vy devedhys rag dannvon kres war an norvys; nyns ov devedhys rag dannvon kres saw kledha.

³⁵Rag yth ov devedhys rag settya den erbynn y das, ha myrgh erbynn hy mamm, ha gohydh erbynn hy hweger,

³⁶hag eskerens den a vydh eseli y vayni y honan.

³⁷Neb a gar tas po mamm moy agesov vy nyns yw gwiw dhymm, ha neb a gar mab po myrgh moy agesov vy nyns yw gwiw dhymm;

³⁸ha'n den na gemmer y grows ha'm holya nyns yw gwiw dhymm.

³⁹Neb a hwila kavoes y vewnans, ev a'n kyll, ha piwpynag a gollo y vewnans a'm govis vy, a'n kyv.

⁴⁰‘Neb a'gas degemmer hwi, a'm degemmer vy, ha piwpynag a'm degemmer vy a dhegemmer neb a'm dannvonas.

⁴¹Piwpynag a dhegemmer profoes yn hanow profoes a gyv gober profoes; ha neb a dhegemmer den gwiryon yn hanow den gwiryon a gyv gober den gwiryon.

⁴²Ha piwpynag a rollo unnweyth hanafas a dhowr yeyn dhe eva dhe onan a'n re vyghan ma, yn hanow dyskybel, yn hwir y lavarav dhywgh, kammenn ny gyll ev y wober.’