Read Kernewek Matthew 12 Bible Online

Matthew 12 - Kernewek bible

Matthew 12

¹Y'n prys na Yesu a dremenas der an ysegi y'n sabot; ha'y dhyskyblon a's teva nown, hag a dhallathas terri pennow an ys ha dybri.

²An Fariseow pan welsons a leveris dhodho, ‘Awotta dha dhyskyblon ow kul an dra nag yw lafyl y wul y'n sabot.’

³Mes ev a leveris dhedha, ‘A ny redsowgh pandr'a wrug Davydh hag ev ow perthi nown, ev ha'n re esa ganso,

⁴fatell entras yn chi Duw ha dybri torthow an ragworrans nag o lafyl dhodho na dhe'n re esa ganso aga dybri, marnas dhe'n oferysi yn unnsel?

⁵Po a ny redsowgh y'n lagha bos an sabot terrys gans an oferysi y'n tempel ha'ga bos divlam?

⁶Mes my a lever dhywgh bos omma neppyth yw brassa ages an tempel.

⁷Ha mar kodhvewgh styr an lavar ma, “Ny vynnav sakrifis, mes tregeredh, ny wrussiwgh ri breus erbynn an re dhivlam.”

⁸Rag Mab an den yw Arloedh an sabot.’

⁹Ha wosa ev dhe dremena alena, ev a dheuth dh'aga synaga.

¹⁰Hag awotta den, gwedhrys y leuv. Hag i a wovynnas orto, ow leverel, ‘Yw lafyl yaghhe y'n sabot?’ rag may hallens y guhudha.

¹¹Mes ev a leveris dhedha, ‘Py den ahanowgh eus, hag unn dhavas ganso, mar koedh hi yn poll y'n sabot, na sett dalghenn ynni ha'y drehevel alena?

¹²Ytho, pygemmys moy a vri yw den ages davas! Rakhenna lafyl yw gul ober da y'n sabot.’

¹³Ena yn-medh ev dhe'n den, ‘Ystynn dha leuv.’ Hag ev a's ystynnas ha hi a veu restorys, yagh avel hy ben.

¹⁴Ha'n Fariseow owth omdenna a omgusulyas er y bynn fatell allens y dhistrui.

¹⁵Mes Yesu ow merkya hemma a omdennas alena; ha routhow bras a'n siwyas, hag ev a's yaghhas pubonan oll,

¹⁶ow korhemmynna dhedha na wrellens gul dhodho bos aswonnys yn apert,

¹⁷may fe kollenwys an dra menegys gans Ysay an profoes, ow leverel,

¹⁸‘Awotta ow gwas a dhewisis, ow haradow mayth usi ynno ow delit; my a worr ow spyrys warnodho hag ev a dheriv breus dhe'n Jentilys.

¹⁹Ny wra strivya na garma, na ny glew denvyth y lev y'n stretys.

²⁰Korsenn vrewys ny's terr na bubenn ow megi ny's difeudh, erna dhokko ev ewnder dhe vudhogoleth,

²¹hag yn y hanow ev an Jentilys a's tevydh govenek.’

²²Ena y feu dres dhodho sagh dyowl, dall hag avlavar, hag ev a'n sawyas par may hylli an avlavar[35] kewsel ha gweles.

²³Ha marth bras a'n jevo oll an routhow, hag yn-medhons, ‘A allsa hemma martesen bos mab Davydh?’

²⁴Mes an Fariseow pan y'n klewsons a leveris, ‘Ny dewl an den ma an dhywolow yn-mes saw dre Belzebul, pryns an dhywolow.’

²⁵Mes ev owth aswonn aga frederow a leveris, ‘Pub gwlaskor rynnys er hy fynn hy honan yw gwrys difeyth ha pub sita po chi rynnys er hy fynn hy honan ny sev.

²⁶Ha Satnas mara tewl ev Satnas yn-mes, rynnys yw erbynn y honan; ytho fatell yll y wlaskor sevel?

²⁷Ha mar towlav vy dywolow yn-mes dre Belzebul, dre biw y's tewl agas mebyon? Rakhenna y fydhons i agas breusysi.

²⁸Mes mars yw dre Spyrys Duw y towlav vy dywolow yn-mes, ena gwlaskor Duw yw devedhys warnowgh.

²⁹Po fatell yll nebonan mos a-bervedh yn chi den krev ha pylla y byth mar ny wra ev kyns oll kelmi an den krev hag ena pylla y ji?

³⁰Neb nag yw genev, er ow fynn yma, ha neb na guntell genev, skoellya y hwra.

³¹Rakhenna, yn-medhav dhywgh: pub pegh ha blasfemi a vydh gevys dhe dus, mes blasfemi erbynn an Spyrys Sans ny vydh gevys.

³²Ha piwpynag a gowsso ger erbynn Mab an den, dhodho y fydh gevys; mes piwpynag a gowsso erbynn an Spyrys Sans ny vydh gevys dhodho naneyl y'n oes ma nag y'n oes a dheu.

³³‘Poken gwrewgh an wydhenn dhe vos da ha'y frut da, po gwrewgh an wydhenn dhe vos podredhek ha'y frut podredhek, rag dre hy frut yth yw an wydhenn aswonnys.

³⁴Hwi askorr nadres, fatell yllowgh leverel taklow da ha hwi ow pos drog? Rag yn-mes a lanwes an golonn y lever an ganow.

³⁵An den da a dhre taklow da yn-mes a'y dresor da, ha'n drog dhen a dhre droktaklow yn-mes a'y dhroktresor.

³⁶Hag yn-medhav dhywgh, pub lavar dibreder a gews tus, i a attal akont anodho dydh breus,

³⁷rag herwydh dha lavarow y fydhydh akwitys ha herwydh dha lavarow y fydhydh dampnys.’

³⁸Ena y hworthybis dhodho re a'n skribys ha'n Fariseow ow leverel, ‘Mester, ni a vynn gweles tokyn dhiworthis.’

³⁹Hag ev a worthybis dhedha, ‘Henedh drog hag avoutrek a hwila tokyn, ha ny vydh tokyn res dhodho saw tokyn Yona an profoes.

⁴⁰Rag kepar dell esa Yona yn torr an morvil tri dydh ha teyr nos, yndella y fydh Mab an den tri dydh ha teyr nos yn kolonn an nor.

⁴¹Gwer Nineve a sev yn-bann y'n vreus gans an henedh ma ha'y dhampnya; rag i a goedhas yn edrek orth pregoth Yona, hag ottomma neppyth moy ages Yona.

⁴²Myghternes an dhyghowbarth a sev y'n vreus gans an henedh ma ha'y dhampnya, rag hi a dheuth dhiworth pennow an bys dhe glewes furneth Solomon, hag ottomma neppyth yw moy ages Solomon.

⁴³‘Peskweyth mayth ello spyrys avlan yn-mes a dhen, ev a dremen dre dylleryow sygh ow hwilas powesva ha ny's kyv.

⁴⁴Ena yn-medh ev, “My a dhehwel dhe'm chi may teuth vy yn-mes anodho”; ha pan yw devedhys, ev a'n kyv gwag ha skubys ha tekhes.

⁴⁵Ena yth a ha dri ganso seyth spyrys arall gweth agesso y honan, hag i ow mones a-bervedh, a drig ena; ha diwedh an den na yw gweth ages y dhalleth. Yndella ynwedh y fydh hi dhe'n henedh drog ma.’

⁴⁶Hag ev ow kewsel orth an routhow, otta, yth esa y vamm ha'y vreder ow sevel a-ves hag ow hwilas kewsel orto.

⁴⁷Ytho nebonan a leveris dhodho, ‘Ottomma dha vamm ha'th vreder ow sevel a-ves ha hwilas kewsel orthis.’[36]

⁴⁸Mes ev a worthybis ha leverel dhe'n den a dherivas henna dhodho, ‘Piw yw ow mamm ha piw yw ow breder?’

⁴⁹Hag owth ystynn i leuv war-tu ha'y dhyskyblon yn-medh ev, ‘Ottomma ow mamm ha'm breder,

⁵⁰rag seul a wrello bodh ow Thas eus y'n nevow, an keth henna yw ow broder ha'm hwoer ha'm mamm.’