Read Kernewek Matthew 13 Bible Online

Matthew 13 - Kernewek bible

Matthew 13

¹Y'n jydh na, Yesu eth yn-mes a'n chi hag esedha ryb an mor;

²ha routhow bras a omguntellas dhodho; ytho ev eth a-bervedh yn gorhel hag esedha, hag oll an routh a sevis war an treth.

³Hag ev a dherivas dhedha lies tra dre barabolennow, ow leverel, ‘Yth eth yn-mes gonador dhe wonedh has.

⁴Hag ev ow konis, rann a'n has a goedhas ryb an fordh, ha'n ydhyn a dheuth ha'y devorya.

⁵Rann arall a goedhas war an veynek, le nag esa meur a dhor, hag a-dhihwans yth eginas drefenn nag esa dhedhi downder dor;

⁶ha pan o an howl drehevys, y feu goleskys; ha rag nag esa gwreydhenn dhedhi, y feu desyghys.

⁷Rann arall a goedhas yn mysk spern ha'n spern a devis ha'y thaga.

⁸Mes rann arall a goedhas war dir da hag a dhug trevas, rann kansplek, rann tri-ugensplek ha rann deg warn ugens.

⁹Neb a'n jeves diwskovarn,[37] ev klewes.’

¹⁰Ena y teuth dhodho an dhyskyblon ha leverel dhodho, ‘Prag y kewsydh orta dre barabolennow?’

¹¹Ev a worthybis ha leverel dhedha, ‘Dhy'hwi yth yw grontys aswonn kevrinyow gwlaskor nev, mes dhedha i nyns yw grontys.

¹²Rag neb a bewvo, dhodho ev y fydh res, hag ev a'n jevydh lanwes; mes neb na bewvo, y fydh kemmerys a-dhiworto ynwedh an pyth a bew.

¹³Rakhenna dre barabolennow y kowsav dhedha, rag “i a vir mes ny welons, hag i a woslow mes ny glewons na konvedhes.”

¹⁴Hag a-dro dhedha yma kollenwys profoesans Ysay neb a lever, “Ow klewes y klewowgh, mes ny gonvedhowgh, hag ow mires y firowgh, mes ny aswonnowgh,

¹⁵rag brys an bobel ma a veu gwrys talsogh ha poes yw klewans aga diwskovarn ha'ga lagasow re dhegesons, ma na wellons gans aga lagasow, na klewes gans aga skovornow na konvedhes gans aga holonn ha treylya, hag ytho my a wra aga sawya.”

¹⁶Mes gwynnvys agas lagasow hwi rag y hwelons, ha'gas skovornow hwi rag y klewons.

¹⁷Rag yn hwir y lavarav dhywgh, lies profoes ha den gwiryon re beu hwansek dhe weles an taklow a welowgh hwi mes ny welsons ha dhe glewes an taklow a glewowgh hwi mes ny glewsons.

¹⁸‘Klewewgh ytho parabolenn an gonador:

¹⁹Pan glew nebonan ger an wlaskor heb y gonvedhes, an tebel el a dheu ha doen dhe-ves an dra yw hesys yn y golonn; hemm yw an dra hesys ryb an fordh.

²⁰Mes an dra hesys war an veynek, ev yw neb a glew an ger ha dihwans a'n degemmer gans lowena.

²¹Byttegyns nyns eus ganso gwreydhenn ynno y honan hag ev ny bes saw pols byghan, ha pan dheffo trobel po helghyans drefenn an ger, ev a drebuch desempis.

²²Ha'n dra hesys yn mysk spern, ev yw neb a glew an ger, mes fienasow an bys ha dynyans rychys a dag an ger hag ev ny dheg frut.

²³Mes an dra hesys yn tir da, ev yw neb a glew an ger ha'y gonvedhes hag ev a dheg frut, re anedha ow ri kansplek, re tri-ugensplek ha re deg warn ugensplek.’

²⁴Ev a worras parabolenn arall a-ragdha, ow leverel, ‘Gwlaskor nev yw hevelebys dhe dhen a wonedhas has da yn y wel.

²⁵Mes pan esa tus ow koska y teuth y eskar ha gonis ivra yn mysk an ys da hag ena mos yn-kerdh.

²⁶Mes pan eginas an skyll ha doen greun, ena yth omdhiskwedhas an ivra ynwedh.

²⁷Ha kethwesyon an tiek a dheuth ha leverel dhodho, “Syrra, a ny wruss'ta jy gonis has da y'th wel? Ytho a-ble kavas ivra?”

²⁸Yn-medh ev dhedha, “Eskar re wrug henna.” Yn-medh an gethwesyon dhodho, “A vynn'ta jy mayth yllyn ha'ga huntell?”

²⁹Mes yn-medh ev, “Na vynnav, rag own ha hwi ow kuntell an ivra, hwi a dhiwreydh an ys gansa.

³⁰Gesiwgh an dhew dhe devi war-barth bys y'n drevas hag yn prys an drevas my a lever dhe'n vysoryon, Kyns oll kuntellewgh war-barth an ivra ha'y gelmi yn manalow rag y leski, mes kuntellewgh an ys y'm skiber.” ’

³¹Ev a worras parabolenn arall a-ragdha, ow leverel, ‘Gwlaskor nev yw haval dhe hasenn kedhow a wrug den hy hemmeres ha'y gorra yn y bark.

³²Hi yw an byghanna a oll an hasennow, mes pan vo tevys, an brassa yw hi yn mysk oll an losow ha hi a dheu ha bos gwydhenn may teu ydhyn an ayr ha triga yn hy skorrennow.’

³³Parabolenn arall y leveris dhedha: ‘Gwlaskor nev yw haval dhe woell, a gemmeras benyn ha'y gemmyska yn tri musur[38] a vleus bys pan wrug dhe oll an toes sevel.’

³⁴Yesu a leveris oll an taklow ma dhe'n routhow dre barabolennow, ha heb parabolennow nyns esa ow leverel dhedha travyth,

³⁵may fe kollenwys an dra kewsys gans an profoes ow leverel, ‘My a iger ow ganow yn parabolennow, my a dheriv taklow a veu kelys a-dhia fondyans an bys.’

³⁶Ena Yesu a asas an routhow ha mos y'n chi. Ha'y dhyskyblon a dheuth dhodho ha leverel, ‘Ro dhyn ni styryans parabolenn ivra an gwel.’

³⁷Hag ev a worthybis, ow leverel, ‘Neb a wonedh an has da yw Mab an den,

³⁸ha'n gwel yw an bys, ha'n has da yw mebyon an wlaskor; mes an ivra yw mebyon an tebel el,

³⁹ha'n eskar neb a's gonedhas yw an jowl, ha'n drevas yw diwedh an oes, ha'n vysoryon yw eledh.

⁴⁰Ytho kepar dell yw an ivra kuntellys ha leskys yn tan, yndella y fydh yn diwedh an oes.

⁴¹Mab an den a vynn dyllo y eledh hag i a guntell yn-mes a'y wlaskor pub acheson a drebuchya, ha'n re a wra anlaghedh,

⁴²hag a's tewl yn fornes tan; ena y fydh oelva ha skrinva dyns.

⁴³Ena y terlenter an re wiryon avel an howl yn gwlaskor aga Thas. Neb a'n jeves diwskovarn,[39] ev klewes.

⁴⁴‘Arta,[40] haval yw gwlaskor nev dhe dresor kelys yn gwel, ha den pan y'n kavas, a'n kudhas, hag yn y lowender, yth eth dhe wertha oll y byth ha prena an gwel na.

⁴⁵‘Arta, gwlaskor nev yw haval dhe varghador eus ow hwilas perlys teg;

⁴⁶ha pan gavas perl a bris meur yth eth ha gwertha oll a'n jeva hag a'n prenas.

⁴⁷‘Arta, haval yw gwlaskor nev dhe roes tewlys y'n mor hag a guntellas pub eghenn a bysk.[41]

⁴⁸Honna pan o hi leun, i a's tennas dhe'n treth ha wosa esedha i a guntellas an re da yn lestri, mes i a dewlis yn-mes an re podrek.

⁴⁹Yndella y fydh hi yn diwedh an oes; an eledh a yn-rag ha ranna an re dhrog dhiworth an re wiryon,

⁵⁰hag a's tewl yn fornes tan; ena y fydh oelva ha skrinva dyns.’

⁵¹Yn-medh Yesu dhedha,[42] ‘A wrussowgh hwi konvedhes oll an lavarow ma?’ Yn-medhons dhodho, ‘Gwrussyn, Arloedh.’[43]

⁵²Yn-medh ev dhedha, ‘Pub skriba, ytho, a veu dyskys rag gwlaskor nev yw haval dhe diek neb a denn yn-mes a'y withva taklow nowydh ha taklow koth.’

⁵³Ha Yesu pan worfennsa an parabolennow ma a omdennas alena.

⁵⁴Ha wosa ev dhe dhos dh'y vro y honan, ev a's dyskas yn aga synaga, par mayth esa marth dhedha, hag yn-medhons, ‘A-ble kavas hemma an furneth ma ha'n oberow barthusek ma?

⁵⁵A nyns yw hemma mab an ser prenn? A nyns yw y vamm henwys Maria, ha'y vreder Jamys ha Yosep[44] ha Simon ha Yudas?

⁵⁶Ha'y hwerydh, a nyns esons i oll omma yn agan mysk? A ble ytho y kavas ev oll an taklow ma?’

⁵⁷Ha sklandrys ens i anodho. Mes Yesu a leveris dhedha, ‘Nyns yw profoes heb enor saw yn y vro y honan hag yn y ji y honan.’

⁵⁸Ha ny wrug ev meur a oberow galloesek ena drefenn aga diskryjyans.