Read Kernewek Matthew 15 Bible Online

Matthew 15 - Kernewek bible

Matthew 15

¹Ena Fariseow ha skribys a Yerusalem a dheuth dhe Yesu ow leverel,

²‘Prag y hwra dha dhyskyblon kammdremena erbynn hengov an henavogyon? Rag ny wolghons aga diwla pan dhebrons bara.’[47]

³Ev a worthybis ow leverel dhedha, ‘Ha hwi ynwedh, prag y hwrewgh kammdremena erbynn gorhemmynn Duw der agas hengov hwi?

⁴Rag Duw a leveris, “Enor dha das ha'th vamm”, ha “Neb a villikko y das po y vamm, bedhes gorrys dhe'n mernans.”

⁵Mes hwi a lever, Piwpynag a lavarro dh'y das po dh'y vamm, “Pypynag a gaffes dhiworthiv yw ro sakrys”,

⁶nyns yw ev synsys dhe enora y das na'y vamm;[48] ha hwi a dhile ger Duw der agas hengov.

⁷Hwi falswesyon, yn ta y profoesas Ysay ahanowgh, ow leverel,

⁸“An bobel ma a'm enor gans aga diwweus, mes pell yw aga holonn dhiworthiv;

⁹hag yn euver i a'm gordh, ow tyski avel dyskas gorhemmynnow tus.” ’

¹⁰Ha wosa ev dhe elwel an routh dhodho, yn-medh ev dhedha, ‘Klewewgh ha konvedhewgh;

¹¹Nyns yw an dra hag a wra mos a-bervedh y'n ganow a dhefol den, mes an dra hag a dheu yn-mes a'y anow — henna a wra defola den.’

¹²Ena an dhyskyblon a dheuth ha leverel dhodho, ‘A wodhesta bos an Fariseow sklandrys ow klewes an lavar na?’

¹³Ev a worthybis ow leverel, ‘Pub losowenn na wrug ow Thas a nev hy flansa a vydh diwreydhys.

¹⁴Gesiwgh i dhe vos; hembrenkysi dhall yns i a dus dhall.[49] Mar kwra den dall hembronk den dall, i aga dew a goedh yn kleudh.’

¹⁵Peder a worthybis, ow leverel dhodho, ‘Styr dhyn an barabolenn ma.’

¹⁶Ev a leveris, ‘Owgh hwi hwath heb konvedhes, hwi ynwedh?

¹⁷A ny gonvedhowgh bos pup-tra a enter a-bervedh y'n ganow ow tremena dhe'n golodhyon hag ena yw tewlys yn-mes y'n kawghti?

¹⁸Mes an taklow a dheu yn-mes a'n ganow a dheu dhiworth an golonn ha henna a wra defola den.

¹⁹Rag dhiworth an golonn y teu drokprederow: denladh, avoutri, dijastita, ladrans, fals dhustuni ha blasfemi.

²⁰An re ma a wra defola den; mes dybri heb golghi diwla ny wra defola den.’

²¹Ha Yesu ow mones alena a omdennas dhe rannvro Tyr ha Sidon.

²²Hag awotta, benyn gananek a dheuth a'n oryon na ha garma, ‘Arloedh, mab Davydh, kemmer truedh ahanav; ow myrgh re beu dalghennys yn trog gans dyowl.’

²³Mes ev ny's gorthybis ger vyth. Ha'y dhyskyblon a dheuth dhodho orth y bysi ha leverel, ‘Gwra hy dannvon yn-kerdh, rag yma hi ow karma war agan lergh.’

²⁴Mes ev a worthybis, ow leverel, ‘Ny veuv vy dannvenys saw dhe dheves kellys chi Ysrael.’

²⁵Mes hi a dheuth ha plegya dhe'n dor a-dheragdho, ow leverel, ‘Arloedh, gweres vy.’

²⁶Mes ev a worthybis, ow leverel, ‘Nyns yw gwiw kemmeres bara an fleghes ha'y dewlel dhe'n keun.’

²⁷Yn-medh hi, ‘Ya, Arloedh, rag ynwedh an keun a dheber an brewyon koedhys dhiworth moes aga mestrysi.’

²⁸Ena Yesu a worthybis, ow leverel dhedha, ‘A venyn, meur yw dha fydh; bedhes dhis kepar dell vynnydh.’ Ha'y myrgh a veu yaghhes a'n keth eur na.

²⁹Ha pan dremenas alena, Yesu a dheuth ryb mor Galile, ha wosa yskynna an menydh ev a esedhas ena.

³⁰Hag y teuth dhodho routhow bras ha gansa tus evredhek, dall, mans, avlavar ha lies huni arall, hag i a's gorras dhe'n leur orth y dreys ev, hag ev a's yaghhas.

³¹Ytho an routh a's teva marth pan welsons an re avlavar ow kewsel, an dus vans yn yagh, ha'n evredhyon ow kerdhes ha'n dhellyon ow kweles; hag i a wormolas Duw Ysrael.

³²Ena Yesu a elwis dhodho y dhyskyblon ha leverel, ‘Yma truedh dhymm a'n routh, rag i dhe vos genev nans yw tri dydh ha nyns eus gansa travyth dhe dhybri; ny vynnav aga dannvon yn-kerdh heb dybri, ma na glamderrons war an fordh.’

³³Ha'n dhyskyblon a leveris dhodho, ‘A-ble kevyn bara lowr y'n gwylvos may hyllyn maga routh mar vras?’

³⁴Ha Yesu a leveris dhedha, ‘Py lies torth eus genowgh?’ Yn-medhons, ‘Seyth, ha nebes puskes byghan.’

³⁵Hag ev a erghis dhe'n routh esedha war an leur,

³⁶ha wosa ev dhe gemmeres an seyth torth ha'n puskes, ev a ros gras ha'ga therri, ha'ga ri dhe'n dhyskyblon, ha'n dhyskyblon dhe'n routhow.

³⁷Ha peub a dhybris hag a veu lenwys, hag i a guntellas remenant an brewyon, seyth kanstellas leun.

³⁸Ha'n re a dhybris o peswar mil wour, heb rekna benynes ha fleghes.

³⁹Ena ev a dhannvonas an routhow yn-kerdh ha mones a-bervedh y'n gorhel ha mos yn oryon Magadan.[50]