Read Kernewek Matthew 17 Bible Online

Matthew 17 - Kernewek bible

Matthew 17

¹Ha wosa hwegh dydh Yesu a gemmeras Peder ha Jamys ha Yowann y vroder ha'ga hembronk yn-bann yn menydh ughel, aga honan.

²Hag ev a veu treusfigurys a-ragdha, ha'y fas a derlentris avel an howl, ha'y dhillas o mar wynn avel an golow.

³Hag awotta, yth omdhiskwedhas dhedha Moyses hag Elias ow keskewsel ganso.

⁴Ena Peder a worthybis ha leverel dhe Yesu, ‘Arloedh, da yw ni dhe vos omma; mar mynnydh, my[55] a dhrehav omma teyr skovva, onan dhiso jy, onan dhe Moyses hag onan dhe Elias.’

⁵Hag ev ow kewsel, awotta, kommolenn wolow a dewlis skeus warnedha, hag awotta lev yn-mes a'n gommolenn ow leverel, ‘Hemm yw ow Mab karadow, mayth usi ynno ow delit; klewewgh ev.’

⁶Ha'n dhyskyblon pan y'n klewsons a goedhas war aga fas hag own meur a's kemmeras.

⁷Ha Yesu a dheuth hag a's tochyas ha leverel, ‘Sevewgh yn-bann ha na berthewgh own.’

⁸Ha pan dhrehevsons aga dewlagas, ny welsons denvyth, saw Yesu yn unnsel.

⁹Ha pan esens ow tiyskynna dhiworth an menydh, Yesu a erghis dhedha ow leverel, ‘Na dherivewgh an welesigeth dhe dhenvyth bys pan vo Mab an den drehevys dhiworth an re varow.’

¹⁰Ha'y dhyskyblon a wovynnas orto ow leverel, ‘Prag ytho y lever an skribys bos res dhe Elias dos kynsa?’

¹¹Ev a worthybis ha leverel, ‘Elias dhe wir a wra dos kynsa ha restorya pup-tra;

¹²mes my a lever dhywgh, Elias yw devedhys seulabrys ha'n dus ny wrug y aswonn mes y hwrussons orto kepar dell vynnens. Y'n keth vaner na y hwra Mab an den godhevel dredha.’

¹³Ena an dhyskyblon a gonvedhas ev dhe gewsel orta a-dro dhe Yowann Besydhyer.

¹⁴Ha pan ens i devedhys dhe'n routh, y teuth dhodho unn den, neb a goedhas war benn-dewlin a-dheragdho

¹⁵ha leverel, ‘Arloedh, kemmer truedh a'm mab, rag ev yw loerek hag ev a wodhev yn tynn; rag menowgh ev a goedh yn tan ha menowgh yn dowr.

¹⁶Ha my a'n dros ev dhe'th dyskyblon ha ny allsons y yaghhe.’

¹⁷Ha Yesu a worthybis ha leverel, ‘A henedh diskryjyk ha kammhynsek, pes termyn y fydhav genowgh? Pes termyn y res dhymm agas perthi? Dro ev omma dhymmo.’

¹⁸Ha Yesu a'n keredhis, ha'n jowl eth yn-mes anodho, ha'n flogh a veu yaghhes a-dhia'n keth eur na.

¹⁹Ena an dhyskyblon a dheuth dhe Yesu yn priva ha leverel, ‘Prag na yllsyn ni y dewlel yn-mes?’

²⁰Yn-medh Yesu dhedha, ‘Drefenn agas boghes fydh;[56] rag yn hwir y lavarav dhywgh, mars eus genowgh fydh kemmys ha hasenn kedhow, hwi a lever dhe'n menydh ma, “Ty bydh removyes alemma yn-hons”, ha removyes vydh; ha travyth ny vydh dres agas galloes.

²¹Mes an eghenn ma nyns yw tewlys yn-mes saw dre bysadow ha penys.’[57]

²²Ha pan ens i omguntellys war-barth yn Galile, Yesu a leveris dhedha, ‘Mab an den a vydh delivrys yntra diwla tus,

²³hag i a'n ladh, hag y'n tressa dydh ev a vydh drehevys.’ Hag yth ens i trist dres musur.

²⁴Pan vons i devedhys dhe Kapernaum, kuntelloryon mona trubyt an tempel[58] a dheuth dhe Peder ha leverel, ‘A ny wra agas Mester tyli an trubyt?’

²⁵Yn-medh ev, ‘Gwra.’ Hag ev eth a-bervedh y'n chi, mes kyns ev dhe gewsel, Yesu a leveris, ‘Fatell hevel dhiso Simon? Piw dhiworto y kemmer myghternedh an bys tollow po trubyt, dhiworth aga mebyon aga honan po dhiworth estrenyon?’

²⁶Hag ev ow korthybi,[59] ‘Dhiworth estrenyon’, Yesu a leveris dhodho, ‘Kwit ytho yw an fleghes.

²⁷Mes, ma na wryllyn aga sklandra, ty gwra mos dhe'n mor ha tewl higenn ha kemmer an kynsa pysk a dheu yn-bann. Wosa ty dhe igeri y anow y kevydh grot.[60] Kemmer henna ha ro dhedha ragov vy ha ragos jy.’