Read Kernewek Matthew 2 Bible Online

Matthew 2 - Kernewek bible

Matthew 2

¹Ha pan veu Yesu genys yn Bethlehem Yudi yn dydhyow myghtern Herod, awotta, tus fur a dheuth dhiworth an howldrevel dhe Yerusalem,

²ow leverel, ‘Ple'ma ev yw genys Myghtern an Yedhewon? Rag ni a welas y sterenn y'n howldrevel hag yth on ni devedhys dh'y wordhya.’

³Pan wrug myghtern Herod klewes hemma, ev a veu troblys, hag oll Yerusalem ganso,

⁴ha wosa kuntell oll an bennoferysi ha skribys an bobel war-barth, ev a wovynnas orta ple fe Krist genys.

⁵Hag i a'n gorthybis, ‘Yn Bethlehem Yudi; rag yndellma y feu skrifys gans an profoes:

⁶“Ha ty, Bethlehem, pow Yuda, nyns os mann an lyha yn mysk gwelhevin Yuda, rag yn-mes ahanas y teu hembrenkyas neb a wra bugelya ow fobel Ysrael.” ’

⁷Ena Herod, wosa gelwel an dus fur yn privedh, a wovynnas orta an termyn poran mayth omdhiskwedhas an sterenn.

⁸Hag ev a's dannvonas dhe Bethlehem, ha leverel, ‘Ewgh ha hwilewgh yn tiwysyk derivadow a-dro dhe'n flogh; ha pan y'n kevsowgh, dannvenewgh derivadow dhymm, mayth ylliv vy ynwedh dh'y wordhya.’

⁹Ha wosa klewes an myghtern yth ethons yn-kerdh, hag awotta'n sterenn a welsons y'n howldrevel ow mos a-dheragdha bys pan dheuth ha sevel a-ugh an tyller mayth esa an flogh.

¹⁰Ha pan welsons an sterenn, i a lowenhas gans joy meur dres eghenn.

¹¹Ha devedhys y'n chi i a welas an flogh gans Maria y vamm, hag i a goedhas dhe'n dor ha'y wordhya; hag owth igeri aga thresoryow, i a brofyas rohow dhodho, owr ha frankynkys ha myrr.

¹²Ha gwarnyes dre hunros na wrellens dehweles dhe Herod, i a omdennas dh'aga fow war fordh arall.

¹³Wosa i dhe vos gyllys yn-kerdh, otta, el an Arloedh a omdhiskwedhas dhe Yosep dre hunros, ow leverel, ‘Sav yn-bann ha kemmer an flogh ha'y vamm ha fi dhe Ejyp ha bydh ena erna leverriv dhis; rag Herod a vynn hwilas an flogh rag y dhistrui.’

¹⁴Ena ev a sevis yn-bann ha kemmeres an flogh ha'y vamm yn nos ha mos dhe Ejyp,

¹⁵hag yth esa ev ena bys vernans Herod, rag may fe kollenwys an dra kewsys gans an Arloedh der an profoes, ow leverel, ‘Yn-mes a Ejyp my re elwis ow mab.’

¹⁶Ena Herod ow kweles ges dhe vos gwrys anodho gans an dus fur o meur serrys hag a dhannvonas ha ladha oll an fleghes esa yn Bethlehem hag yn oll an pow a-dro, a dhew vloedh ha le ages henna, herwydh an termyn a dhys'sa gans an dus fur.

¹⁷Y'n eur na y feu kollenwys an dra kewsys gans Yeremia an profoes, ow leverel,

¹⁸‘Lev a veu klewys yn Rama, oelva ha galarow tynn, Raghel owth oela rag hy fleghes ha ny vynna bos konfortys, rag gyllys yns i.’[5]

¹⁹Wosa Herod dhe verwel, awotta, el a'n Arloedh a omdhiskwedhas dhe Yosep dre hunros yn Ejyp,

²⁰ow leverel, ‘Sav yn-bann, ha kemmer an flogh ha'y vamm ha ke dhe bow Ysrael; rag marow yw an re a hwila bewnans an flogh.’

²¹Hag ev a sevis ha kemmeres an flogh ha'y vamm hag a dheuth dhe bow Ysrael.

²²Mes pan glewas bos Arghelaus ow reynya yn Yudi yn le y das Herod own a'n jevo a vones dhi, ha wosa bos gwarnys dre hunros ev a omdennas dhe'n rannvro Galile,

²³hag ev eth dhe driga yn sita gelwys Nazareth may fe kollenwys an dra kewsys gans an profoes, ‘Ev a vydh henwys Nazaren.’