Read Kernewek Matthew 22 Bible Online

Matthew 22 - Kernewek bible

Matthew 22

¹Ha Yesu a worthybis, ow kewsel dhedha arta dre barabolennow, ow leverel,

²‘Gwlaskor nev yw hevelebys dhe unn myghtern a wrug goel demmedhyans dh'y vab.

³Hag ev a dhannvonas y gethwesyon dhe dhri an dus gelwys dhe dhos dhe'n demmedhyans, mes i ny vynnens dos.

⁴Arta ev a dhannvonas kethwesyon erell, ow leverel, “Derivewgh dhe'n dus a veu gelwys, Awotta, my re bareusis ow hevewi, ledhys yw ow oghen ha'm lodhnow peskys; pup-tra oll yw parys; dewgh dhe'n demmedhyans.”

⁵Mes i a skonyas a wul henna ha mones yn-kerdh y hwrussons, onan dh'y vargen-tir, hag arall dh'y negys.

⁶Ha'n re erell a dhalghennas y gethwesyon hag a's tebeldhyghtyas ha'ga ladha.

⁷Ha'n myghtern a sorras hag a dhannvonas y luyow dhe dhiswul an dhenledhysi na hag a loskas aga sita.

⁸Ena yn-medh ev dh'y gethwesyon, “An demmedhyans yw parys, mes nyns o gwiw an dus a via gelwys.

⁹Kewgh ytho dhe'n fordhow-meur ha myns a dhyerbynnowgh, gelwewgh i dhe'n demmedhyans.”

¹⁰Hag yth eth an gethwesyon na yn-mes dhe'n fordhow ha kuntell oll an dus a wrussons aga dyerbynna, an re dhrog ha da kekeffrys; ha'n demmedhyans a veu lenwys a westoryon.

¹¹‘Ha'n myghtern pan dheuth a-ji dhe vires orth an westoryon, a welas unn den ena nag esa warnodho gwisk demmedhyans,

¹²hag yn-medh ev dhodho, “Koweth, fatell dheuthys omma heb gwisk demmedhyans?” Ha tewel a wrug an den.

¹³Ena yn-medh an myghtern dhe'n servysi, “Kelmewgh y dhewdroes ha'y dhiwla ha tewlewgh ev y'n tewolgow pella. Ena y fydh oelva ha skrinva dyns”

¹⁴Rag lies yw gelwys, mes tanow yw an re yw dewisys.’

¹⁵Ena an Fariseow a omdennas ha kemmeres kusul fatell wrellens y vaglenna yn y lavarow.

¹⁶Hag i a dhannvonas dhodho aga dyskyblon gans an Herodyanys, ow leverel, ‘Mester, ni a woer dha vos gwir, hag ow tyski fordh Duw yn gwiryonedh, ha ny'th teur mann a dhenvyth rag ny virydh orth fas tus.

¹⁷Lavar dhyn ytho pyth yw dha vreus: yw lafyl ri trubyt dhe Sesar, po nag yw?’

¹⁸Mes Yesu, ow kodhvos aga droktra a leveris, ‘Prag y'm prevowgh vy, hwi falswesyon?

¹⁹Diskwedhewgh dhymm mona an trubyt.’ Hag i a dhros dhodho dinerenn.

²⁰Hag ev a leveris dhedha, ‘Piw a bew an imaj ma ha'n pennskrifa?’

²¹Yn-medhons dhodho, ‘Sesar.’ Ena yn-medh ev dhedha, ‘Attelewgh ytho dhe Sesar an taklow yw dhe Sesar, ha dhe Dhuw an taklow yw dhe Dhuw.’

²²Henna pan y'n klewsons marth a's teva, hag i a'n gasas ha mos dhe-ves.

²³Y'n keth jydh na y teuth dhodho Sadukeow neb a lever nag eus dasserghyans, hag i a wovynnas orto

²⁴ow leverel, ‘Mester, Moyses a leveris, Mar merow neb den heb bos dhodho fleghes, y koedh dh'y vroder demmedhi y wreg ev ha maga askorr dh'y vroder.

²⁵Yth esa yn agan mysk seyth broder; ha'n kynsa, wosa demmedhi, a verwis heb gasa askorr, hag a asas y wreg dh'y vroder.

²⁶Y'n keth vaner an nessa, ha'n tressa bys y'n seythves.

²⁷Yn tiwettha oll an venyn a verwis.

²⁸Y'n dasserghyans ytho piw a'n seyth a vydh hi an wreg dhodho, rag i oll a's teva hi?’

²⁹Yesu a worthybis ha leverel dhedha, ‘Kammdybi a wrewgh, drefenn na wodhowgh naneyl an skryptors na galloes Duw.

³⁰Rag y'n dasserghyans ny dhemmedhons, ha nyns yns i res yn demmedhyans, mes yth yns i avel eledh Duw[79] yn nev.

³¹Hag a-dro dhe dhasserghyans an re varow, a ny redsowgh an dra derivys dhywgh gans Duw, ow leverel,

³²“My yw Duw Abraham ha Duw Ysak ha Duw Yakob”? Nyns yw ev Duw an re varow saw a'n re vew.’

³³Ha pan glewas an routhow henna, marth a's teva a'y dhyskas.

³⁴Ha'n Fariseow wosa klewes ev dhe wul dhe'n Sadukeow tewel, a omguntellas war-barth,

³⁵hag onan anedha, laghyas, a wovynnas orto, orth y brevi,

³⁶‘Mester, pandra yw an brassa gorhemmynn y'n lagha?’

³⁷Yn-medh ev dhodho, ‘ “Ty a wra kara an Arloedh dha Dhuw gans oll dha golonn ha gans oll dha enev ha gans oll dha vrys.”

³⁸Hemm yw an brassa ha'n kynsa gorhemmynn.

³⁹Ha'n nessa yw haval dhodho, “Ty a wra kara dha gentrevek kepar dell omgerydh dha honan.”

⁴⁰War a'n dhew worhemmynn ma yma oll an lagha ha'n brofoesi ow kregi.’

⁴¹Ha pan veu an Fariseow omguntellys war-barth, Yesu a wovynnas orta

⁴²ow leverel, ‘Pandra dybowgh hwi a-dro dhe'n Krist? Piw dhodho yw ev mab?’ Yn-medhons dhodho, ‘Dhe Davydh.’

⁴³Yn-medh ev dhedha, ‘Fatell ytho y hwra Davydh y'n Spyrys y elwel Arloedh, ow leverel,

⁴⁴“An Arloedh a leveris dhe'm Arloedh, ‘Ty esedh a'n barth dhyghow dhymm erna worriv dha eskerens yn-dann dha dreys’ ”?[80]

⁴⁵Ytho Davydh mara'n gelow “Arloedh”, fatell yw ev y vab?’

⁴⁶Ha ny ylli denvyth leverel ger dhodho yn gorthyp, na ny vedhas denvyth a-dhia'n jydh na govynn orto namoy.