Read Kernewek Matthew 24 Bible Online

Matthew 24 - Kernewek bible

Matthew 24

¹Ena Yesu eth yn-mes a'n tempel, hag yth esa ow mos yn-rag, pan dheuth y dhyskyblon dhe dhiskwedhes dhodho drehevyansow an tempel.

²Hag ev a worthybis ha leverel dhedha, ‘A ny welowgh hwi oll hemma? Yn hwir y lavarav dhywgh, ny vydh gesys omma men war ven na vydh terrys dhe'n dor.’

³Ha pan ova esedhys war an menydh Oliv, y dhyskyblon a dheuth dhodho yn priva ha leverel, ‘Lavar dhyn, p'eur hwyrvydh oll an taklow ma ha py tokyn vydh a'th devedhyans ha diwedh an oes?’

⁴Ha Yesu a worthybis ha leverel dhedha, ‘Bedhewgh war na wrello denvyth agas toella;

⁵rag lies a dheu y'm hanow vy ha leverel, “My yw an Krist”, hag i a wra toella lies.

⁶Hwi a glewvydh a vreselyow ha son a vreselyow; gwaytyewgh na gemmerrowgh own, rag res yw henna dhe hwarvos, mes ny vydh hwath an diwedh.

⁷Rag kenedhel a sev erbynn kenedhel ha gwlaskor erbynn gwlaskor hag y hwyrvydh divoetter ha dorgrysyow[90] yn divers tylleryow.

⁸Mes dalleth gloesow yw henna oll.

⁹‘Ena i a'gas daskorr dhe dorment ha'gas ladha ha hwi a vydh kesys gans oll an kenedhlow, a-barth ow hanow vy.

¹⁰Hag ena lies huni a wra koedha dhe-ves ha trayta ha kasa an eyl y gila.

¹¹Ha lies profoes fals a sev, ha toella lies;

¹²ha rag bos tebelwrians ow moghhe, kerensa lies huni a vydh yeynhes.

¹³Mes neb a dhur bys yn diwedh, ev a vydh selwys.

¹⁴Ha'n aweyl ma a'n wlaskor a vydh pregewthys yn oll an bys yn dustuni dhe oll an kenedhlow, hag ena y teu an diwedh.

¹⁵‘Pan welowgh ytho pyth kasadow an difeythter menegys gans Daniel an profoes ow sevel y'n tyller sans (gwres an redyer konvedhes),

¹⁶ena fies dhe'n menydhyow an re a drig yn Yudi;

¹⁷neb usi war do an chi na wres diyskynna rag kyrghes neppyth yn-mes a'y ji,

¹⁸ha neb eus y'n gwel na wres dehweles arta rag kyrghes y vantell.

¹⁹Ha go-i an re gans flogh y'n dorr, ha neb a re an vronn y'n dydhyow na.

²⁰Pysiwgh na vo agas fo yn gwav po y'n sabot.

²¹Rag y'n prys na y fydh anken tynn, a'n par na hwarva a-dhia dhalleth an norvys bys y'n jydh hedhyw, na nevra ny vydh.

²²Ha mar ny ve an dydhyow na gwrys kott, ny via kig vyth selwys; mes rag an re dhewisys an dydhyow na a vydh gwrys kott.

²³Ena mar lever nebonan dhywgh, “Ottomma an Krist”, py “Ottena ev”, na'n krysiwgh.

²⁴Rag fals Kristow ha fals profoesi a sev ow kul toknys bras hag anethow, rag toella, mara kyllir, an re dhewisys.

²⁵Otta, my re'gas gwarnyas a-rag dorn.

²⁶Mar leverons dhywgh ytho, “Ottava y'n gwylvos”, nag ewgh dhe-ves; po “Ottava y'n chambouryow a-bervedh”, na grysiwgh henna.

²⁷Rag kepar dell dheu an lughesenn yn-mes a'n howldrevel ha golowi bys y'n howlsedhes, yndella y fydh devedhyans Mab an den.

²⁸Pyle pynag a vo an korf marow, ena yth omguntell an eryon.

²⁹‘A-dhihwans war-lergh galar an dydhyow na an howl a vydh tewlhes, ha'n loer ny re hy golow, an ster a goedh war-nans a'n nev, ha nerthow an nevow a vydh kryghyllys.

³⁰Hag ena yth omdhiskwa tokyn Mab an den yn nev, hag ena pub loeth a'n bys a wra kyni, hag i a wel “Mab an den ow tos war gommol an nev” gans galloes ha golewder meur;

³¹hag ev a dhannvon y eledh gans son bras a hirgorn, hag i a guntell war-barth y bobel dhewisys, yn-mes a'n peswar gwyns dhiworth a'n eyl penn a'n nevow dh'y gila.

³²‘Dyskewgh parabolenn dhiworth an figbrenn; kettell vo y skorrenn medhel, ha gorra del yn-mes, hwi a woer bos yn ogas an hav;

³³yndella hwi ynwedh, pan welowgh oll an taklow ma, hwi a woer ev dhe vos ogas, orth an darasow.

³⁴Yn hwir y lavarav dhywgh, ny dremen an henedh ma erna vo oll an taklow ma gwrys.

³⁵Nev ha nor a dremen dhe-ves, mes ow geryow vy, ny dremenons dhe-ves.

³⁶‘Mes a-dro dhe'n jydh na ha'n eur, ny woer denvyth, naneyl eledh an nevow, na'n Mab,[91] saw unnsel an Tas.

³⁷Rag kepar dell vedha hi yn dydhyow Noy, yndella y fydh devedhyans Mab an den.

³⁸Rag kepar dell esens, y'n dydhyow na kyns an liv, ow tybri hag owth eva, ow temmedhi hag ow ri yn demmedhyans, bys y'n jydh mayth eth Noy a-ji dhe'n gorhel,

³⁹ha ny wodhyens travyth bys pan dheuth an liv hag a's skubas dhe-ves yn kettep penn: yn kettella y fydh devedhyans Mab an den.

⁴⁰Ena y fydh dewdhen y'n gwel, an eyl a vydh kemmerys ha'y gila gesys;

⁴¹diw venyn ow melyas orth an velin, an eyl a vydh kemmerys ha gesys hy ben.

⁴²Gwrewgh goelyas ytho rag ny wodhowgh py dydh y teu agas Arloedh.

⁴³Mes godhvydhewgh hemma: mar kodhve mester an chi yn py goel y to an lader, y fia ow koelyas ha ny wrussa gasa y ji dhe vos terrys.

⁴⁴Rakhenna, bedhewgh hwi ynwedh parys, rag y'n eur ma na dybowgh y teu Mab an den.

⁴⁵‘Piw ytho yw an kethwas lel ha fur may ros an mester dhodho charj a'y deylu rag ri dhedha aga boes yn prys ewn?

⁴⁶Gwynn y vys an kethwas na, a wra y arloedh y gavoes ow kul yndella pan dheffo.

⁴⁷Yn hwir y lavarav dhywgh, ev a re dhodho an charj a oll y byth.

⁴⁸Mes mars yw an kethwas na drog, hag a lever yn y golonn, “Delatya a wra ow mester y dhevedhyans”,

⁴⁹hag ena dalleth gweskel y geswesyon, ha dybri hag eva gans an bennow-medhow,

⁵⁰dos a wra mester an kethwas na yn dydh na wayt, hag yn eur na woer.

⁵¹Ev a wra y gessydhya yn tynn[92] hag ordena dhodho le gans an falswesyon. Ena y fydh oelva ha skrinva dyns.