Read Kernewek Matthew 25 Bible Online

Matthew 25 - Kernewek bible

Matthew 25

¹‘Ena y fydh gwlaskor nev hevelebys dhe dheg gwyrghes neb a gemmeras aga lugern ha mos mes dhe dhyerbynna an gour pries.

²Pymp anedha o foll ha pymp o fur.

³An re foll a gemmeras aga lugern heb kemmeres oyl gansa;

⁴mes an re fur a gemmeras oyl yn lestri gans aga lugern.

⁵Ha pan veu an gour pries delatys, i oll a hunas ha koska.

⁶Mes yn hanter nos yth esa garm, “Ottomma an gour pries, ewgh dhe-ves dh'y dhyerbynna.”

⁷Ena oll an gwyrghesow na a dhifunas ha takla aga lugern.

⁸Ha'n re foll a leveris dhe'n re fur, “Rewgh dhyn rann a'gas oyl, rag agan lugern yw difeudhys.”

⁹Mes an re fur a worthybis ha leverel, “Na ren, rag own na vydh oyl lowr dhyn ni ha dhywgh hwi; yn le henna, ewgh dhe'n werthoryon ha prenewgh ragowgh hwi agas honan.”

¹⁰Pan ethons ytho dhe brena, an gour pries a dheuth, ha'n gwyrghesow o parys eth ganso dhe'n demmedhyans ha'n daras a veu degeys.

¹¹Wosa henna, an gwyrghesow erell a dheuth ha leverel, “Arloedh, arloedh, igor dhyn ni.”

¹²Mes ev a worthybis ha leverel, “Yn hwir y lavarav dhywgh, ny wrav vy agas aswonn.”

¹³Goelyewgh ytho, rag ny wodhowgh naneyl an jydh na'n eur may teu Mab an den.[93]

¹⁴‘Rag yth yw avel den ow vyajya yn-kerdh, neb a elwis y gethwesyon ha ri dhedha an charj a'y bythow,

¹⁵hag a ros dhe onan pymp talent,[94] ha dhe onan arall dew, ha dhe arall unn talent, dhe bubonan herwydh y alloes, ha dison yth eth yn-kerdh.

¹⁶Hag ev neb a dhegemmeras an pymp talent eth ha kenwertha gansa hag a wrug prow a bymp moy.

¹⁷Yn kettella y hwrug gwas an dhew dalent prow a dhew moy.

¹⁸Mes ev neb a gavas an unn talent eth ha palas toll y'n dor ha kudha mona y vester.

¹⁹Wosa hirneth, mester an gethwesyon na a dheuth dhe rekna gansa.

²⁰Hag ev neb a gavsa an pymp talent a dheuth yn-rag, hag a dhros pymp talent moy, ow leverel, “Mester, pymp talent ty a res dhymmo; ottomma pymp moy a wrugavy yn prow dhedha.”

²¹Yn-medh y vester dhodho, “Yn ta re wruss'ta, ty gethwas da ha lel, war nebes ty re beu lel, my a re dhis charj a lies tra. Ke dhejy a-bervedh yn lowena dha vester.”

²²Hag ev neb a gavsa an dhew dalent a dheuth yn-rag, hag yn-medh ev, “Mester, ty a ros dhymm dew dalent; ottomma dew dalent moy a wrugavy yn prow dhedha.”

²³Yn-medh y vester dhodho, “Yn ta y hwruss'ta, ty gethwas da ha lel, ty re beu lel war nebes, my a re dhis charj a lies tra. Ke dhejy a-bervedh yn lowena dha vester.”

²⁴Mes pan dheuth yn-rag ev neb a gavsa an unn talent, yn-medh ev, “Mester, my a wodhya ty dhe vos den kales, ow mysi le na wruss'ta gonis has ha kuntell le na wruss'ta tewlel has,

²⁵hag own a'm kemmeras ha mones a wrugavy dhe gudha dha dalent y'n gweres. Ottomma an pyth eus dhiso.”

²⁶Y vester a worthybis ow leverel dhodho, “Ty gethwas drog ha diek, a wodhesta my dhe vysi le na wrussen gonis has, ha dhe guntell le na wrussen tewlel has?

²⁷Y koedhvia dhis ytho gorra ow mona gans an arghansoryon hag yndella pan dhehwellen y kavsen ow fyth arta, gans oker.

²⁸Rakhenna kemmerewgh a-dhiworto an talent ha'y ri dhe neb a'n jeves an deg talent.

²⁹Rag dhe beub a bewvo, y fydh res, hag ev a'n jevydh lanwes; mes neb na bewvo mann, dhiworto ev y fydh kemmerys ynwedh an pyth a bew.

³⁰Ha tewlewgh an kethwas euver y'n tewlder pella; ena y fydh oelva ha skrinva dyns.”

³¹‘Ha Mab an den pan dheu yn y wolewder, hag oll an eledh ganso, ena yth esedh war dron y wolewder.

³²Hag oll an kenedhlow a vydh kuntellys a-dheragdho, hag ev a's rann an eyl dhiworth hy ben kepar dell rann an bugel an deves dhiworth an gever;

³³hag ev a worr an deves a'y barth dhyghow ha'n gever a'n barth kledh.

³⁴Ena y hwra an Myghtern leverel dhe'n re a'y barth dhyghow, “Dewgh, hwi vennigys a'm Tas, eritewgh an wlaskor yw pareusys dhywgh dhiworth gwrians an bys.

³⁵Rag nown a'm beu ha hwi a ros dhymm dhe dhybri, syghes a'm beu ha hwi a ros dhymm dhe eva, estren en vy, ha hwi a'm wolkommas,

³⁶noeth ha hwi a'm dillesas, klav ha hwi a dheuth dhe'm gweles, yn prison hag y teuthewgh dhymm.”

³⁷Ena y hwra an re wiryon gorthybi dhodho ow leverel, “Arloedh, p'eur y'th welsyn nownek ha ri boes dhis, po ow kodhevel syghes ha ri dhis dhe eva?

³⁸Ha p'eur y'th welsyn estren ha'th wolkomma, po noeth ha'th tillasa?

³⁹P'eur y'th welsyn klav po yn prison ha ni a dheuth dhis?”

⁴⁰Hag y hwra an Myghtern gorthybi ow leverel dhedha, “Yn hwir y lavarav dhywgh, par dell y'n gwrussowgh dhe onan a'n lyha a'm breder ma, dhymmo vy y'n gwrussowgh.”

⁴¹‘Ena y hwra ev leverel ynwedh dhe'n re a'n barth kledh, “Kewgh a-dhiworthiv, hwi dus villigys, dhe'n tan heb diwedh yw darbarys dhe'n jowl ha'y eledh.

⁴²Rag nown a'm beu ha ny resowgh dhymm dhe dhybri, syghes a'm beu ha ny resowgh dhymm dhe eva,

⁴³estren en vy ha ny wrussowgh ow wolkomma, noeth ha ny wrussowgh ow dillasa, klav hag yn prison ha ny dheuthewgh dhe'm gweles.”

⁴⁴Ena y hwra i ynwedh gorthybi ow leverel, “Arloedh, p'eur y'th welsyn ow kodhevel nown po syghes; po estren po noeth po klav po prisonys ha ni heb dha servya?”

⁴⁵Ena ev a wra aga gorthybi ow leverel, “Yn hwir y lavarav dhywgh, par dell na'n gwrussowgh dhe onan a'n re lyha ma, dhymmo vy ny'n gwrussowgh.”

⁴⁶Hag yth a an re ma yn-kerdh dhe gessydhyans bys vykken, mes an re wiryon dhe vewnans heb diwedh.’