Read Kernewek Matthew 26 Bible Online

Matthew 26 - Kernewek bible

Matthew 26

¹Ha Yesu, wosa gorfenna oll an lavarow ma, a leveris dh'y dhyskyblon,

²‘Hwi a woer bos an pask wosa dew dhydh, ha Mab an den a vydh daskorrys dhe vos krowsys.’

³Ena an bennoferysi ha henavogyon an bobel a omguntellas war-barth yn palys an arghoferyas, Kayfas henwys,

⁴hag omgusulya fatell wrellens dalghenna Yesu dre doell ha'y ladha.

⁵Mes yth esens ow leverel, ‘A-der y'n dy'goel, ma na hwarvo freudh yn mysk an bobel.’

⁶Ha pan esa Yesu yn Bethani yn chi Simon an klavorek,

⁷unn venyn a dheuth dhodho ha gensi lester alabaster a eli meur y bris, neb a wrug y dhinewi war y benn, hag ev esedhys dhe dhybri.

⁸Pan welas an dhyskyblon henna, serrys ens i, ow leverel, ‘Prag y feu an koll ma?

⁹An eli ma a allsa bos gwerthys a gals a vona ha res dhe'n voghosogyon.’

¹⁰Yesu a gonvedhas henna, hag yn-medh ev, ‘Prag y hwrewgh hwi trobla an venyn? Rag hi re wrug ober da ragov.

¹¹Hwi a gyv an voghosogyon pub eur genowgh, mes my ny'm gevowgh pup-prys.

¹²Rag pan dhiveris hi an eli ma war ow horf hi a'n gwrug rag ow ynkleudhyans.

¹³Yn hwir y lavarav dhywgh, pyle pynag y fo pregewthys an aweyl ma yn oll an bys, y fydh derivys ynwedh an pyth re wrug hi, yn kovadh anedhi.’

¹⁴Ena yth eth onan a'n dewdhek, henwys Yudas Skaryoth, dhe'n bennoferysi

¹⁵ha leverel, ‘Pandra vynnowgh y ri dhymm mara'n daskorrav dhywgh?’ Hag y hwrussons pe dhodho deg bath warn ugens a arghans,

¹⁶hag alena rag yth esa ow hwilas prys gwiw rag y dhaskorr.

¹⁷Hag yn kynsa dydh an bara heb goell, an dhyskyblon a dheuth dhe Yesu ha leverel, ‘Ple fynnydh ni dhe bareusi rag ty dhe dhybri an pask?’

¹⁸Hag yn-medh ev, ‘Ewgh y'n sita dhe neb den ha leverewgh dhodho: “An Mester a lever: Ow thermyn vy yw ogas; my a syns an pask y'th chi gans ow dyskyblon.” ’

¹⁹Ha'n dhyskyblon a wrug kepar dell erghis Yesu dhedha ha pareusi an pask y hwrussons.

²⁰Ha pan o devedhys an gorthugher, ev a esedhas orth an voes gans an dewdhek.[95]

²¹Hag i ow tybri, yn-medh ev, ‘Yn hwir y lavarav dhywgh, onan ahanowgh a wra ow thrayta.’

²²Hag i pur drist a dhallathas leverel dhodho an eyl wosa y gila, ‘Nyns yw my, Arloedh, ywa?’

²³Mes ev a worthybis ha leverel, ‘Neb a drogh y leuv y'n keth tallyour genev vy, henna a wra ow thrayta.

²⁴Yma Mab an den ow mos kepar dell yw skrifys anodho, mes go-ev an den na may ma Mab an den traytys ganso; da via dhodho, byth na ve genys an den na.’

²⁵Yudas, neb a'n traytas, a leveris dhodho, ‘Sur nyns yw vy, Mester?’ Ev a worthybis, ‘Ty re'n leveris.’

²⁶Ha pan esens ow tybri, Yesu a gemmeras bara hag a'n bennigas hag a'n torras ha'y ri dhe'n dhyskyblon, ow leverel, ‘Kemmerewgh, dybrewgh, hemm yw ow horf.’

²⁷Ena ev a gemmeras an[96] hanaf, ha wosa ri grasow ev a'n ros dhedha ow leverel, ‘Evewgh oll hwi a hemma,

²⁸rag hemm yw ow goes a'n kevambos nowydh[97] yw skoellys rag lies dhe dhehwelyans peghosow.

²⁹My a lever dhywgh, ny evav namoy alemma rag a'n frut ma a'n gwinbrenn bys y'n jydh na ma'n evav genowgh nowydh yn gwlaskor ow Thas.’

³⁰Ha wosa i dhe gana hymna yth ethons dhe'n menydh Oliv.

³¹Ena yn-medh Yesu dhedha, ‘Oll hwi a vydh sklandrys ahanav[98] vy y'n nos ma, rag skrifys yw, “My a wra gweskel an bugel ha deves an flokk a vydh skattrys.”

³²Mes wosa my dhe vos drehevys yth av a-dheragowgh dhe Galile.’

³³Peder a worthybis ha leverel dhodho, ‘Mara pydh kettep onan sklandrys ahanas, byth ny vydhav vy sklandrys.’

³⁴Yn-medh Yesu dhodho, ‘Yn hwir y lavarav dhis, y'n nos ma kyns es an kulyek dhe gana, ty a wra ow denagha teyrgweyth.’

³⁵Yn-medh Peder dhodho, ‘Kyn fe res my dhe verwel genes, ny wrav vy dha dhenagha.’ Yndella ynwedh y kewsis oll an dhyskyblon.

³⁶Ena y teuth Yesu gansa dhe le henwys Gethsemane, hag yn-medh ev dhe'n dhyskyblon, ‘Esedhewgh omma, ha my ow mos yn-hons dhe bysi.’

³⁷Ev a gemmeras ganso Peder ha dew vab Zebede hag a dhallathas bos trist hag yn ahwer.

³⁸Ena yn-medh ev dhedha, ‘Leun a dristyns yw ow enev bys yn ankow; gortewgh omma ha goelyewgh genev.’

³⁹Hag ow mones nebes yn-rag, ev a goedhas war y fas ha pysi ow leverel, ‘Ow Thas, mara kyll henna bos, tremenes an hanaf ma dhiworthiv; mes na vo henna herwydh ow bodh vy saw dha vodh tejy.’

⁴⁰Hag ev a dheuth dh'y dhyskyblon ha'ga havoes ow koska, hag yn-medh ev dhe Peder, ‘Ytho, a ny yllsowgh hwi goelya unn our genev?

⁴¹Goelyewgh ha pysiwgh ma na entrowgh yn temptyans; an spyrys dhe wir yw parys fest, mes gwann yw an kig.’

⁴²Arta an nessa gweyth ev a omdennas ha pysi, ow leverel, ‘Ow Thas, mar ny yll hemma[99] tremena heb my dh'y eva, dha vodh re bo gwrys.’

⁴³Ha pan dheuth arta, ev a's kavas ow koska, rag poes o aga dewlagas.

⁴⁴Hag ev a's gasas hag omdenna arta, ha pysi an tressa gweyth ow leverel an keth lavarow arta.

⁴⁵Ena y teuth dhe'n dhyskyblon hag yn-medh ev dhedha, ‘Pesyewgh ow koska lemmyn, ha powesiwgh;[100] otta, ogas yw an eur mayth yw daskorrys Mab an den yntra diwla peghadoryon.

⁴⁶Sevewgh, deun ahanan. Ottomma an den devedhys neb a wra ow thrayta.’

⁴⁷Hag ev hwath ow kewsel, otta, Yudas, onan a'n dewdhek a dheuth, ha ganso routh veur ow toen kledhedhyow ha fustow, dhiworth an bennoferysi ha henavogyon an bobel.

⁴⁸Hag ev neb a'n traytas a ros dhedha tokyn ow leverel, ‘Neb may rov amm dhodho, henna yw ev, settyewgh dalghenn ynno.’

⁴⁹Ha desempis ev eth dhe Yesu ha leverel, ‘Lowena dhis, Mester!’ hag amma dhodho.

⁵⁰Hag yn-medh Yesu dhodho, ‘Koweth, prag y teuthys?’[101] Ena y teuthons yn-rag ha gorra aga diwla war Yesu ha'y dhalghenna.

⁵¹Hag otta, onan a'n re esa gans Yesu, owth ystynn y leuv a dennas y gledha hag a weskis kethwas an arghoferyas ha treghi dhe-ves y skovarn.

⁵²Ena Yesu a leveris dhodho, ‘Gorr dha gledha yn y le arta, rag oll an re a gemmer an kledha, der an kledha y ferwons.

⁵³Po a dybydh jy na allav pysi ow Thas, hag ev a dhannvon dhymm lemmyn moy ages dewdhek lyjyon a eledh?

⁵⁴Fatell allsa an skryptors bos kollenwys ytho, y tal hwarvos yndella?’

⁵⁵Y'n eur na Yesu a leveris dhe'n routhow, ‘A dheuthewgh hwi yn-mes gans kledhedhyow ha fustow dhe'm dalghenna kepar dell ve erbynn lader? Yth en esedhys[102] y'n tempel pub dydh ow tyski ha ny wrussowgh ow dalghenna.

⁵⁶Mes oll hemma yw hwarvedhys may fo kollenwys skrifow an brofoesi.’ Ena oll an dhyskyblon a'n gasas ha fia dhe'n fo.

⁵⁷An re a dhalghennas Yesu a'n dug dhe Kayfas an arghoferyas yn tyller may feu kuntellys war-barth an skribys ha'n henavogyon.

⁵⁸Ha Peder a'n siwyas a-bell bys yn klos an arghoferyas ha wosa ev dhe vones a-bervedh ynno, ev a esedhas gans an withysi rag gweles an dhiwedhva.

⁵⁹Ha'n bennoferysi hag oll an Sanhedrin a hwila fals dhustuni erbynn Yesu rag y worra dhe'n mernans,

⁶⁰mes ny'n kavsons, kyn teuth yn-rag lies fals dhustunier. Wor'tiwedh y teuth dew dhen

⁶¹neb a leveris, ‘An den ma a leveris, “My a yll distrui tempel Duw ha'y dhastrehevel kyns penn trydydh.” ’

⁶²Ena an arghoferyas a sevis yn-bann ha leverel dhodho, ‘A ny worthybydh? Pyth yw an dustuni a dheg an re ma er dha bynn?’

⁶³Mes Yesu a dewis. Hag yn-medh an arghoferyas dhodho, ‘My a wra dha gonjorya re'n Duw bew dhe leverel dhyn mars osta an Krist, Mab Duw.’

⁶⁴Yesu a leveris dhodho, ‘Ty re'n leveris; mes hwath yn-medhav dhywgh, Wosa hemma, hwi a wel Mab an den esedhys a'n barth dhyghow dhe'n galloes hag ow tos war gommol an nev.’

⁶⁵Ena an arghoferyas a skwardyas y dhillas ow leverel, ‘Ev re wrug blasfemi, py edhomm eus dhyn a voy a dhustunioryon? Otta, hwi re glewas an blasfemi.

⁶⁶Pandr'a dybowgh?’ I a worthybis ow leverel, ‘Gwiw yw dhe verwel.’

⁶⁷Ena i a drewas yn y fas ha'y weskel; ha re anedha orth y gronkya

⁶⁸a leveris, ‘Ty Krist, gwra profoesa piw a'th weskis.’

⁶⁹Ha Peder o esedhys dhe-ves y'n klos; hag unn vaghteth a dheuth dhodho ha leverel, ‘Ty ynwedh, yth esesta gans Yesu a Alile.’

⁷⁰Mes ev a'n naghas a-dherag peub ow leverel, ‘Ny wonn pandr'a gewsydh.’

⁷¹Ha wosa ev dhe vones yn-mes dhe'n porth, maghteth arall a'n gwelas hag a leveris dhe'n re esa ena, ‘Yth esa hemma ynwedh[103] gans Yesu a Nazareth.’

⁷²Hag arta ev a'n denaghas gans ti, ‘Ny aswonnav an den.’

⁷³Pols byghan wosa henna an re ow sevel ena a dheuth ha leverel dhe Peder, ‘Dhe wir ty ynwedh yw onan anedha, rag dha rannyeth a wra dha dhiskudha.’

⁷⁴Ena y tallathas mollethi ha lia, ‘Ny aswonnav an den.’ Ha desempis an kulyek a ganas.

⁷⁵Ha Peder a borthas kov a eryow Yesu, kewsys dhodho, ‘Kyns es an kulyek dhe gana ty a'm denagh teyrgweyth.’ Hag ev eth dhe-ves hag a oelas yn hwerow.