Read Kernewek Matthew 28 Bible Online

Matthew 28 - Kernewek bible

Matthew 28

¹Wosa an sabot, ha'n kynsa dydh a'n seythun ow tardha, Maria Magdalena ha'n Varia arall a dheuth dhe vires orth an bedh,

²hag otta, yth esa dorgrys meur; rag el an Arloedh, diyskynnys a nev, a dheuth, hag ev a rolyas dhe-ves an men hag esedha warnodho.

³Y semlans o avel lughes, ha'y wisk gwynn avel an ergh.

⁴Ha'n withysi, rag own anodho, a grenas ha gyllys ens avel tus varow.

⁵Mes an el a worthybis, ha leverel dhe'n benynes, ‘Na berthewgh own, rag my a woer hwi dhe hwilas Yesu neb a veu krowsys.

⁶Nyns usi omma; rag drehevys yw dell leveris ev. Dewgh, gwelewgh an tyller mayth esa[112] ow krowedha.

⁷Ha kewgh dihwans dhe dherivas dh'y dhyskyblon y vos drehevys a'n re varow, hag otta, yma ev ow mones a-dheragowgh dhe Galile, ena hwi a wra y weles. Otta, my re'n derivas dhywgh.’

⁸Hag i a omdennas uskis dhiworth an bedh gans own ha lowena veur, ha poenya dhe ri derivadow dh'y dhyskyblon.

⁹Hag awotta Yesu a wrug aga dyerbynna ow leverel, ‘Lowena dhywgh.’ Ha pan dheuthons dhodho i a dhalghennas y dreys ha plegya dhe'n leur a-dheragdho.

¹⁰Ena yn-medh Yesu dhedha, ‘Na berthewgh own; kewgh, leverewgh dhe'm breder mos yn-kerdh dhe Galile, hag ena i a'm gwel.’

¹¹Hag i ow mos yn-rag, otta, re a'n withysi a dheuth dhe'n sita ha derivas dhe'n bennoferysi pup-tra oll a hwarva.

¹²Ha wosa i dhe omguntell war-barth gans an henavogyon hag omgusulya, i a ros meur a vona dhe'n soudoryon

¹³hag yn-medhons, ‘Leverewgh, “Y dhyskyblon a dheuth y'n nos ha'y ladra pan esen ni ow koska.”

¹⁴Ha mara teffa an derivadow ma dhe glew an governour, ni a'n perswad, ha'gas gwitha saw.’

¹⁵I a gemmeras an mona ha gul kepar dell veu dyskys dhedha. Ha'n hwedhel ma yw kyhwedhlys yn mysk an Yedhewon bys y'n jydh hedhyw.

¹⁶Ha'n unnek dyskybel eth dhe Galile, dhe'n menydh a wrug Yesu y apoyntya dhedha.

¹⁷Ha pan y'n gwelsons, i a'n gordhyas, mes re a dhoutyas.[113]

¹⁸Ha Yesu a dheuth, ha kewsel dhedha, ow leverel, ‘Pub galloes yn nev ha war an nor re beu res dhymm.

¹⁹Ewgh ytho ha gwra dhe oll an kenedhlow bos dyskyblon, orth aga besydhya yn hanow an Tas, ha'n Mab, ha'n Spyrys Sans,

²⁰ha'ga dyski dhe witha pup-tra oll a worhemmynnis vy dhywgh; hag awotta, yth esov genowgh pup-prys bys worfenn bys.’[114]