Read Kernewek Matthew 5 Bible Online

Matthew 5 - Kernewek bible

Matthew 5

¹Ha pan welas an routhow, ev a yskynnas dhe'n menydh, ha wosa ev dhe esedha y dhyskyblon a dheuth dhodho;

²hag ev a igoras y anow ha'ga dyski, ow leverel,

³‘Gwynn aga bys an re yw boghosek yn spyrys, rag dhedha i yw gwlaskor nev.

⁴‘Gwynn aga bys an re usi ow kalari, rag i a vydh konfortys.

⁵‘Gwynn aga bys an re yw klor, rag i a erit an norvys.

⁶‘Gwynn aga bys an re a berth nown ha syghes ow yeuni war-lergh ewnder, rag i a vydh lenwys.

⁷‘Gwynn aga bys an re yw tregeredhus, rag i a gyv tregeredh.

⁸‘Gwynn aga bys an re pur aga holonn, rag i a wel Duw.

⁹‘Gwynn aga bys gwrioryon kres, rag i a vydh gelwys fleghes Duw.

¹⁰‘Gwynn aga bys an re helghys drefenn ewnder, rag dhedha i yw gwlaskor nev.

¹¹‘Gwynn agas bys pan y'gas despityons ha'gas helghya ha leverel pub eghenn a dhrog gans gow er agas pynn a-barth dhymmo vy.

¹²Lowenhewgh ha bedhewgh pur heudhik, rag meur yw agas gober y'n nevow, rag yndella y hwrussons helghya an brofoesi neb a veu kyns agas prys hwi.

¹³‘Hwi yw hoelan an bys; mes mar kollas an hoelan y vlas, py ganso y fydh ev sellys? Nyns yw 'vas na fella dhe dravyth marnas dhe vos tewlys dhe-ves ha trettys gans tus.

¹⁴‘Hwi yw golow an bys. Ny yll bos kudhys sita a vo settys war venydh;

¹⁵na ny wra tus enowi lugarn ha'y gorra yn-dann vushel, mes war an kantolbrenn, ha hi a re golow dhe gemmys a vo y'n chi.

¹⁶Yndella re derlentro agas golow a-rag tus may hwellons agas oberow da ha gordhya agas Tas eus y'n nevow.

¹⁷‘Na dybewgh my dhe vos devedhys rag diswul an lagha na'n brofoesi; ny dheuth vy dhe dhiswul saw dhe gollenwel.

¹⁸Rag yn hwir my a lever dhywgh, bys pan dremenno nev ha nor, ny dremen unn jet na banna dhiworth an lagha erna vo kowlwrys pup-tra oll.

¹⁹Rakhenna piwpynag a dorro onan a'n gorhemmynnow lyha ma ha dyski dhe dus gul yndella, ev a vydh gelwys an lyha yn gwlaskor nev, mes piwpynag a's gwrello ha'ga dyski, an keth den na a vydh gelwys meur yn gwlaskor nev.

²⁰Rag my a lever dhywgh, marnas agas ewnder a vo moy ages henna a'n skribys ha'n Fariseow, ny wrewgh mos a-bervedh yn gwlaskor nev.

²¹‘Hwi re glewas bos leverys dhe dus an termyn koth, Na ladh; ha piwpynag a lattho yma yn peryll a vreusyans.

²²Mes my a lever dhywgh, Piwpynag a sorro orth y vroder heb ken[6] dhe vos yn peryll a vreusyans, ha piwpynag a lavarro dh'y vroder, “Raka”,[7] dhe vos yn peryll a'n Sanhedrin; mes piwpynag a lavarro, “Ty foll” dhe vos yn peryll a dan ifarn.[8]

²³Ytho mars esos ow profya dha ro dhe'n alter hag ena ty a berth kov bos gans dha vroder neppyth er dha bynn,

²⁴gas ena dha ro a-dherag an alter, ha ke yn-kerdh; kyns oll, bydh unnverhes gans dha vroder hag ena deus dhe offrynna dha ro.

²⁵Bydh unnverhes gans dha eskar toeth da ha ty ow kerdhes war an fordh war-barth ganso, rag own dha eskar dhe'th taskorr dhe'n breusydh ha'n breusydh dha dhaskorr dhe'n gwithyas ha ty dhe vos tewlys yn prison.

²⁶Yn hwir y lavarav dhis, ny wre'ta dos yn-mes alena bys may tylli an ferdhynn[9] diwettha.

²⁷‘Hwi re glewas bos leverys, “Na wra avoutri.”

²⁸Mes my a lever dhywgh, Neb a vir orth benyn gans drokhwans re wrug avoutri seulabrys gensi yn y golonn.

²⁹Ha dha lagas dyghow mar kwra dha sklandra, tenn e mes ha towl e dhiworthis; rag y fydh dhe les dhis onan a'th eseli dhe vos dhe goll, ha na vo tewlys oll dha gorf yn ifarn;[10]

³⁰ha mar kwra dha leuv dhyghow dha sklandra, trogh hi dhe-ves ha towl hi dhiworthis, rag y fydh dhe les dhiso onan a'th eseli dhe vos dhe goll, ha na vo tewlys oll dha gorf yn ifarn.[11]

³¹‘Ynwedh y feu leverys, “Neb a worro dhe-ves y wreg, gwres ev ri dhedhi skrifedh didhemmedhyans.”

³²Mes my a lever dhywgh, Piwpynag a worro dhe-ves y wreg marnas dijastita, ev a's gwra avoutres; ha neb a dhemmettho benyn dhidhemmedhys, ev a wra avoutri.

³³‘Arta, hwi re glewas bos leverys dhe dus an termyn koth, “Na dorr dha di, mes ty a dal kewera tiow gwrys dhe'n Arloedh.”

³⁴Mes my a lever dhywgh, Na wrewgh tiow mann: naneyl re'n nev, rag esedh Duw ywa,

³⁵na re'n dor, rag skavell y dreys yw ev, na re Yerusalem, rag sita an Myghtern meur yw hi,

³⁶naneyl na wra ti re'th penn, rag ny yll'ta gul dhe unn vlewenn bos naneyl gwynn na du.

³⁷Mes bedhes agas lavar, Yw, yw, Nag yw, nag yw; ha pup-tra oll eus pella es henna, a'n tebel el[12] ywa.

³⁸‘Hwi re glewas bos leverys, “Lagas rag lagas ha dans rag dans.”

³⁹Mes my a lever dhywgh, Na sevewgh erbynn neb yw drog, saw piwpynag a'th wysk war dha vogh dhyghow, treyl dhodho hy ben ynwedh;

⁴⁰ha mar mynn nebonan dha siwya dre lagha ha doen dha bows dhiworthis, ro dhodho dha vantell ynwedh;

⁴¹ha neb a'th konstrynno dhe lavurya unn mildir, ke ganso dew.

⁴²Ro dhe neb a wovynno orthis, ha na wra omdenna dhiworth an den a vynnsa chevisya ahanas.

⁴³‘Hwi re glewas bos leverys, “Ty gwra kara dha gentrevek ha kasa dha eskar.”

⁴⁴Mes my a lever dhywgh, Kerewgh agas eskerens ha pysiwgh rag an re a wra agas helghya,

⁴⁵may hallowgh hwi bos mebyon agas Tas eus y'n nevow, rag ev a wra dh'y howl drehevel keffrys war an re dhrog ha'n re dha, hag a dhannvon an glaw war an re ewnhynsek ha'n re gammhynsek.

⁴⁶Rag mar kerewgh an re usi orth agas kara hwi, pana wober a'gas bydh? A ny wra ynwedh an dolloryon an keth tra?

⁴⁷Ha mar ny salusewgh marnas agas breder, pandra moy a wrewgh hwi es dell wra tus erell? A ny wra ynwedh an Jentilys[13] an keth tra?

⁴⁸Rakhenna, bedhewgh hwi perfydh kepar dell yw agas Tas a nev perfydh.